ଭୁବନେଶ୍ୱର : ରାଜ୍ୟରୁ ଦକ୍ଷିଣ-ପଶ୍ଚିମ ମୌସୁମୀ ବାୟୁ ବିଦାୟ ନେବା ପାଇଁ ପାଗ ଅନୁକୂଳ ରହିଛି । ଭାରତୀୟ ପାଣିପାଗ ବିଭାଗ (IMD) ଅନୁଯାୟୀ ଅକ୍ଟୋବର ଦ୍ୱିତୀୟ ସପ୍ତାହ ସୁଦ୍ଧା ଓଡ଼ିଶାରୁ ଏହା ସମ୍ପୂର୍ଣ୍ଣ ବିଦାୟ ନେଇପାରେ । ବର୍ତ୍ତମାନ ରାଜ୍ୟରୁ କେତେକ ସ୍ଥାନରୁ ମୌସୁମୀ ସମ୍ପୂର୍ଣ୍ଣ ବିଦାୟ ନେଇ ସାରିଲାଣି । ବିଶେଷକରି ସୁନ୍ଦରଗଡ଼ ଏବଂ ବରଗଡ଼ ଜିଲ୍ଲାରୁ ମୌସୁମୀ ବିଦାୟ ନେଇ ସାରିଥିବାବେଳେ ଆସନ୍ତା ୩-୪ ଦିନ ମଧ୍ୟରେ ସମ୍ପୂର୍ଣ୍ଣ ଭାବରେ ମୌସୁମୀ ବିଦ୍ୟା ନେବାର ସମ୍ଭାବନା ରହିଛି । ମୌସୁମୀ ଅପସାରଣ ଯୋଗୁଁ ରାଜ୍ୟରେ ଧୀରେ ଧୀରେ ବର୍ଷାର ପରିମାଣ କମିବା ସହ ଶୁଖିଲା ପାଗ ଅନୁଭୂତ ହେବ।

ଅନ୍ୟପଟେ, ମୌସୁମୀ ସମ୍ପୂର୍ଣ୍ଣ ବିଦାୟ ନେବା ପୂର୍ବରୁ ୧୩-୧୪ ତାରିଖ ଆଡକୁ ବଙ୍ଗୋପସାଗରରେ ସୃଷ୍ଟି ହେବାକୁ ଯାଉଛି ପୁଣି ଏକ ଲଘୁଚାପ । ଏହା ପ୍ରଭାବରେ ରାଜ୍ୟରେ କେତେକ ଜିଲ୍ଲାରେ ହଳୁକାରୁ ମଧ୍ୟମ ଧରଣର ବର୍ଷା ହେବାର ସମ୍ଭାବନା ରହିଛି । 

ବର୍ତ୍ତମାନ କିଛି ସ୍ଥାନରେ ଦିନର ତାପମାତ୍ରା ସାମାନ୍ୟ ଅଧିକ ରହୁଥିବା ବେଳେ ମୌସୁମୀ ଫେରିଯିବା ପରେ ରାତିର ତାପମାତ୍ରା ଧୀରେ ଧୀରେ ହ୍ରାସ ପାଇ ଶୀତର ଆଗମନ ପ୍ରକ୍ରିୟା ଆରମ୍ଭ ହେବ । 

କେନ୍ଦ୍ରାପଡା : କେନ୍ଦ୍ରାପଡା ଜିଲ୍ଲା ଆଳି ବ୍ଲକ ମାଲପାଟଣା ଗାଁ ରେ ଚାଞ୍ଚଲ୍ୟ । ନାବାଳକ ପୁଅ ଝିଅ ସହ ମିଶି ମଦ୍ୟପ ସ୍ୱାମୀକୁ ହତ୍ୟା କଲା ସ୍ତ୍ରୀ । ଗତକାଲି ରାତିରେ ନିଶାସକ୍ତ ଅବସ୍ଥାରେ ସ୍ୱାମୀ ଶୋଇଥିବାବେଳେ ତଣ୍ଟି ଉପରେ ଚଢି ହତ୍ୟା କରିଥିବା ଅଭିଯୋଗ ହୋଇଛି । ମୃତକ ହେଉଛନ୍ତି ନିରଞ୍ଜନ ସାହୁ। ଗତକାଲି ବିଳମ୍ବିତ ରାତିରେ ନିରଞ୍ଜନ ମଦ ପିଇ ଘରକୁ ଫେରିଥିଲେ । ଘରେ ପହଞ୍ଚି ସ୍ତ୍ରୀ ଓ ପୁଅ,ଝିଅଙ୍କ ସହ ଝଗଡ଼ା କରିଥିଲେ । ଏହାପରେ ନିରଞ୍ଜନ ଶୋଇଥିବା ଅବସ୍ଥାରେ ତାଙ୍କ ସ୍ତ୍ରୀ ମନୋରମା ତଣ୍ଟି ଉପରେ ଛିଡ଼ା ହୋଇ ତାଙ୍କୁ ହତ୍ୟାକରି ଥିଲେ । ଏହି ମାମଲାରେ ମନୋରମାଙ୍କ ସହ ତାଙ୍କ ପୁଅ ଓ ନାବାଳିକା ଝିଅ ସାମିଲ ଥିବା ନିଜେ ମନୋରମା ସ୍ୱୀକାର କରିଛନ୍ତି । ଏନେଇ ଥାନାରେ ଅଭିଯୋଗ ପରେ ଘରୁ ୩ଜଣଙ୍କୁ ଉଠାଇ ନେଇଛି ଆଳି ପୋଲିସ। ତେବେ ସ୍ୱମୀ ଜଣକ ନିଶାସକ୍ତ ଅବସ୍ଥାରେ ପ୍ରତିଦିନ ଘରେ ଗଣ୍ଡଗୋଳ କରୁଥିବାରୁ ,ଏଥିରେ ଅତିଷ୍ଠ ହୋଇ ଗତକାଲି ଏପରି ଜଘନ୍ୟ କାଣ୍ଡ ଘଟାଇଛନ୍ତି ସ୍ତ୍ରୀ । ଏନେଇ ଅଧିକ ତଦନ୍ତ ଜାରି ରହିଛି । 

ଭୁବନେଶ୍ୱର : ପୂଜା କମିଟି ଗୁଡ଼ିକ ପାଇଁ ବଡ଼ ଭେଟି ଘୋଷଣା କରିଛନ୍ତି ମୁଖ୍ୟମନ୍ତ୍ରୀ । ଭୁବନେଶ୍ୱର ମହାନଗର ନିଗମ (BMC) ଅଞ୍ଚଳରେ ପୂଜା ମଣ୍ଡପ ଓ ସାଂସ୍କୃତିକ କାର୍ଯ୍ୟକ୍ରମ ଆୟୋଜନ ପାଇଁ ଦେବାକୁ ପଡ଼ୁଥିବା ଗ୍ରାଉଣ୍ଡ ରେଣ୍ଟ (ପଡ଼ିଆ ଭଡ଼ା)କୁ ସମ୍ପୂର୍ଣ୍ଣ ଛାଡ଼ କରିବାକୁ ନିର୍ଦେଶ ଦେଇଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ  ।

ସରକାରଙ୍କ ଏହି ନିଷ୍ପତ୍ତି ଫଳରେ ରାଜଧାନୀରେ ଆୟୋଜିତ ହେବାକୁ ଥିବା ଦୁର୍ଗାପୂଜା, ଲକ୍ଷ୍ମୀପୂଜା ଏବଂ କାଳୀପୂଜା ପାଇଁ ପୂଜା କମିଟିଗୁଡ଼ିକୁ ଆଉ ଗ୍ରାଉଣ୍ଡ ରେଣ୍ଟ ଦେବାକୁ ପଡ଼ିବ ନାହିଁ । ଏହି ଗ୍ରାଉଣ୍ଡ ରେଣ୍ଟ ଛାଡ଼ ଅବଧି ଆସନ୍ତା ଅକ୍ଟୋବର ୧୭ ତାରିଖରୁ ନଭେମ୍ବର ୧୮ ତାରିଖ ପର୍ଯ୍ୟନ୍ତ ବଳବତ୍ତର ରହିବ। ସାଧାରଣତଃ ପୂଜା କମିଟିଗୁଡ଼ିକୁ ମଣ୍ଡପ ଓ ସାଂସ୍କୃତିକ କାର୍ଯ୍ୟକ୍ରମ ଆୟୋଜନ ପାଇଁ ୧୦,୦୦୦ ଟଙ୍କାରୁ ୫୦,୦୦୦ ଟଙ୍କା ପର୍ଯ୍ୟନ୍ତ ଗ୍ରାଉଣ୍ଡ ରେଣ୍ଟ ଦେବାକୁ ପଡ଼ିଥାଏ, ଯାହା ଏବେ ଦେବାକୁ ପଡ଼ିବ ନାହିଁ ।

ପାର୍ବଣ ସମୟରେ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ଓ ପୂଜା ପାଳନକୁ ଅଧିକ ଧୂମ୍‌ଧାମ୍‌ରେ ପାଳନ କରିବା ପାଇଁ  ମୁଖ୍ୟମନ୍ତ୍ରୀ ମୋହନ ଚରଣ ମାଝୀଙ୍କ ଏହି ପ୍ରଶଂସନୀୟ ପଦକ୍ଷେପକୁ ବିଭିନ୍ନ ପୂଜା କମିଟି ପକ୍ଷରୁ ସାଧୁବାଦ ଜଣାଯାଇଛି ।

ଯାଜପୁର : ଯାଜପୁର ରୋଡ୍ ସ୍ଥିତ ବ୍ୟାସନଗର ସ୍ୱୟଂଶାସିତ ମହାବିଦ୍ୟାଳୟ ପରିସରରେ ଛାତ୍ର ସଂସଦ ନିର୍ବାଚନ ପୂର୍ବରୁ ବୋମାମାଡ଼ ହେବା ଫଳରେ ପ୍ରାକ ନିର୍ବାଚନୀ ହିଂସା ଦେଖାଦେଇଛି। ଛାତ୍ର ସଂସଦ ନିର୍ବାଚନ ପାଇଁ ବିଜ୍ଞପ୍ତି ପ୍ରକାଶ ପାଇବାର ମାତ୍ର ଗୋଟିଏ ଦିନ ପରେ, ବୁଧବାର ବିଳମ୍ବିତ ରାତିରେ ଦୁର୍ବୃତ୍ତମାନେ କଲେଜ ପରିସରକୁ ଆସି ବୋମାମାଡ଼ କରିଥିଲେ। କଲେଜ କାଉନସିଲ ନିର୍ବାଚନକୁ ନେଇ ପରିସ୍ଥିତି ଅଶାନ୍ତ ହୋଇପଡ଼ିଛି । କ୍ୟାମ୍ପସରେ ପ୍ରାକ୍ ନିର୍ବାଚନୀ ହିଂସାକାଣ୍ଡ ଘଟି ଏକାଧିକ ସ୍ଥାନରେ ଦୁର୍ବୃତ୍ତମାନେ ବୋମା ମାଡ଼ କରିଛନ୍ତି । ବିଶେଷକରି ମହାବିଦ୍ୟାଳୟର ଇନ୍ଦ୍ରଧନୁ ବଏଜ୍ ହଷ୍ଟେଲ୍ ଏବଂ କଲେଜ ପ୍ରିନ୍ସପାଲଙ୍କ ପ୍ରକୋଷ୍ଠକୁ ଟାର୍ଗେଟ୍ କରି ବୋମାମାଡ଼ କରାଯାଇଛି ।ଏହି ଘଟଣା ପରେ ସମଗ୍ର ଅଞ୍ଚଳରେ ଭୟର ବାତାବରଣ ଖେଳିଯାଇଛି । 

ବିସ୍ଫୋରଣ ଶବ୍ଦରେ କଲେଜ କ୍ୟାମ୍ପସ ଥରି ଉଠିଥିଲା । ଘଟଣାସ୍ଥଳର କଲେଜ ଗେଷ୍ଟହାଉସ ଏବଂ ପ୍ରିନ୍ସିପାଲଙ୍କ ବାସଭବନ ଫାଟକ ନିକଟରୁ କିଛି ଅଫୁଟା ବୋମା ମଧ୍ୟ ଜବତ କରାଯାଇଛି । 

ଏଭଳି ସମ୍ବେଦନଶୀଳ ଘଟଣା ପରେ ମହାବିଦ୍ୟାଳୟର କର୍ତ୍ତୃପକ୍ଷ ତତ୍ପରତା ପ୍ରକାଶ କରି ଯାଜପୁର ରୋଡ଼ ଆଦର୍ଶ ଥାନାରେ ଏକ ଲିଖିତ ଏତଲା ଦେଇଛନ୍ତି । ଘଟଣା ସମ୍ପର୍କରେ ଖବର ପାଇ ଯାଜପୁର ରୋଡ୍ ଥାନା ପୋଲିସ ତୁରନ୍ତ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି । ଘଟଣାର ଗୁରୁତ୍ୱକୁ ଦୃଷ୍ଟିରେ ରଖି କଲେଜ ପରିସରରେ ସନ୍ଧାନୀ କୁକୁର ଏବଂ ବୋମା ନିଷ୍କ୍ରିୟକାରୀ ଦଳ ଦ୍ୱାରା ଜୋରଦାର ଯାଞ୍ଚ କରାଯାଉଛି। ପୋଲିସ କଲେଜ ପରିସରରୁ କିଛି ଜୀବନ୍ତ ବୋମା ମଧ୍ୟ ଜବତ କରିଛି । 

ସେପଟେ, ମହାବିଦ୍ୟାଳୟର ଅଧ୍ୟକ୍ଷ ଅକ୍ଷୟ ତ୍ରିପାଠୀ ଛାତ୍ରଛାତ୍ରୀ ଓ କର୍ମଚାରୀଙ୍କ ସୁରକ୍ଷାକୁ ନେଇ ଚିନ୍ତା ପ୍ରକଟ କରିବା ସହ ଏହି ଘଟଣାରେ ସମ୍ପୃକ୍ତ ଥିବା ଦୁର୍ବୃତ୍ତମାନଙ୍କୁ ତୁରନ୍ତ ଗିରଫ କରିବା ପାଇଁ ପୋଲିସ ପ୍ରଶାସନ ନିକଟରେ ଦାବି କରିଛନ୍ତି।

ଭୁବନେଶ୍ୱର : ଇଣ୍ଡିଆ ମେଣ୍ଟ ପକ୍ଷରୁ ଓଡିଶା ବନ୍ଦ ଡାକରା ଦିଆଯାଇଥିବା ସତ୍ତ୍ୱେ D.El.Ed. (ଡିପ୍ଲୋମା ଇନ୍ ଏଲିମେଣ୍ଟାରୀ ଏଜୁକେଶନ) ପରୀକ୍ଷା ପୂର୍ବ ନିର୍ଦ୍ଧାରିତ ସୂଚୀ ଅନୁଯାୟୀ ଜାରି ରହିବ। ମାଧ୍ୟମିକ ଶିକ୍ଷା ପରିଷଦ (BSE), ଓଡ଼ିଶା ଏହି ସୂଚନା ସ୍ପଷ୍ଟ କରିବା ସହ ପରୀକ୍ଷା ବାତିଲ କିମ୍ବା ଘୁଞ୍ଚିବା ନେଇ ହେଉଥିବା ଗୁଜବ ଉପରେ ବିରାମ ଲଗାଇଛି । ଧାର୍ଯ୍ୟ ସୂଚୀ ଅନୁସାରେ ପରୀକ୍ଷା ସ୍ୱାଭାବିକ ଭାବେ ଅନୁଷ୍ଠିତ ହେବ ବୋଲି ମାଧ୍ୟମିକ ଶିକ୍ଷା ପରିଷଦ ପକ୍ଷରୁ ସ୍ପଷ୍ଟ କରାଯାଇଛି । 

ରାଜ୍ୟର ୩୦ଟି ଯାକ ଜିଲ୍ଲାର ୬୪ ଟି କେନ୍ଦ୍ରରେ ୧୨ ହଜାର ୧୨୫ ଜଣ ପରୀକ୍ଷାର୍ଥୀ ଏହି ପରୀକ୍ଷା ଦେଉଛନ୍ତି । ମାଧ୍ୟମିକ ଶିକ୍ଷା ପରିଷଦର ଧାର୍ଯ୍ୟ କାର୍ଯ୍ୟସୂଚୀ ଅନୁଯାୟୀ ଡିପ୍ଲୋମା ଇନ ଏଲିମେଣ୍ଟାରୀ ଏଜୁକେସନ ପରୀକ୍ଷା ଅକ୍ଟୋବର ୩ରୁ ଅକ୍ଟୋବର ୧୬ ପର୍ଯ୍ୟନ୍ତ ଚାଲିବ ।

ଆଜି FC-୧ (C/E) ପେପର୍ ପରୀକ୍ଷା ହେବ । ପରୀକ୍ଷା ସକାଳ ୯ଟାରୁ ଦିନ ୧୨ଟା ପର୍ଯ୍ୟନ୍ତ ଗୋଟିଏ ସିଟିଂରେ ଅନୁଷ୍ଠିତ ହେବ । ବନ୍ଦ ପାଳନ ଯୋଗୁଁ ପରୀକ୍ଷାର୍ଥୀମାନେ ଯାତାୟାତରେ ସମ୍ଭାବ୍ୟ ସମସ୍ୟାକୁ ଦୃଷ୍ଟିରେ ରଖି ସକାଳ ୮ଟା ସୁଦ୍ଧା ପରୀକ୍ଷା କେନ୍ଦ୍ରରେ ପହଞ୍ଚିବାକୁ ମାଧ୍ୟମିକ ଶିକ୍ଷା ପରିଷଦ ପରାମର୍ଶ ଦେଇଛି। ବନ୍ଦ ଯୋଗୁଁ ପରୀକ୍ଷା ସୂଚୀରେ କୌଣସି ପରିବର୍ତ୍ତନ ହୋଇନଥିବାରୁ ପରୀକ୍ଷାର୍ଥୀମାନେ ଧାର୍ଯ୍ୟ ସମୟରେ କେନ୍ଦ୍ରରେ ପହଞ୍ଚି ପରୀକ୍ଷା ଦେବାକୁ ବୋର୍ଡ ସଭାପତି ଶ୍ରୀକାନ୍ତ ତରାଇ କହିଛନ୍ତି ।

କଟକ: ଏସସିବି ମେଡିକାଲରେ ରୋଗୀଙ୍କୁ ପିଟିପିଟି ହତ୍ୟା । ଆସିଲା ମୃତକଙ୍କ ଶବ ବ୍ୟବଚ୍ଛେଦ ରିପୋର୍ଟ । ମାନସିକ ରୋଗ ବିଭାଗରେ ଚିକିତ୍ସାଧିନ ଥିବା ଯାଜପୁର ଅଞ୍ଚଳର ଶ୍ରୀକାନ୍ତ ଦାସଙ୍କ ଶବ ବ୍ୟବଚ୍ଛେଦ ରିପୋର୍ଟ ବୁଧବାର ଆସିଛି। ଅତ୍ୟଧିକ ମାଡ଼ ମରାଯାଇଥିବାରୁ ଶ୍ରୀକାନ୍ତଙ୍କ ମୃତ୍ୟୁ ଘଟିଥିବା ରିପୋର୍ଟରେ ଉଲ୍ଲେଖ ରହିଛି। ଏହି ତଥ୍ୟ ପାଇବା ପରେ ପୁଲିସ ତଦନ୍ତକୁ ତ୍ୱରାନ୍ୱିତ କରିଛି। ହସ୍ପିଟାଲ କର୍ମଚାରୀ ୱାର୍ଡ ଆଟେଣ୍ଡାଣ୍ଟ ଏବଂ କିଛି ସୁରକ୍ଷା କର୍ମୀ ସଂଘବଦ୍ଧ ଭାବେ ମାଡ଼ ମାରି ଅତି ନିର୍ମମ ଭାବେ ହତ୍ୟା କରିଥିବା ନେଇ ମଙ୍ଗଳାବାଗ ଥାନାରେ ଏତଲା ହୋଇଥିଲା । ପୋଷ୍ଟମର୍ଟମ୍ ରିପୋର୍ଟରେ ମୃତକଙ୍କ ଶରୀରରେ ଏକାଧିକ ଗଭୀର କ୍ଷତ ଓ ମାଡ଼ର ଦାଗ ଚିହ୍ନଟ ହୋଇଥିବାବେଳେ ପୋଲିସ ସିସିଟିଭି ଫୁଟେଜ୍ ଆଧାରରେ ତିନିଜଣ ଅଭିଯୁକ୍ତଙ୍କୁ ଗିରଫ କରିଛି।

ସୂଚନାଯୋଗ୍ୟ, ଯାଜପୁର ରୋଡ ଅଞ୍ଚଳର ଶ୍ରୀକାନ୍ତ ଦାସ ମାନସିକ ରୋଗରେ ପୀଡ଼ିତ ଥିଲେ । ଗତ ୨୮ରେ ତାଙ୍କୁ ଏସସିବି ମେଡିକାଲର ମାନସିକ ରୋଗ ଚିକିତ୍ସା ବିଭାଗରେ ଭର୍ତ୍ତି କରାଯାଇଥିଲା। ୨୯ ତାରିଖ ରାତିରେ ତାଙ୍କର ମୃତ୍ୟୁ ଘଟିଥିଲା। ତାଙ୍କ ଶରୀରରେ ମାଡ଼ ଦାଗ ଦେଖି ପରିବାର ଲୋକ ହତ୍ୟା ଅଭିଯୋଗ ଆଣିଥିଲେ। ତେବେ ଶବ ବ୍ୟବଚ୍ଛେଦ ରିପୋର୍ଟରେ ଶ୍ରୀକାନ୍ତଙ୍କର ହୃଦରୋଗ ଥିବା କଥା ମଧ୍ୟ ସ୍ପଷ୍ଟ ହୋଇଥିବାବେଳେ ବର୍ତ୍ତମାନ ସୁଦ୍ଧା ତାଙ୍କର ଭିସେରା ରିପୋର୍ଟ ମିଳିପାରି ନାହିଁ  ।

ଭୁବନେଶ୍ୱର : କଂଗ୍ରେସ ନେତୃତ୍ବାଧୀନ ଇଣ୍ଡିଆ ମେଣ୍ଟ ପକ୍ଷରୁ ଆଜି ୧୨ଘଣ୍ଟିଆ ଓଡିଶା ବନ୍ଦ । ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାରଙ୍କ ଇସ୍ତଫା, ଏମଏମଡିଆର ବିଲ୍ ପ୍ରତ୍ୟାହାର ଓ ପାଠ୍ୟପୁସ୍ତକ ତ୍ରୁଟି ପ୍ରସଙ୍ଗରେ ରାଜ୍ୟ ଗଣଶିକ୍ଷା ମନ୍ତ୍ରୀଙ୍କ ଇସ୍ତଫା ଦାବିରେ ରାଜ୍ୟ କଂଗ୍ରେସ ଓ ବାମ ଦଳ ପକ୍ଷରୁ ଅକ୍ଟାବର ୮ ତାରିଖ ସକାଳ ୬ରୁ ସନ୍ଧ୍ୟା ୬ଯାଏଁ ବନ୍ଦ ଡାକରା ଦିଆଯାଇଛି । ଫଳରେ ସାରା ରାଜ୍ୟରେ ଜନଜୀବନ ଗମ୍ଭୀର ଭାବେ ପ୍ରଭାବିତ ହୋଇଛି । ବନ୍ଦ ପାଳନରେ ସିପିଆଇ, ସିପିଆଇ (ଏମ୍), ସିପିଆଇ (ଏମ୍ଏଲ), ଏନସିପି, ଫରୱାର୍ଡ ବ୍ଳକ, ସମାଜବାଦୀ ପାର୍ଟି, ଆରଜେଡି, ଜେଏମଏମ୍ ସାମିଲ ହେବ । ଏ ନେଇ ବୁଧବାର ଭୁବନେଶ୍ୱରରେ ଏକ ପଦଯାତ୍ରା ଓ ବାଇକ୍ ରାଲି ହୋଇଥିଲା ।

୧୨ ଘଣ୍ଟିଆ ଓଡ଼ିଶା ବନ୍ଦ ଡାକରାରେ ସାଧାରଣ ଜନତା ହନ୍ତସନ୍ତ। ରାଜ୍ୟର ବିଭିନ୍ନ ସ୍ଥାନରେ ଦେଖାଯାଇଛି ବନ୍ଦର ପ୍ରଭାବ। ଅଖ ଚକ ବନ୍ଦ ସହ କେବଳ ଜରୁରୀ ସେବାକୁ ଛାଡି ଅନ୍ୟାନ୍ୟ ଗାଡିମୋଟର ଚଳାଚଳ ବନ୍ଦ ରହିଛି। ଭୁବନେଶ୍ବର ବରମୁଣ୍ଡା ବସ୍‌ଷ୍ଟାଣ୍ଡରୁ ଗଡ଼ୁନି ବସ୍‌। ଗନ୍ତବ୍ୟ ସ୍ଥଳକୁ ଯିବା ପାଇଁ ଅପେକ୍ଷାରତ ଯାତ୍ରୀ ହନ୍ତସନ୍ତ ହୋଇଛନ୍ତି।  

ଅନ୍ୟପଟେ ବନ୍ଦ ପାଳନରୁ ଜରୁରୀକାଳୀନ ସେବାକୁ ବାଦ ଦିଆଯାଇଛି । ହସ୍ପିଟାଲ, ଆମ୍ବୁଲାନ୍ସ, ଦମକଳ ସେବା, ମେଡିସିନ୍ ଦୋକାନ ସମେତ ଅନ୍ୟାନ୍ୟ ଅତ୍ୟାବଶ୍ୟକ ଓ ଜରୁରୀ ସେବା ଜାରି ରହିବ। 

ଗୁରୁବାର ରହିବ ଅଟୋ ଚଳାଚଳ। ରାଜଧାନୀ ଭୁବନେଶ୍ଵର ସମେତ ସାରା ରାଜ୍ୟରେ ଅଟୋ ଚଳାଚଳ ବନ୍ଦ ରହିବ ବୋଲି ସୂଚନା ଦେଇଛନ୍ତି ନିଖିଳ ଓଡ଼ିଶା ଅଟୋ ଟାକ୍ସି ଚାଳକ ମହାସଂଘ । ମାଷ୍ଟର କ୍ୟାଣ୍ଟିନ୍ ଠାରେ ମଧ୍ୟ ଓଡିଶା ବନ୍ଦର ପ୍ରଭାବରେ ବାଇକ ରାଲି, ଆନ୍ଦୋଳନ ଓ ରାସ୍ତାରୋକ କରାଯାଇଛି । ଜାତୀୟ ରାଜପଥ ଅବରୋଧ କରିଛି କଂଗ୍ରେସ । ଓଡ଼ିଶା ବନ୍ଦ ପାଇଁ ୟୁନିଟ୍ ୨ ମାର୍କେଟ ବିଲଡିଂ ଦୋକାନ ବଜାର ବନ୍ଦ ରହିଛି। ଓଡ଼ିଶା ବନ୍ଦ ଡାକରାରେ କଳ୍ପନା ଛକ ଓ ଜନପଥରେ ଆନ୍ଦୋଳନ କର୍ମୀମାନେ ବିକ୍ଷୋଭ ସହ ରାସ୍ତାରୋକ କରିଛନ୍ତି । ଚକୋଲେଟ୍‌ ଦେଇ ଓଡ଼ିଶା ବନ୍ଦକୁ ସମର୍ଥନ କରିବା ପାଇଁ ନିବେଦନ ମଧ୍ୟ ଅନେକ ସ୍ଥାନରେ କରାଯାଇଛି । ବିଭିନ୍ନ ସ୍ଥାନରେ କଂଗ୍ରେସ କର୍ମୀଙ୍କ ପିକେଟିଂ କରୁଛନ୍ତି । କଂଗ୍ରେସ କର୍ମୀଙ୍କ ପକ୍ଷରୁ ପିକେଟିଂ, ଟାୟାର ଜାଳି ଜାତୀୟ ରାଜପଥ ଅବରୋଧ କରାଯାଇଛି । ରାଜଧାନୀ ଭୁବନେଶ୍ୱର ସମେତ ଉତ୍ତରରୁ ଦକ୍ଷିଣ  ସବୁଠି ଦେଖିବାକୁ ମିଳିଛି ବନ୍ଦ ର ପ୍ରଭାବ । ତେବେ କେତେକ ସ୍ଥାନରେ ବନ୍ଦ ରେ ସାମିଲ ଥିବା କର୍ମୀମାନେ ଟାୟାର ଜାଳି ହିଂସାତ୍ମକ ଆଚରଣ କରୁଥିବା ଦେଖାଯାଇଛି । ଏପରିକି ଭୁବନେଶ୍ୱରରେ ଆମ ବସ ରୁ ଯାତ୍ରୀଙ୍କୁ ଓହ୍ଲାଇଦେବା ସହ ବସକୁ ଭଙ୍ଗାରୁଜା କରିଛନ୍ତି ଆନ୍ଦୋଳନ କାରୀ । 

ଏପଟେ ବନ୍ଦ ଯୋଗୁଁ ସ୍କୁଲ ଯିବାକୁ ମଧ୍ୟ ଲୋକଙ୍କୁ ଅସୁବିଧାର ସମ୍ମୁଖୀନ ହେବାକୁ ପଡ଼ିଛି । ବନ୍ଦ ଯୋଗୁଁ ଜଣେ ପାଚିକାଙ୍କୁ ଚାଲି ଚାଲି ସ୍କୁଲ ଯିବାକୁ ପଡ଼ିଛି । ସେ କହିଛନ୍ତି, ସକାଳୁ ବସ୍ ଯୋଗେ ସ୍କୁଲ ଯିବା ପାଇଁ ବାହାରିଥିଲେ। ବନ୍ଦକୁ ଦୃଷ୍ଟିରେ ରଖି ସ୍କୁଲ କର୍ତ୍ତୃପକ୍ଷ ତାଙ୍କୁ ଆଗୁଆ ସ୍କୁଲରେ ପହଞ୍ଚିବାକୁ କହିଥିଲେ । ହେଲେ ରାସ୍ତାରେ ବସ୍ ଆଉ ଆଗକୁ ନଯିବାରୁ ବାଧ୍ୟ ହୋଇ ବସ୍‌ରୁ ଓହ୍ଲାଇ ଚାଲି ଚାଲି ସ୍କୁଲ ଯାଇଥିବା ସେ କହିଛନ୍ତି । ଏଭଳି ଭାବେ ବନ୍ଦର ପ୍ରଭାବରେ ରାଜ୍ୟର ବିଭିନ୍ନ ସ୍ଥାନରେ ଯାତାୟାତ ବ୍ୟବସ୍ଥା ପ୍ରଭାବିତ ହୋଇଥିବା ବେଳେ ସାଧାରଣ ଲୋକଙ୍କ ଦୈନନ୍ଦିନ ଜୀବନ ମଧ୍ୟ ବାଧାପ୍ରାପ୍ତ ହୋଇଛି ।

ମୁମ୍ବାଇ : ବଲିଉଡ ରେ ଶୋକ ର ଛାୟା । ପ୍ରତିଷ୍ଠିତ ଅଭିନେତା ନାନା ପାଟକରଙ୍କ ପରଲୋକ । ଗତ ବିଳମ୍ବିତ ରାତିରେ ଗୋଆ ର ଦୋନା ପାଉଲାସ୍ଥିତ ନିଜ ବାସଭବନରେ ହୃଦଘାତରେ ତାଙ୍କର ମୃତ୍ୟୁ ଘଟିଥିଲା । ମୄତ୍ୟୁ ବେଳକୁ ତାଙ୍କୁ ୭୫ବର୍ଷ ହୋଇଥିଲା । 

ନାନା ପାଟକର ଗୋଆ ସ୍ଥିତ ନିଜ ବାସ ଭବନରେ ଏକୁଟିଆ ରହୁଥିଲେ । ବହୁ ପୂର୍ବରୁ ତାଙ୍କ ପତ୍ନୀ ନୀଳକଣ୍ଠି ପାଟକରଙ୍କର ପରଲୋକ ଘଟିଛି । ଗତକାଲି ରାତିରେ ସେ ହଠାତ ଅସୁସ୍ଥ ହୋଇପଡିଥିଲେ । ସକାଳେ ତାଙ୍କ ବ୍ୟକ୍ତିଗତ ସହାୟକ ଏବଂ ଜଣେ  ବନ୍ଧୁ ତାଙ୍କୁ ଘର ଭିତରୁ ଅଚେତନ ଅବସ୍ଥାରେ ଉଦ୍ଧାର କରି ତୁରନ୍ତ ଡାକ୍ତରଖାନା ନେଇଥିଲେ । ସେଠାରେ ଡାକ୍ତରମାନେ ପ୍ରାୟ ୪୫ ମିନିଟ୍ ଧରି ତାଙ୍କୁ   ସିପିଆର (CPR) ଦେଇ ବଞ୍ଚାଇବାକୁ ଚେଷ୍ଟା କରିଥିଲେ ମଧ୍ୟ ସେଥିରେ ସଫଳ ହୋଇନଥିଲେ ଏବଂ ସକାଳ ପ୍ରାୟ ୫:୨୦ ରେ ତାଙ୍କୁ ମୃତ ଘୋଷଣା କରାଯାଇଥିଲା। ତାଙ୍କ ମୃତ୍ୟୁ ଖବର ହିନ୍ଦୀ ଓ ମରାଠୀ ଚଳଚ୍ଚିତ୍ର ଜଗତ ତଥା ତାଙ୍କ ପ୍ରଶଂସକଙ୍କ ମଧ୍ୟରେ ଶୋକର ଛାୟା ଖେଳାଇ ଦେଇଛି ।

ପାଟେକରଙ୍କ ଜନ୍ମ ବିଶ୍ୱନାଥ ପାଟେକରଙ୍କ ନାମରେ ହୋଇଥିଲା, ଯାହାର ନାମ ଥିଲା ମହାରାଷ୍ଟ୍ରର ରାୟଗଡ ଜିଲ୍ଲାର ମୁରୁଦ-ଜଞ୍ଜିରାର ଏକ ମରାଠୀ ପରିବାର। ନାନା ପାଟେକର ୧୯୭୮ ମସିହାରେ ବିବାହ କରିଥିଲେ ଏବଂ ସେମାନଙ୍କର ଦୁଇଟି ପୁଅ ଥିଲେ।ଦୁର୍ବାସା ଏବଂ ମଲହାର। ଦୁର୍ବାସା ଦୁଇ ବର୍ଷ ବୟସରେ ଅସୁସ୍ଥତା ହେତୁ ମୃତ୍ୟୁବରଣ କରିଥିଲେ। ନାନାଙ୍କୁ ଯେତେବେଳେ ୨୮ବର୍ଷ ବୟସ ହୋଇଥିଲା ହୃଦ୍ଘାତ ରେ ତାଙ୍କ ବାପାଙ୍କର ଦେହାନ୍ତ ହୋଇଥିଲା । ତାଙ୍କର ଦୁଇ ଭାଇ ଅଛନ୍ତି, ଅଶୋକ ଏବଂ ଦିଲୀପ ପାଟେକର। ନାନା ପାଟେକର ବହୁତ ଧୂମପାନ କରୁଥିଲେ, କିନ୍ତୁ ୫୬ ବର୍ଷ ବୟସରେ ସେ ଏହାକୁ ଛାଡ଼ି ଦେଇଥିଲେ । ଏକ ସାକ୍ଷାତକାରରେ ସେ ପ୍ରକାଶ କରିଥିଲେ ଯେ ତାଙ୍କ ବାପା ନାଟକଗୁଡ଼ିକୁ ଭଲ ପାଉଥିଲେ ଏବଂ ସେଗୁଡ଼ିକୁ ଦେଖିବାକୁ ଉତ୍ସାହିତ କରିଥିଲେ, ଯାହା ପାଟେକରଙ୍କ ଅଭିନୟ ପ୍ରତି ଆଗ୍ରହକୁ ଜାଗ୍ରତ କରିଥିଲା। ତାଙ୍କର ପ୍ରଥମ ନାଟକ ବିଜୟା ମେହେଟ୍ଟାଙ୍କ ଦ୍ୱାରା ନିର୍ଦ୍ଦେଶିତ ହୋଇଥିଲା। ନାନା ପାଟେକର ତାଙ୍କ ସହିତ ରହୁଥିବା ତାଙ୍କ ମାଆ ନିର୍ମଳା ପାଟେକରଙ୍କ ସହିତ ବହୁତ ନିକଟତର ଥିଲେ। ସେ ମଧ୍ୟ ୨୯ ଜାନୁଆରୀ ୨୦୧୯ରେ ୯୯ ବର୍ଷ ବୟସରେ ଦେହାନ୍ତ କରିଥିଲେ ।

ନିଜର ଦମଦାର ଅଭିନୟ ଶୈଳୀ ଓ ସଂଳାପ ପରିବେଷଣ ପାଇଁ ଜଣାଶୁଣା ନାନା ପାଟେକର ୧୯୭୮ ମସିହାରେ ‘ଗମନ’ ଚଳଚ୍ଚିତ୍ରରୁ ନିଜର ଅଭିନୟ କ୍ୟାରିୟର ଆରମ୍ଭ କରିଥିଲେ। ୪ ଦଶନ୍ଧିରୁ ଅଧିକ ସମୟର ଏହି ଦୀର୍ଘ ଯାତ୍ରାରେ ସେ ଫିଲ୍ମଫେୟାର୍ ପୁରସ୍କାର ଇତିହାସରେ ଶ୍ରେଷ୍ଠ ଅଭିନେତା, ଶ୍ରେଷ୍ଠ ସହ-ଅଭିନେତା ଏବଂ ଶ୍ରେଷ୍ଠ ଖଳନାୟକ, ଏହି ତିନୋଟିଯାକ ବର୍ଗରେ ପୁରସ୍କାର ଜିତିବାରେ ଏକମାତ୍ର ଭାରତୀୟ ଅଭିନେତା ଭାବେ ରେକର୍ଡ ସୃଷ୍ଟି କରିଛନ୍ତି।

ସିନେମା କ୍ଷେତ୍ରରେ ତାଙ୍କର ଅତୁଳନୀୟ ଯୋଗଦାନ ପାଇଁ ୧୯୮୯ରେ ‘ପରିନ୍ଦା’ ଫିଲ୍ମ ସମେତ ‘କ୍ରାନ୍ତିବୀର’ ଏବଂ ‘ଅଗ୍ନି ସାକ୍ଷୀ’ ପାଇଁ ସେ ମୋଟ ୩ ଥର ଜାତୀୟ ଚଳଚ୍ଚିତ୍ର ପୁରସ୍କାର ଲାଭ କରିଥିଲେ। ତାଙ୍କ ନିଜ ନିର୍ଦ୍ଦେଶିତ ‘ପ୍ରହାର’ ସହିତ ‘ଅବ ତକ ଛପନ’, ‘ୱେଲକମ’, ‘ରାଜନୀତି’ ଏବଂ ‘ନଟସମ୍ରାଟ’ ଭଳି ଚଳଚ୍ଚିତ୍ରଗୁଡ଼ିକ ତାଙ୍କ କ୍ୟାରିୟରର ସର୍ବଶ୍ରେଷ୍ଠ ସଫଳତା। ତେବେ କଳା କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ ୨୦୧୩ ମସିହାରେ ତାଙ୍କୁ ‘ପଦ୍ମଶ୍ରୀ’ ସମ୍ମାନରେ ସମ୍ମାନିତ କରାଯାଇଥିଲା। ନିଜର ସାଧାରଣ ଜୀବନଶୈଳୀ ଓ ସମାଜସେବା ପାଇଁ ସେ ସଦାସର୍ବଦା ଦର୍ଶକଙ୍କ ହୃଦୟରେ ଅମର ରହିବେ।

ନୂଆଦିଲ୍ଲୀ : ରସାୟନ ବିଜ୍ଞାନ (କେମିଷ୍ଟ୍ରି) ରେ ମିଳିତ ଭାବରେ ୨ ବୈଜ୍ଞାନିକଙ୍କୁ ମିଳିବ ନୋବେଲ ପୁରସ୍କାର -୨୦୨୬ ।  ୨ ଜଣ ବୈଜ୍ଞାନିକ ହେଲେ ଫ୍ରାନ୍ସର ହେନ୍ରି ବି. କାଗାନ୍ ଏବଂ ଜାପାନର କେନସୋ ସୋଆଇ । ରୟାଲ ସ୍ୱିଡିଶ୍ ଏକାଡେମୀ ଅଫ୍ ସାଇନ୍ସ ପକ୍ଷରୁ ସେମାନଙ୍କୁ ଏହି ସମ୍ମାନଜନକ ପୁରସ୍କାର ଦିଆଯାଇଛି । "ଅସୀମିତ ଜୈବ ସଂଶ୍ଳେଷଣରେ ଅଣ-ରୈଖିକ ପ୍ରଭାବ ଏବଂ ଅଟୋକାଟାଲିସିସ୍‌ର ଆବିଷ୍କାର" ପାଇଁ ଜୀବନର ରସାୟନ ବିଜ୍ଞାନରେ ଏକ ଶତାବ୍ଦୀରୁ ଅଧିକ ପୁରୁଣା ରହସ୍ୟ, ଅର୍ଥାତ୍ 'ହୋମୋଚିରାଲିଟି' (homochirality) କିଭଳି ସ୍ୱତଃସ୍ଫୂର୍ତ୍ତ ଭାବେ ସୃଷ୍ଟି ହୁଏ, ତାହାର ସମାଧାନ ଏହି ଦୁଇ ବୈଜ୍ଞାନିକ କରିଛନ୍ତି। ଔଷଧ ପ୍ରସ୍ତୁତି କ୍ଷେତ୍ରରେ ଏହି ଆବିଷ୍କାର ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବ ।

କଲ୍ୟାଣସିଂହପୁର : ପୋଖରୀରେ ବୁଡ଼ି ଚାଲିଗଲା ୨ ନାବାଳିକାଙ୍କ ଜୀବନ । ଏଭଳି ଅଭବନୀୟ ଘଟଣା ଘଟିଛି ରାୟଗଡ଼ା ଜିଲ୍ଲା କଲ୍ୟାଣସିଂହପୁର ବ୍ଲକ ପୂଜାରୀଗୁଡା ପଞ୍ଚାୟତ ବଡ଼ନାୟକଗୁଡ଼ା ଗ୍ରାମରେ ଇ ମୃତ ଦୁଇ ନାବାଳିକା ହେଲେ ପୂଜାରୀଗୁଡ଼ା ପଞ୍ଚାୟତ ବଡ଼ନାୟକଗୁଡ଼ା ଗାଁର ୧୨ ବର୍ଷୀୟ ନିଲୁ କାଡ୍ରାକା ୧୨ ବର୍ଷୀୟ କାମି ତିଆକା । ଦୁଇ ନାବାଳିକା ବଡନାୟକଗୁଡା ବିଦ୍ୟାଳୟରେ ୭ମ ଶ୍ରେଣୀରେ ପଢୁଥିଲେ । ଆଜି ୨ଜଣ ମିଶି ବଡ଼ନାୟକଗୁଡା ଗ୍ରାମ ଠାରୁ ପ୍ରାୟ ଏକ କିମି ଦୁରରେ ଥିବା ଶାନ୍ତିନଗର ନିକଟ ପୋଖରୀକୁ ଗାଧୋଇବା ପାଇଁ ଯାଇ ବିଡି ଯାଇଥିଲେ । ଏହା ଦେଖି ଗ୍ରାମବାସୀ ଦୁଇ ନାବାଳିକାକୁ ଉଦ୍ଧାର କରି ସ୍ଥାନୀୟ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ନେଇଥିଲେ । କିନ୍ତୁ ସେଠାରେ ଡାକ୍ତର ଉଭୟଙ୍କୁ ମୃତ ଘୋଷଣା କରିଥିଲେ । ଘଟଣାସ୍ଥଳରେ କଲ୍ୟାଣସିଂହପୁର ପୁଲିସ ପହଞ୍ଚି ଅପମୃତ୍ୟୁ ମାମଲା ରୁଜୁ କରି ତଦନ୍ତ ଚଳାଇଛି ।

ଭୁବନେଶ୍ୱର : ରାଜ୍ୟରେ ଗତ କିଛି ଦିନ ହେବ ପ୍ରବଳ ଖରା ଓ ଗୁଳୁଗୁଳି ଅନୁଭୂତ ହେଉଥିବା ବେଳେ ଆଜିଠାରୁ ପାଣିପାଗରେ ହେବ ବଡ଼ ପରିବର୍ତ୍ତନ । ପଶ୍ଚିମାଝଡ ପ୍ରଭାବରେ ଆଜିଠାରୁ ଆସନ୍ତା ୯ ତାରିଖ ମଧ୍ୟରେ ରାଜ୍ୟର କିଛି କିଛି ସ୍ଥାନରେ ବିଜୁଳି ଘଡଘଡି ସହିତ ବର୍ଷା ହେବାର ସମ୍ଭାବନା ରହିଛି । ଏକ ଟ୍ରଫ୍ ଲାଇନ୍ (Trough line) ପ୍ରଭାବରେ ଏହି ପାଗ ପରିବର୍ତ୍ତନ ହେଉଛି, ଯାହା ଫଳରେ ମେଘୁଆ ପାଗ ସହ ଝଡ଼ବର୍ଷା ହେବ। ଓଡ଼ିଶାର ବିଭିନ୍ନ ଜିଲ୍ଲା ପାଇଁ ବଜ୍ରପାତ ଓ ଘଡ଼ଘଡ଼ି ସହ ୟେଲୋ ୱାର୍ଣ୍ଣିଂ ଜାରି କରାଯାଇଛି । ବିଶେଷକରି ଅକ୍ଟୋବର ୮ ରେ ଉପକୂଳ ଏବଂ ସଂଲଗ୍ନ ଜିଲ୍ଲାମାନଙ୍କର କିଛି କିଛି ସ୍ଥାନରେ ବିଜୁଳି ଘଡଘଡି ସହିତ ବର୍ଷା ଏବଂ ଝଟକା ପବନ ଦେଖିବାକୁ ମିଳିପାରେ । ବଜ୍ରପାତ ସମୟରେ ସତର୍କ ରହିବାକୁ ପାଣିପାଗ ବିଭାଗ ପକ୍ଷରୁ ପରାମର୍ଶ ଦିଆଯାଇଛି । 

ସେପଟେ ଇସିଏମଡବଲୁଏଫ୍ ଆକଳନ ଅନୁସାରେ ୧୩ ତାରିଖ ବେଳକୁ ପୂର୍ବ କେନ୍ଦ୍ରୀୟ ବଙ୍ଗୋପସାଗରରେ ଏକ ଲଘୁଚାପ ସୃଷ୍ଟି ହୋଇପାରେ । ଏହା ପଶ୍ଚିମ କେନ୍ଦ୍ରୀୟ ବଙ୍ଗୋପସାଗରରେ ୧୪ରେ ଅବପାତ ରୂପ ନେଇପାରେ । ୧୫ ତାରିଖକୁ ଏହା ଗଭୀର ଅବପାତରେ ପରିଣତ ହୋଇ ୧୬ ତାରିଖବେଳକୁ ଆନ୍ଧ୍ର କିମ୍ବା ଓଡ଼ିଶା ଉପକୂଳ ଛୁଇଁବା ସମ୍ଭାବନା ରହିଛି  । 

ଭୁବନେଶ୍ୱର : ଆସନ୍ତାକାଲି କଂଗ୍ରେସର ଓଡ଼ିଶା ବନ୍ଦ ଡାକରା । ବାଣିଜ୍ୟ ଅନୁଷ୍ଠାନ ସହ ସରକାରୀ, ବେସରକାରୀ କାର୍ଯ୍ୟାଳୟ ସମେତ ଗାଡି ମଟର ବନ୍ଦ ରହିବ । ତେବେ ଓଡ଼ିଶା ବନ୍ଦକୁ ସମର୍ଥନ କରୁନି ଓଡ଼ିଶା ରାଜ୍ୟ ଘରୋଇ ବସ୍ ମାଲିକ ସଂଘ । ଗୋଟେ ଦିନ ବସ୍ ବନ୍ଦ ହେଲେ ଲୋକ ନାହିଁନଥିବା ଅସୁବିଧାର ସମ୍ମୁଖୀନ ହେବେ । ବସ୍ ମାଲିକ ବଡ଼ କ୍ଷତିର ସମ୍ମୁଖୀନ ହେବ । ତେଣୁ ଆସନ୍ତାକାଲି ବସ୍ ସେବା ଚାଲିବ । ଯେଉଁଠି ପିକେଟିଙ୍ଗରେ ବନ୍ଦ କରାଯିବ ସେଠାରେ ବସ୍ ସେବା ବନ୍ଦ ରହିବ ବୋଲି କହିଛନ୍ତି ଓଡ଼ିଶା ରାଜ୍ୟ ବସ୍ ମାଲିକ ସଂଘ ସଭାପତି ବରଦା ପ୍ରସନ୍ନ ଆଚାର୍ଯ୍ୟ ।

ଏପଟେ ଆସନ୍ତା ବନ୍ଦ ପ୍ରଭାବରେ ରାଜ୍ୟରେ ଅଟୋ ସେବା ମଧ୍ୟ ପ୍ରଭାବିତ ହେବ। କାଲି ଗଡିବନି କୌଣସି ଅଟୋ । ରାଜଧାନୀ ଅଟୋ ଚାଳକ ସଂଘର ଆହ୍ୱାନ ।  ଆସନ୍ତାକାଲି ଓଡିଶା ବନ୍ଦକୁ ସମର୍ଥନ ଜଣାଇ ରାଜଧାନୀ ସମେତ ରାଜ୍ୟର ସମସ୍ତ ଜାଗାରେ ଅଟୋ ଚଳାଚଳ ବନ୍ଦ କରିବାକୁ ନିଷ୍ପତ୍ତି । ସାରା ଓଡ଼ିଶାରେ ୧ ଲକ୍ଷରୁ ଅଧିକ ଅଟୋ ଚଳାଚଳ ବନ୍ଦ ରହିବାକୁ ଥିବା ବେଳେ, ଭୁବନେଶ୍ୱରରେ ୨୦ ହଜାରରୁ ଅଧିକ ଅଟୋ ରାସ୍ତାକୁ ଓହ୍ଲାଇବ ନାହିଁ । ବନ୍ଦ ସମୟରେ ଗାଡ଼ିର କ୍ଷତି ହେଲେ ଇନ୍ସୁରାନ୍ସ କ୍ଲେମ୍‌ ସୁବିଧା ନଥିବାରୁ ଅଟୋ ସେବା ବନ୍ଦ ରଖିବାକୁ ସଂଘ ନିଷ୍ପତ୍ତି ନେଇଛି । କୌଣସି ପ୍ରକାରର ଅନଲାଇନ୍ କିମ୍ବା ଅଫଲାଇନ୍ ଅଟୋ ଚାଲିବ ନାହିଁ । ଗତକାଲି ଏନେଇ ଆସୋସିଏସନର ବୈଠକ ବସିଥିଲା । ଅଟୋ ଚଳାଚଳ ସକାଳ ୬ ରୁ ସନ୍ଧ୍ୟା ୬ ପର୍ଯ୍ୟନ୍ତ ବନ୍ଦ ରଖିବା ପାଇଁ ଏଥିରେ ନିଷ୍ପତି ନିଆଯାଇଛି। ନିଜ ଅଞ୍ଚଳରେ ଧାରଣାରେ ସାମିଲ ହେବା ପାଇଁ ମଧ୍ୟ ଅଟୋ ଚାଳକଙ୍କୁ କୁହାଯାଇଛି ।

ଭୁବନେଶ୍ବର: ଯାନ୍ତ୍ରିକ ତ୍ରୁଟି ଯୋଗୁଁ ମଝି ଚିଲିକାରେ ଫସିଲରେ ଦଙ୍ଗା । ଅସହାୟ ଭାବରେ ଦଙ୍ଗା ଭିତରେ ଫସି ରହିଛନ୍ତି ୪୦ରୁ ଉର୍ଦ୍ଧ୍ବ ଯାତ୍ରୀ । ଆଜି ସକାଳ ପ୍ରାୟ ୭ଟା ବେଳେ ପୁରୀ ଜିଲ୍ଲା ବ୍ରହ୍ମଗିରି ନିକଟ ଚିଲିକା ହ୍ରଦରେ ଏହି ଅଘଟଣ ଘଟିଛି । 

ସୂଚନାନୁସାରେ, ଆଜି ସକାଳ ପ୍ରାୟ ୭ଟା ସମୟରେ ଏହି ଡଙ୍ଗାଟି ବ୍ରହ୍ମଗିରିର ସାତପଡ଼ା ଘାଟରୁ ନିଜର ଗନ୍ତବ୍ୟ ସ୍ଥଳ ଅଭିମୁଖେ ବାହାରିଥିଲା । ତେବେ ହ୍ରଦର ମଝି ଭାଗରେ ହଠାତ୍ ଡଙ୍ଗାର ମେସିନ୍ ବନ୍ଦ ହୋଇଯିବାରୁ ଏହା ଅଚଳ ହୋଇ ପଡ଼ିଥିଲା । ଫଳରେ ଗତ ଦୁଇ ଘଣ୍ଟାରୁ ଊର୍ଦ୍ଧ୍ୱ ସମୟ ଧରି ଡଙ୍ଗାଟି ଜଳ ମଧ୍ୟରେ ହିଁ ଫସି ରହିଛି । ଏହି ଡଙ୍ଗାରେ ମୋଟ ୪୦ ଜଣ ଯାତ୍ରୀ ରହିଥିବା ବେଳେ ସେମାନଙ୍କ ସହିତ ପ୍ରାୟ ୨୦ଟି ମୋଟରସାଇକେଲ ବା ବାଇକ୍ ମଧ୍ୟ ଲୋଡ୍ ହୋଇ ରହିଛି ।  ଘଟଣା ସମ୍ପର୍କରେ ଖବର ପାଇବା ପରେ ଘାଟ ମାଲିକ ଏବଂ ସ୍ଥାନୀୟ ଲୋକଙ୍କ ପକ୍ଷରୁ ଅନ୍ୟ ଡଙ୍ଗା ସାହାଯ୍ୟରେ ଫସି ରହିଥିବା ଯାତ୍ରୀ ଓ ବାହନଗୁଡ଼ିକୁ ସୁରକ୍ଷିତ ଭାବେ ଉଦ୍ଧାର କରିବା ପାଇଁ ପ୍ରଚେଷ୍ଟା ଜାରି ରହିଛି । ଚିଲିକାରେ ପ୍ରାୟତଃ ମେସିନ୍ ଖରାପ ହେବା କିମ୍ବା ପାଣିର ଶାବଳ ଓ ପଙ୍କରେ ଡଙ୍ଗା ଫସିଯିବା ଯୋଗୁଁ ଏଭଳି ପରିସ୍ଥିତି ସୃଷ୍ଟି ହେଉଥିବାରୁ, ଯାତ୍ରୀଙ୍କ ସୁରକ୍ଷା ଦୃଷ୍ଟିରୁ ନିୟମିତ ଯାଞ୍ଚ ଏବଂ ଲାଇଫ୍ ଜ୍ୟାକେଟ୍ ବ୍ୟବହାର ଉପରେ କଡ଼ା ନଜର ରଖିବାକୁ ଦାବି ହେଉଛି ।

ଭୁବନେଶ୍ୱର : ଆସନ୍ତାକାଲି ଓଡ଼ିଶା ବନ୍ଦକୁ ନେଇ ରାଜ୍ୟ ରାଜନୀତିରେ ନୂଆ ମୋଡ଼ ଦେଖିବାକୁ ମିଳିଛି । ମାତ୍ର ଅଧ ଘଣ୍ଟା ମଧ୍ୟରେ ବଦଳିଲା ବିଜୁ ଜନତା ଦଳ ର ନିଷ୍ପତ୍ତି । ଆସନ୍ତା କାଲି କଂଗ୍ରେସ ପକ୍ଷରୁ ଓଡିଶା ବନ୍ଦ ଡାକରାକୁ ସମର୍ଥନ କରିବ ନାହିଁ ଦଳ । ଏନେଇ ସ୍ପଷ୍ଟ କରିଛନ୍ତି ବିଜେଡି ନେତ୍ରୀ ପ୍ରମିଳା ମଲ୍ଲିକ । ସେ କହିଛନ୍ତି ଆମେ କୌଣସି ମେଣ୍ଟରେ ନାହୁଁ । ଆମେ କେବଳ ଏସଆଇଆର ଏବଂ ଜ୍ଞାନେଶ କୁମାରଙ୍କ ଇସ୍ତଫା କୁ ନେଇ ଇଣ୍ଡିଆ ମେଣ୍ଟକୁ ସମର୍ଥନ କରିଥିଲୁ । ଯିଏ ବନ୍ଦ ଡାକରା ଦେଇଛନ୍ତି ସେ ଆମକୁ ପଚାରି ବନ୍ଦ ଡାକରା ଦେଇ ନଥିଲେ । ଆମେ ସମ ଦୂରତା ନୀତି ଅବଲମ୍ବନ କରୁଛୁ । ତେଣୁ ଏହି ବନ୍ଦକୁ ସମର୍ଥନ କରିବାର ପ୍ରଶ୍ନ ଉଠୁନାହିଁ । ତେବେ ଅଧ ଘଣ୍ଟା ପୂର୍ବରୁ ନବୀନ ନିବାସ ରୁ ଫେରି ବନ୍ଦ କୁ ସମର୍ଥନ କରିବୁ ଏବଂ ଆମେ ଇଣ୍ଡିମେଣ୍ଟ  ରେ ଅଛୁ ବୋଲି କହିଥିଲେ ପ୍ରମିଳା ମଲ୍ଲିକ । ମାତ୍ର ହଠାତ ଅଧଘଣ୍ଟା ପରେ କାହା ଚାପରେ ଆସି ପୁଣି ମତ ବଦଳାଇଲେ ଏହାକୁ ନେଇ ଉଠିଛି  ପ୍ରଶ୍ନ ।

ସୂଚନାନୁସାରେ, ଅକ୍ଟୋବର ୮ ତାରିଖରେ ସକାଳ ୬ଟାରୁ ସନ୍ଧ୍ୟା ୬ଟା ଯାଏ ରାଜ୍ୟବ୍ୟାପୀ ୧୨ ଘଣ୍ଟିଆ ବନ୍ଦ ପାଇଁ ଇଣ୍ଡିଆ ବ୍ଲକ୍‌ ପକ୍ଷରୁ ଆହ୍ୱାନ ଦିଆଯାଇଛି । MMDR Amendment Act, ୨୦୨୬ ପ୍ରତ୍ୟାହାର ସମେତ ବିଭିନ୍ନ ଦାବି ନେଇ ଏହି ବନ୍ଦ ଡାକରା ଦିଆଯାଇଛି।

ଭୁବନେଶ୍ୱର : ଆଇଏଏସ (IAS) ସ୍ତରରେ ଏକ ବଡ଼ ଧରଣର ଅଦଳବଦଳ କରିଛନ୍ତି ରାଜ୍ୟ ସରକାର । ଏନେଇ ସାଧାରଣ ପ୍ରଶାସନ ବିଭାଗ ପକ୍ଷରୁ ବିଜ୍ଞପ୍ତି ପ୍ରକାଶ ପାଇଛି । ଏହି ଅନୁଯାୟୀ ୭ ଜଣ ବରିଷ୍ଠ ଆଇଏଏସ ଅଫିସରଙ୍କୁ ପ୍ରଶାସନିକ ସଚିବ ଏବଂ ଜିଲ୍ଲାପାଳ ଭାବରେ ନିଯୁକ୍ତି ଦିଆଯାଇଛି  । 

ବିଜ୍ଞପ୍ତି ଅନୁସାରେ , ନୂଆପଡା ଏବଂ ନବରଙ୍ଗପୁର ଜିଲ୍ଲାପାଳଙ୍କୁ ବଦଳି କରାଯାଇଛି । ନୂଆପଡା ଜିଲ୍ଲାପାଳ ଥିବା ମଧୁସୂଦନ ଦାଶ ବଦଳି ହୋଇ ସାଧାରଣ ପ୍ରଶାସନ ଓ ସାଧାରଣ ଅଭିଯୋଗ (GA &PG)ବିଭାଗର ଅତିରିକ୍ତ ସଚିବ ଦାୟିତ୍ୱ ଗ୍ରହଣ କରିଛନ୍ତି । ତାଙ୍କ ସ୍ଥାନରେ ନୂଆପଡା ଜିଲ୍ଲାପାଳ ଭାବେ ମଧୁମିତା ଙ୍କୁ ନିଯୁକ୍ତି ଦିଆଯାଇଛି  । 

ସେହିପରି, ଡକ୍ଟର ମହେଶ୍ୱର ସ୍ୱାଇଁଙ୍କୁ ନବରଙ୍ଗପୁର ଜିଲ୍ଲାପାଳ ପଦରୁ ବଦଳି ହୋଇ ମୁଖ୍ୟମନ୍ତ୍ରୀଙ୍କ ଅତିରିକ୍ତ ସଚିବ ଭାବେ ନିଯୁକ୍ତି ପାଇଛନ୍ତି ଏବଂ ତାଙ୍କ ସ୍ଥାନରେ ଅନନ୍ୟା ଦାସ ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗର ଉପସଚିବ ପଦରୁ ବଦଳି ହୋଇ ନବରଙ୍ଗପୁରର ନୂଆ ଜିଲ୍ଲାପାଳ ଭାବେ ନିଯୁକ୍ତ ହୋଇଛନ୍ତି । 

ଅଶ୍ୱନୀ ଏ.ଏଲ ଙ୍କୁ ଭବାନୀପାଟଣା ଉପଜିଲ୍ଲାପାଳ ଭବରେ ନିଯୁକ୍ତି ମିଳିଥିବାବେଳେ ପ୍ରଦୀପ ନାୟକ ମତ୍ସ୍ୟ ଓ ପଶୁ ସମ୍ପଦ ବିଭାଗ ଅତିରିକ୍ତ ସଚିବ ଭାବରେ ନିଯୁକ୍ତି ପାଇଛନ୍ତି ।

ଶରତର ଆଗମନରେ ପୃଥିବୀ ଶସ୍ୟଶ୍ୟାମଳା ହେବା ସହିତ ଦୂର ଗହୀରରେ କାଶତଣ୍ଡୀ ଫୁଲ ଦେଖି ସମସ୍ତଙ୍କ ମନରେ ଉଙ୍କିମାରେ ଧରାପୃଷ୍ଠ କୁ ମାଆ ଆସୁଛନ୍ତି । ମା ଙ୍କ ଆଗମନରେ ସମସ୍ତେ ପୁଲକିତ ହୋଇ ଉଠନ୍ତି, ଲାଗିପଡ଼ନ୍ତି ମା ଙ୍କୁ ପୂଜାର୍ଚନା ପାଇଁ, ମା ଙ୍କ ଆଶୀର୍ବାଦର ପରସ ପାଇବା ପାଇଁ । ପ୍ରତ୍ୟେକ ଶକ୍ତି ପୀଠ ଚଳଚଞ୍ଚଳ ହୋଇ ଉଠେ, ଉତ୍ସବମୁଖର ହୋଇଉଠେ,ସଜେଇ ହୋଇ ପଡେ ମା ଙ୍କ ସ୍ୱାଗତ ପାଇଁ । ଏହିପରି ଏକ ଶକ୍ତି ପୀଠ ପୁରୀ ଜିଲ୍ଲା କାକଟପୁର ବାସିନୀ ମା ମଙ୍ଗଳାଙ୍କ ପୀଠ । ମାତୃ ଉପାସନାର ଏକ ଅନନ୍ୟ ପୀଠ, ଯେଉଁଠାରେ ଜଗତର ନାଥ ଜଗନ୍ନାଥଙ୍କ ସମସ୍ତ ରୀତିନୀତି ଏଠାରେ ପରିଲକ୍ଷିତ ହୋଇଥାଏ । ଯେହେତୁ ଜଗନ୍ନାଥଙ୍କ ଏନ୍ତୁଡ଼ିଶାଳ କହିଲେ କାକଟପୁରକୁ ବୁଝାଇଥାଏ, ପୀଠ ର ଅଧିଷ୍ଠାତ୍ରୀ ଦେବୀ ଜଗତଜନନୀ ମା ମଙ୍ଗଳାଙ୍କ ଆଜ୍ଞା ରେ ଲିମ୍ବ କାଠ ଦାରୁରେ ପରିଗଣିତ ହୁଏ । ଦାରୁରୁ ଚତୁର୍ଦ୍ଧାମୂର୍ତ୍ତି ତିଆରି ହୁଅନ୍ତି,ସେଇ ମଙ୍ଗଳମୟୀ ମା ମଙ୍ଗଳାଙ୍କ ଲୀଳା ଅବର୍ଣ୍ଣନୀୟ । ମାଆ ମଙ୍ଗଳାଙ୍କର ବିଭିନ୍ନ ମାସର ବିଭିନ୍ନ ଯାନିଯାତ୍ରା ମଧ୍ୟରେ ଶରତ ଋତୁରେ ଶାରଦୀୟ ପାର୍ବଣ ପୂଜା ଅନ୍ୟତମ। ପବିତ୍ର ପାର୍ବଣ ଆଶ୍ୱିନ ମାସ ମୂଳାସପ୍ତମୀ ତିଥିରେ ସହସ୍ରାକୁମ୍ଭାଭିଷେକ ଓ ଘଟ ସ୍ଥାପନ ପୂର୍ବକ ମା ଦୁର୍ଗାଙ୍କୁ ଆବାହନ କରାଯାଏ । ମୂଳାଷ୍ଟାମୀଠାରୁ ଷୋଡଶଦିନାତ୍ମକ ପୂଜା ଆରମ୍ଭ ହୋଇ ଶୁକ୍ଳ ପକ୍ଷ ନବମୀ ପର୍ଯ୍ୟନ୍ତ ଷୋଳ ପୂଜା ବା ପାର୍ବଣ ପୂଜାଚାଲିଥାଏ । ଏହି ପୂଜା, ଭିତର ପୂଜା, ବାହାର ପୂଜା, ଓ ସନ୍ଧି ପୂଜା ଭାବେ ଅତ୍ୟନ୍ତ ନିଷ୍ଠାର ସହିତ ପ୍ରଚଳିତ ରୀତିନୀତି ଅନୁସାରେ ହୋଇଥାଏ  । ପାର୍ବଣରେ ମାଆଙ୍କ ସାହସ୍ରକୁମ୍ଭାଭିଷେକ ୧O ୮ କଳସ ଶୁଦ୍ଧ ସୁଗନ୍ଧ ଯୁକ୍ତ, ହଳଦୀ, ଚୁଆ, ଅଗୁରୁ, ଚନ୍ଦନ ମିଶ୍ରିତ ଜଳ ଦ୍ୱାରା ମହାସ୍ନାନ କରାଯାଏ । ଯାହାକି ସାହାଣ ମେଲା କରାଯାଏ ଭକ୍ତ ମାନଙ୍କ ଦର୍ଶନ ନିମନ୍ତେ। ବ୍ୟତିକ୍ରମ ଏହିକି ଯେ ଅନ୍ୟଦିନ ମାନଙ୍କରେ ଚାରିକବାଟ ବନ୍ଦ କରି ମାଙ୍କ ସ୍ନାନ କରାଯାଏ। ବର୍ଷର ସବୁଦିନ ପାଞ୍ଚଉପଚାର ପଦ୍ଧତିରେ ମାଙ୍କୁ ପୂଜା କରାଯାଉଥିଲା ବେଳେ ପାର୍ବଣରେ ଷୋଡଶ ଉପଚାରରେ ପୂଜା ସ୍ୱତନ୍ତ୍ର ନିଯୁକ୍ତ ପୂଜାପଣ୍ଡାଙ୍କ ଦ୍ୱାରା ପୂଜlକରାଯାଏ । ମୂଳାଷ୍ଟାମୀ ଠାରୁ ମହାଷ୍ଟମୀ ପର୍ଯ୍ୟନ୍ତ ପୀଠରେ ଚଣ୍ଡୀପାଠ କରାଯାଏ । ଚଣ୍ଡୀପାଠ ପୂର୍ବରୁ ମା ଙ୍କୁ ସ୍ତୁତିଗାନ କରାଯାଏ,

ରୁପଂ ଦେହି ଜୟଂ ଦେହି,

ଯଶୋ ଦେହି, ତ୍ରି୍ଷୋ ଦେହି,,,

ମା ତୁମେ ରୂପ ଦିଅ, ଜୟ ପ୍ରଦାନ କର, ଯଶ ଦିଅ, ଶତ୍ରୁ ମାନଙ୍କ କବଳ ରୁ ରକ୍ଷା କର ll

ମା ମଙ୍ଗଳା ପରମବୈଷ୍ଣବୀ ଦେବୀ ଭାବେ ଖ୍ୟାତ l ମା ଙ୍କ ନିଜସ୍ୱ ମନ୍ତ୍ର ଅଗୋଚର ଥିବାବେଳେ, ମା ବନ ଦୁର୍ଗା ମନ୍ତ୍ର ରେ ପୂଜା ହୁଅନ୍ତି l ମା ଙ୍କ ଠାରେ ବର୍ଷ ସାରା ନିରାମିଷ ଭୋଗ ହେଉଥିବା ବେଳେ ପାର୍ବଣ ରେ ବନ ଦୁର୍ଗାଙ୍କ ପାଇଁ ଆମିଷ ଭୋଗ କରାଯାଏ । ଯେଉଁ ଭୋଗ ମାଙ୍କ ଆସ୍ଥାନ ପିଣ୍ଡିରେ ବଢ଼ା ନ ଯାଇ ବାହାର ଅର୍ଗଳୀ ଠାରେ ସମର୍ପଣ କରାଯାଇଥାଏ । ପାର୍ବଣ ସମୟ ରେ ପୀଠରେ, ପ୍ରତିଦିନ ଷୋଡଶ ଉପଚାରରେ ପୂଜା ହୋଇଥାଏ । ପ୍ରତିଦିନ ସ୍ନାନ, ମାର୍ଜନା, ସୂର୍ଯ୍ୟ ପୂଜା, ସକାଳ ଧୂପ, ଦ୍ବିପହର ଧୂପ, ଭଅଣ୍ଡ ସରିଲା ପରେ ପହୁଡ଼ ପଡିଥାଏ । ପହୁଡ଼ ଫିଟା ନୀତି ପରେ ସନ୍ଧ୍ୟା ଆଳତୀ କରାଯାଇ ମହାସ୍ନାନ କରାଯାଏ । ମା ଙ୍କୁ ମହାସ୍ନାନ କରାଯାଇ ପ୍ରତିପଦ ଠାରୁ ମହା ନବମୀ ପର୍ଯ୍ୟନ୍ତ ବିଭିନ୍ନ ବେଶରେ ସଜ୍ଜିତ କରାଯାଏ । ବେଶ ନୀତି ଅନୁଷ୍ଠିତ ପରେ ମା ରତ୍ନ ଗିରି କୁ ମହିଷାସୁର ଠାବ ପାଇଁ ଭ୍ରମଣୀ ରେ ଯାଇ ଥାଆନ୍ତି । ଏହି ଭ୍ରମଣୀ ନୀତିରେ ମାଙ୍କ ଚଳନ୍ତି ପ୍ରତିମା ମଣିବିମାନରେ ଅବସ୍ଥାନ କରି ନିକଟସ୍ଥ ରତ୍ନଗିରି ମଣ୍ଡପକୁ ଯାଇଥାନ୍ତି l ସେଠାରେ ମାଆଙ୍କ ଗୁପ୍ତ ନୀତି ସରିଲା ପରେ ପୁନର୍ବାର ମନ୍ଦିର କୁ ଫେରି ଆସିଥାନ୍ତି l ସେଠାରେ ଆଦିମାତାଙ୍କ ସହିତ ମା ଦୁର୍ଗାଙ୍କ ପଂକ୍ତି ଭୋଗ ସହିତ ବନ୍ଦାପନା ଆଳତୀ ପରେ ମାଙ୍କ ବେଶ ପଣା ଭୋଗ ସହିତ ବେଶ ନୀତି ସlହlଣମେଲା କରାଯାଏ । ଏହିପରି ଭାବରେ ପ୍ରତିଦିନ ମାଙ୍କ ବିଭିନ୍ନ ନୀତି ଅନୁଯାୟୀ ବିଭିନ୍ନ ବେଶ ହୋଇଥାଏ । ଏହି ଅବସରରେ ମା ମଙ୍ଗଳାଙ୍କ ନବପତ୍ରିକା ପୂଜା ଆରମ୍ଭ ରେ ନାଲିକଲି ଓ ଭୁଜ ଲାଗି, କଳାକଲି ଇତ୍ୟାଦି ବେଶ ପରେ ପଞ୍ଚମୀ ରେ ତୀର କମାଣ ଵେଶ, ଷଷ୍ଠୀ ପୂଜା ଵା କାତ୍ୟାୟାନୀ ବେଶ (କାର୍ତ୍ତିଖପର), ସପ୍ତମୀ ପୂଜାରେ ସିଂହବାହିନୀ ବେଶ, ମହାଷ୍ଟମୀ ପୂଜା ରେ ମହିଷାମର୍ଦିନୀ ବେଶ, ମହା ନବମୀ ରେ ମହା ସ୍ନାନ ଓ ଶାନ୍ତି ହୋମ କରାଯାଇ ଶାନ୍ତି ବେଶ, ସେଦିନ ମା ଙ୍କୁ ଶୁଭ୍ର ବସ୍ତ୍ର ପରିଧାନ କରାଇବା ସହିତ ଶୁଭ୍ର ପୁଷ୍ପ ବ୍ୟବହାର କରାଯାଇଥାଏ । ପରଦିନ ଦଶମୀରେ ସ୍ବମେଶ୍ବ ମହାଦେବଙ୍କ ପୀଠରେ ହର ଦୁର୍ଗା ଭେଟ କରାଯାଇ ପୂଜା ସମାପନ ହେବାସହିତ ବିଜୟାଦଶମୀ ପାଳନ କରାଯାଏ ।

ତଥ୍ୟ _ ମାନସ ଦିକ୍ଷୀତ (ସେବାୟତ)

ପ୍ରସ୍ତୁତି _ କାକଟପୁର ରୁ ପ୍ରଶାନ୍ତ କୁମାର ଜେନା

ପ୍ରତିବର୍ଷ ଅକ୍ଟୋବର ୭ ତାରିଖରେ ସମଗ୍ର ବିଶ୍ୱରେ 'ବିଶ୍ୱ କପା ଦିବସ' ପାଳନ କରାଯାଇଥାଏ ।  କୃଷି ଓ ବସ୍ତ୍ର ଶିଳ୍ପରେ 'ଧଳା ସୁନା' ଭାବେ ପରିଚିତ କପାର ଗୁରୁତ୍ୱ ଏବଂ ଏହା ସହ ଜଡ଼ିତ କୋଟି କୋଟି ଚାଷୀ ଓ ଶ୍ରମିକଙ୍କ ଅବଦାନକୁ ଚିହ୍ନଟ କରିବା ଏହାର ମୁଖ୍ୟ ଉଦ୍ଦେଶ୍ୟ ଅଟେ । ୨୦୧୯ ମସିହାରେ ବିଶ୍ୱ ବାଣିଜ୍ୟ ସଂଗଠନ ଏବଂ ଆଫ୍ରିକୀୟ କପା ଉତ୍ପାଦନକାରୀ ଦେଶ 'କଟନ୍-୪' (ବେନିନ୍, ବୁର୍କିନା ଫାସୋ, ଚାଡ୍ ଓ ମାଲି)ର ମିଳିତ ଉଦ୍ୟମରେ ପ୍ରଥମ କରି ଏହି ଦିବସର ପାଳନ ହୋଇଥିଲା । ଯାହାକୁ ପରବର୍ତ୍ତୀ ସମୟରେ ମିଳିତ ଜାତିସଂଘ ସ୍ୱୀକୃତି ପ୍ରଦାନ କରିଥିଲା । କପା କେବଳ ଏକ କୃଷିଜାତ ଦ୍ରବ୍ୟ ନୁହେଁ, ବରଂ ଏହା ବିଶ୍ୱବ୍ୟାପୀ ପ୍ରାୟ ୧୨୫ ନିୟୁତରୁ ଅଧିକ ଲୋକଙ୍କ ଜୀବିକା, ନିଯୁକ୍ତି ଓ ବୈଦେଶିକ ମୁଦ୍ରା ଅର୍ଜନର ପ୍ରମୁଖ ମାଧ୍ୟମ ପାଲଟିଛି । ବିଶେଷ କରି ଭାରତ ଭଳି ବିକାଶଶୀଳ ଦେଶଗୁଡ଼ିକରେ କପା ଚାଷ ସାମାଜିକ-ଆର୍ଥିକ ବିକାଶର ଏକ ମୁଖ୍ୟ ସ୍ତମ୍ଭ ସଦୃଶ ଛିଡ଼ା ହୋଇଛି । କୃତ୍ରିମ ତନ୍ତୁର ବୃଦ୍ଧି, ଜଳବାୟୁ ପରିବର୍ତ୍ତନ ଏବଂ କୀଟନାଶକର ବ୍ୟବହାର ଭଳି ପ୍ରତିକୂଳ ପରିସ୍ଥିତି ସତ୍ତ୍ୱେ, ଜୈବିକ କପା ଉତ୍ପାଦନ, ସ୍ଥାୟୀ କୃଷି ପ୍ରଣାଳୀ ଓ ଉଚିତ ବାଣିଜ୍ୟ ନୀତି ଆପଣାଇବା ପାଇଁ ଏହି ଦିବସ ସଚେତନତା ସୃଷ୍ଟି କରେ ।

ଆମେରିକାର ଆରକାନସାସ ସ୍ଥିତ 'କ୍ରାଟର ଅଫ୍ ଡାଇମଣ୍ଡସ ଷ୍ଟେଟ ପାର୍କ'ରେ ଜଣେ ବ୍ୟକ୍ତି ମାତ୍ର ୧୫ ଡଲାର (ପ୍ରାୟ ୧,୪୦୦ ଟଙ୍କା) ପ୍ରବେଶ ଫି' ଦେଇ ୬.୦୩ କେରଟର ଏକ ଦାମୀ ହଳଦିଆ ହୀରା ପାଇବା ଘଟଣା ସମଗ୍ର ବିଶ୍ୱରେ ଚର୍ଚ୍ଚାର ବିଷୟ ପାଲଟିଛି । ଯାହାର ଆନୁମାନିକ ମୂଲ୍ୟ ପ୍ରାୟ ୧ ନିୟୁତ ଡଲାର (ପ୍ରାୟ ୯ କୋଟି ଟଙ୍କା) ବୋଲି ଆକଳନ କରାଯାଇଛି । ଜ୍ୟାକ୍ ପିଏରାଡିନ୍ ନାମକ ଏହି ବ୍ୟକ୍ତିଜଣକ ୨୦୧୩ ମସିହାରୁ ଦୀର୍ଘ ୧୨ ବର୍ଷ ଧରି ଏହି ପାର୍କକୁ ଆସି ହୀରା ଖୋଜୁଛନ୍ତି । ଏପର୍ଯ୍ୟନ୍ତ ସେଠାରୁ ୩୦୦ରୁ ଅଧିକ ମୂଲ୍ୟବାନ ପଥର ସଂଗ୍ରହ କରିସାରିଛନ୍ତି । ନିକଟରେ ସେ ଜଣେ ସାଙ୍ଗଙ୍କ ସହ ମିଶି ୫-ଗ୍ୟାଲେନ୍ ବାଲଟିରେ ଗୋଡ଼ି ଏବଂ ପଥର ଛାଣୁଥିବା ସମୟରେ ଏହି ଚମକପ୍ରଦ ହଳଦିଆ ହୀରାଟି ପାଇଥିଲେ । ଏହାର ନାମ 'ଆମେରିକାନ୍ ଡ୍ରିମ୍' ରଖିଛନ୍ତି । ସୂଚନାଯୋଗ୍ୟ ଯେ, ୧୯୭୨ ମସିହାରୁ ଏହି ପାର୍କରୁ ୩୭,୦୦୦ରୁ ଅଧିକ ହୀରା ମିଳିସାରିଥିବା ବେଳେ ୧୯୨୪ ମସିହାରେ ସେଠାରୁ ଆମେରିକାର ସବୁଠାରୁ ବଡ଼ ୪୦.୨୩ କେରଟର 'ଅଙ୍କଲ ସାମ୍' ହୀରା ଆବିଷ୍କୃତ ହୋଇଥିଲା ।

ନବରାତ୍ରି ଆରମ୍ଭ ପୂର୍ବରୁ ଅହମ୍ମଦାବାଦଠାରେ ପୋଷା କୁକୁରମାନଙ୍କ ପାଇଁ 'ପୱରାତ୍ରି'  ନାମକ ଏକ ସ୍ୱତନ୍ତ୍ର ଓ ଆକର୍ଷଣୀୟ ଉତ୍ସବର ଆୟୋଜନ କରାଯାଇଛି । ଏକ 'ଡଗ୍ ହୋଟେଲ' ପକ୍ଷରୁ ଆୟୋଜିତ ଏହି ଚତୁର୍ଥ ସଂସ୍କରଣ କାର୍ଯ୍ୟକ୍ରମରେ କୁକୁରମାନେ ଚନିୟା-ଚୋଲି ଓ ପାରମ୍ପରିକ ଗୁଜରାଟୀ ପୋଷାକ ପରିଧାନ କରି ଭାଗ ନେଇଛନ୍ତି । ସେମାନେ ଏଠାରେ ପେଟ୍-ଫ୍ରେଣ୍ଡଲି ଗରବା, ଦାଣ୍ଡିଆ, ସଙ୍ଗୀତ, ଖେଳକୁଦ ଓ ସେଲଫି ଚ୍ୟାଲେଞ୍ଜ ଭଳି ବିଭିନ୍ନ ପ୍ରତିଯୋଗିତାରେ ଭାଗ ନେଇଥିଲେ । ଏହାସହ ଶ୍ରେଷ୍ଠ ପୋଷାକଧାରୀ କୁକୁର, ସର୍ବୋତ୍ତମ ମ୍ୟାଚିଂ ପରିବାର, ଏବଂ ସବୁଠାରୁ କୌତୂହଳୀ ପୋଷା ଜୀବ ପାଇଁ ସ୍ୱତନ୍ତ୍ର ପ୍ରତିଯୋଗିତା ସହ ସେମାନଙ୍କର ମାଲିକମାନଙ୍କ ପାଇଁ ଶପିଂ, ଖାଦ୍ୟ ଓ ଗରବାର ବ୍ୟବସ୍ଥା କରାଯାଇଥିଲା । ପୋଷା ପ୍ରାଣୀ ଓ ସେମାନଙ୍କ ମାଲିକମାନଙ୍କୁ ଏକାଠି ଆଣି ନବରାତ୍ରି ପାଳନ କରିବା ଉଦ୍ଦେଶ୍ୟରେ ଏହି ନିଆରା କାର୍ଯ୍ୟକ୍ରମଟିର ଆୟୋଜନ କରାଯାଇଥିଲା । ଯେଉଁଥିରେ ମାଲିକମାନେ ନିଜ ନିଜ କୁକୁରଙ୍କୁ ପାରମ୍ପରିକ ପୋଷାକ ପିନ୍ଧାଇ ବେଶ୍ ଉତ୍ସାହର ସହ ଯୋଗଦେଇଥିଲେ । ସୋସିଆଲ ମିଡିଆରେ ଏହାର ଖୁବ ଚର୍ଚ୍ଚା ହେଉଥିବା ଦେଖିବାକୁ ମିଳୁଛି ।

ନୂଆଦିଲ୍ଲୀ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସରକାର ମୁଖ୍ୟ ଭାବେ ୨୫ ବର୍ଷ ପୂରଣ କରିଛନ୍ତି । ୨୦୦୧ ମସିହା ଅକ୍ଟୋବର ୭ରେ ସେ ପ୍ରଥମଥର ପାଇଁ ଗୁଜରାଟର ମୁଖ୍ୟମନ୍ତ୍ରୀ ଭାବେ ଶପଥ ନେଇଥିଲେ । ଏହାପରେ ଦୀର୍ଘ ରାଜନୈତିକ ଯାତ୍ରା ପରେ ୨୦୧୪ରେ ଦେଶର ପ୍ରଧାନମନ୍ତ୍ରୀ ହୋଇଥିଲେ । 

ଆଜି ସାର୍ବଜନୀନ ଜୀବନରେ ୨୫ ବର୍ଷ ପୂରଣ କରିଛନ୍ତି ମୋଦୀ। ଏହି ଅବସରରେ ଦିଲ୍ଲୀର ଇନ୍ଦିରା ଗାନ୍ଧୀ ଇନଡୋର ଷ୍ଟାଡିୟମରେ ଏକ କାର୍ଯ୍ୟକ୍ରମ ଆୟୋଜନ କରାଯାଇଛି । ଯେଉଁଠାରେ ପ୍ରଧାନମନ୍ତ୍ରୀ ମୋଦୀ ଦେଶବ୍ୟାପୀ ବିଜେପି କର୍ମୀମାନଙ୍କୁ ଭର୍ଚୁଆଲ୍ ଭାବରେ ସମ୍ବୋଧିତ କରିଛନ୍ତି । ଜନସାଧାରଣଙ୍କୁ ସମ୍ବୋଧିତ କରି ନିଜ ରାଜନୈତିକ ଯାତ୍ରାକୁ ନେଇ ଭାବବିହ୍ବଳ ହୋଇଥିଲେ ମୋଦି । ଲୋକଙ୍କ ନିରନ୍ତର ଆଶୀର୍ବାଦକୁ ଶ୍ରେୟ ଦେଇଥିଲେ ଏବଂ ବିଜେପି, ଏନଡିଏ ଏବଂ ଗଣତନ୍ତ୍ରରେ ବିଶ୍ୱାସ କରୁଥିବା ଲୋକଙ୍କ ପ୍ରତି କୃତଜ୍ଞତା ପ୍ରକାଶ କରିଥିଲେ ପ୍ରଧାନମନ୍ତ୍ରୀ ।

ପ୍ରଧାନମନ୍ତ୍ରୀ ମୋଦୀ କହିଛନ୍ତି,ସେ କୋଟି କୋଟି ଭାରତୀୟଙ୍କ ପାଇଁ ପ୍ରାର୍ଥନା କରିଛନ୍ତି ।  ଈଶ୍ୱର ତାଙ୍କୁ ଦେଶ ପାଇଁ ଆହୁରି ଅଧିକ ଶକ୍ତି ସହିତ କାମ କରିବା ଏବଂ ଦିନରାତି ତାଙ୍କ ସହ ନାଗରିକଙ୍କ ସମେତ ସମସ୍ତଙ୍କ ସେବା କରିବା ପାଇଁ ଶକ୍ତି ଦିଅନ୍ତୁ । ଆଜି ସେ ଯାହା ଅଛନ୍ତି ସେଥିରେ ଜନସାଧାରଣ ହିଁ ସର୍ବଶ୍ରେଷ୍ଠ ଅବଦାନକାରୀ ।“ମୁଁ ଏବେ ବି ନିଜକୁ ଜଣେ ଛାତ୍ର ବୋଲି ଭାବୁଛି।” ୨୫ ବର୍ଷର ଜନସାଧାରଣଙ୍କ ବିଶ୍ୱାସ ଏବଂ ୨୫ ବର୍ଷର ଅଭିଜ୍ଞତା ଏକ ମହାନ ସମ୍ପତ୍ତି ବୋଲି ପ୍ରଧାନମନ୍ତ୍ରୀ  କହିଛନ୍ତି ।

ସେହିପରି,ଲାଲକିଲ୍ଲାରୁ ପ୍ରଧାନମନ୍ତ୍ରୀ ‘ସବକା ପ୍ରୟାସ’ ଆହ୍ବାନକୁ ମନେ ପକାଇ କହିଛନ୍ତି ,ଦେଶ ତାଙ୍କୁ ବହୁତ କିଛି ଦେଇଛି। ତେଣୁ, ଦେଶ ତାଙ୍କ ପାଇଁ ସବୁକିଛି। ଦେଶର ନାଗରିକମାନଙ୍କର ତାଙ୍କ ଉପରେ ସବୁଠାରୁ ଅଧିକ ଅଧିକାର ଅଛି । ଭାରତକୁ ନୂଆ ଉଚ୍ଚତାକୁ ନେବା ପାଇଁ ଦେଶବାସୀଙ୍କ ମନରେ ଦୃଢ଼ ସଂକଳ୍ପ ରହିବା ଆବଶ୍ୟକ । ଆମେ କରି ଦେଖାଇବୁ। ବିକଶିତ ଭାରତ-୨୦୪୭, ଆମେ କରି ଦେଖାଇବୁ। ଏହି ସଂକଳ୍ପ ସହ ଦେଶକୁ ଆଗକୁ ନେବା ପାଇଁ ସମସ୍ତେ ମିଳିତ ଭାବେ କାମ କରିବାକୁ ସେ ଆହ୍ବାନ ଦେଇଛନ୍ତି

ଅନ୍ୟପଟେ, ଆଜି ପ୍ରଧନମନ୍ତ୍ରୀଙ୍କ ୨୫ବର୍ଷ ପୂର୍ତ୍ତି ଅବସରରେ ଓଡ଼ିଶାରେ ହେବ ସ୍ୱତନ୍ତ୍ର ଆୟୋଜନ। ରାଜ୍ୟର ୩୧ଟି ସାଂଗଠନିକ ଜିଲ୍ଲାରେ ଲୋକଙ୍କ ସହ ଯୋଡ଼ିହେବା ପାଇଁ ଆୟୋଜିତ କାର୍ଯ୍ୟକ୍ରମରେ ମନ୍ତ୍ରୀ, ସାଂସଦ ଓ ବିଧାୟକମାନେ ସାମିଲ ହେବେ। ଖୋର୍ଦ୍ଧାରେ ମୁଖ୍ୟମନ୍ତ୍ରୀ ମୋହନ ମାଝୀ ଏବଂ ଭୁବନେଶ୍ୱରରେ ମନମୋହନ ସାମଲ ଉପସ୍ଥିତ ରହିବେ। ତେବେ ମୋଦିଙ୍କ ୨୫ ବର୍ଷର ଜନସେବାକୁ ନେଇ ଏହି ଆୟୋଜନରେ କ’ଣ ରହିଛି ବିଶେଷ କାର୍ଯ୍ୟକ୍ରମ, ତାହା ଉପରେ ରହିଛି ସମସ୍ତଙ୍କ ନଜର ।

ଆମେରିକୀୟ ରୋବୋଟିକ୍ସ କମ୍ପାନୀ 'ଫିଗର ଏଆଇ' ନିଜର ପୁରୁଣା 'ଏଫ୍.୦୨' ମଡେଲ ରୋବୋଟଗୁଡ଼ିକୁ ସେବାରୁ ହଟାଇବା ପାଇଁ ଏକ ଅଜବ ପ୍ରକ୍ରିୟାର ଆରମ୍ଭ କରିଛି । ସୂଚନା ଅନୁସାରେ ତରଳ ନିଆଁ କୁଣ୍ଡକୁ ଡେଇଁ ନିଜକୁ ନଷ୍ଟ କରିବାକୁ ଉକ୍ତ ରୋବଟ ଗୁଡିକୁ ପ୍ରୋଗ୍ରାମିଂ କରାଯାଇଛି । କମ୍ପାନୀରେ ନୂତନ ପିଢ଼ିର 'ଏଫ୍.୦୩' ରୋବୋଟ୍ ସଂଖ୍ୟା ବୃଦ୍ଧି ପାଇବା ପରେ ଏହି ପୁରୁଣା ରୋବୋଟଗୁଡ଼ିକ ଅନାବଶ୍ୟକ ହୋଇପଡ଼ିଥିଲେ । କମ୍ପାନୀର ଗୁପ୍ତ ପ୍ରଯୁକ୍ତିବିଦ୍ୟା ସୁରକ୍ଷିତ ରଖିବା ପାଇଁ ଏଗୁଡ଼ିକୁ ଅନ୍ୟ କୌଣସି ସଂସ୍ଥାକୁ ହସ୍ତାନ୍ତର କରାଯାଇପାରିନଥିଲା । ସେହିଭଳି ହାତରେ ଅଲଗା କରି ଭାଙ୍ଗିବା ପାଇଁ ଅଧିକ କର୍ମଚାରୀ ଓ ସମୟର ଆବଶ୍ୟକତା ଥିବାରୁ ଏଭଳି ଅଜବ କୋଡିଂ ପ୍ରସ୍ତୁତ କରାଯାଇଛି । ଏହି ସମସ୍ୟାର ସମାଧାନ ପାଇଁ କମ୍ପାନୀର ସିଇଓ ବ୍ରେଟ୍ ଆଡକକ୍ ସୋସିଆଲ ମିଡିଆ ପ୍ଲାଟଫର୍ମ 'ଏକ୍ସ'ରେ ପରାମର୍ଶ ମାଗିବାରୁ ହଲିଉଡ୍ ଅଭିନେତା ଆର୍ନୋଲ୍ଡ ଶ୍ୱାର୍ଜନେଗର "ସେଗୁଡ଼ିକୁ ତରଳାଇ ଦିଅ" ବୋଲି ଅଜବ ପରାମର୍ଶ ଦେଇଥିଲେ । ଏହି ପରାମର୍ଶକୁ ଗ୍ରହଣ କରି କମ୍ପାନୀ ପକ୍ଷରୁ ଏଫ୍.୦୨ ରୋବୋଟଗୁଡ଼ିକୁ ଫିନଲ୍ୟାଣ୍ଡସ୍ଥିତ ଏକ ଫାଉଣ୍ଡ୍ରିକୁ ନିଆଯାଇ ୭୫ ଟନ୍ ଅଗ୍ନିକୁଣ୍ଡକୁ ଡେଇଁ ନିଜକୁ ସମ୍ପୂର୍ଣ୍ଣ ଭାବେ ନଷ୍ଟ କରିବାକୁ ନିର୍ଦ୍ଦେଶ ଦିଆଯାଇଥିଲା । ଯାହା ବର୍ତ୍ତମାନ ସୋସିଆଲ ମିଡିଆରେ ରୋବୋଟଙ୍କ ଆତ୍ମହତ୍ୟା ନାମରେ ଚର୍ଚ୍ଚାର ବିଷୟ ପାଲଟିଛି ।

ବଲିଉଡ୍ ଅଭିନେତ୍ରୀ ରକୁଲ ପ୍ରୀତ ସିଂହ ନିଜ ବାସଭବନରେ ଆୟକର ବିଭାଗ ଚଢ଼ାଉ କରିଥିବା ନେଇ ଗଣମାଧ୍ୟମରେ ପ୍ରକାଶିତ ଖବରକୁ ଦୃଢ଼ ଭାବେ ଖଣ୍ଡନ କରିଛନ୍ତି । ଏହାକୁ ସମ୍ପୂର୍ଣ୍ଣ ଭିତ୍ତିହୀନ ଓ ଉଦ୍ଦେଶ୍ୟମୂଳକ ବୋଲି ସେ ମତ ରଖିଛନ୍ତି । ନିକଟରେ ଚଳଚ୍ଚିତ୍ର ଇନଭେଷ୍ଟମେଣ୍ଟ ଓ ବେଆଇନ ବୈଦେଶିକ କାରବାର ଅଭିଯୋଗକୁ ନେଇ ରକୁଲ ଓ ତାଙ୍କ ଶ୍ୱଶୁର ତଥା ପ୍ରଖ୍ୟାତ ପ୍ରଯୋଜକ ବାସୁ ଭଗନାନୀଙ୍କ ସହ ଜଡ଼ିତ ୧୨ଟି ସ୍ଥାନରେ ଆୟକର ଚଢ଼ାଉ ହୋଇଥିବା ନେଇ ଚର୍ଚ୍ଚା ଜୋର ଧରିଥିଲା । ସୋସିଆଲ ମିଡିଆରେ ପୋଷ୍ଟ କରି ରକୁଲ ସ୍ପଷ୍ଟ କରିଛନ୍ତି ଯେ ଏହି ତଦନ୍ତ କିମ୍ବା ଚଢ଼ାଉ ସହ ତାଙ୍କର କୌଣସି ସମ୍ପର୍କ ନାହିଁ। ସତକଣ ନଜାଣି କେବଳ ସେନ୍ସେସନ୍ ପାଇଁ ଏଭଳି ଗୁଜବ ପ୍ରଚାର କରାଯାଉଥିବାରୁ ଗଣମାଧ୍ୟମର ଦାୟିତ୍ୱହୀନତାକୁ କଡ଼ା ଭାଷାରେ ସେ ସମାଲୋଚନା କରିଛନ୍ତି । ସେ ୨୦ ବର୍ଷ ବୟସରୁ ଜଣେ ଦାୟିତ୍ୱବାନ୍ ନାଗରିକ ଭାବେ ନିୟମିତ କର ପରିଶୋଧ କରି ନିଜ ପରିଶ୍ରମ ବଳରେ ଏଠାରେ ପହଞ୍ଚିଛନ୍ତି ବୋଲି ରକୁଲ ମତ ଦେଇଛନ୍ତି । କୌଣସି ବେଆଇନ ଆର୍ଥିକ କାରବାର, ବେନାମୀ ସମ୍ପତ୍ତି କିମ୍ବା ମୂଲ୍ୟବାନ୍ ଉପହାର କାରବାରରେ ସେ ଆଦୌ ସଂପୃକ୍ତ ନୁହନ୍ତି ବୋଲି ସ୍ପଷ୍ଟ କରିଛନ୍ତି । ଏହାସହ ବ୍ୟବସାୟିକ ଚାପ ଆଳରେ କାହାର ପ୍ରତିଷ୍ଠା ଓ ଜୀବିକାକୁ ଆଘାତ ନପହଞ୍ଚାଇବାକୁ ସେ ଗଣମାଧ୍ୟମଗୁଡ଼ିକୁ ନିବେଦନ କରିଛନ୍ତି। ଅନ୍ୟପଟେ, ପୂର୍ବରୁ ସୁଶାନ୍ତ ସିଂହ ରାଜପୁତ ମାମଲା, ଟଲିଉଡ୍ ଡ୍ରଗ୍ସ ମାମଲାରେ ଇଡିର ପଚରାଉଚରା ଏବଂ ନିକଟରେ ୨୦୨୫ ଡିସେମ୍ବରରେ ତାଙ୍କ ଭାଇ ଅମନ ପ୍ରୀତ ସିଂହଙ୍କ ଡ୍ରଗ୍ସ ମାମଲାରେ ଗିରଫଦାରୀ ପରି ବିବାଦ ସହ ତାଙ୍କ ନାମ ଯୋଡ଼ି ହୋଇଥିବା ଦେଖିବାକୁ ମିଳିଥିଲା । ବର୍ତ୍ତମାନର ଆୟକର ଚଢ଼ାଉ ଖବରକୁ ସେ ସମ୍ପୂର୍ଣ୍ଣ ଗୁଜବ ବୋଲି ଦର୍ଶାଇଛନ୍ତି ।

ଭୁବନେଶ୍ୱର : ଆସନ୍ତା ୮ ତାରିଖ ୧୨ ଘଣ୍ଟିଆ ଓଡ଼ିଶା ବନ୍ଦ । ଇଣ୍ଡିଆ ବ୍ଲକ୍ ଏବଂ କଂଗ୍ରେସ ପକ୍ଷରୁ ସକାଳ ୬ଟାରୁ ସନ୍ଧ୍ୟା ୬ଟା ପର୍ଯ୍ୟନ୍ତ ଏହି ବନ୍ଦ ଡାକରା ଦିଆଯାଇଛି । MMDR ଆଇନ ସଂଶୋଧନ ପ୍ରତ୍ୟାହାର, ପାଠ୍ୟପୁସ୍ତକ ତ୍ରୁଟି ଏବଂ ବନ୍ୟା ସହାୟତା ଭଳି ୪ ଦଫା ଦାବିକୁ ନେଇ ଏହି ରାଜ୍ୟବ୍ୟାପୀ ଆନ୍ଦୋଳନର ଆହ୍ୱାନ କରାଯାଇଛି । ସେପଟେ, ନିର୍ବାଚନ କମିଶନର (CEC) ଜ୍ଞାନେଶ କୁମାରଙ୍କ ଇସ୍ତଫା ଦାବିରେ ଦେଶବ୍ୟାପୀ ପ୍ରତିବାଦ କରୁଛନ୍ତି ବିରୋଧୀ ।

ବନ୍ଦ ସମୟରେ ରେଳ, ବସ୍ ଓ ଅନ୍ୟାନ୍ୟ ସରକାରୀ ବେସରକାରୀ ଯାନବାହନ ଚଳାଚଳ ବନ୍ଦ କରିବାକୁ ଆହ୍ୱାନ ଦିଆଯାଇଛି । ତେବେ ହସ୍ପିଟାଲ, ଆମ୍ବୁଲାନ୍ସ, ମେଡିକାଲ ଷ୍ଟୋର ସମେତ ସମସ୍ତ ଜରୁରୀକାଳୀନ ସେବାକୁ ବନ୍ଦରୁ ବାଦ ଦିଆଯିବ । ଏହାସହ ଅଷ୍ଟମ ଓ ନବମ ଶ୍ରେଣୀର ପରୀକ୍ଷା ଦେଉଥିବା ଛାତ୍ରଛାତ୍ରୀଙ୍କୁ କୌଣସି ଅସୁବିଧା ନହୁଏ ଧ୍ୟାନ ଦିଆଯିବ ।

ସେହିପରି, ଓଡ଼ିଶା ବନ୍ଦ ଡାକରା ସତ୍ତ୍ୱେ ପୂର୍ବ ନିର୍ଦ୍ଧାରିତ ସୂଚୀ ଅନୁଯାୟୀ ହେବ D.El.Ed. ପରୀକ୍ଷା। ଆସନ୍ତା ଅକ୍ଟୋବର ୮ ତାରିଖରେ ହେବାକୁ ଥିବା ପରୀକ୍ଷା ବାତିଲ କିମ୍ବା ଘୁଞ୍ଚିବା ନେଇ ହେଉଥିବା ଗୁଜବରେ ବିରାମ ଲଗାଇଛି ମାଧ୍ୟମିକ ଶିକ୍ଷା ପରିଷଦ । ବୋର୍ଡ ପକ୍ଷରୁ ସ୍ପଷ୍ଟ କରାଯାଇଛି ଯେ, ଓଡ଼ିଶା ବନ୍ଦ ପାଇଁ D.El.Ed. ପରୀକ୍ଷା ବାତିଲ ହେବ ନାହିଁ କିମ୍ବା ଘୁଞ୍ଚାଯିବ ନାହିଁ। ପୂର୍ବ ନିର୍ଦ୍ଧାରିତ ସୂଚୀ ଅନୁଯାୟୀ ପରୀକ୍ଷା ଚାଲୁ ରହିବ। D.El.Ed. ପରୀକ୍ଷା-୨୦୨୬ ଅକ୍ଟୋବର ୩ ତାରିଖରୁ ଆରମ୍ଭ ହୋଇଥିବା ବେଳେ ଅକ୍ଟୋବର ୧୬ ପର୍ଯ୍ୟନ୍ତ ଚାଲିବ।  ଏ ପର୍ଯ୍ୟନ୍ତ ୩ଟି ପେପର ପରୀକ୍ଷା ଶେଷ ହୋଇଛି। ଅକ୍ଟୋବର ୮ ତାରିଖରେ ୪ର୍ଥ ପେପର ପରୀକ୍ଷା ହେବ। ଏହାପରେ ଆଉ ୬ଟି ପେପର ପରୀକ୍ଷା ବାକି ରହିଛି। ଅକ୍ଟୋବର ୮ ତାରିଖର ପରୀକ୍ଷା ସକାଳ ୯ଟାରୁ ମଧ୍ୟାହ୍ନ ୧୨ଟା ପର୍ଯ୍ୟନ୍ତ ହେବ। ତେବେ ଓଡ଼ିଶା ବନ୍ଦ ଯୋଗୁଁ ଯାତାୟାତରେ ସମସ୍ୟା ହୋଇପାରେ। ତେଣୁ ପରୀକ୍ଷାର୍ଥୀମାନେ ସକାଳ ୮ଟା ସୁଦ୍ଧା ନିଜ ନିଜ ପରୀକ୍ଷା କେନ୍ଦ୍ରରେ ପହଞ୍ଚିବାକୁ ବୋର୍ଡ ପକ୍ଷରୁ ପରାମର୍ଶ ଦିଆଯାଇଛି।

କଣ ବନ୍ଦ ଓ କଣ ଖୋଲା ରହିବ :

ବନ୍ଦ ସମୟରେ ବସ୍, ଟ୍ରକ୍, ଅଟୋ ସମେତ ସାଧାରଣ ପରିବହନ, ବ୍ୟବସାୟିକ ପ୍ରତିଷ୍ଠାନ, ଅଦାଲତ, ବଜାର, ଦୋକାନ ଏବଂ ସରକାରୀ ଓ ବେସରକାରୀ କାର୍ଯ୍ୟାଳୟ ବନ୍ଦ ରହିବା ପାଇଁ ସହଯୋଗ କରିବାକୁ ଆହ୍ୱାନ ଦିଆଯାଇଛି । ହସ୍ପିଟାଲ, ଆମ୍ବୁଲାନ୍ସ, ଅଗ୍ନିଶମ ସେବା, ଔଷଧ ଦୋକାନ, ଦୁଗ୍ଧ ଯୋଗାଣ ଓ ଅନ୍ୟାନ୍ୟ ଅତ୍ୟାବଶ୍ୟକ ସେବାକୁ ବନ୍ଦ ପରିସରରୁ ବାଦ ଦିଆଯିବ । ଇଣ୍ଡିଆ ବ୍ଲକ ରାଜ୍ୟର ସମସ୍ତ ଗଣତାନ୍ତ୍ରିକ ଓ ଧର୍ମନିରପେକ୍ଷ ଦଳ, ଶ୍ରମିକ କୃଷକ ସଂଗଠନ, ଛାତ୍ର-ଯୁବ ସଂଗଠନ, ଓକିଲ ସଂଘ, ବ୍ୟବସାୟୀ ସମୁଦାୟ ଓ ସାଧାରଣ ଜନତାଙ୍କୁ ୮ ଅକ୍ଟୋବର ଓଡ଼ିଶା ବନ୍ଦକୁ ସଫଳ କରି ଗଣତାନ୍ତ୍ରିକ ପ୍ରତିବାଦକୁ ଶକ୍ତିଶାଳୀ କରିବାକୁ ଆହ୍ୱାନ ଜଣାଇଛି ।

ଭୁବନେଶ୍ବର :ଏସଆଇଆର (SIR) ପ୍ରକ୍ରିୟାରୁ ବାଦ୍ ପଡ଼ିଥିବା ଭୋଟରଙ୍କ ପାଇଁ ଆଉ ଏକ ସୁଯୋଗ । ଓଡ଼ିଶାର ମୁଖ୍ୟ ନିର୍ବାଚନ ଅଧିକାରୀ (CEO) ସ୍ପେଶାଲ ଇଣ୍ଟେନସିଭ୍ ରିଭିଜନ ତାଲିକାରୁ ବାଦ ପଡ଼ିଥିବା ଯୋଗ୍ୟ ଭୋଟରଙ୍କ ନାମ ପୁନର୍ବାର ଯୋଡ଼ିବା ପାଇଁ ଆଜିଠାରୁ ରାଜ୍ୟବ୍ୟାପୀ ଏକ ୩ ଦିନିଆ ସ୍ୱତନ୍ତ୍ର ଅଭିଯାନ ଆରମ୍ଭ ହୋଇଛି  । ୭, ୮ ଓ ୯ ତାରିଖ ୩ଦିନ ରାଜ୍ୟବ୍ୟାପି ଚାଲିବ ସ୍ୱତନ୍ତ୍ର ଅଭିଯାନ । 

ଏହି ଅନୁସାରେ, ୧ ଅକ୍ଟୋବର ୨୦୨୬ ସୁଦ୍ଧା ୧୮ ବର୍ଷ ବୟସ ପୂରଣ କରିଥିବା ଯୁବକ-ଯୁବତୀ କରିପାରିବେ ଆବେଦନ । ମୃତ, ସ୍ଥାନାନ୍ତରିତ, ଅନୁପସ୍ଥିତ ଓ ଦୋହରା ଭୋଟରଙ୍କ ତାଲିକା CEO ଓଡ଼ିଶା ଓ ସମ୍ପୃକ୍ତ  ଜିଲ୍ଲା ୱେବସାଇଟ ରେ ଉପଲବ୍ଧ ହେବ । ଭୋଟର ତାଲିକାକୁ ଅଧିକ ସଠିକ, ସ୍ୱଚ୍ଛ ଓ ଅଦ୍ୟତନ କରିବା ଉଦ୍ଦେଶ୍ୟରେ ଆଜିଠାରୁ ରାଜ୍ୟରେ ସ୍ୱତନ୍ତ୍ର ଅଭିଯାନ ଆରମ୍ଭ ହେଉଛି । 

ଆପଣ ଆପଣଙ୍କ ସ୍ଥାନୀୟ ବୁଥ୍ ସ୍ତରୀୟ ଅଧିକାରୀ (BLO) ଙ୍କ ନିକଟକୁ ଯାଇ ଫର୍ମ-୬ (Form-6) ପୂରଣ କରି ଜମା କରିପାରିବେ କିମ୍ବା ଆପଣ ନିର୍ବାଚନ କମିଶନଙ୍କ ଅଫିସିଆଲ୍ ECI Citizen Service Portal କୁ ଯାଇ ନିଜେ ମଧ୍ୟ ଅନଲାଇନ୍‌ରେ ଫର୍ମ-୬ ଆବେଦନ କରିପାରିବେ। 

ସେହିପରି ,ଯେଉଁ ଯୋଗ୍ୟ ଭୋଟରମାନଙ୍କ ନାମ କୌଣସି କାରଣରୁ ଚୂଡ଼ାନ୍ତ ଭୋଟର ତାଲିକାରେ ସାମିଲ ହୋଇପାରି ନାହିଁ , ସେମାନେ ମଧ୍ୟ ଏହି ସ୍ୱତନ୍ତ୍ର ଅଭିଯାନ ସମୟରେ ନିଜ ନାମ ଯୋଡ଼ିବା ପାଇଁ ଆବେଦନ କରିପାରିବେ । ସଂଶୋଧନ ପ୍ରକ୍ରିୟାରେ ଚିହ୍ନଟ ହୋଇଥିବା ମୃତ, ସ୍ଥାନାନ୍ତରିତ, ଅନୁପସ୍ଥିତ ଓ ଦୋହରା ଭୋଟରମାନଙ୍କ ସମ୍ପର୍କିତ ତାଲିକା ସମ୍ପୃକ୍ତ ଜିଲ୍ଲା  ଏବଂ CEO ଓଡ଼ିଶାଙ୍କ ୱେବସାଇଟରେ ଉପଲବ୍ଧ କରାଯିବ ।

 BLO ମାନଙ୍କୁ ନିଜ ନିଜ ଅଧୀନସ୍ଥ ଅଞ୍ଚଳରେ ଭୋଟର ତାଲିକାରେ ବାଦ୍ ପଡିଥିବା ଯୋଗ୍ୟ ଭୋଟର ନାମ ଓ ନୂତନ ଯୁବ ଭୋଟର ଙ୍କ ନାମ ପଞ୍ଜୀକରଣରେ ଆବଶ୍ୟକ ସହଯୋଗ ଓ ମାର୍ଗଦର୍ଶନ ପ୍ରଦାନ କରିବାକୁ ନିର୍ଦ୍ଦେଶ ଦିଆଯାଇଛି । ନାମ ଯୋଡ଼ିବାକୁ ଇଛୁକ ଯୋଗ୍ୟ ଭୋଟରମାନେ ନିଜ ନିଜ ବୁଥ୍‌ ସ୍ତରୀୟ ଅଧିକାରୀଙ୍କ ସହ ଯୋଗାଯୋଗ କରି ଆବେଦନ ପ୍ରକ୍ରିୟା ସମ୍ପର୍କରେ ସହାୟତା ନେଇପାରିବେ ।

ସୂଚନାନୁସାରେ, ଆପଣଙ୍କ ନାମ ତାଲିକାରେ ଅଛି କି ନାହିଁ ତାହା ଜାଣିବା ପାଇଁ CEO Odisha Portal କିମ୍ବା ନିଜ ଜିଲ୍ଲାର ୱେବସାଇଟ୍‌ରେ ଉପଲବ୍ଧ 'ASDD ଲିଷ୍ଟ' (Absent, Shifted, Dead, Duplicate) ଯାଞ୍ଚ କରିପାରିବେ ।

ଭୁବନେଶ୍ୱର : ବୃଦ୍ଧି ପାଇଲା ରେପୋ ରେଟ୍‌ । ଭାରତୀୟ ରିଜର୍ଭ ବ୍ୟାଙ୍କ (RBI) ଏହାର ଦ୍ୱିମାସିକ ମୁଦ୍ରାନୀତି ସମୀକ୍ଷା ବୈଠକରେ ରେପୋ ରେଟ୍‌କୁ ୨୫ ବେସିସ୍ ପଏଣ୍ଟ (୦.୨୫%) ବୃଦ୍ଧି କରିଛି। ଏହି ନିଷ୍ପତ୍ତି ପରେ ବର୍ତ୍ତମାନର ରେପୋ ରେଟ୍‌ ୫.୨୫ ପ୍ରତିଶତରୁ ବଢ଼ି ୫.୫୦ ପ୍ରତିଶତରେ ପହଞ୍ଚିଛି। ପଶ୍ଚିମ ଏସିଆ ବିବାଦ ଯୋଗୁଁ ଆନ୍ତର୍ଜାତୀୟ ବଜାରରେ ଅଶୋଧିତ ତୈଳ ଦର ବୃଦ୍ଧି ଏବଂ ମୁଦ୍ରାସ୍ଫୀତି (inflation) ଚାପକୁ ନିୟନ୍ତ୍ରଣ କରିବା ପାଇଁ ଆରବିଆଇ ଗଭର୍ଣ୍ଣର ସଞ୍ଜୟ ମାଲହୋତ୍ରାଙ୍କ ନେତୃତ୍ୱରେ ଏହି ନିଷ୍ପତ୍ତି ନିଆଯାଇଛି । ଦୀର୍ଘ ସାଢ଼େ ତିନି ବର୍ଷର ବ୍ୟବଧାନ ପରେ ଆରବିଆଇ ପ୍ରଥମ ଥର ପାଇଁ ସୁଧ ହାରରେ ଏଭଳି ବୃଦ୍ଧି କରିଛି ।  

ରେପୋ ରେଟ୍‌ ବଢ଼ିବା ଫଳରେ ବ୍ୟାଙ୍କଗୁଡ଼ିକ ପାଇଁ ଋଣ ନେବା ମହଙ୍ଗା ହୋଇପାରେ। ଏହାର ସିଧାସଳଖ ପ୍ରଭାବ ସାଧାରଣ ଲୋକଙ୍କ ଉପରେ ପଡ଼ିବାର ଆଶଙ୍କା ରହିଛି। କାରଣ ହୋମ୍‌ ଲୋନ୍‌, କାର୍‌ ଲୋନ୍‌ ଓ ପର୍ସନାଲ୍‌ ଲୋନ୍‌ର ସୁଧହାର ବଢ଼ିଲେ ଗ୍ରାହକଙ୍କ ମାସିକ କିସ୍ତି (EMI) ମଧ୍ୟ ମହଙ୍ଗା ହେବ ।

ଆସନ୍ତୁ ଜାଣିବା ରେପୋ ରେଟ୍‌ କ’ଣ? ରେପୋ ରେଟ୍‌ ହେଉଛି ସେହି ସୁଧ ହାର, ଯେଉଁ ହାରରେ ଆରବିଆଇ ବାଣିଜ୍ୟିକ ବ୍ୟାଙ୍କଗୁଡ଼ିକୁ ଅଳ୍ପ ସମୟ ପାଇଁ ଟଙ୍କା ଧାର ଦେଇଥାଏ। SBI, HDFC, ICICI ଭଳି ବ୍ୟାଙ୍କଗୁଡ଼ିକର ଋଣ ଖର୍ଚ୍ଚ ଉପରେ ଏହାର ପ୍ରଭାବ ପଡ଼ିପାରେ।  ରେପୋ ରେଟ୍‌ ବଢ଼ିଲେ ବ୍ୟାଙ୍କଗୁଡ଼ିକ ପାଇଁ ଆରବିଆଇଠାରୁ ଟଙ୍କା ଧାର କରିବା ମହଙ୍ଗା ହୋଇପାରେ । ଏହାର ପ୍ରଭାବରେ ବ୍ୟାଙ୍କଗୁଡ଼ିକ ନିଜର କିଛି ଋଣର ସୁଧ ହାର ବଢ଼ାଇପାରନ୍ତି । ଫଳରେ ହୋମ୍ ଲୋନ୍‌, କାର୍ ଲୋନ୍‌ କିମ୍ବା ପର୍ସନାଲ୍ ଲୋନ୍‌ ନେଇଥିବା ଗ୍ରାହକଙ୍କ EMI ବଢ଼ିବା କିମ୍ବା ଋଣର ଅବଧି ବଢ଼ିବାର ସମ୍ଭାବନା ରହିଥାଏ । ତେବେ ପ୍ରଭାବ କେତେ ହେବ, ତାହା ଋଣର ପ୍ରକାର, ସୁଧ ହାର ଏବଂ ବ୍ୟାଙ୍କର ରିସେଟ୍‌ ବ୍ୟବସ୍ଥା ଉପରେ ନିର୍ଭର କରେ ।