ପାଟନା : ପାଟନା ଜୟପ୍ରକାଶ ନାରାୟଣ ଅନ୍ତର୍ଜାତୀୟ ବିମାନବନ୍ଦରରେ ଏକ ଅଭାବନୀୟ ସ୍ଥିତି ସୃଷ୍ଟି ହୋଇଛି। ବେଙ୍ଗାଲୁରୁରୁ ଆସିଥିବା ଆଇଏକ୍ସ-୨୯୩୬ ଓ ଚେନ୍ନାଇରୁ ଆସିଥିବା ଆଇଏକ୍ସ-୧୬୩୪ ବିମାନର ଅନେକ ଯାତ୍ରୀ ସେମାନଙ୍କ ବ୍ୟାଗ୍, ଓ ଅନ୍ୟ ସାମଗ୍ରୀ ନପାଇ ହଟହଟା ହୋଇଛନ୍ତି। ଶେଷରେ ବିମାନ କର୍ତ୍ତୃପକ୍ଷ ସାମଗ୍ରୀଗୁଡ଼ିକୁ ସେମାନଙ୍କ ଘରେ ପହଞ୍ଚାଇବାକୁ ପ୍ରତିଶ୍ରୁତି ଦେଇଛନ୍ତି। ସୂଚନାନୁଯାୟୀ, ଶନିବାର ପୂର୍ବାହ୍ନ ୮ଟା ୨୩ରେ ଆଇଏକ୍ସ-୨୯୩୬ ଓ ପୂର୍ବାହ୍ନ ୮ଟା ୫୦ରେ ଆଇଏକ୍ସ-୧୬୩୪ ବିମାନ ପାଟନାରେ ପହଞ୍ଚିଥିଲା। ଯାତ୍ରୀମାନଙ୍କୁ ସେମାନଙ୍କ ସାମଗ୍ରୀ ବେଲ୍ଟ ୪ ଓ ୩ରୁ ସଂଗ୍ରହ କରିବାକୁ କୁହାଯାଇଥିଲା। ତେବେ ଦୀର୍ଘ ସମୟ ଅପେକ୍ଷା କରିବା ପରେ ମଧ୍ୟ ଯାତ୍ରୀମାନେ ସେମାନଙ୍କ ସାମଗ୍ରୀ ପାଇନଥିଲେ। ବ୍ୟାଗ୍ ଓ ସାମଗ୍ରୀ ଫେରାଇବାକୁ ଦାବି କରି ହଟ୍ଟଗୋଳ କରିଥିଲେ। ବିମାନଯାତ୍ରା ସୁରକ୍ଷିତ ଓ ଶୃଙ୍ଖଳିତ କରିପାରୁ ନ ଥିବାରୁ ବିମାନ ଚଳାଚଳ ବନ୍ଦ କରିଦିଅନ୍ତୁ ବୋଲି ସ୍ଲୋଗାନ ଦେଇଥିଲେ। ଶେଷରେ ସିଆଇଏସ୍ଏଫ୍ ଓ ବିମାନବନ୍ଦରର ଅନ୍ୟ କର୍ମଚାରୀ ଆସି ବୁଝାସୁଝା କରିଥିଲେ। ବିମାନ କର୍ତ୍ତୃପକ୍ଷ ଯାତ୍ରୀଙ୍କ ବ୍ୟାଗ୍, ସାମଗ୍ରୀକୁ ସେମାନଙ୍କ ଘରେ ପହଞ୍ଚାଇବାର ପ୍ରତିଶ୍ରୁତି ଦେଇଥିଲେ। ଘଟଣା ସମ୍ପର୍କରେ ବେଙ୍ଗାଲୁରୁର ଜଣେ ଯାତ୍ରୀ ବିବେକ ଶର୍ମା କହିଛନ୍ତି, ସେ ଏକ ଘଣ୍ଟା ଧରି ଅପେକ୍ଷା କରିଥିଲେ, କିନ୍ତୁ ସେହି ବେଲ୍ଟି ଖାଲି ରହିଥିଲା। ବିମାନ କାଉଣ୍ଟରରେ ଅନେକ ଥର ପଚାରିବା ପରେ ମଧ୍ୟ କୌଣସି ସ୍ପଷ୍ଟ ଉତ୍ତର ମିଳିପାରିନଥିଲା। ଲଗେଜ୍ରେ ଥିବା ବ୍ୟାଗରେ ଅନେକ ବ୍ୟକ୍ତି ସେମାନଙ୍କ ଔଷଧ ଓ ଅନ୍ୟ ଅତ୍ୟାବଶ୍ୟକ ସାମଗ୍ରୀ ରଖିଥିବାରୁ ଚିନ୍ତାରେ ପଡ଼ିଯାଇଥିଲେ। ଅପରପକ୍ଷରେ, ବିମାନ କମ୍ପାନିର ଜଣେ ଅଧିକାରୀ ନାମ ଗୋପନ ରଖିବା ସର୍ତ୍ତରେ କହିଛନ୍ତି, ଅନେକ ସମୟରେ ‘ଓଜନ ପ୍ରସଙ୍ଗ’କୁ ନେଇ ଏଭଳି ଘଟିଥାଏ।
Comments are closed.