ତତ୍କାଳୀନ ମୟୂରଭଞ୍ଜ ରାଜ୍ୟର ପ୍ରଥମ ଶିକ୍ଷା ନିର୍ଦ୍ଦେଶକ ତଥା କବି ସଚ୍ଚିନ୍ଦ୍ର ଦାସ ଓ ମାତା କୁମୁଦିନୀ ଦାସଙ୍କର କୋଳ ମଣ୍ଡନ କରି ଶିବବ୍ରତ ବାଲେଶ୍ୱର ସହର ଅନ୍ତର୍ଗତ ସୁନହଟରେ ୧୯୩୦ ମସିହା ଅଗଷ୍ଟ ୨୬ରେ ଭୂମିଷ୍ଠ ହୋଇଥିଲେ । ସେ ଥିଲେ କାନ୍ତକବି ଲକ୍ଷ୍ମୀକାନ୍ତ ମହାପାତ୍ରଙ୍କର ଭଣଜା । ଛାତ୍ର ଜୀବନରୁ ମାମୁଙ୍କ ପ୍ରଭାବରେ ସେ ଗୀତ ଲେଖିବା ଆରମ୍ଭ କରିଥିଲେ । ସେ ରେଭେନ୍ସା କଲେଜରେ ପାଠ ପଢ଼ୁଥିବା ବେଳେ ବିଶିଷ୍ଟ କବି ଓ ଗୀତିକାର ଜୀବନାନନ୍ଦ ପାଣିଙ୍କ ସସ୍ପର୍ଶରେ ମଧ୍ୟ ଆସିଥିଲେ । ତାଙ୍କର ଆଉ ଜଣେ ମାମୁଁପୁଅ ଭାଇ ଡକଫର ପାର୍ଥସାରଥୀ ମହାପାତ୍ର ମଧ୍ୟ ଜଣେ ଜଣାଶୁଣା ଗୀତିକାର ଥିଲେ । ତାଙ୍କ ପ୍ରଭାବରେ ମଧ୍ୟ ଶିବବ୍ରତ ଗୀତ ରଚନା କରିଥିଲେ । ପ୍ରଥମେ ସେ ହାସ୍ୟରସାତ୍ମକ କବିତା ରଚନା କରୁଥିଲେ । ପରେ ଚଳଚ୍ଚିତ୍ରରେ ତାଙ୍କ ରଚିତ ଗୀତଗୁଡ଼ିକ ବେଶ୍ ଆଦ୍ରୁତ ହୋଇଥିଲା । ସେ ଜଣେ ପୋଲିସ୍ ଅଫିସର ଭାବେ ଗୁଳିଚାଳନା ପ୍ରତିଯୋଗିତାରେ ପ୍ରଥମ ହେବା ସହ ସୁନ୍ଦର ଭାବେ ଗୀତ ଲେଖି ଶ୍ରୋତାଙ୍କୁ ମୁଗ୍ଧ କରିପାରୁଥିଲେ । “ନଦୀର ନାମ ଅଳସ କନ୍ୟା’ ତାଙ୍କର ପ୍ରସିଦ୍ଧ ସଂଗୀତ ଯାହା କଣ୍ଠଶିଳ୍ପୀ ଚିତ୍ତ ଜେନା ଗାଇଥିଲେ । କଟକ ଆକାଶବାଣୀରେ ତାଙ୍କ ଗୀତସବୁକୁ କଣ୍ଠଶିଳ୍ପୀ ଅକ୍ଷୟ ମହାନ୍ତି, ପ୍ରଫୁଲ୍ଲ କର, ସିକନ୍ଦର ଆଲାମ ଓ ପ୍ରଣବ ପଟ୍ଟନାୟକ ସୁଲଳିତ କଣ୍ଠରେ ବୋଲି ଶ୍ରୋତାମାନଙ୍କୁ ମନ୍ତ୍ରମୁଗ୍ଧ କରିଥିଲେ । ତାଙ୍କ ପତ୍ନ ସୁବାସିନୀ ଦେବୀ, ପୁତ୍ର ବାବି, କନ୍ୟା ମାମି ଓ ଜାମାତା ଶିବନାରାୟଣ ପଟ୍ଟନାୟକ ତାଙ୍କ ସ୍ମୃତି ରକ୍ଷା ପାଇଁ ପ୍ରତିବର୍ଷ ଭୁବନେଶ୍ୱରରେ ସଂଗୀତ ସନ୍ଧ୍ୟା କରୁଥିବା ଜଣାଯାଏ । ୮ ସେପ୍ଟମ୍ବର ୧୯୮୮ରେ ତାଙ୍କର ଭଦ୍ରକ ଠାରେ ଦେହାନ୍ତ ହୋଇଥିଲା ।
