ଇମ୍ଫାଲ : ମଣିପୁର ହିଂସାରେ ମୋଟ୍ ୫୪ ଜଣଙ୍କ ମୃତ୍ୟୁ ହୋଇଛି। ସରକାରୀ ଅଧିକାରୀଙ୍କ ସୂତ୍ରରୁ ଏହି ତଥ୍ୟ ମିଳିଛି। କିନ୍ତୁ ବେସରକାରୀ ଭାବେ ମଣିପୁର ହିଂସା ଜନିତ ମୃତ୍ୟୁସଂଖ୍ୟା ବହୁତ ଅଧିକ ହେବ। ଇତି ମଧ୍ୟରେ ଇମ୍ଫାଲରେ ଶାନ୍ତି ଫେରିଛି ଏବଂ ଜୀବନ ସ୍ବାଭାବିକ ହୋଇଛି। ଶନିବାର ଦିନ ଇମ୍ଫାଲରେ ଦୋକାନ ବଜାର ଖୋଲିଛି। ରାସ୍ତାରେ ଗାଡ଼ି ମୋଟର ଗଡ଼ିଛି। ସମସ୍ତ ପ୍ରମୁଖ ରାସ୍ତା ଗୁଡ଼ିକରେ ଏବେ ବି କଡ଼ା ସୁରକ୍ଷା ମୁତୟନ ହୋଇଛି। ସୁରକ୍ଷାକର୍ମୀଙ୍କ ଉପସ୍ଥିତିରେ ଲୋକମାନେ ଅତ୍ୟାବଶ୍ୟକ ଜିନିଷ କିଣିବାପାଇଁ ଘରୁ ବାହାରକୁ ବାହାରିଛନ୍ତି। ମିଳିଥିବା ସୂଚନାନୁଯାୟୀ ମଣିପୁର ହିଂସାରେ ପ୍ରାଣ ହାରିଥିବା ମୋଟ୍ ୫୪ ଜଣଙ୍କ ମଧ୍ୟରୁ ୧୬ ଜଣଙ୍କ ମର ଶରୀରକୁ ଚୁରାଚାନ୍ଦପୁର ଜିଲ୍ଲା ହସ୍ପିଟାଲର ଶବଗୃହରେ ରଖାଯାଇଛି। ୧୫ ଶବକୁ ଜବାହରଲାଲ୍ ନେହୀରୁ ଇନଷ୍ଟିଚ୍ୟୁଟ ଅଫ ମେଡିକାଲ ସାଇନ୍ସରେ ରଖାଯାଇଛି। ଲାମ୍ଫେଲରେ ୨୩ ଜଣଙ୍କ ମୃତଦେହ ରଖାଯାଇଛି। ସେନା ଦ୍ବାରା ୧୩ ହଜାର ଲୋକଙ୍କୁ ସୁରକ୍ଷିତ ସ୍ଥାନରେ ରଖାଯାଇଛି। ଗୁଳିମାଡ଼ର ଶିକାର ହୋଇଥିବା ଅନେକ ଲୋକ ଏବେ ଚିକିତ୍ସାଧୀନ ଅଛନ୍ତି। ସେନା ଏବଂ ଆସାମ ରାଇଫଲ୍ସର ପ୍ରାୟ ୧୦ ହଜାର ସୈନିକ ମଣିପୁରରେ ମୁତୟନ ହୋଇଛନ୍ତି।
Comments are closed.