ଶ୍ରୀନଗର: ଜମ୍ମୁ କଶ୍ମୀରରେ ଚୂଡ଼ାନ୍ତ ପର୍ଯ୍ୟାୟରେ ୪୦ ଆସନରେ ଭୋଟ୍ ଗ୍ରହଣ ଶେଷ ହୋଇଛି। ଏହି ପର୍ଯ୍ୟାୟରେ ୬୫.୪୮ ପ୍ରତିଶତ ମତଦାନ ହୋଇଥିବା ରେକର୍ଡ କରାଯାଇଛି। ଉଧମପୁର ଜିଲ୍ଲାରେ ସର୍ବାଧିକ ୭୨.୯୧ ପ୍ରତିଶତ ମତଦାନ ରେକର୍ଡ କରାଯାଇଥିବା ବେଳେ ବାରମୂଳାରେ ସର୍ବନିମ୍ନ ୫୫.୭୩ ପ୍ରତିଶତ ମତଦାନ ରେକର୍ଡ ହୋଇଛି। ଜମ୍ମୁରେ ୨୪ ଆସନରେ ଭୋଟ୍ ଗ୍ରହଣ ହୋଇଥିବାବେଳେ କଶ୍ମୀରରେ ୧୬ ଆସନରେ ଭୋଟ୍ ଗ୍ରହଣ ହୋଇଛି। ୩ ସୀମାନ୍ତ ଜିଲ୍ଲାର ୧୬ଟି ବିଧାନସଭା କ୍ଷେତ୍ରରେ କଡ଼ା ସୁରକ୍ଷା ମଧ୍ୟରେ ଭୋଟ୍ ଗ୍ରହଣ ହୋଇଥିଲା। ଅକ୍ଟୋବର ୮ ତାରିଖରେ ନିର୍ବାଚନ ଫଳାଫଳ ଘୋଷଣା ହେବ। ଧାରା ୩୭୦ ଉଚ୍ଛେଦ ପରେ ଜନସାଧାରଣ ପ୍ରଥମ ଥର ପାଇଁ ଭୋଟ୍ ଦେଉଥିବାରୁ ସେମାନଙ୍କ ମଧ୍ୟରେ ପ୍ରବଳ ଆଗ୍ରହ ଦେଖିବାକୁ ମିଳିଥିଲା। ମତଦାନ କେନ୍ଦ୍ରରେ ଭୋଟରମାନଙ୍କର ଲମ୍ବା ଧାଡ଼ି ଥିଲା ଏହାର ବଳିଷ୍ଠ ପ୍ରମାଣ। ଚୂଡ଼ାନ୍ତ ପର୍ଯ୍ୟାୟରେ ୪୧୫ ପ୍ରାର୍ଥୀଙ୍କର ଭାଗ୍ୟ ଇଭିଏମ୍ରେ ବନ୍ଦ ହୋଇଛି। ପ୍ରମୁଖ ପ୍ରାର୍ଥୀଙ୍କ ମଧ୍ୟରେ ୨ ଜଣ ପୂର୍ବତନ ଉପମୁଖ୍ୟମନ୍ତ୍ରୀ ତାରା ଚାନ୍ଦ ଏବଂ ମୁଜାଫର ବୈଗ ଏବଂ ଅନ୍ୟ ପୂର୍ବତନ ମନ୍ତ୍ରୀ ଓ ବିଧାୟକମାନେ ଅଛନ୍ତି। ଶାନ୍ତି ଶୃଙ୍ଖଳାରେ ଭୋଟ୍ ଗ୍ରହଣ ଶେଷ ହୋଇଥିବା ନିର୍ବାଚନ ଅଧିକାରୀ ସୂଚନା ଦେଇଛନ୍ତି।
Comments are closed.