ଗାଜା: ଗାଜାରେ ଗତ ୨୪ ଘଣ୍ଟାରେ ପୁଣି ୧୧ ଜଣଙ୍କର ଅନାହାରରେ ମୃତ୍ୟୁ ହୋଇଛି। ଏପର୍ଯ୍ୟନ୍ତ ଅନାହାରରେ ୨୧୨ ଜଣଙ୍କର ମୃତ୍ୟୁ ହେଲାଣି। ଏଥିସହ ଦିନକରେ ୨୧ ରିଲିଫ ଆଶାୟୀଙ୍କର ଇସ୍ତ୍ରାଏଲ ଆକ୍ରମଣରେ ମୃତ୍ୟୁ ଘଟିଛି। ଗାଜା ସହରକୁ ନିଜ କବ୍ଜକୁ ନେବାକୁ ଇସ୍ତ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁ ଯୋଜନା କରୁଥିବାବେଳେ ଇସ୍ତ୍ରାଏଲ ନିରାପତ୍ତା ସମ୍ବନ୍ଧୀୟ କ୍ୟାବିନେଟ ଶୁକ୍ରବାର ଏହା ଉପରେ ମୋହର ମାରିଛି। ଇସ୍ତ୍ରାଏଲ ପକ୍ଷରୁ ୧୦ ଲକ୍ଷ ପାଲେଷ୍ଟାଇନବାସୀଙ୍କୁ ଗାଜା ଛାଡ଼ି ଦକ୍ଷିଣରେ ଥିବା କନସନଟ୍ରେସନ୍ ଜୋନ୍କୁ ଯିବା ପାଇଁ ବାଧ୍ୟ କରାଯାଉଛି। କିନ୍ତୁ ସେମାନେ ଏହାକୁ ବିରୋଧ କରୁଛନ୍ତି। ଇସ୍ତ୍ରାଏଲର ସାମରିକ ଅତିକ୍ରମଣକୁ ଜାତିସଂଘ ସହିତ ଅନେକ ୟୁରୋପୀୟ ଦେଶ ଏବଂ ଚୀନ ବିରୋଧ କରୁଛନ୍ତି। ଇଜିପ୍ଟ, ତୁର୍କୀ, ସାଉଦି ଆରବ ଭଳି ୨୦ଟି ଆରବ ଦେଶ ଏନେଇ ସ୍ବର ଉଠାଇବା ସହିତ ଏହା ଅବୈଧ ଏବଂ ଆନ୍ତର୍ଜାତିକ ଆଇନ ବିରୋଧରେ ବୋଲି ସେମାନେ କହିଛନ୍ତି। ରବିବାର ଆରବ ଲିଗ ଦେଶଗୁଡ଼ିକ ଏ ସମ୍ପର୍କରେ ଆଲୋଚନା ପାଇଁ ଏକ ବୈଠକ ଡାକିଛନ୍ତି। ଲଣ୍ଡନ, ଜର୍ମାନୀ ବର୍ଲିନ, ନରୱେର ଓସଲୋ, ସ୍ବିଡେନର ଷ୍ଟକହୋମ୍ ଏବଂ ହେଲସିଂବର୍ଗ, ନେଦରଲ୍ୟାଣ୍ଡର ଆମଷ୍ଟରଡାମ, ଡେନମାର୍କର କୋପେନହାଜେନ ଏବଂ ଆରହସରେ ପ୍ରତିବାଦ ଦେଖିବାକୁ ମିଳିଛି। ଗାଜାରେ ଇସ୍ତ୍ରାଏଲର ଯୁଦ୍ଧ ଯୋଗୁଁ ଏପର୍ଯ୍ୟନ୍ତ ୬୧,୩୬୯ ଜଣଙ୍କର ମୃତ୍ୟୁ ଘଟିଥିବାବେଳେ ଦେଢ଼ ଲକ୍ଷରୁ ଅଧିକ ଆହତ ହୋଇଛନ୍ତି। ସେହିପରି ୨୦୨୩ ଅକ୍ଟୋବରରୁ ଇସ୍ତ୍ରାଏଲର ୧,୧୩୯ ଜଣଙ୍କ ମୃତ୍ୟୁ ହୋଇଥିବାବେଳେ ୨୦୦ ରୁ ଅଧିକ ବନ୍ଧକ ହୋଇଛନ୍ତି।
