ଇମ୍ଫାଲ : ମଣିପୁର ହିଂସା ଥମିବାର ନାଁ ନେଉନାହିଁ। ଦିନକୁ ଦିନ ହିଂସା ଉଗ୍ର ରୂପ ନେଉଛି। କଡ଼ା ସୁରକ୍ଷା ମୁତୟନ ସତ୍ତ୍ବେ ବିଭିନ୍ନ ସ୍ଥାନରେ ହିଂସା ଓ ପୋଡ଼ାଜଳା ଜାରି ରହିଛି। ୪ ଦିନିଆ ମଣିପୁର ଗସ୍ତରେ ଥିବା କେନ୍ଦ୍ର ଗୃହମନ୍ତ୍ରୀ ଅମିତ ଶାହ ଆଜି ମଣିପୁର ମୁଖ୍ୟମନ୍ତ୍ରୀ ଏନ୍ ବୀରେନ ସିଂହ ଏବଂ ଅନ୍ୟ ମନ୍ତ୍ରୀମାନଙ୍କ ସହ ସୁରକ୍ଷା ସ୍ଥିତି ନେଇ ଏକ ଗୁରୁତ୍ବପୂର୍ଣ୍ଣ ବୈଠକ କରିଛନ୍ତି। ମେ’ ୩ ତାରିଖରୁ ମଣିପୁରରେ ମୈତେଇ ଏବଂ କୁକି ସମ୍ପ୍ରଦାୟ ମଧ୍ୟରେ ହିଂସା ଲାଗି ରହିଛି। ରାଜ୍ୟରେ ସ୍ଥିତି ଦିନକୁ ଦିନ ବିଗୁଡ଼ୁଥିବାରୁ ଶାହ ଗତକାଲିଠାରୁ ମଣିପୁର ଗସ୍ତରେ ଅଛନ୍ତି। ହିଂସା ପରେ ଏହା ଶାହଙ୍କର ମଣିପୁରକୁ ପ୍ରଥମ ଗସ୍ତ। ଶାହ ବିଭିନ୍ନ ରାଉଣ୍ଡ୍ ବୈଠକ କରି ରାଜ୍ୟରେ ଶାନ୍ତି ଏବଂ ସ୍ବାଭାବିକ ସ୍ଥିତି ଫେରାଇ ଆଣିବାପାଇଁ ରଣନୀତି ପ୍ରସ୍ତୁତ କରିବେ। ରାଜ୍ୟରେ ହିଂସା ନିୟନ୍ତ୍ରଣ ନେଇ କେଉଁ ସବୁ ପଦକ୍ଷେପ ଗ୍ରହଣ ହୋଇଛି ସେନେଇ ଶାହ ଆସନ୍ତାକାଲି ଏକ ସାମ୍ବାଦିକ ସମ୍ମିଳନୀ କରି ଘୋଷଣା କରିବେ।ହିଂସା ହେବାରୁ ଇମ୍ଫାଲରେ ପୁଣିଥରେ ସଦ୍ୟ କର୍ଫ୍ୟୁ ଜାରି କରାଯାଇଛି। ରାଜ୍ୟରେ ମେ’ ୩୧ ପର୍ଯ୍ୟନ୍ତ ଇଣ୍ଟରନେଟ୍ ସେବା ବନ୍ଦ ରହିଛି।
Comments are closed.