ନୂଆଦିଲ୍ଲୀ : ସୁପ୍ରିମକୋର୍ଟ ନ୍ୟାୟ ଦେବୀଙ୍କ ଆଖିରୁ ହଟିଲା କଳା ପଟି । ଭାରତର ସୁପ୍ରିମକୋର୍ଟ ବିଚାରପତିଙ୍କ ପ୍ରକୋଷ୍ଠରେ ଥିବା ‘ନ୍ୟାୟ ଦେବୀ’ଙ୍କ ପ୍ରତିମୂର୍ତ୍ତିରେ ବଡ଼ ଧରଣର ପରିବର୍ତ୍ତନ କରାଯାଇଛି । ନ୍ୟାୟ ଦେବୀଙ୍କ ପ୍ରତିମୂର୍ତ୍ତିର ଆଖିରେ ଲାଗିଥିବା କଳା କପଡ଼ାକୁ ହଟାଇ ଦିଆଯାଇଛି । ଭାରତୀୟ ଆଇନ କେବେ ହେଲେ ଅନ୍ଧ ନୁହେଁ। ଏଥିପାଇଁ ‘ସିମ୍ବଲ ଅଫ୍ ଜଷ୍ଟିସ୍’ ଭାବେ କୋର୍ଟ ପରିସରରୁ ଆରମ୍ଭ କରି ବିଚାରପତିଙ୍କ ପ୍ରକୋଷ୍ଠରେ ଥିବା ନ୍ୟାୟ ଦେବୀଙ୍କ ପ୍ରତିମୂର୍ତ୍ତିକୁ ବଦଳାଯାଇ ନୂତନ ପ୍ରତିମୂର୍ତ୍ତିକୁ ସ୍ଥାନ ଦିଆଯାଇଛି।
ପୂର୍ବରୁ ନ୍ୟାୟ ଦେବୀଙ୍କ ଆଖିରେ କଳା ପଟି ଏବଂ ହାତରେ ଖଣ୍ଡା ରହିଥିବା ବେଳେ ଏବେ ନୂତନ ପ୍ରତିମୂର୍ତ୍ତିରେ ଆଖିରୁ କଳା ପଟି କାଢ଼ି ଦିଆଯାଇଛି। ସେହିଭଳି ହାତରେ ଖଣ୍ଡା ବଦଳରେ ଡାହାଣ ହାତରେ ତରାଜୁ ଏବଂ ବାମ ହାତରେ ରହିଛି ସମ୍ବିଧାନ ପୁସ୍ତକ । ନ୍ୟାୟ ଦେବୀଙ୍କ ଏହି ନୂତନ ପ୍ରତିମୂର୍ତ୍ତି ପ୍ରଥମକରି ସୁପ୍ରିମକୋର୍ଟ ଲାଇବ୍ରେରୀରେ ସ୍ଥାନ ପାଇଛି।
ଉଲ୍ଲେଖଯୋଗ୍ୟ ଯେ ନ୍ୟାୟର ପ୍ରତୀକ ଭାବେ ନ୍ୟାୟ ଦେବୀଙ୍କ ନୂଆ ରୂପ ପାଇଁ ସୁପ୍ରିମକୋର୍ଟ ପ୍ରଧାନବିଚାରପତି ଜଷ୍ଟିସ୍ ଡିଓ୍ୱାଇ ଚନ୍ଦ୍ରଚୂଡ଼ ପରାମର୍ଶ ଦେବା ସହିତ ଏହାପଛରେ ରହିଥିବା ପରିକଳ୍ପନାରେ ମଧ୍ୟ ପରିବର୍ତ୍ତନ କରିବାକୁ କହିଥିଲେ। ସେହି ଅନୁସାରେ ନ୍ୟାୟ ଦେବୀଙ୍କ ସ୍ୱରୂପକୁ ବଦଳାଯାଇଛି। ପ୍ରଧାନବିଚାରପତିଙ୍କ ବିଚାରରେ ଖଣ୍ଡା ହେଉଛି ହିଂସାର ପ୍ରତୀକ। କିନ୍ତୁ ଅଦାଲତଙ୍କ କାର୍ଯ୍ୟ ହିଂସାତ୍ମକ ନୁହେଁ।କୋର୍ଟ ସବୁବେଳେ ସାମ୍ବିଧାନିକ ବିଧି ବ୍ୟବସ୍ଥା ଭିତ୍ତିରେ ନ୍ୟାୟ ପ୍ରଦାନ କରିଥାନ୍ତି। ସେହିପରି ନ୍ୟାୟ ଦେବୀଙ୍କ ଆଖିରେ ବନ୍ଧା ଯାଉଥିବା କଳାପଟି ମଧ୍ୟ ଭିନ୍ନ ସଙ୍କେତ ଦେଉଥିବାରୁ ଏହାକୁ ପରିବର୍ତ୍ତନ କରିବାକୁ ସିଜେଆଇ ପରାମର୍ଶ ଦେଇଥିଲେ। ସେହି ଅନୁଯାୟୀ ନ୍ୟାୟଦେବୀଙ୍କ ପ୍ରତିମୂର୍ତ୍ତି ଆକାରରେ ପରିବର୍ତ୍ତନ କରାଯାଇଛି।
ମିଳିଥିବା ସୂଚନା ଅନୁଯାୟୀ, ଏହି ନୂତନ ପ୍ରତିମୂର୍ତ୍ତି ନିର୍ମାଣ କରାଯାଇ ୨୦୨୩ ଏପ୍ରିଲରେ ବିଚାରପତିଙ୍କ ନୂତନ ପାଠାଗାର ନିକଟରେ ସ୍ଥାପନ କରାଯାଇଥିଲା । କିନ୍ତୁ ଏବେ ଏହି ଫଟୋ ସୋସିଆଲ ମିଡିଆରେ ଖୁବ ଜୋରସୋରରେ ଭାଇରାଲ ହେବାରେ ଲାଗିଛି । ସୂଚନାଯୋଗ୍ୟ, ଯେଉଁ ପ୍ରତିମୂର୍ତ୍ତିକୁ ଆମେ ନ୍ୟାୟ ଦେବୀଙ୍କ ରୂପରେ ଦେଖୁଥିଲୁ, ସେହି ପ୍ରତିମୂର୍ତ୍ତିକୁ ଅଷ୍ଟାଦଶ ଶତାବ୍ଦୀରେ ଜଣେ ବ୍ରିଟିଶ ଅଧିକାରୀ ଗ୍ରୀସରୁ ଆଣିଥିଲେ । ନ୍ୟାୟର ଏହି ଦେବୀ ଗ୍ରୀସର ପ୍ରାଚୀନ ଦେବୀ ଏବଂ ତାଙ୍କ ନାମ ହେଉଛି ଜଷ୍ଟିୟା ।
ଗ୍ରୀସରେ ଏହି ଦେବୀ ନ୍ୟାୟର ପ୍ରତୀକ ଭାବରେ ମାନ୍ୟତା ପାଇଛନ୍ତି । ତାଙ୍କ ଆଖିରେ ଥିବା କଳା ପଟିର ଅର୍ଥ ହେଉଛି ସେ ନିରପେକ୍ଷ ଭାବରେ ନ୍ୟାୟ ପ୍ରଦାନ କରିବେ, କାରଣ ଯଦି ତାଙ୍କ ଆଖି ଖୋଲା ଥାଏ, ତେବେ ନ୍ୟାୟ କ୍ଷେତ୍ରରେ ପକ୍ଷପାତିତା ହୋଇପାରେ । ସ୍ୱାଧୀନତା ପରେ, ଆମେ ଏହି ପ୍ରତିମୂର୍ତ୍ତିକୁ ‘ନ୍ୟାୟ ଦେବୀ’ ବୋଲି ମାନ୍ୟତା ଦେଇଥିଲୁ । ଯେଉଁଥିରେ ଏବେ ବଡ଼ ପରିବର୍ତ୍ତନ କରାଯାଇଛି ।
Comments are closed.