ଭୁବନେଶ୍ୱର : ଆୟତ୍ତ ହେଲା ମଣିଷ ମରା ଷଣ୍ଢ । ବିଏମସି ର ସ୍ୱତନ୍ତ୍ର ଟିମ ଷଣ୍ଢକୁ କାବୁ କରିଛି । ସୋମବାର ଭୁବନେଶ୍ୱର ଉପକଣ୍ଠ ରକୋଟ ଗ୍ରାମରେ ପାଗଳ ଷଣ୍ଢର ଉତ୍ପାତ ଦେଖିବାକୁ ମିଳିଥିଲା । ଜଣେ ବୃଦ୍ଧାଙ୍କୁ ଆକ୍ରମଣ କରି କଚାଡି ଦେବାରୁ ତାଙ୍କର ମୃତ୍ୟୁ ଘଟିଥିଲା । ମୃତକ ହେଲେ ହେମଲତା ଦାସ । ଏହାପରେ ଷଣ୍ଢଟି ଅନେକ ଲୋକଙ୍କୁ ଆକ୍ରମଣ କରି ଆହତ କରିଥିଲା । ବୃଦ୍ଧାଙ୍କ ମୃତ୍ୟୁ ପରେ ସ୍ଥାନୀୟ ଅଞ୍ଚଳରେ ଅସନ୍ତୋଷ ଦେଖା ଦେଇଥିଲା । ମୃତଦେହ ରଖି ରାସ୍ତାରୋକ କରିଥିଲେ ଗ୍ରାମବାସୀ । ଏ ନେଇ ବାରମ୍ବାର ଗ୍ରାମବାସୀମାନେ ବିଏମସିକୁ ଜଣାଇଥିଲେ ମଧ୍ୟ କିଛି ସୁଫଳ ମିଳି ନଥିଲା । ଯାହାଫଳରେ ଆଜି ସ୍ଥାୟୀ ପ୍ରତିକାର ଦାବିରେ ସ୍ଥାନୀୟ ଲୋକେ ଇଞ୍ଜଣା ରୋକଟ ମଞ୍ଚେଶ୍ଵରକୁ ସଂଯୋଗ କରୁଥିବା ରାସ୍ତା ଅବରୋଧ କରିଥିଲେ ।
ଷଣ୍ଢକୁ କାବୁ ନ କରିବା ଯାଏ ରାସ୍ତାରୋକରୁ ହଟିବେ ନାହିଁ ବୋଲି ବିଏମ୍ସିକୁ ଚେତାବନୀ ଦେଇଥିଲେ । ସ୍ଥିତି ଅଣାୟତ୍ତ ହେବା ପୂର୍ବରୁ ପୋଲିସ ଘଟଣା ସ୍ଥଳରେ ପହଞ୍ଚି ଲୋକଙ୍କୁ ବୁଝାସୁଝା କରିଥିଲା । ବିଏମ୍ସି ମଧ୍ୟ ତୁରନ୍ତ ଷଣ୍ଢକୁ ଟ୍ରାଙ୍କୁଲାଇଜ କରିବାକୁ ପ୍ରତିଶ୍ରୁତି ଦେବା ପରେ ସ୍ଥିତି ଶାନ୍ତ ପଡିଥିଲା ।
ତେବେ ଆଶ୍ୱସ୍ତିକର ଖବର ହେଉଛି ଶେଷରେ କାବୁ ହୋଇଛି ମଣିଷ ମରା ଷଣ୍ଢ । ଫାଶ ପକାଇ ଷଣ୍ଢକୁ ଧରିଛନ୍ତି ଗୋ ସେବକ। ହେଲେ ଧରା ପଡ଼ିବା ପରେ ଷଣ୍ଢଟିର ମୃତ୍ୟୁ ହୋଇଥିବା ନେଇ ସୂଚନା ମିଳିଛି । ମୃତ ଷଣ୍ଢକୁ ଗାଁ ଲୋକେ ସମାଧି ଦେବେ ବୋଲି ସୂଚନା ମିଳିଛି ।
Comments are closed.