ନୂଆଦିଲ୍ଲୀ: ବରିଷ୍ଠ ଆଇପିଏସ୍ ଅଫିସର ନଳିନ ପ୍ରଭାତ ହେବେ ଜମ୍ମୁ କାଶ୍ମୀରର ପରବର୍ତ୍ତୀ ପୁଲିସ ମହାନିର୍ଦ୍ଦେଶକ (ଡିଜିପି)। ଏନେଇ ଗୃହ ମନ୍ତ୍ରାଳୟ ପକ୍ଷରୁ ନିର୍ଦ୍ଦେଶ ଜାରି ହୋଇଛି। ଏବେ ଡିଜିପି ଥିବା ରଶ୍ମୀ ରଞ୍ଜନ ସ୍ୱାଇଁ ଆସନ୍ତା ମାସ ଅର୍ଥାତ୍ ସେପ୍ଟେମ୍ବର ୩୦ ତାରିଖରେ ଅବସର ନେବେ। ସେ ଅବସର ନେବା ପରେ ଅକ୍ଟୋବର ୧ ତାରିଖରେ ଜମ୍ମୁ ଓ କଶ୍ମୀରର ନୂଆ ଡିଜିପି ଭାବେ ଦାୟିତ୍ୱ ଗ୍ରହଣ କରିବେ ନଳିନ ପ୍ରଭାତ। ତେବେ ତା’ପୂର୍ବରୁ ତାଙ୍କୁ ସେଠାରେ ସ୍ୱତନ୍ତ୍ର ପୁଲିସ ମହାନିର୍ଦ୍ଦେଶକ ଭାବେ ନିଯୁକ୍ତି ଦିଆଯାଇଛି। ଗୃହ ମନ୍ତ୍ରାଳୟ ପକ୍ଷରୁ ଜାରି କରାଯାଇଥିବା ନିର୍ଦ୍ଦେଶରେ କୁହାଯାଇଛି ଯେ ନଳିନ ପ୍ରଭାତଙ୍କୁ ତତ୍କାଳ ଜମ୍ମୁ ଓ କାଶ୍ମୀରର ସ୍ୱତନ୍ତ୍ର ପୁଲିସ୍ ମହାନିର୍ଦ୍ଦେଶକ ଭାବେ ନିଯୁକ୍ତି ଦେଇ ପଠାଯାଇଛି। ଜମ୍ମୁ ଓ କାଶ୍ମୀରରେ ଆତଙ୍କବାଦୀ ଆକ୍ରମଣ ଘଟଣା ବୃଦ୍ଧି ପାଇଥିବା ବେଳେ ସ୍ଥିତିକୁ ନିୟନ୍ତ୍ରଣ କରିବା ପାଇଁ କେନ୍ଦ୍ର ସରକାର ଜରୁରୀକାଳୀନ ଭିତ୍ତିରେ ନଳିନ ପ୍ରଭାତଙ୍କୁ ନିଯୁକ୍ତି ଦେଇ ସେଠାକୁ ପଠାଇଥିବା କୁହାଯାଇଛି।
ନଳିନ ପ୍ରଭାତ ହେଉଛନ୍ତି ୧୯୯୨ ବ୍ୟାଚ୍ର ଆନ୍ଧ୍ର ପ୍ରଦେଶ କ୍ୟାଡରର ଆଇପିଏସ୍ ଅଫିସର। ଗତ ଏପ୍ରିଲ ମାସରୁ ସେ ଏନ୍ଏସ୍ଜିର ମହାନିର୍ଦ୍ଦେଶକ (ଡିଜି) ଭାବେ କାର୍ଯ୍ୟ କରିଆସୁଥିଲେ। କିନ୍ତୁ ତାଙ୍କର ସେହି ଅବଧିକୁ କାଣ୍ଟଛାଣ୍ଟ କରାଯାଇ ତାଙ୍କୁ ଜମ୍ମୁ କାଶ୍ମୀର ପଠାଯାଇଛି। ନଳିନ ପ୍ରଭାତଙ୍କୁ ଜମ୍ମୁ କାଶ୍ମୀରର ଡିଜିପି କରିବା ପାଇଁ ପ୍ରଥମେ ତାଙ୍କୁ ଏଜିଏମ୍ୟୁଟି (ଅରୁଣାଚଳ ପ୍ରଦେଶ-ଗୋଆ-ମିଜୋରାମ ଓ କେନ୍ଦ୍ର ଶାସିତ ଅଞ୍ଚଳ) କ୍ୟାଡରକୁ ବଦଳି କରାଯାଇଥିଲା। ଏଜିଏମ୍ୟୁଟି କ୍ୟାଡରକୁ ବଦଳି ହୋଇ ଆସିବାର ୧୨ ଘଣ୍ଟା ମଧ୍ୟରେ ତାଙ୍କୁ ଜମ୍ମୁ କାଶ୍ମୀରର ପରବର୍ତ୍ତୀ ଡିଜିପି ଭାବେ ନିଯୁକ୍ତି ଦିଆଯାଇଛି।
Comments are closed.