ନୂଆଦିଲ୍ଲୀ : ସୁପ୍ରିମକୋର୍ଟ ଏକ ଐତିହାସିକ ରାୟ ଦେଇ କହିଛନ୍ତି ଯେ ଦୃଷ୍ଟିବାଧିତଙ୍କୁ ବିଚାର ବିଭାଗୀୟ ସେବା ପାଇଁ ‘ଅଯୋଗ୍ୟ’ ମନେ କରାଯାଇ ପାରିବ ନାହିଁ। ସୁପ୍ରିମକୋର୍ଟଙ୍କ ବିଚାରପତି ଜଷ୍ଟିସ୍ ଜେ.ବି.ପରଦିୱାଲା ଓ ଜଷ୍ଟିସ୍ ଆର.ମହାଦେବନଙ୍କ ଖଣ୍ଡପୀଠ ଏସଂକ୍ରାନ୍ତ ଏକ ଆବେଦନର ଶୁଣାଣି କରି ଏହି ନିଷ୍ପତ୍ତି ନେଇଛନ୍ତି । ବିଚାରବିଭାଗୀୟ ସେବାରେ ନେତ୍ର ଦୃଷ୍ଟିବାଧିତ ପ୍ରାର୍ଥିଙ୍କୁ ରିଜର୍ଭେସନ ଦିଆଯାଉ ନଥିବାର ପ୍ରଶ୍ନ ଉଠାଯାଇଥିଲା। କୋର୍ଟ ବିଶେଷ କରି ମଧ୍ୟପ୍ରଦେଶ ବିଚାରବିଭାଗୀୟ ସେବା ନିୟମର ୬-ଏ ର ନିୟମକୁ ଅସାମ୍ବିଧାନିକ ବୋଲି କହିଛନ୍ତି, କାରଣ ଏଥିରେ ଦୃଷ୍ଟିବାଧିତ ପ୍ରାର୍ଥୀଙ୍କୁ ଆବେଦନ କରିବାର ଅନୁମତି ଦିଆଯାଉନଥିଲା। ସୁପ୍ରିମକୋର୍ଟ ତାଙ୍କ ରାୟରେ କହିଛନ୍ତି ଯେ ରାଜ୍ୟ ସରକାରଙ୍କୁ ସକରାତ୍ମକ ପଦକ୍ଷେପ ନେବା ଦରକାର ଯାହାଦ୍ୱାରା ଦିବ୍ୟାଙ୍ଗ ପ୍ରାର୍ଥୀଙ୍କ ଲାଗି ଏକ ଅନ୍ତର୍ଭୁକ୍ତିମୂଳକ ଚୟନ ପ୍ରକ୍ରିୟା ପ୍ରସ୍ତୁତ କରାଯାଇ ପାରିବ। କୋର୍ଟ ଏ କଥା ଉପରେ ମଧ୍ୟ ଗୁରୁତ୍ୱ ଦେଇଛନ୍ତି ଯେ କଠୋର କଟ୍-ଅଫ ମାର୍କ ଅଥବା ଜଟିଳ ଚୟନ ପ୍ରକ୍ରିୟା ଦିବ୍ୟାଙ୍ଗ ପ୍ରାର୍ଥୀଙ୍କ ନିମନ୍ତେ ଅପ୍ରତ୍ୟକ୍ଷ ଭେଦଭାବର କାରଣ ହୋଇପାରେ। ସବୁଠୁ ଗୁରୁତ୍ୱପୂର୍ଣ୍ଣ ମଧ୍ୟରୁ ଗୋଟିଏ ହେଉଛି ଦୃଷ୍ଟିବାଧିତ ପ୍ରାର୍ଥୀଙ୍କ ଲାଗି ପ୍ରତ୍ୟେକ ପର୍ଯ୍ୟାୟ ଚୟନ ପରୀକ୍ଷାରେ ଅଲଗା କଟ୍-ଅଫ ନିର୍ଦ୍ଧାରଣ କରାଯିବ।
Comments are closed.