ନୂଆଦିଲ୍ଲୀ: ବିହାର ବିଧାନସଭା ନିର୍ବାଚନ ନିମନ୍ତେ ଭାରତୀୟ ନିର୍ବାଚନ ଆୟୁକ୍ତ (ଇସି) ସ୍ବତନ୍ତ୍ର ସଘନ ଭୋଟରତାଲିକା ସଂଶୋଧନ ଅଭିଯାନ (ସାର୍) ଆରମ୍ଭ କରିଛନ୍ତି। ସଂଶୋଧନ ସମୟରେ ଆବଶ୍ୟକ ପ୍ରମାଣପତ୍ର ଦାଖଲ ନକଲେ ତାଲିକାଭୁକ୍ତ ହୋଇପାରିବ ନାହିଁ ବୋଲି ପୂର୍ବରୁ ଇସି ସ୍ପଷ୍ଟ କରିଥିଲେ। ପରେ ବିରୋଧୀ ଦଳର ବିରୋଧ ପରେ ଏହାକୁ କିଛି ପରିମାଣରେ କୋହଳ କରାଯାଇଛି। ଯଦି ବ୍ୟକ୍ତି ଆବଶ୍ୟକ ପ୍ରମାଣପତ୍ର ଦାଖଲ କରିନପାରିଲେ ଭୋଟରତାଲିକା ପଞ୍ଜୀକରଣ ଅଧିକାରୀ (ଇଆର୍ଓ) ଯାଞ୍ଚ କରି ନିଷ୍ପତ୍ତି ନେବେ ବୋଲି ଇସିଙ୍କ ପକ୍ଷରୁ ସଦ୍ୟତମ ବିଜ୍ଞପ୍ତି ଜାରି କରାଯାଇଛି। ‘ସାର୍’ ସମୟରେ ଭୋଟର ନିଜର ଜନ୍ମ ପ୍ରମାଣପତ୍ର, ପାସପୋର୍ଟ, ପରିଚୟପତ୍ର କିମ୍ବା ପେନ୍ସନ୍ ପ୍ରଦାନ ନିର୍ଦ୍ଦେଶ ପତ୍ର, ସ୍ଥାୟୀ ବାସିନ୍ଦା ପ୍ରମାଣପତ୍ର, ଜଙ୍ଗଲ ଅଧିକାରୀ ପ୍ରମାଣପତ୍ର, ଜାତି ପ୍ରମାଣପତ୍ର, ରାଜ୍ୟ ଓ ସ୍ଥାନୀୟ କର୍ତ୍ତୃପକ୍ଷଙ୍କ ଦ୍ବାରା ପ୍ରସ୍ତୁତ ପରିବାର ପଞ୍ଜୀକରଣ, ଜମି ଓ ଘର ପ୍ରଦାନ ପ୍ରମାଣପତ୍ର ଆଦି ୧୧ଟି ପ୍ରମାଣପତ୍ର, ସନନ୍ଦ ମଧ୍ୟରୁ କୌଣସି ଗୋଟିଏ ଦାଖଲ କରିବାକୁ ବାଧ୍ୟତାମୂଳକ ଦର୍ଶାଯାଇଥିଲା। କିନ୍ତୁ ‘ଆଧାର’କୁ ଏଥିରେ ସାମିଲ କରାଯାଇନଥିଲା। ଏହକୁ ନେଇ ଆର୍ଜେଡି, କଂଗ୍ରେସ ଓ ବାମଦଳ ତୀବ୍ର ବିରୋଧ କରିଛନ୍ତି। ବିଜେପି ଜିତିବା ନିଶ୍ଚିତ କରିବାକୁ ଏଭଳି ସଂଶୋଧନ କରାଯାଉଛି ବୋଲି ଅଭିଯୋଗ କରିଛନ୍ତି। ବର୍ତ୍ତମାନ ନିର୍ବାଚନ କମିସନଙ୍କ ପକ୍ଷରୁ ପ୍ରକାଶିତ ବିଜ୍ଞାପନ ଆଦିରେ ଉଲ୍ଲେଖ କରାଯାଇଛି ଯେ ଆବଶ୍ୟକ ନଥିପତ୍ର ଦାଖଲ କରିନପାରିଲେ କିମ୍ବା ଫଟୋ ନଥିଲେ କେବଳ ନିର୍ଦ୍ଧାରିତ ଫର୍ମ ପୂରଣ କରି ଇଆର୍ଓ ନିକଟରେ ଦାଖଲ କରନ୍ତୁ। ଇଆର୍ଓ ସ୍ଥାନୀୟ ଯାଞ୍ଚ କିମ୍ବା ଅନ୍ୟ ନଥିପତ୍ର ଯାଞ୍ଚ କରି ନିଷ୍ପତ୍ତି ନେବେ।
Comments are closed.