ରାଜସ୍ଥାନ : ରାଜସ୍ଥାନ ନ୍ୟାସନାଲ ହାଇୱେରେ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଛି । ଦୁର୍ଘଟଣାରେ ନବବିବାହିତ ବର-କନ୍ୟାଙ୍କ ସମେତ ପରିବାରର ୫ ଜଣଙ୍କ ମୃତ୍ୟୁ । ଏହା ସହ ୧୨ ଜଣ ଗୁରୁତର ଆହତ ହୋଇଥିବା ସୂଚନା ମିଳିଛି । ମଙ୍ଗଳବାର ବିଳମ୍ବିତ ରାତିରେ ରାଜସ୍ଥାନର ଦୌସା-ମନୋହରପୁର ରାଜପଥରେ ଘଟିଛି ଏହି ମର୍ମନ୍ତୁଦ ସଡକ ଦୁର୍ଘଟଣା । ମଧ୍ୟପ୍ରଦେଶରୁ ବିବାହ ସାରି ବର-କନ୍ୟାଙ୍କ ସମେତ ଅନ୍ୟ ସମ୍ପର୍କୀୟ ମାନଙ୍କୁ ନେଇ ଆସୁଥିବା ଏକ ଜିପ ରାଇସର ନିକଟରେ ଟ୍ରକ ସହ ମୁହାଁମୁହିଁ ଧକ୍କା ହୋଇଥିଲା । ଦୁର୍ଘଟଣା ପରେ ପରିବାରରେ ଶୋକର ଛାୟା ଖେଳିଯାଇଛି । ଘଟଣାସ୍ଥଳରେ ପୋଲିସ ପହଞ୍ଚି ସ୍ଥିତି ନିୟନ୍ତ୍ରଣ କରିଛନ୍ତି ।
ସୂଚନାନୁଯାୟୀ, ମଧ୍ୟପ୍ରଦେଶରୁ ଏକ ବିବାହ ଉତ୍ସବ ସାରି ଫେରିବାବେଳେ ତାଙ୍କ ଜିପଟି ନିୟନ୍ତ୍ରଣ ହରାଇ ଟ୍ରକ୍କୁ ଧକ୍କା ଦେଇଥିଲା । ଏହି ଜିପରେ ଗୋଟିଏ ପରିବାରର ୧୪ରୁ ୧୫ ଜଣ ଥିବା ସୂଚନା ମିଳୁଛି । ଫଳରେ ଘଟଣାସ୍ଥଳରେ ଗୋଟିଏ ପରିବାରର ବର-କନ୍ୟାଙ୍କ ସମେତ ୫ ଜଣଙ୍କର ମୃତ୍ୟୁ ଘଟିଥିଲା । ଏହା ବ୍ୟତୀତ ଅନ୍ୟ ସଦସ୍ୟ ଗୁରୁତର ଭାବେ ଆହତ ହୋଇଥିଲେ । ଏପରି ଅଘଟଣ ଦୌସା-ମନୋହରପୁର ରାଜପଥରେ ଦେଖିବାକୁ ମିଳିଥିଲା । ଧକ୍କା ଏତେ ଜୋର ସେ ଥିଲା ଯେ ଜିପଟି ସମ୍ପୂର୍ଣ୍ଣ ଭାଙ୍ଗିଯିବା ସହ ଲୋକମାନେ ଗୁରୁତର ଭାବେ ଫସି ରହିଥିଲେ । ଫଳରେ ସ୍ଥାନୀୟ ଲୋକଙ୍କର ଏବଂ ପୋଲିସର ବହୁ ପରିଶ୍ରମ ପରେ ଆହତ ଏବଂ ମୃତକଙ୍କୁ ବାହାର କରିଥିଲା । ପରେ ଆହତଙ୍କ ଚିକିତ୍ସା ପାଇଁ ନିକଟସ୍ଥ NIMS ହସ୍ପିଟାଲରେ ପୋଲିସ ସେମାନଙ୍କୁ ଭର୍ତ୍ତି କରିଥିଲା । ଏହା ପରେ ପୋଲିସ ତଦନ୍ତ ପ୍ରକ୍ରିୟା ଆରମ୍ଭ କରିଛି । ଏହା ବ୍ୟତୀତ ମୃତକଙ୍କୁ ଚିହ୍ନଟ କରିବା ସହିତ ଦୁର୍ଘଟଣାର କାରଣ ଖୋଜିବାରେ ବ୍ୟସ୍ତ ରହିଛି ପୋଲିସ ।
Comments are closed.