ନୂଆଦିଲ୍ଲୀ : ଗ୍ରେଟର ନୋଏଡା ଯୌତୁକ ମୃତ୍ୟୁ ମାମଲାରେ ଏକ ନୂଆ ଟ୍ବିଷ୍ଟ୍ ଆସିଛି। ନିକ୍କି ଭାଟି ତାଙ୍କ ମୃତ୍ୟୁ ବୟାନରେ ଡାକ୍ତରମାନଙ୍କୁ କହିଥିଲେ ଯେ ତାଙ୍କ ଶ୍ବଶୁର ଘରେ ସିଲିଣ୍ଡର ବିସ୍ଫୋରଣ ଯୋଗୁଁ ନିଆଁ ଲାଗିବା ପରେ ସେ ପୋଡ଼ି ହୋଇ ଆହତ ହୋଇଥିଲେ। ସୂତ୍ର ଅନୁସାରେ, ନିକ୍କିଙ୍କୁ ଭର୍ତ୍ତି କରାଯାଇଥିବା ଫୋର୍ଟିସ୍ ହସ୍ପିଟାଲର ଜଣେ ଡାକ୍ତର ଏବଂ ଜଣେ ନର୍ସ ପୋଲିସକୁ ଦେଇଥିବା ବୟାନରେ ଏହା ପ୍ରକାଶ କରିଛନ୍ତି। ଉଲ୍ଲେଖଯୋଗ୍ୟ ଯେ ପୂର୍ବରୁ ୨୬ ବର୍ଷୀୟ ନିକ୍କଙ୍କୁ ତାଙ୍କ ସ୍ୱାମୀ ବିପିନ ଭାଟି ଏବଂ ତାଙ୍କ ପରିବାର ଯୌତୁକ ଦାବି ପାଇଁ ଏକ ଜ୍ୱଳନଶୀଳ ତରଳ ପଦାର୍ଥରେ ପୋଡ଼ି ଦେଇଥିବା ଅଭିଯୋଗ ହୋଇଥିଲା। ତଥାପି, ତାଙ୍କ ବାସଭବନରେ ଗ୍ୟାସ ସିଲିଣ୍ଡର ବିସ୍ଫୋରଣର କୌଣସି ପ୍ରମାଣ ପୁଲିସ ପାଇନାହିଁ। ନିକ୍କି କାହିଁକି ଏପରି ବୟାନ ଦେଲେ କିମ୍ବା ତାଙ୍କୁ ଏପରି କହିବାକୁ ବାଧ୍ୟ କରାଯାଇଥିଲା କି ନାହିଁ ସେନେଇ ପୁଲିସ ତଦନ୍ତ ଚଳାଇଛି।
