ବେଙ୍ଗାଲୁରୁ: କର୍ଣ୍ଣାଟକ ବିଧାନସଭା ନିର୍ବାଚନ ପାଇଁ କଂଗ୍ରେସ ଆଜି ଏହାର ନିର୍ବାଚନ ଇସ୍ତାହାର ଜାରି କରିଛି। କଂଗ୍ରେସ ଇସ୍ତାହାର ମହିଳା ଏବଂ ଯୁବ ଭୋଟରଙ୍କୁ ଫୋକସ୍ କରି ପ୍ରସ୍ତୁତ କରାଯାଇଛି। କଂଗ୍ରେସ ସଭାପତି ମଲ୍ଲିକାର୍ଜୁନ ଖଡ଼ଗେ, କର୍ଣ୍ଣାଟକ କଂଗ୍ରେସ ମୁଖ୍ୟ ଡିକେ ଶିବକୁମାର, ବରିଷ୍ଠ ନେତା ସିଦ୍ଦରମେୟା ଆଜି ବେଙ୍ଗାଲୁରୁର ଏକ ହୋଟେଲ୍ରେ ଦଳର ଇସ୍ତାହାର ଜାରି କରିଛନ୍ତି। କଂଗ୍ରେସ ପ୍ରତି ପରିବାରକୁ ୨୦୦ ୟୁନିଟ ପର୍ଯ୍ୟନ୍ତ ମାଗଣା ବିଜୁଳି ଦେବ ବୋଲି ଘୋଷଣା କରିଛି। ଗୃହ ଲକ୍ଷ୍ମୀ ଯୋଜନା ଅଧୀନରେ ପରିବାରରେ ପ୍ରତି ମହିଳା ମୁଖ୍ୟଙ୍କୁ ମାସିକ ୨ ହଜାର ଟଙ୍କା ଏବଂ ଚାକିରି କରିନଥିବା ଗ୍ରାଜୁଏଟ୍ଙ୍କୁ ଏହା ୨ ବର୍ଷ ପର୍ଯ୍ୟନ୍ତ ୩ ହଜାର ଟଙ୍କା ଭତ୍ତା ଦେବ। କଂଗ୍ରେସ ନିର୍ବାଚନ ଇସ୍ତାହାରରେ କୁହାଯାଇଛି କଂଗ୍ରେସ କ୍ଷମତାକୁ ଆସିଲେ ବଜରଙ୍ଗ ଦଳ ପରି ସଂସ୍ଥାକୁ ନିଷିଦ୍ଧ କରିବ। ସମ୍ପ୍ରଦାୟରେ ଘୃଣା ପ୍ରସାଜର କରୁଥିବା ବ୍ୟକ୍ତିବିଶେଷ ଏବଂ ଅନୁଷ୍ଠାନ ବିରୋଧରେ କଂଗ୍ରେସ କଡ଼ା କାତର୍ଯ୍ୟାନୁଷ୍ଠାନ ଗ୍ରହଣ କରିବ ବୋଲି କହିଛି। କଂଗ୍ରେସ ଘୋଷଣା କରିଥିବା ଅନ୍ୟ ନିର୍ବାଚନ ପ୍ରତିଶୃତି ଗୁଡ଼ିକ ହେଉଛି ପୂର୍ତ୍ତ ବିଭାଗ, ଗ୍ରାମୀଣ ବିକାଶ, ଜଳସେଚନ ସହରାଞ୍ଚଳ ବିକାଶ ଏବଂ ଶକ୍ତି କ୍ଷେତ୍ରରେ ଏକ ସ୍ବଚ୍ଛ ଟେଣ୍ଡର ସିଷ୍ଟମ ସୃଷ୍ଟି କରିବା ଏବଂ ଦୁର୍ନୀତିର ମୂଳପୋଛ କରିବା। ରାଜ୍ୟରେ ପ୍ରତି ଗ୍ରାମ ପଞ୍ଚାୟତରେ କଂଗ୍ରେସ ହାଇ ସ୍ପିଡ୍ ୱାଇଫାଇ ହଟସ୍ପଟ୍ ବ୍ୟବସ୍ଥା କରିବାପାଇଁ ଘୋଷଣା କରିଛି। ମହାତ୍ମା ଗାନ୍ଧୀ ଗ୍ରାମ ସ୍ବରାଜ ଯୋଜନା ଅଧୀନରେ କଂଗ୍ରେସ କ୍ଷମତାକୁ ଆସିଲେ ଗ୍ରାମ ଗୁଡ଼ିକର ବିକାଶ ପାଇଁ ୫୦ ହଜାର କୋଟି ଟଙ୍କା ବିନିଯୋଗ କରିବ ବୋଲି କହିଛି। କଂଗ୍ରେସ ମଧ୍ୟ କୃଷି ସର୍ବୋଦୟ ନିଧି ପାଇଁ ପ୍ରସ୍ତାବ ଦେଇଛି। ଏହି ଯୋଜନା ଅଧୀନରେ କଂଗ୍ରେସ ୫ ବର୍ଷ ମଧ୍ୟରେ ୧.୫୦ ଲକ୍ଷ କୋଟି ଟଙ୍କା କୃଷିର ଆଧୁନିକୀକରଣ ପାଇଁ ଆବଣ୍ଟନ କରିବ ବୋଲି ପ୍ରତିଶୃତି ଦେଇଛି। ପ୍ରତିବର୍ଷ କଂଗ୍ରେସ ୫ ହଜାର ମହିଳା ଉଦ୍ୟୋଗୀଙ୍କୁ ସମର୍ଥନ କରିବ ବୋଲି ପ୍ରତିଶୃତି ଦେଇଛି।
Comments are closed.