ନ୍ୟୁୟର୍କ: ଭାରତ-ପାକ୍ ଯୁଦ୍ଧକୁ ଅଟକାଇବା ନେଇ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଦାବି ଓ ଭାରତର ଅସ୍ବୀକାରକୁ ନେଇ ବିବାଦ ଜାରି ରହିଛି। ଏହି ସମୟରେ ପୁଣିଥରେ ଆମେରିକାର ବିଦେଶ ରାଷ୍ଟ୍ର ସଚିବ ମାର୍କୋ ରୁବିଓ କହିଛନ୍ତି, ଟ୍ରମ୍ପଙ୍କ ହସ୍ତକ୍ଷେପ ଯୋଗୁଁ ଭାରତ-ପାକିସ୍ତାନ ମଧ୍ୟରେ ଆଣବିକ ଯୁଦ୍ଧ ବନ୍ଦ ହୋଇଥିଲା। ଅପରେସନ୍ ସିନ୍ଦୂର ପରେ ଆମେରିକାର ହସ୍ତକ୍ଷେପ ଯୋଗୁ ଏକ ଆଣବିକ ଯୁଦ୍ଧ ବନ୍ଦ ହୋଇଥିବା ଟ୍ରମ୍ପ ଦାବି କରିଆସୁଛନ୍ତି। ଟ୍ରମ୍ପଙ୍କ ଏହି ଦାବିକୁ ପାକିସ୍ତାନ ମଧ୍ୟ ସମର୍ଥନ କରୁଛି। ଏପରିକି ଏହାକୁ ନେଇ ଟ୍ରମ୍ପଙ୍କୁ ନୋବେଲ ଶାନ୍ତି ପୁରସ୍କାର ପ୍ରଦାନ ପାଇଁ ପ୍ରସ୍ତାବ ଦିଆଯାଇଛି। କିନ୍ତୁ ଟ୍ରମ୍ପଙ୍କ ଦାବିକୁ ଭାରତ କ୍ରମାଗତ ଭାବେ ଅସ୍ବୀକାର କରିଛି। ଏହାକୁ ନେଇ ଦୁଇଦେଶ ମଧ୍ୟରେ ଏକ ପ୍ରକାର ଟଣାଓଟରା ଜାରି ରହିଥିବା ବେଳେ ଆଜି ଆମେରିକାର ବିଦେଶ ରାଷ୍ଟ୍ର ସଚିବ ମାର୍କୋ ରୁବିଓ ଟ୍ରମ୍ପଙ୍କ କଥାକୁ ଦୋହରାଇଛନ୍ତି। ଗତକାଲି ରାଷ୍ଟ୍ରପତି ଭବନରେ କ୍ୟାବିନେଟ୍ ବୈଠକ ସମୟରେ ଟ୍ରମ୍ପଙ୍କ ପାର୍ଶ୍ବରେ ବସିଥିବା ରୁବିଓ କହିଥିଲେ, ରାଷ୍ଟ୍ରପତି ଟ୍ରମ୍ପଙ୍କ ନେତୃତ୍ବରେ ଆମେରିକା ଭାରତ-ପାକିସ୍ତାନ ମଧ୍ୟରେ ଯୁଦ୍ଧର ଅବସାନ ଘଟାଇଛି। ଏଥିସହ ଡିମୋକ୍ରାଟିକ୍ ରିପବ୍ଲିକ୍ ଅଫ୍ ଦ କଙ୍ଗୋ ଓ ରୱାଣ୍ଡା ମଧ୍ୟରେ ଶାନ୍ତି ଚୁକ୍ତି, ଇରାନ-ଇସ୍ରାଏଲ ମଧ୍ୟରେ ୧୨ ଦିନର ଯୁଦ୍ଧ ଆମେରିକା ହସ୍ତକ୍ଷେପରେ ଅବସାନ, ଆଜରବାଇଜାନ୍ ଓ ଅର୍ମେନିଆ ମଧ୍ୟରେ ସମ୍ଭାବ୍ୟ ଶାନ୍ତି ଚୁକ୍ତି ସମସ୍ତ ଡୋନାଲ୍ଡ ଟ୍ରମ୍ପଙ୍କ ନେତୃତ୍ବ ଦ୍ବାରା ସମ୍ଭବ ହୋଇଛି ବୋଲି ମାର୍କୋ ରୁବିଓ କହିଥିଲେ।
Comments are closed.