ନୂଆଦିଲ୍ଲୀ: ବିଦେଶ ବ୍ୟାପାର ମନ୍ତ୍ରୀ ଏସ୍ ଜୟଶଙ୍କର ଏବେ ଚୀନ୍ ଗସ୍ତରେ ଅଛନ୍ତି। ଏସ୍ସିଓ ବିଦେଶ ମନ୍ତ୍ରୀଙ୍କ ବୈଠକରେ ଯୋଗ ଦେବାପାଇଁ ଚୀନ୍ ଗସ୍ତରେ ଯାଇଥିବା ଜୟଶଙ୍କର ଆଜି ଚୀନ୍ ରାଷ୍ଟ୍ରପତି ସି ଜିନପିଙ୍ଗଙ୍କୁ ଭେଟିଛନ୍ତି। ଜୟଶଙ୍କରଙ୍କ ସହ ଏକ ସାକ୍ଷାତର ଫଟୋ ଏକ୍ସରେ ପୋଷ୍ଟ୍ କରି ଜୟଶଙ୍କର କହିଛନ୍ତି, ଭାରତ-ଚୀନ୍ ଦ୍ବିପାକ୍ଷିକ ସମ୍ପର୍କ ସୁଦୃଢ଼ କରିବା ଦିଗରେ ସେ ଜିନପିଙ୍ଗଙ୍କ ସହ କଥା ହୋଇଛନ୍ତି। ଏହି ଗସ୍ତ ଅବସରରେ ଜୟଶଙ୍କର ଚୀନ୍ ଉପରାଷ୍ଟ୍ରପତି ହାନ ଝେଙ୍ଗ ଏବଂ ବିଦେଶ ମନ୍ତ୍ରୀ ୱାଙ୍ଗ ୟିଙ୍କୁ ଭେଟିଛନ୍ତି। ଜୟଶଙ୍କର ତାଙ୍କ ଚୀନ୍ ପ୍ରତିପକ୍ଷ ୱାଙ୍ଗ ୟିଙ୍କୁ କହିଛନ୍ତି, ଭାରତ ଏବଂ ଚୀନ୍ ସୀମା ଓ ଅନ୍ୟାନ୍ୟ ପ୍ରସଙ୍ଗଗୁଡ଼ିକର ସମାଧାନ କରି ସେମାନଙ୍କ ସମ୍ପର୍କକୁ ସ୍ୱାଭାବିକ କରିବା ପାଇଁ ଆଗକୁ ବଢ଼ିବାକୁ ପଡ଼ିବ। ସ୍ଥିର ଦ୍ୱିପାକ୍ଷିକ ସମ୍ପର୍କ କେବଳ ପାରସ୍ପରିକ ସମ୍ମାନ, ପାରସ୍ପରିକ ସ୍ୱାର୍ଥ ଏବଂ ପାରସ୍ପରିକ ସମ୍ବେଦନଶୀଳତା ଆଧାରରେ ଗଢ଼ା ହୋଇପାରିବ। ସୀମାପାର ଆତଙ୍କବାଦକୁ ପାକିସ୍ତାନର ସମର୍ଥନ ସମ୍ପର୍କରେ ସ୍ପଷ୍ଟ ଭାବରେ ଉଲ୍ଲେଖ କରି ଜୟଶଙ୍କର ୱାଙ୍ଗଙ୍କୁ କହିଛନ୍ତି , ଭାରତ ଆଶା କରୁଛି ଯେ ଏସ୍ସିଓ ବୈଠକରେ ‘ଆତଙ୍କବାଦ ପ୍ରତି ଶୂନ୍ୟ ସହନଶୀଳତା’ ବଜାୟ ରହିବ, ଯାହାର ମୁଖ୍ୟ ଉଦ୍ଦେଶ୍ୟ ହେଉଛି ଆତଙ୍କବାଦ ଏବଂ ଉଗ୍ରବାଦ ବିରୁଦ୍ଧରେ ଲଢ଼ିବା। ଏହା ପୂର୍ବରୁ ଜୟଶଙ୍କର ଚୀନ୍ ଉପରାଷ୍ଟ୍ରପତି ହାନ୍ ଝେଙ୍ଗଙ୍କୁ ଭେଟିଥିଲେ ଏବଂ ତାଙ୍କୁ କହିଥିଲେ ଯେ ଦ୍ୱିପାକ୍ଷିକ ସମ୍ପର୍କକୁ ସ୍ବାଭାବିକ କରାଗଲେ ଉଭୟ ଏହାର ଲାଭ ପାଇବେ। ୨୦୨୦ ଏପ୍ରିଲ-ମେ’ରେ ଭାରତ-ଚୀନ୍ ସୀମା ବିବାଦ ପାଇଁ ଦୁଇ ରାଷ୍ଟ୍ର ମଧ୍ୟରେ ସମ୍ପର୍କ ପ୍ରଭାବିତ ହେବା ପରଠାରୁ ଏହା ଜୟଶଙ୍କରଙ୍କ ପ୍ରଥମ ଚୀନ୍ ଗସ୍ତ।
Comments are closed.