ଦଲାଇଲାମାଙ୍କ ପାଇଁ ଭାରତ ରତ୍ନ ଦାବି

ନୂଆଦିଲ୍ଲୀ: ତିବ୍ଦତୀୟ କାରଣ ପାଇଁ ଦୃଢ଼ ସମର୍ଥନ ଦର୍ଶାଇ ଏକ ସର୍ବ ଦଳୀୟ ଫୋରମ୍‌ ତିବ୍ଦତୀୟ ଧର୍ମଗୁରୁ ଦଲାଇଲାମାଙ୍କ ପାଇଁ ଭାରତ ରତ୍ନ ଦାବି କରିଛି । ଆଲ୍‌ ପାର୍ଟି ପାଲିଆମେଣ୍ଟାରି ଫୋରମ୍‌ ଫର୍‌ ତିବ୍ଦତ ( ତିଦ୍ଦତ ପାଇଁ ସର୍ବ ଦଳୀୟ ଭାରତୀୟ ସଂସଦୀୟ ଫୋରମ୍‌)ରେ ବିଜେପି, ବିଜେଡି ଏବଂ ଜେଡିୟୁର ସାଂସଦମାନେ ଥିବାବେଳେ ଫୋରମ୍‌ ଚଳିତ ମାସ କରିଥିବା ଦ୍ବିତୀୟ ‌ବୈଠକରେ ଦଲାଇଲାମାଙ୍କୁ ଭାରତ ରତ୍ନ ଦେବାପାଇଁ ଦାବି କରି ଏକ ପ୍ରସ୍ତାବ ଗୃହୀତ କରିଛି। ଦଲାଇଲାମାଙ୍କୁ ସଂସଦର ମିଳିତ ଅଧିବେଶନରେ ଉଦ୍‌ବୋଧନ ଦେବାପାଇଁ ଅନୁମତି ଦେବାକୁ ମଧ୍ୟ ଫୋରମ୍‌ ସରକାରଙ୍କୁ ଅନୁରୋଧ କରିଛି। ଉକ୍ତ ଫୋରମ୍‌ ଦଲାଇଲାମାଙ୍କୁ ଭାରତ ରତ୍ନ ଦେବା ଦାବିରେ ୮୦ ଜଣ ସାଂସଦଙ୍କ ଦସ୍ତଖତ ସଂଗ୍ରହ କରିଥିବା ଦାବି କରିଛି। ବିଜେପି ରାଜ୍ୟସଭା ସାଂସଦ ସୁଜିତ କୁମାରଙ୍କ ନେତୃ୍ତ୍ବାଧୀନ ଏକ ୧୦ ଜଣିଆ କମିଟି ଦଲାଇ ଲାମାଙ୍କୁ ଭାରତ ରତ୍ନ ଦେବାପାଇଁ ଏକ ଦସ୍ତଖତ ଅଭିଯାନ ଆରମ୍ଭ କରିଛନ୍ତି।

Comments are closed.