ଆଜି ପଶ୍ଚିମ ଓଡ଼ିଶାର ଗଣପର୍ବ ନୂଆଁଖାଇ

ଭୁବନେଶ୍ୱର : ଆଜି ପଶ୍ଚିମ ଓଡ଼ିଶାର ଗଣପର୍ବ ନୂଆଁଖାଇ । ଏହା ଏକ କୃଷିଭିତ୍ତିକ ପର୍ବ । ମା’ ମାଟି ଓ ଇଷ୍ଟ ଦେବୀଙ୍କୁ ପୂଜା କରିବାର ପର୍ବ ହେଉଛି ନୂଆଖାଇ । ଚାଷୀ ତାର ପ୍ରଥମ ଫସଲକୁ ଇଷ୍ଟ ଦେବୀଙ୍କ ପାଖରେ ଲାଗି କରିବା ପରେ ସହପରିବାରଙ୍କ ସହ ମିଶି ଏକାଠି ନୂଆ ଖାଇଥାନ୍ତି । ଏହା ହେଉଛି ନୂଆ ଖାଇ ପର୍ବର ସ୍ୱତନ୍ତ୍ର ପରମ୍ପରା । ବନ୍ଧୁ ବାନ୍ଧବ ସମସ୍ତେ ରାଗ ରୋଷ, ମାନ ଅଭିମାନ ଭୁଲି ପରିବାର ସାରା ଏକାଠି ବସି ନବାନ୍ନ ଭକ୍ଷଣ କରନ୍ତି । ଇଷ୍ଟଦେବୀଙ୍କୁ ନବାନ୍ନ ଅର୍ପଣ ପରେ ପୂରା ପରିବାର ଏକାଠି ବସି ନୂଆ ଖାଇବାର ପରମ୍ପରା ରହିଛି । ପୂର୍ବାହ୍ନ ୧୦ଟା ୩୩ ରୁ ୧୦ଟା ୫୫ ମଧ୍ୟମରେ ଅଧିଷ୍ଠାତ୍ରୀ ଦେବୀ ମା ସମଲେଶ୍ବରୀଙ୍କ ନିକଟରେ ଲାଗି ହେବ ନବାନ୍ନ ।

ଏହା ପରେ ମାଆଙ୍କ ସର୍ବସାଧାରଣ ଦର୍ଶନ ପାଇଁ ମନ୍ଦିର ଦ୍ବାର ଖୋଲାଯିବ । ମାଁ ସମଲେଶ୍ୱରୀଙ୍କ ପୀଠ ଟ୍ରଷ୍ଟ ବୋର୍ଡ଼ ପକ୍ଷରୁ ସମସ୍ତ ପ୍ରସ୍ତୁତି ସରିଛି । ମାଙ୍କ ପାଇଁ ନବାନ୍ନ ମୁଖ୍ୟ ପୂଜକଙ୍କ ସମେତ ଆଉ ଦୁଇ ପୂଜକଙ୍କ ଘରେ ପ୍ରସ୍ତୁତ ହେଉଛି । ନୂଆଁଖାଇ ପାଇଁ ପୂରା ପଶ୍ଚିମ ଓଡ଼ିଶା ଉତ୍ସବମୁଖର । ପାରମ୍ପରିକ ନୃତ୍ୟ ବାଦ୍ୟରେ ଦୁଲୁକିବ ଗାଁ ଦାଣ୍ଡ । ବିଭିନ୍ନ ସ୍ଥାନରେ ଭିନ୍ନ ଭିନ୍ନ ସାଂସ୍କୃତି କାର୍ଯ୍ୟକ୍ରମ ପରିବେଷଣ ହେବ ।

ପରମ୍ପରା ଅନୁସାରେ,ପଶ୍ଚିମ ଓଡ଼ିଶାର ଏହି ଗଣପର୍ବ ପାଇଁ ପାଞ୍ଜି ଦେଖି ଶୁଭଦିନକୁ ନିର୍ଦ୍ଧାରଣ କରିଥାନ୍ତି ପଣ୍ଡିତ । ଡେଙ୍ଗୁରା ପିଟି ଗ୍ରାମବାସୀଙ୍କୁ ନୂଆଖାଇର ଶୁଭ ମୁହୂର୍ତ୍ତ ଜଣାଇ ଦିଆଯାଏ । ସେବେଠାରୁ ଆରମ୍ଭ ହୋଇଯାଏ ପ୍ରସ୍ତୁତି । ଘର ଅଗଣା ଲିପା, ପୋଛା ହୋଇ ଆସବା ପତ୍ର ସଜାଡି ଦିଆଯାଏ । ନୂଆ ଧାନରୁ ଚୁଡା, ଖଇ ଓ ଚୁନା ପ୍ରସ୍ତୁତ କରିଥାନ୍ତି ଘରର ମହିଳା ମାନେ । ବିଭିନ୍ନ ଜାତିର ଲୋକେ ବିଭିନ୍ନ ପତ୍ରରେ ନୂଆ ଖାଉଥିବାରୁ ଜଙ୍ଗଲରୁ ପତ୍ର ତୋଳା ମଧ୍ୟ ଆରମ୍ଭ ହୋଇ ଖଲି ଦନା ତିଆରି କରାଯାଏ । ନୂଆଖାଇ ପୂର୍ବରୁ ପଶ୍ଚିମ ଓଡ଼ିଶାରେ ବସିଥାଏ ସ୍ୱତନ୍ତ୍ର ହାଟ । ଏଠାରେ ସମସ୍ତ ପ୍ରକାର ସାମଗ୍ରୀ ବିକ୍ରି କରାଯାଇଥାଏ । ସବୁ କିଛି ନୂଆ ଆବଶ୍ୟକ ହୋଇଥିବାରୁ ଏହି ବଜାରରେ ବେଶ ଭିଡ଼ ଜମିଥାଏ ।

ନୂଆଖାଇ ଦିନ ବିଭିନ୍ନ ପ୍ରକାର ସୁସ୍ୱାଦ ବ୍ୟଞ୍ଜନ ପ୍ରସ୍ତୁତ କରାଯାଏ । ସମସ୍ତଙ୍କ ଘରେ ଛଅ ତିଅଣ ନବଜା ଓ ପିଠା ପଣା ପ୍ରସ୍ତୁତ କରାଯାଇଥାଏ । ଘରର ମହିଳା ମାନେ ଏକାଠି ରୋଷେଇ କରିବା ଓ ଏକାଠି ବସି ଖାଇବା ହେଉଛି ନୂଆଖାଇର ଏକ ଅନ୍ୟନ ପରାମ୍ପରା । ଖିଆପିଆ ପରେ ଆରମ୍ଭ ହୋଇଥାଏ ଜୁହାର ଭେଟ୍‍ । ଘରର ଛୋଟ ମାନେ ବଡମାନଙ୍କୁ ମୁଣ୍ଡିଆ ମାରି ଆର୍ଶିବାଦ ଭିକ୍ଷା କରନ୍ତି ।