ମଣିପୁରକୁ ସମସ୍ତ ଟ୍ରେନ୍‌ ଚଳାଚଳ ବନ୍ଦ

ଇମ୍ଫାଲ : ମଣିପୁରରେ ଆଦିବାସୀ ଓ ଅଣଆଦିବାସୀଙ୍କ ମଧ୍ୟରେ ହିଂସା ଜାରି ରହିଛି। ଶତାଧିକ ସ୍ଥାନରେ ବ୍ୟାପକ ହିଂସା ଓ ପୋଡ଼ାଜଳା ସମଗ୍ର ରାଜ୍ୟକୁ ଅଶାନ୍ତ କରିଦେଇଛି। ହିଂସା ଯୋଗୁଁ ମଣିପୁରକୁ ସମସ୍ତ ଟ୍ରେନ୍‌ ଚଳାଚଳ ବନ୍ଦ ରହିଛି। ସ୍ଥିତିରେ ସୁଧାର ନଆସିବା ପର୍ଯ୍ୟନ୍ତ ରାଜ୍ୟକୁ କୌଣସି ଟ୍ରେନ୍‌ ଗଡ଼ିବନି ବୋଲି ଉତ୍ତରପୂର୍ବ ରେଳବାଇ ପକ୍ଷରୁ କୁହାଯାଇଛି। ଇତି ମଧ୍ୟରେ ରାଜ୍ୟରେ ସୁରକ୍ଷା କଡ଼ାକଡ଼ି କରାଯାଇଛି। ଅଧିକ ସେନା ମୁତୟନ ହୋଇଛନ୍ତି।
ତେବେ ସ୍ଥିତି ଏବେ ନିୟନ୍ତ୍ରଣାଧୀନ ରହିଛି ବୋଲି ସେନା ପକ୍ଷରୁ ଏକ ବିବୃତି ଜାରି କରି କୁହାଯାଇଛି। ହିଂସା ପ୍ରଭାବିତ ଅଞ୍ଚଳରୁ ସମସ୍ତ ଲୋକଙ୍କୁ ସୁରକ୍ଷିତ ଉଦ୍ଧାର କରାଯାଇଛି। ହିଂସା ଯୋଗୁ ବିଭିନ୍ନ ସ୍ଥାନରେ କର୍ଫ୍ୟୁ ଓ ୧୪୪ ଧାରା ଜାରି କରାଯିବା ସହ ସମଗ୍ର ରାଜ୍ୟରେ ଇଣ୍ଟରନେଟ୍ ସେବା ବନ୍ଦ ରଖାଯାଇଛି। ଦଙ୍ଗାକାରୀଙ୍କୁ ଦେଖିବା ମାତ୍ରେ ଗୁଳି ନିର୍ଦ୍ଦେଶ ଦିଆଯାଇଛି। ଏ ବାବଦ ସରକାରଙ୍କ ନିଷ୍ପତ୍ତିକୁ ରାଜ୍ୟପାଳ ମଂଜୁରି ଦେଇଛନ୍ତି। ଇତି ମଧ୍ୟ‌ରେ ପ‌ଡ଼ୋଶୀ ରାଜ୍ୟମାନେ ମଣିପୁରରୁ ସେମାନଙ୍କ ନାଗରିକଙ୍କୁ ଉଦ୍ଧାର କାର୍ଯ୍ୟ ଆରମ୍ଭ କରିଛନ୍ତି। ଇତି ମଧ୍ୟରେ କେନ୍ଦ୍ର ଗୃହ ମନ୍ତ୍ରୀ ଅମିତ ଶାହ ସମସ୍ତ ୩ ଉତ୍ତରପୂର୍ବ ରାଜ୍ୟର ମୁଖ୍ୟମନ୍ତ୍ରୀମାନଙ୍କ ସହ କଥା ହୋଇଛନ୍ତି। ଶାହ ମଣିପୁର ଏବଂ କେନ୍ଦ୍ରରେ ବରିଷ୍ଠ ଅଧିକାରୀଙ୍କ ସହ ଉକ୍ତ ପ୍ରସଙ୍ଗରେ ୨ ଥର ବୈଠକ କରିଛନ୍ତି।
ଉଲ୍ଲେଖଯୋଗ୍ୟ ଯେ ଅଲ୍‌ ଟ୍ରାଇବାଲ ଷ୍ଟୁଡେଣ୍ଟ ୟୁନିୟନ ମଣିପୁର (ଏଟିଏସ୍‌ୟୁଏମ୍‌) ଦ୍ବାରା ବୁଧବାର ଦିନ ହୋଇଥିବା‘ଟ୍ରାଇବାଲ ସଲିଡାରିଟି ମାର୍ଚ୍ଚ’ ସମୟରେ ହିଂସା ହୋଇଥିଲା। ରାଜ୍ୟର ସଂଖ୍ୟାଗରିଷ୍ଠ ମୈତେଇ ଜାତିର ଲୋକଙ୍କୁ ଅନୁସୂଚିତ ଜନଜାତି (ଏସ୍‌ଟି) ମାନ୍ୟତା ଦାବି ବିରୋଧରେ ଆଦିବାସୀ ଛାତ୍ର ସଂଗଠନ ପକ୍ଷରୁ ଏହି ଆନ୍ଦୋଳନ ଡାକରା ଦିଆଯାଇଥିଲା। ଚୁରାଚାନ୍ଦପୁରର ତରବୁଙ୍ଗ ଅଞ୍ଚଳରେ ସେମାନେ ମାର୍ଚ୍ଚିଂ କରୁଥିବା ବେଳେ ହିଂସା ହୋଇଥିଲା। ବୁଧବାର ଆଇନଶୃଙ୍ଖଳା ରକ୍ଷା କରିବା ପାଇଁ ସେନା ପକ୍ଷରୁ କାର୍ଯ୍ୟାନୁଷ୍ଠାନ ଆରମ୍ଭ କରାଯାଇଥିଲା।
ପ୍ରତିକାରାତ୍ମକ ପଦକ୍ଷେପ ସ୍ବରୂପ ମଣିପୁର ସରକାର ସାରା ରାଜ୍ୟରେ ଇଣ୍ଟରନେଟ୍ ସେବା ବନ୍ଦ କରିବା ସହ ବିଭିନ୍ନ ଜିଲ୍ଲାରେ ହିଂସାକାଣ୍ଡ ଆରମ୍ଭ ହେବା ପରେ ପରେ କର୍ଫ୍ୟୁ ଓ ୧୪୪ ଧାରା ଜାରି କରାଯାଇଥିଲା। ମଙ୍ଗଳବାର ରାତିରେ ଓ ବୁଧବାର ସେନା ଓ ଆସାମ ରାଇଫଲ୍‌ସ କର୍ମଚାରୀମାନେ ଶାନ୍ତିଶୃଙ୍ଖଳା ରକ୍ଷା କରିଥିଲେ ଏବଂ ଆଜି ସକାଳେ ପୁଣି ଶତାଧିକ ସ୍ଥାନରେ ହିଂସା ଆରମ୍ଭ ହୋଇଯାଇଥିଲା। ହିଂସାପୀଡ଼ିତ ଅଞ୍ଚଳରୁ ୯୦୦୦ରୁ ଅଧିକ ଗ୍ରାମବାସୀଙ୍କୁ ଉଦ୍ଧାର କରି ସେନା ପକ୍ଷରୁ ସୁରକ୍ଷିତ ସରକାରୀ ସ୍ଥାନମାନଙ୍କରେ ରଖାଯାଇଥିଲା।
ଅଣ-ଆଦିବାସୀ ମୈତେଇ ଜାତିର ଲୋକଙ୍କ ଅନୁସୂଚିତ ଜନଜାତି ମାନ୍ୟତା ଦାବିକୁ ବିରୋଧ କରି ଏଟିଏସ୍‌ୟୁଏମ୍‌ ପକ୍ଷରୁ ଟ୍ରାଇବାଲ ସଲିଡାରିଟି ମାର୍ଚ୍ଚ ସମୟରେ ହିଂସା ହୋଇଛି।