ୱାସିଂଟନ୍: ଆମେରିକୀୟ ମହାକାଶଚାରୀ ସୁନୀତା ୱିଲିୟମ୍ସ ଓ ବଚ୍ ୱିଲମୋରଙ୍କ ମହାକାଶ କେନ୍ଦ୍ରରୁ ଫେରିବା ଯାତ୍ରା ପୁଣିଥରେ ଅନିଶ୍ଚିତତା ମଧ୍ୟକୁ ଚାଲିଯାଇଛି। ଅନ୍ତର୍ଜାତୀୟ ମହାକାଶ ଷ୍ଟେସନ୍ (ଆଇଏସ୍ଏସ୍)ରୁ ପୃଥିବୀ ପୃଷ୍ଠକୁ ଫେରିବା ପାଇଁ ନିୟୋଜିତ ହୋଇଥିବା ବୋଇଂ ଷ୍ଟାରଲାଇନର୍ କ୍ୟାପ୍ସୁଲ୍ରେ ବିଭିନ୍ନ ଯାନ୍ତ୍ରିକ ତ୍ରୁଟି ଠାବ ହୋଇଥିବାରୁ ଫେରିବାରେ ବିଳମ୍ବ ହୋଇପାରେ ବୋଲି ନାସା ପକ୍ଷରୁ ସ୍ପଷ୍ଟ କରାଯାଇଛି।
ନାସା ପକ୍ଷରୁ ଜାରି ସୂଚନାରେ କୁହାଯାଇଛି, ମହାକାଶଯାନର ସମସ୍ୟା ସମ୍ପର୍କରେ ଆବଶ୍ୟକ ଯାଞ୍ଚ କରାଯାଉଛି। ଏକାଧିକ ଥର ପରୀକ୍ଷଣ କରାଯାଇଛି, କିନ୍ତୁ କେଉଁ ତାରିଖରେ ସୁନୀତା ଓ ୱିଲମୋର ଫେରିବେ ତାହା ସଠିକ କୁହାଯାଇପାରିବ ନାହିଁ। ତେବେ ଯଦି ନିର୍ଦ୍ଧାରିତ ଯୋଜନାନୁସାରେ ଷ୍ଟାରଲାଇନର୍ରେ ଯାତ୍ରା ସଫଳ ହୋଇପାରୁନାହିଁ ତେବେ ଦ୍ବିତୀୟ ବିକଳ୍ପ ସ୍ବରୂପ ସ୍ପେସ୍ ଏକ୍ସର ଡ୍ରାଗନ ଯାନରେ ଫେରାଇ ଆଣିବାର ବ୍ୟବସ୍ଥା କରାଯିବ। ସୂଚନାଯୋଗ୍ୟ, ଆନ୍ତର୍ଜାତିକ ମହାକାଶ ଷ୍ଟେସନ୍ରେ ଉଭୟ ସୁନୀତା ଓ ବଚ୍ ଜୁନ୍ ୬ରୁ ଅଟକିଛନ୍ତି। ଯାତ୍ରା ପୂର୍ବରୁ ସେମାନଙ୍କ ରହଣି ୧୦ ଦିନ ନିମନ୍ତେ ଧାର୍ଯ୍ୟ ହୋଇଥିଲା ତେବେ ମହାକାଶଯାନର ବିଭିନ୍ନ ଯାନ୍ତ୍ରିକ ତ୍ରୁଟି ଯୋଗୁଁ ସଂପ୍ରତି ପ୍ରାୟ ୫୦ ଦିନ ଅତିବାହିତ ହୋଇଗଲାଣି।

Comments are closed.