ନୂଆଦିଲ୍ଲୀ: କର୍ଣ୍ଣାଟକରେ ହାଇ ଭୋଲ୍ଟେଜ ପ୍ରଚାର ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି କର୍ଣ୍ଣାଟକ ଭୋଟରଙ୍କ ପାଇଁ ଖୋଲା ଚିଠି ଲେଖିଛନ୍ତି। ବିଜେପିର ଟ୍ବିଟର ଆକାଉଣ୍ଟରେ ଏକ ଭିଡିଓ ପୋଷ୍ଟ୍ କରି ପ୍ରଧାନମନ୍ତ୍ରୀ କହିଛନ୍ତି, ପ୍ରତି କନ୍ନଡିଗାଙ୍କ ସ୍ବପ୍ନ ହେଉଛି ତାଙ୍କ ନିଜ ସ୍ବପ୍ନ। ମୋଦୀ କହିଛନ୍ତି, ଆପଣମାନଙ୍କ ପ୍ରସ୍ତାବ ହେଉଛି ମୋର ପ୍ରସ୍ତାବ। ଦେଶର ଅର୍ଥନୀତିରେ କର୍ଣ୍ଣାଟକର ଭୂମିକା ଉପରେ ଗୁରୁତ୍ବାରୋପ କରି ମୋଦୀ କହିଛନ୍ତି, ଭାରତ ହେଉଛି ବିଶ୍ବରେ ପଞ୍ଚମ ବୃହତ୍ତମ ଅର୍ଥନୀତି। ତେଣୁ ଆମକୁ ଏହା ନିଶ୍ଚିତ କରିବାକୁ ପଡ଼ିବ ଯେ ବିଶ୍ବର ଶୀର୍ଷ ୩ ଅର୍ଥନୀତି ମଧ୍ୟରେ ଭାରତ ରହିଛି। କେବଳ କର୍ଣ୍ଣାଟକର ଅର୍ଥନୀତି ବୃଦ୍ଧି ହେବା ସହ ଏହା ସମ୍ଭବ ହୋଇପାରିବ। କର୍ଣ୍ଣାଟକରେ ସାଢ଼େ ୩ ବର୍ଷର ଡବଲ ଇଂଜିନ ସରକାରକୁ ପ୍ରଶଂସା କରି ମୋଦୀ କହିଛନ୍ତି, ବିଜେପି ସରକାରର କାର୍ଯ୍ୟ ପାଇଁ କର୍ଣ୍ଣାଟକ ଅର୍ଥନୀତି ଅତି ଦ୍ରୁତ ଗତିରେ ବୃଦ୍ଧି ପାଉଛି। ରାଜ୍ୟରେ ବିକାଶ ପାଇଁ ମୋଦୀ ପ୍ରତିଶୃତି ଦେଇଛନ୍ତି। ମୋଦୀ କହିଛନ୍ତି, ବିନିଯୋଗ, ଶିଳ୍ପ ଏବଂ ଉଦ୍ଭାବନ କ୍ଷେତ୍ରରେ ଆମେ କର୍ଣ୍ଣାଟକକୁ ନମ୍ବର ୱାନ୍ କରିବାକୁ ଚାହୁ। ଆମେ କର୍ଣ୍ଣାଟକକୁ ଶିକ୍ଷା , ନିଯୁକ୍ତି ଏବଂ ଉଦ୍ୟୋଗ କ୍ଷେତ୍ରରେ ବି ନମ୍ବର ୱାନ କରିବାକୁ ଚାହୁ। ତେଣୁ କର୍ଣ୍ଣାଟକକୁ ନମ୍ବର ୱାନ୍ କରିବାପାଇଁ ମୁଁ ସମସ୍ତଙ୍କୁ ଜଣେ ଦାୟିତ୍ବବାନ୍ ନାଗରିକ ଭାବେ ଭୋଟ୍ ଦେବାପାଇଁ ଅନୁରୋଧ କରୁଛି।
Comments are closed.