ବୁଲନ୍ଦସହର: ବୁଲନ୍ଦସହର ଜିଲ୍ଲାରେ ‘ଆଶ୍ରମ’ ୱେବ୍ ସିରିଜ୍ ଭଳି ଏକ ମାମଲା ସାମ୍ନାକୁ ଆସିଛି। ଜିଲ୍ଲାର ସିଆନା କୋତୱାଲି ଅଞ୍ଚଳରେ ଥିବା ଆଶ୍ରମର ଜଣେ ବୃଦ୍ଧ ସେବାୟତ ଦୁଇ ନାବାଳିକାଙ୍କୁ ନିଶା ଦେଇ ଦୁଷ୍କର୍ମ କରିଥିଲେ। ଜଣେ ନାବାଳିକା ଗର୍ଭବତୀ ହେବା ପରେ ଏହି ଘଟଣା ସାମ୍ନାକୁ ଆସିଥିଲା। ଏହାପରେ ପରିବାର ଲୋକଙ୍କ ଅଭିଯୋଗକ୍ରମେ ପୁଲିସ ଅଭିଯୁକ୍ତ ସେବାଦାର ୭୫ ବର୍ଷୀୟ ମୋହନଲାଲକୁ ଗିରଫ କରି ଜେଲ୍ ପଠାଇଛି। ମିଳିଥିବା ସୂଚନା ଅନୁଯାୟୀ, ସାଇନା କୋତୱାଲି ଅଞ୍ଚଳର ଏକ ଗାଁ ନିକଟରେ ‘ରାଧାସ୍ୱାମୀ ସତ୍ସଂଗ ବ୍ୟାସ ଆଶ୍ରମ’ ରହିଛି। ଗୋଟିଏ ଗାଁର ଦୁଇଟି ଭିନ୍ନ ଭିନ୍ନ ପରିବାରର ଦୁଇ ଜଣ ଝିଅ ଗୋଟିଏ ଗାଁ ସ୍କୁଲରେ ଷଷ୍ଠ ଓ ଅଷ୍ଟମ ଶ୍ରେଣୀରେ ପଢନ୍ତି। ଝିଅମାନଙ୍କ ଘର ଆଶ୍ରମ ସମ୍ମୁଖରେ। ତେଣୁ ଦୁହେଁ ଆଶ୍ରମ ପରିସରରେ ଖେଳିବାକୁ ଯାଉଥିଲେ। ପରିବାର ଲୋକେ ପୁଲିସ ନିକଟରେ ଦେଇଥିବା ଅଭିଯୋଗରେ କହିଛନ୍ତି ଯେ ଆଶ୍ରମରେ କାର୍ଯ୍ୟରତ ସେବାୟତ ଚକୋଲେଟ୍ ନାଁରେ ଉଭୟ ଛାତ୍ରୀଙ୍କୁ ନିଶା ଦ୍ରବ୍ୟ ଖୁଆଇ ୮ ମାସ ଧରି ଦୁଷ୍କର୍ମ କରି ଆସୁଥିଲା। କିଛି ଦିନ ତଳେ ଜଣେ ଛାତ୍ରୀଙ୍କ ପେଟରେ ଯନ୍ତ୍ରଣା ହେବାରୁ ପରିବାର ଲୋକେ ତାଙ୍କୁ ଡାକ୍ତରଙ୍କ ପାଖକୁ ନେଇଯାଇଥିଲେ। ଅଲଟ୍ରାସାଉଣ୍ଡରୁ ଜଣାପଡ଼ିଲା ଯେ ଛାତ୍ରୀ ଜଣକ ସାଢ଼େ ୪ ମାସର ଗର୍ଭବତୀ। ଏହାପରେ ପରିବାର ଲୋକେ ଝିଅକୁ ପଚାରିବାରୁ ସେ ପୂରା କଥା କହିଥିଲେ। ଏହା ସହ ତାଙ୍କ ସାଙ୍ଗ ମଧ୍ୟ ଆଶ୍ରମକୁ ଯାଉଥିଲେ ବୋଲି ସେ କହିଥିଲେ। ଦ୍ୱିତୀୟ ଝିଅକୁ ତାଙ୍କ ପରିବାର ଲୋକେ ପଚାରିବାରୁ ସେ ମଧ୍ୟ ସେବାୟତଙ୍କ ଦ୍ବାରା ସମାନ ଘଟଣାର ଶିକାର ହୋଇଥିବା କହିଥିଲେ। ଏହାପରେ ଉଭୟ ଛାତ୍ରୀଙ୍କ ପରିବାର ଲୋକେ କୋତୱାଲି ଥାନାରେ ଅଭିଯୋଗ କରିଥିଲେ।
Comments are closed.