ଇମ୍ରାନ ଗିରଫ ହେବାପରେ ପାକିସ୍ତାନ ଜଳୁଛି

ଇସଲାମାବାଦ : ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନ୍ ଗତକାଲି ପାକିସ୍ତାନ ରେଂଜର୍ସଙ୍କ ଦ୍ବାରା ଗିରଫ ହେବାପରେ ଦେଶବ୍ୟାପୀ ପୋଡ଼ାଜଳା ଏବଂ ଦଙ୍ଗା ହୋଇଛି। ପାକିସ୍ତାନ ତେହରିକ ଏ ଇନସାଫ (ପିଟିଆଇ) ସମର୍ଥକମାନେ ଦେଶବ୍ୟାପୀ ପୋଡ଼ାଜଳା କରିଛନ୍ତି। ସେନା କୋଠା ପୁଲିସ କୋଠା ଏବଂ ରେଡିଓ ଅଫିସ ଜାଳି ଦେଇଛନ୍ତି। ହିଂସା ଯୋଗୁଁ ୬ ଜଣଙ୍କର ମୃତ୍ୟୁ ହୋଇଛି। ପିଟିଆଇ ସମର୍ଥକମାନେ ରାୱଲପିଣ୍ଡି ସ୍ଥିତ ସେନା ମୁଖ୍ୟାଳୟ ବାହାରେ ରୁଣ୍ଡ ହୋଇ ପଥର ମାଡ଼ କରିଥିଲେ ଏବଂ ପରେ ମୁଖ୍ୟାଳୟରେ ଧସେଇ ପଶିଥିଲେ। ଲାହୋରରେ କର୍ପ୍େସ କମାଣ୍ଡରଙ୍କ ବାସଭବନରେ ମଧ୍ୟ ସେମାନେ ଧସେଇ ପଶିଛନ୍ତି। ସେଠାରେ କିଛି ସୁରକ୍ଷାକର୍ମୀଙ୍କୁ ମଧ୍ୟ ଆକ୍ରମଣ ହୋଇଥିବା ରିପୋର୍ଟ ମିଳିଛି। ଇମ୍ରାନଙ୍କ ସମର୍ଥକମାନେ ପେଶାୱାରରେ ରେଡିଓ ପାକିସ୍ତାନ ଅଫିସରେ ନିଆଁ ଲଗାଇ ଦେଇଛନ୍ତି। ଖାନ୍ଙ୍କୁ ମୁକ୍ତ କରିବାପାଇଁ ବିଭିନ୍ନ ସହରରେ ପିଟିଆଇ ସମର୍ଥକମାନେ ରାସ୍ତାକୁ ଓହ୍ଲାଇ ହିଂସା ଓ ପୋଡ଼ାଜଳା କରିଛନ୍ତି। ପିଟିଆଇ ସମର୍ଥକମାନେ ମଧ୍ୟ ପାକିସ୍ତାନ ବାୟୁସେନାର ଏକ ନମୂନା ଜାଳି ଦେଇଛନ୍ତି। ଖାଇବର ପଖତୁଙ୍ଖୱାରେ ସମର୍ଥକମାନେ ଟାୟାର ଜାଳି ଇଣ୍ଡସ ରାଜପଥ ଅବରୋଧ କରିଛନ୍ତି। ସମଗ୍ର ପାକିସ୍ତାନରେ ଧାରା ୧୪୪ ଜାରି ହୋଇଛି। ରାୱଲପିଣ୍ଡି ଏବଂ ଇସଲାମାବାଦରେ ଅନେକ ଅଂଶରେ ଇଣ୍ଟରନେଟ୍ ସେବା ବନ୍ଦ କରାଯାଇଛି। ଇମ୍ରାନଙ୍କୁ ରାୱଲପିଣ୍ଡିର ଏନଏବି ଅଫିସ ନିଆଯାଇଛି ବୋଲି କିଛି ଗଣମାଧ୍ୟମ ରିପୋର୍ଟରେ ଦାବି କରାଯାଉଛି। ଶତାଧିକ ପିଟିଆଇ ସମର୍ଥକମାନେ ଏନଏବି ଅଫିସ ବାହାରେ ରୁଣ୍ଡ ହୋଇଛନ୍ତି। ଅନେକ ଆନ୍ଦୋଳନକାରୀଙ୍କୁ ପୁଲିସ ଗିରଫ କରିଛି। ଆନ୍ଦୋଳନକାରୀଙ୍କ ସହ ସଂଘର୍ଷ ବେଳେ କିଛି ପୁଲିସ ଅଫିସର ମଧ୍ୟ ଆହତ ହୋଇଛନ୍ତି। ଲାନହୋରରେ କର୍ପସ କମାଣ୍ଡରଙ୍କ ବାସଭବନରେ ପିଟିଆଇ ସମର୍ଥକମାନେ ନିଆଁ ଲଗାଇ ଦେଇଛନ୍ତି। କ୍ବେଟାରେ ସମସ୍ତ ହସ୍ପିଟାଲରେ ଏମର୍ଜେନ୍ସି ଜାରି ହୋଇଛି। ଲାହୋରରେ ଏକାଧିକ ପୁଲିସ ଗାଡ଼ିରେ ନିଆଁ ଲଗାଇ ଦେଇଛନ୍ତି ପିଟିଆଇ ସମର୍ଥକ। ପାକିସ୍ତାନରେ ସମସ୍ତ ସ୍କୁଲ୍ ବୁଧବାରଠାରୁ ପରବର୍ତ୍ତୀ ନୋଟିସ ଜାରି ହେବା ପର୍ଯ୍ୟନ୍ତ ବନ୍ଦ ରହିବ।