ନୂଆଦିଲ୍ଲୀ : ଭାରତୀୟ ବାୟୁସେନା ମୁଖ୍ୟ ଏପି ସିଂହ ଏକ ବଡ଼ ଖୁଲାସା କରି କହିଛନ୍ତି ଯେ ସଶସ୍ତ୍ର ବାହିନୀ ଅପରେସନ୍ ସିନ୍ଦୂର ସମୟରେ ପାଞ୍ଚଟି ପାକିସ୍ତାନୀ ଲଢ଼ୁଆ ବିମାନ ଏବଂ ଆକାଶ ମାର୍ଗରେ ନିରୀକ୍ଷଣ ପାଇଁ ଡିଜାଇନ୍ କରାଯାଇଥିବା ଅନ୍ୟ ଏକ ବିମାନକୁ ଧ୍ୱଂସ କରିଦେଇଛି। ବେଙ୍ଗାଲୁରୁରେ ଏୟାର ଚିଫ୍ ମାର୍ଶାଲ୍ ଏକ କାର୍ଯ୍ୟକ୍ରମରେ ଯୋଗ ଦେବା ଅବସରରେ ଏହି ଟିପ୍ପଣୀ ଦେଇଛନ୍ତି। ଆଇଏଏଫ୍ ମୁଖ୍ୟ ଆହୁରି ପ୍ରକାଶ କରିଛନ୍ତି ଯେ ମେ ୧୦ ତାରିଖରେ ଭାରତ ପାକିସ୍ତାନର ସାମରିକ ସ୍ଥାନଗୁଡ଼ିକୁ ଟାର୍ଗେଟ କରିବା ସମୟରେ ଜାକୋବାବାଦ ଏୟାରବେସରେ ପାର୍କିଂ ହୋଇଥିବା କିଛି ଆମେରିକା ନିର୍ମିତ ଏଫ୍-୧୬ ଜେଟ୍ କ୍ଷତିଗ୍ରସ୍ତ ହୋଇଥିଲା । ଦୁଇଟି କମାଣ୍ଡ ଏବଂ ନିୟନ୍ତ୍ରଣ କେନ୍ଦ୍ର ମଧ୍ୟ କ୍ଷତିଗ୍ରସ୍ତ ହୋଇଥିଲା। ଉଲ୍ଲେଖଯୋଗ୍ୟ ଯେ ପହଲଗାମ ଆତଙ୍କବାଦୀ ଆକ୍ରମଣର ଜବାବ ସ୍ୱରୂପ ଆରମ୍ଭ ହୋଇଥିବା ଏହି ଅପରେସନ୍ ସମୟରେ ପାକିସ୍ତାନୀ ବାୟୁସେନାର କ୍ଷତିର ପରିମାଣ ବିଷୟରେ ସଶସ୍ତ୍ର ବାହିନୀ ଦ୍ୱାରା ଏହା ପ୍ରଥମ ସାର୍ବଜନୀନ ପ୍ରକାଶ । ବାୟୁସେନା ମୁଖ୍ୟ ମାର୍ଶାଲ ମଧ୍ୟ ପାକିସ୍ତାନରେ ଥିବା ବାୟୁସେନା ଘାଟିଗୁଡ଼ିକୁ ଗୁରୁତର କ୍ଷତି ହୋଇଥିବା ନିଶ୍ଚିତ କରିଛନ୍ତି, ଯେଉଁଥିରେ ଜାକୋବାବାଦ ଏୟାରଫିଲ୍ଡ ମଧ୍ୟ ଅନ୍ତର୍ଭୁକ୍ତ, ଯେଉଁଠାରେ ଏଫ୍-୧୬ ଜେଟ୍ ରହିଥିଲା।
