ପାଟନା : ବିହାରର କଟିହାର ଜିଲ୍ଲାରେ ଆଜି ପୁଣି ଏକ ପୋଲ ଭୁଶୁଡ଼ି ପଡ଼ିଛି। ଗଙ୍ଗା ନଦୀ ଉପରେ ନିର୍ମାଣ କାମ ଚାଲିଥିବା ଏକ ନିର୍ମାଣାଧୀନ ପୋଲର କିଛି ଅଂଶ ଆଜି ଭୁଶୁଡ଼ି ପଡ଼ିଛି । ଏହା ଏକ କ୍ଷୁଦ୍ର ପୋଲ ଏବଂ ଗ୍ରାମୀଣ ବିକାଶ ବିଭାଗ ଦ୍ବାରା ଏହି ପୋଲ ନିର୍ମାଣ କାର୍ଯ୍ୟ ଚାଲିଥିଲା। ସୁକାୟେ ପଞ୍ଚାୟତ ଅଞ୍ଚଳରୁ ଜିଲ୍ଲା ମୁଖ୍ୟାଳୟକୁ ଯୋଗାଯୋଗ କରିବାପାଇଁ ଏହି ପୋଲ ନିର୍ମାଣ ହେଉଥିଲା। ତେବେ ପୋଲ ଭୁଶୁଡ଼ିବା ଘଟଣାରେ କେହି ମୃତାହତ ହୋଇନାହାନ୍ତି। ନିକଟରେ ଏହି ପୋଲ ନିର୍ମାଣ କାର୍ଯ୍ୟ ଆରମ୍ଭ ହୋଇଥିଲା। ଜିଲ୍ଲାପାଳ ମନେଶ କୁମାର ମୀନା କହିଛନ୍ତି, ପୋଲର ୨ଟି ପିଲାର ଭୁଶୁଡ଼ି ପଡ଼ିଛି। ବୋଧହୁଏ ନଦୀରେ ପ୍ରଖର ସୁଅ ଯୋଗୁଁ ଏହି ଘଟଣା ଘଟିଥିବା ସେ କହିଛନ୍ତି। ଉକ୍ତ ଘଟଣାରେ ଅଧିକ ତଦନ୍ତ ଜାରି ରହିଛି। ଉଲ୍ଲେଖଯୋଗ୍ୟ ଯେ ଗତ ୨ ମାସ ମଧ୍ୟରେ ବିହାରରେ ଅନେକ ଛୋଟ ଓ ବଡ଼ ପୋଲ ଭୁଶୁଡ଼ିଛି। ଏହି ଘଟଣା ପାଇଁ ସରକାର ୧୫ ଜଣ ଇଞ୍ଜିନିୟରଙ୍କୁ ନିଲମ୍ବନ ମଧ୍ୟ କରିଛନ୍ତି।
Comments are closed.