ଅନେକ ବଲିଉଡ ହିରୋଇନ୍ ରହିଛନ୍ତି ଯେଉଁମାନେ କର୍କଟ ରୋଗରେ ପୀଡିତ ହୋଇଥିବାର ସୂଚନା ରହିଛି । ସେହି ତାଲିକାରେ ନିକଟରେ ସାମିଲ ହୋଇଛନ୍ତି ବିଟାଉନ୍ର ଛୋଟ ପରଦାର ନାୟିକା ଦୀପିକା କକର । ଦୀପିକାଙ୍କୁ ଲିଭର କ୍ୟାନ୍ସରର ଷ୍ଟେଜ ୨ ହୋଇଥିବା ଜଣା ପଡିଥିଲା । ତେବେ ଏହା ଚିହ୍ନଟ ହେବା ପରେ ତାଙ୍କର ସର୍ଜରୀ ହୋଇଛି, ଏବଂ ଏହା ସଫଳ ହୋଇଥିବା ସୂଚନା ମିଳିଛି । ଏନେଇ ଦୀପିକାଙ୍କ ସ୍ୱାମୀ ସୋହେବ ଏକ ବ୍ଲଗରେ ସୂଚନା ଦେଇଛନ୍ତି । ତେବେ ଏହି ସମୟରେ ଦୀପିକା ମଧ୍ୟ ଫ୍ୟାନ୍ଙ୍କ ସହିତ କଥା ହେଉଥିବାର ଦେଖିବାକୁ ମିଳିଛି । ଭିଡିଓରେ ଦୀପିକା ତାଙ୍କ ଶୁଭେଚ୍ଛୁଙ୍କୁ ଧନ୍ୟବାଦ ଜଣାଇଛନ୍ତି । ତାଙ୍କ ପାଇଁ ସେମାନେ ପ୍ରାର୍ଥନା କରୁଥିବାରୁ ସେମାନଙ୍କ ନିକଟରେ ସେ କୃତଜ୍ଞ ଥିବା ଭିଡିଓରେ ପ୍ରକାଶ କରିଛନ୍ତି । ସେହିଭଳି ହସ୍ପିଟାଲରେ ମଧ୍ୟ ତାଙ୍କୁ ଅନେକ ଭଲ ପାଇବା ମିଳିଥିଲା ସେ କହିଛନ୍ତି । ହସପିଟାଲ ଷ୍ଟାଫ୍ଙ୍କ ଠାରୁ ଆରମ୍ଭ କରି ଅନ୍ୟ ରୋଗୀଙ୍କ ସମ୍ପର୍କୀୟ ମଧ୍ୟ ତାଙ୍କ ପାଇଁ ପ୍ରାର୍ଥନା କରିଥିବା ଦୀପିକା ପ୍ରକାଶ କରିଛନ୍ତି । ସର୍ଜରୀ ପରେ ବର୍ତ୍ତମାନ ସେ ଧୀରେଧୀରେ ସୁସ୍ଥ ହେବାକୁ ଲାଗିଛନ୍ତି ଏବଂ ଖୁବଜଲଦି ସୁସ୍ଥ ହୋଇଯିବେ ବୋଲି ଦୀପିକା ମତ ଦେଇଛନ୍ତି । ସୂଚନା ଅନୁସାରେ ଚଳିତ ଇଦ୍ ମଧ୍ୟ ଦୀପିକା ଓ ସୋହେବ୍ ହସ୍ପିଟାଲରେ ହିଁ ପାଳନ କରିଛନ୍ତି । ଏହି ସମୟରେ ପୁରା ପରିବାର ଓ ସୋହେବ ତାଙ୍କ ସହିତ ଅଛନ୍ତି ଏବଂ ସେମାନଙ୍କ ଭଲପାଇବା ତାଙ୍କ ପାଇଁ କବଚ ସଦୃଶ୍ୟ କାମ କରୁଛି ବୋଲି ଦୀପିକା ମତ ଦେଇଛନ୍ତି । ପରିବାରର ଭଲ ପାଇବା ଓ ଫ୍ୟାନଙ୍କ ଶୁଭକାମନା କାରଣରୁ ସେ ଖୁବ ଜଲଦି ସୁସ୍ଥ ହୋଇଯିବେ ବୋଲି ଦୀପିକା ପ୍ରକାଶ କରିଛନ୍ତି ।
Comments are closed.