ବେଙ୍ଗାଲୁରୁ: କର୍ଣ୍ଣାଟକର ଉତ୍ତର କନ୍ନଡ଼ ଜିଲ୍ଲାରେ ଅତି ଦୁଃଖଦ ଘଟଣାକ୍ରମରେ ନଦୀରେ ଭାସିଯାଇ ୮ ଜଣଙ୍କର ମୃତ୍ୟୁ ଶିରାଳି ଗାଁର ୧୪ ଜଣ ଲୋକ ଥଟ୍ଟେ ହକ୍କଲୁ ନଦୀରେ ଶଙ୍ଖ-ଶାମୁକା ସଂଗ୍ରହ କରିବା‌ ପାଇଁ ଯାଇଥିଲେ। ଏହା ସ୍ଥାନୀୟ ସମୁଦାୟର ପାରମ୍ପରିକ କାର୍ଯ୍ୟ। କିନ୍ତୁ ନଦୀର ପ୍ରଖର ସୁଅରେ ୭ ମହିଳାଙ୍କ ସମେତ ୮ ଜଣ ଭାସିଯାଇ ମୃତ୍ୟୁବରଣ କରିଛନ୍ତି। ଅନ୍ୟ ଦୁଇଜଣ ଏପର୍ଯ୍ୟନ୍ତ ନିଖୋଜ ଅଛନ୍ତି। ପୁଲିସର କହିବା ଅନୁଯୟୀ, ଲୋକମାନେ ପାଣିର ଗଭୀରତା ଓ ପ୍ରବାହର ପ୍ରଖରତାକୁ ଠିକ୍‌ଭାବରେ ଆକଳନ କରିପାରି ନ ଥିଲେ। ପ୍ରଥମେ କିଛି ଲୋକ ପ୍ରବାହରେ ଭାସିଗଲେ, ପରେ ସେମାନଙ୍କୁ ବଞ୍ଚାଇବାକୁ ଯାଇ ଅନ୍ୟମାନେ ବୁଡ଼ି ଯାଇଥିଲେ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏହି ଦୁର୍ଘଟଣାରେ ଗଭୀର ଶୋକ ପ୍ରକାଶ କରିବା ସହ ମୃତକଙ୍କ ପରିବାରକୁ ୨ ଲକ୍ଷ କ୍ଷତିପୂରଣ ଘୋଷଣା କରିଛନ୍ତି।

କୋଲକାତା:  ପଶ୍ଚିମବଙ୍ଗ ବିଧାନସଭା ନିର୍ବାଚନରେ ତୃଣମୂଳ କଂଗ୍ରେସର ବଡ଼ଧରଣ ପରେ ଦଳରେ ବଡ଼ ଧରଣର ଅସ୍ଥିରତା ଦେଖାଯାଇଛି। ପୂର୍ବତନ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ଘନିଷ୍ଠ କୁହାଯାଉଥିବା ଲୋକସଭା ସାଂସଦ କାକଳି ଘୋଷ ଦସ୍ତିଦାର ବାରାସାତ୍‌ ଜିଲ୍ଲା କମିଟି ସଭାପତି ପଦରୁ ଇସ୍ତଫା ଦେଇଛନ୍ତି। ବିଧାନସଭା ନିର୍ବାଚନରେ ପରାଜୟ ପାଇଁ ଆଇପ୍ୟାକ୍‌କୁ ଦାୟୀ କରି କାକଳି ତାଙ୍କ ପଦରୁ ଇସ୍ତଫା ଦେଇଛନ୍ତି। ସେ କହିଛନ୍ତି, ଆଇପ୍ୟାକ୍‌ ଟିମ୍‌ ଦ୍ବାରା ତାଙ୍କ ଉପରେ ଚାପ ପକାଯାଇଥିଲା, ଯଦ୍ଦ୍ବାରା ଦଳର କାର୍ଯ୍ୟଧାରା ପ୍ରଭାବିତ ହୋଇଥିଲା।

କାକଳି ଚିଠି ଲେଖି ଜଣାଇଛନ୍ତି ଯେ, ଗତ କିଛି ଦିନ ହେଲା ପଶ୍ଚିମବଙ୍ଗରେ ଅପରାଧ ଓ ଦୁର୍ନୀତି ଘଟଣାକୁ ନେଇ ଲୋକଙ୍କ ମନରେ ସ୍ବାଭାବିକ ଭାବେ ପ୍ରଶ୍ନବାଚୀ ସୃଷ୍ଟି ହେବା ସହିତ ଭୟ ଦେଖାଯାଇଥିଲା। ଗଣତନ୍ତ୍ରରେ ଉତ୍ତରଦାୟୀ ହେବା, ଲୋକଙ୍କ ପ୍ରତି ଦାୟିତ୍ବବୋଧ ରହିବା ଓ ନୈତିକତାକୁ ଗୁରୁତ୍ବ ଦେବା ଜରୁରୀ। ବିଧାନସଭା ନିର୍ବାଚନରେ ଜିଲ୍ଲାରେ ଦଳ ଆଶା ଅନୁଯାୟୀ ପ୍ରଦର୍ଶନ କରି ନ ଥିଲା। ବାରାସାତରେ ଟିଏମ୍‌ସି ପରାଜୟ ପାଇଁ ସେ ନିଜକୁ ନୈତିକ ଭାବେ ଦାୟୀ କରି ଜିଲ୍ଲା କମିଟି ସଭାପତି ପଦରୁ ଇସ୍ତଫା ଦେଇଥିବା କହିଛନ୍ତି। ଉଲ୍ଲେଖଯୋଗ୍ୟ ଗତ  କିଛି ଦିନ ତଳେ ମମତା କାକଳିଙ୍କୁ ଲୋକସଭାରେ ଦଳର ମୁଖ୍ୟ ସଚେତକ ପଦରୁ ହଟେଇ କଲ୍ୟାଣ ବାନାର୍ଜୀଙ୍କୁ ପୁଣି ଥରେ ଏହି ଦାୟିତ୍ବ ଦେଇଥିବାବେଳେ କାକଳି ଏହାକୁ ନେଇ ଅସନ୍ତୁଷ୍ଟ ଥିଲେ।

କ୍ବେଟା: ପାକିସ୍ତାନର ଅଶାନ୍ତ ଦକ୍ଷିଣ-ପଶ୍ଚିମ ପ୍ରଦେଶ ବଲୁଚିସ୍ତାନରେ ସାମରିକ କର୍ମଚାରୀଙ୍କୁ ନେଇ ଯାଉଥିବା ଏକ ଟ୍ରେନକୁ ଟାର୍ଗେଟ୍ କରି ରବିବାର ହୋଇଥିବା ବିସ୍ଫୋରଣରେ ୨୪ ଜଣଙ୍କର ମୃତ୍ୟୁ ଘଟିଛି। ଏହି ବିସ୍ଫୋରଣରେ ଏକ ଟ୍ରେନ୍ ଆଂଶିକ କ୍ଷତିଗ୍ରସ୍ତ ହୋଇଥିବା ବେଳେ ସେହି ଅଞ୍ଚଳରେ ପାର୍କିଂ ହୋଇଥିବା ୧୦ଟି ଗାଡ଼ି ମଧ୍ୟ ଜଳିଯାଇଛି ବୋଲି ପୁଲିସ କହିଛି। ବିସ୍ଫୋରଣର ପ୍ରଭାବରେ ନିକଟସ୍ଥ କୋଠାଗୁଡ଼ିକର ଝରକା ଓ କାଚ ପ୍ୟାନେଲ୍ ଭାଙ୍ଗି ଯାଇଥିଲା`

ରବିବାର କ୍ୱେଟାର ଚମନ ଫାଟକ ରେଳ ଷ୍ଟେସନ ନିକଟରେ ଏହି ବିସ୍ଫୋରଣ ଘଟିଛି। ଏହି ବିସ୍ଫୋରଣରେ ଅନ୍ୟୂନ ୨୦ ଜଣ ଆହତ ହୋଇଥିବା ଉଦ୍ଧାରକାରୀ ଅଧିକାରୀ କହିଛନ୍ତି। ଏହି ଘଟଣା ପରେ କ୍ୱେଟାର ସରକାରୀ ଡାକ୍ତରଖାନାରେ ଜରୁରିକାଳୀନ ପରିସ୍ଥିତି ଘୋଷଣା କରାଯାଇଥିଲା। ବିସ୍ଫୋରଣ ପରେ ସତର୍କତାମୂଳକ ପଦକ୍ଷେପ ସ୍ୱରୂପ ପେଶାୱାର ଅଭିମୁଖେ ଯାଉଥିବା ଜାଫର ଏକ୍ସପ୍ରେସକୁ କ୍ୱେଟା ରେଳ ଷ୍ଟେସନରେ ଅଟକାଯାଇଥିଲା। ଗୃହମନ୍ତ୍ରୀଙ୍କ ମୁଖପାତ୍ର ବାବର ୟୁସୁଫଜାଇ କହିଛନ୍ତି ଯେ ସହରରେ ବିସ୍ଫୋରଣ ପରେ ସମସ୍ତ ସମ୍ପୃକ୍ତ ଅନୁଷ୍ଠାନକୁ ହାଇ ଆଲର୍ଟରେ ରଖାଯାଇଛି।ଉକ୍ତ ଆକ୍ରମଣ ପାଇଁ ବଲୋଚ୍ ଲିବରେସନ୍ ଆର୍ମି (ବିଏଲ୍‌ଏ) ନିଜକୁ ଦାୟୀ କରିଛି।

ମାନବ ସ୍ୱର ହେଉଛି ଆମ ବ୍ୟକ୍ତିତ୍ୱର ସବୁଠାରୁ ସ୍ୱତନ୍ତ୍ର ବୈଶିଷ୍ଟ୍ୟ, ଯାହାଦ୍ୱାରା ଜନଗହଳିପୂର୍ଣ୍ଣ ସ୍ଥାନରେ ମଧ୍ୟ ପରିଚିତ ଲୋକେ ଆମକୁ ତୁରନ୍ତ ଚିହ୍ନିପାରନ୍ତି । ତେବେ 'ନ୍ୟାସନାଲ ଲାଇବ୍ରେରୀ ଅଫ୍ ମେଡିସିନ୍'ରେ ପ୍ରକାଶିତ ଏକ ଅଧ୍ୟୟନ ଅନୁଯାୟୀ, ବିବର୍ତ୍ତନ ପ୍ରକ୍ରିୟାରେ ଅନ୍ୟ ମାଙ୍କଡ଼ ଓ ବାନରମାନଙ୍କଠାରେ ଦେଖାଯାଉଥିବା 'ଭୋକାଲ୍ ମେମ୍ବ୍ରେନ୍'  ଏବଂ ବାୟୁ ଥଳୀ ଗୁଡ଼ିକ ଶରୀରରୁ ବିଲୁପ୍ତ ହେବା ଫଳରେ ମଣିଷଠାରେ ଏକ ସ୍ଥିର ସ୍ୱର ପେଟିକା ବିକଶିତ ହୋଇଛି । ଯାହା କୋଳାହଳପୂର୍ଣ୍ଣ ଧ୍ୱନି ବଦଳରେ ସ୍ପଷ୍ଟ ଏବଂ ନିୟନ୍ତ୍ରିତ ସ୍ୱର ସୃଷ୍ଟି କରିବାରେ ସାହାଯ୍ୟ କରେ । ସ୍ୱରତନ୍ତ୍ରୀରୁ ବାହାରୁଥିବା ଏହି ଧ୍ୱନି ଗଳା, ପାଟି ଏବଂ ନାକ ରୂପକ ଇକୋ ଚାମ୍ବର ଦେଇ ଗତି କରିବା ସମୟରେ ଏକ ସ୍ୱତନ୍ତ୍ର ରୂପ ନେଇଥାଏ । ଏହି ପ୍ରକ୍ରିୟାରୁ ବଞ୍ଚିଯାଉଥିବା ସବୁଠାରୁ ସ୍ଥାୟୀ ଧ୍ୱନି ଆବୃତ୍ତିକୁ ବୈଜ୍ଞାନିକମାନେ "ଫର୍ମାଣ୍ଟସ୍" କହିଥାନ୍ତି, ଯାହା ପ୍ରତ୍ୟେକ ବ୍ୟକ୍ତିର ସ୍ୱରକୁ ଭିନ୍ନ କରିଥାଏ । ଏହି ଫର୍ମାଣ୍ଟସ୍ ସମ୍ପୂର୍ଣ୍ଣ ରୂପେ ବ୍ୟକ୍ତିର ସ୍ୱର ନଳୀର ଲମ୍ବ, ପାଟିର ଆକୃତି, ତାଳୁର ବକ୍ରତା, ଗଳାର ଗଭୀରତା, ମୁଣ୍ଡଖପୁରି  ଓ ସାଇନସ୍‌ର ଗଠନ ଉପରେ ନିର୍ଭର କରିଥାଏ । ସମାନ ଉଚ୍ଚତାର ଦୁଇଜଣ ପୁରୁଷ କିମ୍ବା ଶାରୀରିକ ଗଠନର ଭିନ୍ନତା ଯୋଗୁଁ ମହିଳା ଓ ପୁରୁଷଙ୍କ ସ୍ୱର ସମ୍ପୂର୍ଣ୍ଣ ଅଲଗା ଶୁଣାଯାଏ । ଏପରିକି ଏହି ଆନୁବଂଶିକ ଜିନ୍‌ଗୁଡ଼ିକର ପ୍ରଭାବ କାରଣରୁ ଗର୍ଭସ୍ଥ ଶିଶୁ ମଧ୍ୟ ନିଜ ମା'ର ସ୍ୱରକୁ ସହଜରେ ଚିହ୍ନି ପ୍ରତିକ୍ରିୟା ପ୍ରକାଶ କରିଥାଏ ।

ସାମଗ୍ରୀ _  କ୍ଷୀର ୪ଲିଟର, ଚିନି ୪କପ, କିସମିସ, ମଇଦା ଦୁଇ ଚାମଚ, ବେକିଂ ପାଉଡର ୧ ଚାମଚ, ଗୁଜୁରାତି ।

ପ୍ରଣାଳୀ _ ଅଧା କ୍ଷୀରରେ ଛେନା ଓ ଅଧା କ୍ଷୀରରେ ଖୁଆ ତିଆରି କରନ୍ତୁ । ବର୍ତ୍ତମାନ ଛେନା, ଖୁଆ, ମଇଦା, ବେକିଂ ପାଉଡରକୁ ମିଶାଇ ଭଲଭାବେ ଚକଟି ଦିଅନ୍ତୁ । ଏହି ଚକଟାରେ ଛୋଟଛୋଟ ଗୁଳା ତିଆରି କରି ଗୁଜୁରାତି ଗୁଣ୍ଡ ଓ କିସମିସ ଦେଇ ଗୋଲ କରନ୍ତୁ । ସିରା ପ୍ରସ୍ତୁତ କରନ୍ତୁ, ଛେନା ଗୁଳାକୁ ତେଲରେ ଛାଣନ୍ତୁ । ଏହା ବାଦାମୀରଙ୍ଗ ହୋଇଗଲେ ତେଲ କଢେଇରୁ କାଢି ସିରା କଢେଇରେ ପକାନ୍ତୁ । ପ୍ରସ୍ତୁତ ହୋଇଯିବ ଛେନା ଗୋଲାପ ଜାମୁ ।

ବଲିଉଡ୍ ଅଭିନେତ୍ରୀ ତଥା ବିଜେପି ସାଂସଦ କଙ୍ଗନା ରାନାୱତଙ୍କ ଗୁପ୍ତ ବିବାହକୁ ନେଇ ସୋସିଆଲ ମିଡିଆରେ ଚର୍ଚ୍ଚା ଜୋର ଧରିଛି । ନିକଟରେ ଏକ ଭାଇରାଲ୍ ଭିଡିଓରେ ସେ  ମଙ୍ଗଳସୂତ୍ର ଓ ସବୁଜ ଚୁଡ଼ି ପିନ୍ଧି ଏକ ପାରମ୍ପରିକ ବିବାହିତ ମହିଳା ରୂପରେ ନଜର ଆସିଥିଲେ, ଯାହାକୁ ଦେଖି ପ୍ରଶଂସକଙ୍କ ମଧ୍ୟରେ ତାଙ୍କ ଗୁପ୍ତ ବିବାହର ଗୁଜବ ସୃଷ୍ଟି ହୋଇଥିଲା । ତେବେ ଏହି ଆଲୋଚନା ଉପରେ ବିରାମ କଙ୍ଗନା ନିଜ ଇନଷ୍ଟାଗ୍ରାମ୍ ଷ୍ଟୋରିରେ ଲଗାଇଛନ୍ତି । କଙ୍ଗନା କହିଛନ୍ତି କି, ସେ ପ୍ରତିଦିନ ସହର ଓ ଏହାର ଆଖପାଖ ଅଞ୍ଚଳରେ ସୁଟିଂ କରୁଛନ୍ତି ଏବଂ ଚଳଚ୍ଚିତ୍ରର ଚରିତ୍ର ମେକଅପ୍‌ରେ କେହି ଜଣେ ତାଙ୍କର ଏହି ଫଟୋ ଉଠାଇ ଭାଇରାଲ୍ କରିଦେଇଛନ୍ତି । ଏହି କାରଣରୁ ତାଙ୍କ ପାଖକୁ ଅନେକ ଫୋନ କଲ୍ ଆସୁଛି, କିନ୍ତୁ ଜଣେ ଅଭିନେତ୍ରୀ ବିଭିନ୍ନ ପ୍ରକାରର ଭୂମିକା ଗ୍ରହଣ କରୁଥିବାରୁ ବିବାହିତ ମହିଳା ରୂପରେ ନଜର ଆସିବା କୌଣସି ବଡ଼ କଥା ନୁହେଁ ବୋଲି କଙ୍ଗନା ମତ ଦେଇଛନ୍ତି । ଏହାସହ ସେ କେବେହେଲେ ଲୁଚିଛପି ବିବାହ କରିବେ ନାହିଁ ବୋଲି ପ୍ରଶଂସକଙ୍କୁ ପ୍ରତିଶ୍ରୁତି ଦେଇଛନ୍ତି । ନିର୍ଦ୍ଦେଶକ ବିକାଶ ବହଲ ମଧ୍ୟ ଏହି ଖବରକୁ ନିଶ୍ଚିତ କରି କହିଛନ୍ତି ଯେ, ୨୦୧୪ ମସିହାର ସୁପରହିଟ୍ ଫିଲ୍ମ 'କ୍ୱିନ୍' ର ସିକ୍ୟୁଏଲ୍ 'କ୍ୱିନ୍ ୨'ର କାହାଣୀ ପ୍ରସ୍ତୁତ ହୋଇ ସୁଟିଂ ଆରମ୍ଭ ହୋଇସାରିଛି ଏବଂ ଏହା ସେହି ସେଟ୍‌ର ଲୁକ୍ ଅଟେ ।

ଟେକ୍ନୋଲୋଜି ଏବଂ ଭିତ୍ତିଭୂମି ବିକାଶ କ୍ଷେତ୍ରରେ ଚୀନ୍ ସାରା ବିଶ୍ୱକୁ ପୁଣି ଥରେ ଚକିତ କରିଦେଇଛି, ଯାହାକି ବର୍ତ୍ତମାନ ସାରା ବିଶ୍ୱରେ ଚର୍ଚ୍ଚାର ବିଷୟ ପାଲଟିଛି । ନିକଟରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ସହ ଚୀନ୍ ଗସ୍ତରେ ଯାଇଥିବା ବିଶିଷ୍ଟ କୋଟିପତି ତଥା ଉଦ୍ୟୋଗୀ ଏଲନ୍ ମସ୍କ ନିଜର ସୋସିଆଲ ମିଡିଆ ଆକାଉଣ୍ଟ 'X' ରେ ଚୀନ୍‌ର ଏକ ମେଗା ପ୍ରୋଜେକ୍ଟର ଭିଡିଓ ସେୟାର କରିଛନ୍ତି। ଯାହା ଚୀନ୍‌ର "ଚୋଙ୍ଗକିଙ୍ଗ୍ ଇଷ୍ଟ ରେଳଷ୍ଟେସନ"ର ଅଟେ । ଏହି ଷ୍ଟେସନକୁ ବର୍ତ୍ତମାନ ବିଶ୍ୱର ସବୁଠାରୁ ବଡ଼ ରେଳଷ୍ଟେସନ ବୋଲି କୁହାଯାଉଛି ଏବଂ ଏହାର ସବୁଠାରୁ ଆଶ୍ଚର୍ଯ୍ୟଜନକ କଥା ହେଉଛି ଯେ, ଏତେ ବଡ଼ ବିଶାଳ ଭିତ୍ତିଭୂମିକୁ ମାତ୍ର ୩୮ ମାସ ମଧ୍ୟରେ ସମ୍ପୂର୍ଣ୍ଣ ରୂପେ ପ୍ରସ୍ତୁତ କରାଯାଇଛି । ଯେଉଁଥିରେ ମଣିଷ ଅପେକ୍ଷା ଆର୍ଟିଫିସିଆଲ୍ ଇଣ୍ଟେଲିଜେନ୍ସ ବା ଏଆଇ ଚାଳିତ ରୋବୋଟ୍‌ମାନଙ୍କର ଗୁରୁତ୍ୱପୂର୍ଣ୍ଣ ଭୂମିକା ରହିଥିଲା । ଦକ୍ଷିଣ-ପଶ୍ଚିମ ଚୀନ୍‌ର ପ୍ରସିଦ୍ଧ ଚୋଙ୍ଗକିଙ୍ଗ୍ ସହରରେ ନିର୍ମିତ ଏହି ରେଳଷ୍ଟେସନ ପ୍ରାୟ ୧୨.୨ ଲକ୍ଷ ବର୍ଗ ମିଟର ଅଞ୍ଚଳରେ ପରିବ୍ୟାପ୍ତ ହୋଇଛି । ଉଲ୍ଲେଖଯୋଗ୍ୟ ଯେ, ଚୋଙ୍ଗକିଙ୍ଗ୍ ହେଉଛି ସେହି ଆଧୁନିକ ତଥା ଚମତ୍କାର ସହର ଯେଉଁଠାରେ ମେଟ୍ରୋ ଟ୍ରେନ୍‌ଗୁଡ଼ିକ ସିଧାସଳଖ ଆପାର୍ଟମେଣ୍ଟ ବିଲ୍ଡିଂ ଏବଂ ବହୁତଳ ପ୍ରାସାଦ ମଧ୍ୟ ଦେଇ ଗତି କରୁଥିବାର ଦେଖାଯାଏ । ବିଭିନ୍ନ ଆନ୍ତର୍ଜାତୀୟ ରିପୋର୍ଟ ଅନୁସାରେ, ଏହି ମେଗା ଷ୍ଟେସନର ନିର୍ମାଣ କାର୍ଯ୍ୟରେ ବହୁ ସଂଖ୍ୟାରେ ସ୍ୱୟଂଚାଳିତ ମେସିନ୍ ଏବଂ ରୋବୋଟ୍‌ଙ୍କର ଏକ ସମ୍ପୂର୍ଣ୍ଣ ସେନା ନିୟୋଜିତ କରାଯାଇଥିଲା, ଯାହା ଦ୍ୱାରା ଅତି କମ୍ ସମୟ ମଧ୍ୟରେ କାମ ଶେଷ ହୋଇପାରିଛି ।

ସୋସିଆଲ ମିଡିଆରେ ବର୍ତ୍ତମାନ ଜଣେ ଯୁବକଙ୍କ ଭିଡିଓ ବେଶ୍‌ ଭାଇରାଲ୍‌ ହେବାରେ ଲାଗିଛି, ଯେଉଁଥିରେ ସେ କେରଳରୁ ନେପାଳ ପର୍ଯ୍ୟନ୍ତ ଏକ ସ୍ୱତନ୍ତ୍ର ଧରଣର ଗୋଟିଏ ଚକ ବିଶିଷ୍ଟ ସାଇକେଲ୍‌ ଚଲାଇ ଯାଉଥିବା ଦେଖିବାକୁ ମିଳୁଛି । ଏହା କୌଣସି ସାଧାରଣ ସାଇକେଲ ନୁହେଁ, କାରଣ ଏହାର ଆଗ ପାର୍ଶ୍ୱଟି ଶୂନ୍ୟରେ ଉପରକୁ ଟେକି ହୋଇ ରହିଛି ଏବଂ ସେ କେବଳ ପଛ ଚକ ସାହାଯ୍ୟରେ ସମ୍ପୂର୍ଣ୍ଣ ଭାରସାମ୍ୟ ରକ୍ଷା କରି ରାସ୍ତାରେ ଆଗକୁ ବଢୁଛନ୍ତି । ଟ୍ରାଫିକ୍‌ ଜାମ୍‌ ଏବଂ ଖରାପ ରାସ୍ତା ସତ୍ତ୍ୱେ ମଧ୍ୟ ସେ ବିନା କୌଣସି ଭୟ କିମ୍ବା ଦ୍ୱିଧାରେ, ପୂର୍ଣ୍ଣ ଆତ୍ମବିଶ୍ୱାସର ସହ ଘଣ୍ଟା ଘଣ୍ଟା ଧରି ଏହିପରି ସାଇକେଲ୍ ଚଲାଇବା ଦେଖି ଲୋକେ ଆଶ୍ଚର୍ଯ୍ୟ ଚକିତ ହୋଇଯାଇଛନ୍ତି । ସୋସିଆଲ ମିଡିଆରେ ଏହାକୁ ନେଇ ୟୁଜର୍ସଙ୍କ ମଧ୍ୟରେ ଅନେକ ମଜାଦାର ପ୍ରତିକ୍ରିୟା ଦେଖିବାକୁ ମିଳୁଛି । ଅଦ୍ଭୁତ ସନ୍ତୁଳନ ଏବଂ ଦୁଃସାହସିକତାର ପ୍ରତୀକ ସାଜିଥିବା ଏହି ଯୁବକଙ୍କ ଯାତ୍ରା ଏବେ ସବୁଠି ଚର୍ଚ୍ଚାର ବିଷୟ ପାଲଟିଛି ।

 ଜ୍ୟେଷ୍ଠ (ମଳ)ଶୁକ୍ଳପକ୍ଷ ନବମୀ 

ମେଷ:  ସମ୍ପର୍କ ହାନି, ଅର୍ଥ ସମସ୍ୟା, ପାରିବାରିକ ସହଯୋଗ, ଶତ୍ରୁ ସମସ୍ୟା, ଶାରୀରିକ ସୁସ୍ଥତା, େଦବକାର୍ଯ୍ୟରେ ସନ୍ତୁଷ୍ଟ, ଦୂର ଯାତ୍ରା, ବ୍ୟବସାୟରେ ଶତ୍ରୁତା, ବନ୍ଧୁ ଲାଭ, ସନ୍ତାନ ଖୁସି, ଚିଡ଼ିଚିଡ଼ା ସ୍ବଭାବ ହେତୁ କଷ୍ଟ। ଅଶ୍ବିନ ନକ୍ଷତ୍ର- ସତର୍କ ରୁହନ୍ତୁ, ଶୁଭରଙ୍ଗ-ଧଳା, ସଂଖ୍ୟା-୬, ଆରାଧନା- ମହାଲକ୍ଷ୍ମୀ

ବୃଷ: ଭ୍ରମଣ କଷ୍ଟ, ନୂତନ କାର୍ଯ୍ୟ ଲାଭ, ଅତିଥÒ ସତ୍କାର, ପାରିବାରିକ ସମସ୍ୟା, କର୍ମକ୍ଷେତ୍ରରେ ସଫଳ, ପଦବୀ ଲାଭ, ଅନୁଷ୍ଠାନରୁ ଖୁସି, ମନ ଅସ୍ଥର, ବନ୍ଧୁ ଲାଭ, ଅର୍ଥ ସମସ୍ୟା, ସମ୍ପତ୍ତି ଲାଭ, ଶୁଭ ଖବର, ବିଦ୍ୟାରେ ସଫଳ। କୃତ୍ତିକା ନକ୍ଷତ୍ର- ସତର୍କ ରୁହନ୍ତୁ, ଶୁଭରଙ୍ଗ-ହଳଦୀ, ସଂଖ୍ୟା-୫, ଆରାଧନା- ମା’ ଭୁବନେଶ୍ବରୀ

ମିଥୁନ: କାର୍ଯ୍ୟରେ ସଫଳ, ନୂତନ ବନ୍ଧୁ ଲାଭ, ଶତ୍ରୁ ପରାଜିତ, ସମ୍ପତ୍ତି ଲାଭ, ବ୍ୟବସାୟିକ ଖୁସି, ଶାରୀରିକ ସୁସ୍ଥତା , ବିଶିଷ୍ଟ କାର୍ଯ୍ୟରେ ସଫଳ, ପୁରାତନ ବିବାଦ ସମାଧାନ, ଅର୍ଥ ଲାଭ, ଦାମ୍ପତ୍ୟ ଖୁସି, ସନ୍ତାନ ପ୍ରାପ୍ତି। ଆଦ୍ରା ନକ୍ଷତ୍ର- ସତର୍କ ରୁହନ୍ତୁ, ଶୁଭରଙ୍ଗ- ଧଳା, ସଂଖ୍ୟା-୮, ଆରାଧନା- ମା’ ଗୌରୀ

କର୍କଟ: ଅର୍ଥ ସମସ୍ୟା, ଦୂର ଯାତ୍ରା, ଅନୁଷ୍ଠାନରୁ ଲାଭ, ଶୁଭ ଖବର, ଯାନ୍ତ୍ରିକ ତ୍ରୁଟି, ବିଶିଷ୍ଟ ବ୍ୟକ୍ତିଙ୍କ ସାନିଧ୍ୟ, ବ୍ୟବସାୟରେ ସ୍ବଳ୍ପ ଲାଭ, ପାରିବାରିକ ସହଯୋଗ, ଶରିର ସୁସ୍ଥ, ସୁମିଷ୍ଟ ଭୋଜନ ପ୍ରାପ୍ତି, ସନ୍ତାନ ସମସ୍ୟା। ପୁଷ୍ୟା ନକ୍ଷତ୍ର- ସତର୍କ ରୁହନ୍ତୁ, ଶୁଭରଙ୍ଗ- ନାଲି, ସଂଖ୍ୟା-୬, ଆରାଧନା- ମା’ ମାଣିକେଶ୍ବରୀ

ସିଂହ: କାର୍ଯ୍ୟରେ ସଫଳ, ନୂତନ କାର୍ଯ୍ୟରେ ଲାଭ, ପାରିବାରିକ ଖୁସି, ମାନସିକ ଶାନ୍ତି, ଅର୍ଥ ଲାଭ, ଦ୍ରବ୍ୟ ପ୍ରାପ୍ତି, ବିବାଦ ସମାଧାନ, ନୂତନ ଚୁକ୍ତି, ସମ୍ପତ୍ତି ଲାଭ, କଳହ ସମାଧାନ, ଶୁଭ ଖବର, ପିଲାଙ୍କ ଚିନ୍ତା। ମଘା ନକ୍ଷତ୍ର- ସତର୍କ ରୁହନ୍ତୁ, ଶୁଭରଙ୍ଗ- ଧଳା, ସଂଖ୍ୟା-୧୨, ଆରାଧନା- ମା’ ଭଗବତୀ

କନ୍ୟା: ଅଯଥା ବ୍ୟୟ, କାର୍ଯ୍ୟ ବିଳମ୍ବ, ହଠାତ୍ ଦୂର ଯାତ୍ରା, ଉଚ୍ଚ ସ୍ଥାନରୁ ପତନ ଭୟ, ଲୋକସମ୍ପର୍କ ବୃଦ୍ଧ, ପୁରାତନ ମାମଲାରେ କଷ୍ଟ, ଅଳ୍ପ ଧନ ଲାଭ, ସୁମିଷ୍ଠ ଭୋଜନ ପ୍ରାପ୍ତି, ଶୁଭ ଖବର, ଦାମ୍ପତ୍ୟ ଖୁସି, ବିବାଦମୁକତ। ଉତ୍ତରାଫାଲ୍ଗୁନି ନକ୍ଷତ୍ର- ସତର୍କ ରୁହନ୍ତୁ, ଶୁଭରଙ୍ଗ- ଆକାଶି, ସଂଖ୍ୟା-୮, ଆରାଧନା- ଭଗବାନ ବିଷ୍ଣୁ

ତୁଳା: ଯାତ୍ରାରେ ସଫଳ, ସମ୍ମାନ ଲାଭ, ବନ୍ଧୁ ସମସ୍ୟା, ମାନସିକ ଶାନ୍ତି, ପଦବୀ ଲାଭ, ଗୃହେ ସହଯୋଗ, ଅର୍ଥ ଲାଭ, ମାମଲା ସମାଧାନ, ପାରିବାରିକ ଖୁସି, ବ୍ୟବସାୟରେ ଲାଭ, ପୁରାତନ ବନ୍ଧୁ ମିଳନ, ସନ୍ତାନ ଖୁସି।  ସ୍ବାତୀ ନକ୍ଷତ୍ର- ସତର୍କ ରୁହନ୍ତୁ, ଶୁଭରଙ୍ଗ-ନୀଳ, ସଂଖ୍ୟା-୯, ଆରାଧନା- ଶଙ୍କର ଭଗବାନ

ବିଛା: ଖୁସି ଖବର, ବ୍ୟବସାୟରେ ଲାଭ, ଅର୍ଥ ଲାଭ, ପାରିବାରିକ ସମସ୍ୟା, ପଦବୀ ଲାଭ, ଯାତ୍ରା ସଫଳ, ଆଶା ପୂର୍ଣ୍ଣ, ସମ୍ପତ୍ତି ଲାଭ, ଅଳ୍ପ ଶତ୍ରୁ ସମସ୍ୟା, ପୁରୁଣା ମାମଲାର ସମାଧାନ, ବନ୍ଧୁ ଲାଭ, ଦାମ୍ପତ୍ୟ ଖୁସି। ଅନୁରାଧା ନକ୍ଷତ୍ର- ସତର୍କ ରୁହନ୍ତୁ, ଶୁଭରଙ୍ଗ- ଧଳା, ସଂଖ୍ୟା-୧୦, ଆରାଧନା- ପ୍ରଭୁ ନୃସିଂହ

ଧନୁ: କାର୍ଯ୍ୟରେ ବାଧା, ଅର୍ଥ ସମସ୍ୟା, କର୍ମକ୍ଷେତ୍ରରେ ପରିଶ୍ରମ, ହେବା କାର୍ଯ୍ୟରେ ବିଳମ୍ବ, ମାନସିକ ଶାନ୍ତି, ବନ୍ଧୁ ସାହାଯ୍ୟ, ଉଚ୍ଚ ଆଶାରେ ବିଫଳ, େଲାକସମ୍ପର୍କ ବୃଦ୍ଧ, ବ୍ୟବସାୟିକ କଷ୍ଟ, ଧର୍ମ କାର୍ଯ୍ୟରେ ଉତ୍ସାହ, ପାରିବାରିକ ଖୁସି। ମୂଳା ନକ୍ଷତ୍ର- ସତର୍କ ରୁହନ୍ତୁ, ଶୁଭରଙ୍ଗ-ହଳଦୀ, ସଂଖ୍ୟା-୭, ପ୍ରତିକାର-ଗୁରୁଜନଙ୍କ ସେବା

ମକର: ଅପମାନ, ଶାରୀରିକ ଅସୁସ୍ଥ, ପାରିବାରିକ ଖୁସି, ଉଚ୍ଚ ଆଶା ବିଫଳ, େଦବ ଦର୍ଶନ, ଯାତ୍ରାରେ ସତର୍କ, ଦ୍ରବ୍ୟ ନଷ୍ଟ, ବ୍ୟବସାୟରେ ସ୍ବଳ୍ପ ଲାଭ, ବନ୍ଧୁ ଦର୍ଶନ, ଗୁରୁଜନଙ୍କ ଆଶୀର୍ବାଦ, ବିଦ୍ୟାରେ ସଫଳ।

ଉତ୍ତରାଷାଢ଼ା ନକ୍ଷତ୍ର- ସତର୍କ ରୁହନ୍ତୁ, ଶୁଭରଙ୍ଗ- ବାଇଗଣୀ, ସଂଖ୍ୟା-୬, ଆରାଧନା- ଲକ୍ଷ୍ମୀନାରାୟଣ

କୁମ୍ଭ: ପ୍ରୀତି ବୃଦ୍ଧ, କାର୍ଯ୍ୟରେ ସଫଳ, ବନ୍ଧୁ ଲାଭ, ଧର୍ମ କାର୍ଯ୍ୟରେ ସନ୍ତୁଷ୍ଟ, ପଦବୀ ଲାଭ, ବ୍ୟବସାୟରେ ଉନ୍ନତି, ଶାରୀରିକ ସୁସ୍ଥ, ଅର୍ଥ ଲାଭ, ସମ୍ପତ୍ତି କ୍ରୟ, ମାମଲାରେ ଖୁସି, ପାରିବାରିକ ଖୁସି, ଭ୍ରାତୃ ସ୍ନେହ। ଶତଭିଷା ନକ୍ଷତ୍ର- ସତର୍କ ରୁହନ୍ତୁ, ଶୁଭରଙ୍ଗ- କଳା, ସଂଖ୍ୟା-୬, ଆରାଧନା- ପ୍ରଭୁ ରାଧାବଲ୍ଲଭ।

ମୀନ: ଦ୍ରବ୍ୟ ଲାଭ, ପୁରାତନ ରୋଗରୁ ଉପସମ, ବ୍ୟବସାୟରେ ଲାଭ, ଅର୍ଥ ସମସ୍ୟା ସମାଧାନ, ସନ୍ତାନ ଖୁସି, ଶତ୍ରୁ ପରାଜିତ, ନୂତନ ସୁଯୋଗ ପ୍ରାପ୍ତି, ଯାନବାହନ କ୍ରୟ, ଶାରୀରିକ ସୁସ୍ଥ, ଦାମ୍ପତ୍ୟ ଖୁସି। ଉତ୍ତରାଭାଦ୍ର ନକ୍ଷତ୍ର- ସତର୍କ ରୁହନ୍ତୁ, ଶୁଭରଙ୍ଗ- ନାଲି, ସଂଖ୍ୟା-୮, ଆରାଧନା- ମା’ ବାଟମଙ୍ଗଳା

ଭୁବନେଶ୍ୱର : ରାଜଧାନୀ ଭୁବନେଶ୍ୱରରୁ ଜଣେ ନକଲି NIA ଅଧିକାରୀଙ୍କୁ ଗିରଫ କରିଛି କମିଶନରେଟ ପୋଲିସ । ଗିରଫ ବ୍ୟକ୍ତି ଜଣକ ହେଲେ ନୂଆଦିଲ୍ଲୀର ଆଶିଷ ରେଡ୍ଡୀ । ନିଜକୁ NIA ଅଧିକାରୀ ଦର୍ଶାଇ ଜଣେ ମହିଳାଙ୍କ କେଶରେ ତୁରନ୍ତ କାର୍ଯ୍ୟାନୁଷ୍ଠାନ ନେବାକୁ ଖାରବେଳ ନଗର ଥାନା ପୋଲିସ ଉପରେ ଚାପ ପକାଉଥିଲେ । ଗତକାଲି ତାଙ୍କୁ ଗିରଫ କରିବା ପରେ କୋର୍ଟରେ ହାଜର କରାଯାଇଥିଲା । ଜାମିନ ନାମଞ୍ଜୁର ପରେ ତାକୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି । ଏନେଇ ପୋଲିସ କମିଶନର ସୁରେଶ ଦେବଦତ୍ତ ସିଂ ସୂଚନା ଦେଇଛନ୍ତି ।

ପୋଲିସ ସୂଚନାନୁସାରେ, ଖାରବେଳ ନଗର ଥାନାରେ ଏକ ଦୁଷ୍କର୍ମ ମାମଲାରେ ଆଶିଷ ରେଡ୍ଡୀ ତାଙ୍କ ବାନ୍ଧବୀଙ୍କ ପାଇଁ ଅନ୍ୟ ଜଣେ ମହିଳାଙ୍କ ନାଁରେ ମିଛ କେଶ କରିବାକୁ ଆସି ଫସିଥିଲେ। ଖାରବେଳ ନଗର ଥାନରେ ସେ ନିଜକୁ NIA ଅଧିକାରୀ ବୋଲି କହି ଏକ ନକଲି ପରିଚୟ ପତ୍ର ଦେଖାଇଥିଲେ । ସେ ଆସିଥିବା ଗାଡ଼ିରେ ମଧ୍ୟ ଭାରତ ସରକାର ଓ ଗୃହ ମନ୍ତ୍ରଣାଳୟର ଷ୍ଟିକର ଲାଗିଥିଲା, ଯାହା ଦେଖି ପ୍ରଥମେ ସନ୍ଦେହ ହୋଇନଥିଲା । ତେବେ ତାଙ୍କର ବ୍ୟବହାର ସନ୍ଦେହଜନକ ଲାଗିବାରୁ ପୋଲିସ NIA କାର୍ଯ୍ୟାଳୟ ସହ ଯୋଗାଯୋଗ କରିଥିଲା । ସେଠାରୁ ସେ NIA ର କର୍ମଚାରୀ ନୁହଁନ୍ତି ବୋଲି ସ୍ପଷ୍ଟ ହେବା ପରେ ପୋଲିସ ତାଙ୍କୁ ଗିରଫ କରିଛି । ପୋଲିସ ତାଙ୍କଠାରୁ ନକଲି ପରିଚୟ ପତ୍ର, ଅନ୍ୟାନ୍ୟ ଜାଲ କାଗଜପତ୍ର ଏବଂ ଗୃହ ମନ୍ତ୍ରଣାଳୟ ଲେଖା ଥିବା ବୋଲେରୋ ଗାଡି, ଦୁଇଟି ଛୁରୀ, ଗୋଟିଏ ଭୁଜାଲି, ଗୋଟିଏ ବାଡ଼ି, ଗୋଟିଏ ରଡ୍, ଏନଆଇଏ ଲୋଗୋ ଥିବା ଟି-ସାର୍ଟ, ନକଲି ଆଇକାର୍ଡ, ସୁନା ଓ ରୁପା ଚେନ୍ ଆଦି ଜବତ କରାଯାଇଛି । ସେ ଏହିପରି ଭାବେ ଅନ୍ୟମାନଙ୍କୁ ଠକି ଆର୍ଥିକ ଫାଇଦା ନେଉଥିବା ସନ୍ଦେହ କରାଯାଉଛି ଏନେଇ ପୋଲିସ ଅଧିକ ତଦନ୍ତ ଜାରି ରଖିଛି।

ଭୁବନେଶ୍ୱର : ଭୀଷଣ ଗରମ ପ୍ରକୋପରୁ ମିଳିବ ଆଶ୍ଵସ୍ତି। ଜୁନ୍ ପ୍ରଥମ ସପ୍ତାହ ବେଳକୁ ରାଜ୍ୟରେ ପ୍ରାକ୍ ମୌସୁମୀ ବର୍ଷା ଆରମ୍ଭ ହୋଇପାରେ । ବିଶେଷ କରି ମେ'ମାସ ଶେଷ ବେଳକୁ ଉପକୂଳ ଓଡ଼ିଶାରେ ପ୍ରାକ୍ ମୌସୁମୀ ବର୍ଷା ଯୋଗୁ ପାଗ ବଦଳିବ ଓ ତାପମାତ୍ରା କମିବ। ମୌସୁମୀ ଓଡ଼ିଶାକୁ ଜୁନ୍ ୧୦ ରୁ ୧୨ ତାରିଖ ସୁଦ୍ଧା ଆସିପାରେ ବୋଲି ପାଣିପାଗ ବିଶେଷଜ୍ଞ ପୂର୍ବାନୁମାନ କରିଛନ୍ତି ।

ସେହିପରି ଆସନ୍ତା ୨୬ ତାରିଖ ବେଳକୁ ମୌସୁମୀ କେରଳ ଉପକୂଳ ଛୁଇଁପାରେ । ଏହା ପୂର୍ବରୁ ୨୪-୨୫ ତାରିଖ ବେଳକୁ ପଶ୍ଚିମ କେନ୍ଦ୍ରୀୟ ଏବଂ ସଂଲଗ୍ନ ଦକ୍ଷିଣ ପଶ୍ଚିମ ବଙ୍ଗୋପସାଗରରେ ଏକ ଲଘୁଚାପ ସୃଷ୍ଟି ହୋଇପାରେ । ଏହାର ଗତି ବାଂଲାଦେଶ କିମ୍ବା ମିଆଁମାର ଉପକୂଳ ଆଡ଼କୁ ରହିପାରେ । ଏହା ମୌସୁମୀ ଅଗ୍ରସର ପାଇଁ ଅନୁକୂଳ ବାତବାରଣ ସୃଷ୍ଟି କରିବ । ଏହା ପ୍ରଭାବରେ ଉତ୍ତର ପୂର୍ବ ଭାରତ ଦିଗରେ ମୌସୁମୀ ଆଗେଇ ପାରେ । ଓଡ଼ିଶାରେ ବର୍ତ୍ତମାନ ଲାଗି ରହିଥିବା ଗ୍ରୀଷ୍ମ ପ୍ରକୋପ ଜାରି ରହିବ । ୨୬ ତାରିଖ ପରେ ଉପକୂଳ ଓଡ଼ିଶାରେ କାଳବୈଶାଖୀ ବର୍ଷା କିଛି ଆଶ୍ୱସ୍ତି ଆଣିପାରେ । ମାତ୍ର ପଶ୍ଚିମରେ ବିଶେଷ ତ୍ରାହି ମିଳିବା ସମ୍ଭାବନା କମ୍ । ପଶ୍ଚିମ ଓଡ଼ିଶାରେ ପ୍ରାୟତଃ ମୌସୁମୀ ଆଗମନ ପର୍ଯ୍ୟନ୍ତ ଗ୍ରୀଷ୍ମ ପ୍ରକୋପ ଅଧିକ ରହିପାରେ ।

ସେପଟେ, ତାତିରୁ ସତର୍କ ରହିବା ପାଇଁ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୂଜାରୀଙ୍କ ପରାମର୍ଶ । ସେ କହିଛନ୍ତି ,ଆସନ୍ତା ଜୁନ ୨ତାରିଖ ପର୍ଯ୍ୟନ୍ତ ରହିବ ଗ୍ରୀଷ୍ମପ୍ରବାହ । ରାଜ୍ୟରେ ଗ୍ରୀଷ୍ମପ୍ରବାହକୁ ନେଇ ସତର୍କତା ଗାଇଡ ଲାଇନ ଜାରି କରାଯାଇଥିବା କହିଛନ୍ତି ମନ୍ତ୍ରୀ । କୌଣସି କାମ ନଥିଲେ ଘରୁ ବହାରନ୍ତୁ ନାହିଁ । ଯଦି କୌଣସି କାର୍ଯ୍ୟରେ ଘରୁ ବାହାରିଛନ୍ତି, ତେବେ ସାଙ୍ଗରେ ପାଣି ବୋତଲ, ଛତା, ଜୋତା ନେଇ ବାହାରନ୍ତୁ । ଅନ୍ୟପକ୍ଷରେ ରାଜ୍ୟର ସମସ୍ତ ଏନ.ଏ.ସି. ଏବଂ ମୁନିସିପାଳିଟି ପକ୍ଷରୁ ସ୍ଥାନେ ସ୍ଥାନେ ପିଇବା ପାଣି ଵ୍ୟଵସ୍ଥା କରାଯାଇଛି । ଏଭଳି ସ୍ଥିତି ରାଜ୍ୟରେ ଜୁନ ୨ତାରିଖ ପର୍ଯ୍ୟନ୍ତ ଜାରି ରହିବ ବୋଲି ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୂଜାରୀ କହିଛନ୍ତି ।

ପୃଥିବୀର ଅନ୍ୟତମ ପ୍ରାଚୀନ ଜୀବ କଇଁଛଙ୍କ ସଂରକ୍ଷଣ ଏବଂ ସେମାନଙ୍କର ହ୍ରାସ ପାଉଥିବା ପ୍ରାକୃତିକ ବାସସ୍ଥଳୀ ପ୍ରତି ଜନସଚେତନତା ସୃଷ୍ଟି କରିବା ଉଦ୍ଦେଶ୍ୟରେ ପ୍ରତିବର୍ଷ ମେ' ୨୩ ତାରିଖକୁ ସମଗ୍ର ବିଶ୍ୱରେ 'ବିଶ୍ୱ କଇଁଛ ଦିବସ' ଭାବେ ପାଳନ କରାଯାଇଥାଏ । ଏହି ଦିବସ ପାଳନର ଇତିହାସ ପ୍ରାୟ ଦୁଇ ଦଶନ୍ଧିରୁ ଅଧିକ ପୁରୁଣା, ଯାହାର ଆରମ୍ଭ ୨୦୦୦ ମସିହାରେ ଆମେରିକାର ଏକ ଅଣ-ଲାଭଦାୟକ ସଂଗଠନ 'ଆମେରିକାନ୍ ଟୋର୍ଟଏଜ୍ ରେସକ୍ୟୁ' ଦ୍ୱାରା କରାଯାଇଥିଲା । ପରିବେଶ ସନ୍ତୁଳନ ରକ୍ଷା କରିବାରେ କଇଁଛମାନଙ୍କର ଭୂମିକା ଅତ୍ୟନ୍ତ ଗୁରୁତ୍ୱପୂର୍ଣ୍ଣ; ବିଶେଷ କରି ସାମୁଦ୍ରିକ କଇଁଛମାନେ ସମୁଦ୍ରର ଘାସ ପ୍ରଣାଳୀକୁ ସୁସ୍ଥ ରଖିବା ସହ ସାମୁଦ୍ରିକ ଜୈବ ବିବିଧତାକୁ ନିୟନ୍ତ୍ରିତ କରିଥାନ୍ତି ।  ସେହିଭଳି ଓଡ଼ିଶା ପରିପ୍ରେକ୍ଷୀରେ ଏହି ଦିବସର ତାପ୍ତର୍ଯ୍ୟ ଆହୁରି ଅଧିକ, କାରଣ ରାଜ୍ୟର ଗହୀରମଥା, ଋଷିକୂଲ୍ୟା ଏବଂ ଦେବୀ ମୁହାଣ ଭଳି ଉପକୂଳ ଅଞ୍ଚଳ ବିରଳ 'ଅଲିଭ୍ ରିଡ୍‌ଲେ' ସାମୁଦ୍ରିକ କଇଁଛମାନଙ୍କର ବିଶ୍ୱର ସବୁଠାରୁ ବଡ଼ ଗଣ-ଅଣ୍ଡାଦାନ  କ୍ଷେତ୍ର ପାଲଟିଛି । ବର୍ତ୍ତମାନ ସମୟରେ ସାମୁଦ୍ରିକ ପ୍ରଦୂଷଣ, ପ୍ଲାଷ୍ଟିକ ବର୍ଜ୍ୟବସ୍ତୁ, ବେଆଇନ ଶିକାର ଏବଂ ଜଳବାୟୁ ପରିବର୍ତ୍ତନ ଯୋଗୁଁ ଏହି ଶାନ୍ତ ପ୍ରାଣୀଙ୍କ ଅସ୍ତିତ୍ୱ ବିପନ୍ନ ହେବାରେ ଲାଗିଛି, ତେଣୁ କେବଳ ସରକାରୀ ସ୍ତରରେ ନୁହେଁ, ବରଂ ପ୍ରତ୍ୟେକ ନାଗରିକ ସଚେତନ ହୋଇ ପ୍ଲାଷ୍ଟିକ ବର୍ଜନ କରିବା ସହ ଏହି ଜୀବମାନଙ୍କୁ ସୁରକ୍ଷା ଦେବା ହିଁ ଚଳିତ ବିଶ୍ୱ କଇଁଛ ଦିବସର ପ୍ରକୃତ ସଂକଳ୍ପ ହେବ ।

ପ୍ରତିବର୍ଷ ଭଳି ଚଳିତ ବର୍ଷ ମଧ୍ୟ ବଲିଉଡ ଅଭିନେତ୍ରୀ ଐଶ୍ୱର୍ଯ୍ୟା ରାୟ ପ୍ରସିଦ୍ଧ କାନ୍ସ ଫିଲ୍ମ ଫେଷ୍ଟିଭାଲରେ ଭାଗ ନେବାକୁ ଯାଉଛନ୍ତି । ସେ ସର୍ବଦା ଲୋରିଆଲ୍ ବ୍ରାଣ୍ଡ୍ ତରଫରୁ ଏଠାରେ ପ୍ରତିନିଧିତ୍ୱ କରନ୍ତି, କିନ୍ତୁ ଏଥର ଓପନିଙ୍ଗ ସେରେମନିରେ ଆଲିଆ ଭଟ୍ଟଙ୍କ ଉପସ୍ଥିତି ଦେଖି ଅନେକେ ଭାବୁଥିଲେ ଯେ ହେଲେ ହୁଏତ ଐଶ୍ୱର୍ଯ୍ୟା ଏଥର କାନ୍ସରେ ନଜର ଆସିବେ ନାହିଁ । ମାତ୍ର ସବୁ ଚର୍ଚ୍ଚାର ଅନ୍ତ ଘଟାଇ ସେ କାନ୍ସରେ ସାମିଲ ହେବେ ବୋଲି ଜଣା ପଡିଛି ।  ମୁମ୍ବାଇ ଏୟାରପୋର୍ଟରୁ ସାମ୍ନାକୁ ଆସିଥିବା ଏକ ଭିଡିଓରେ ସେ ଝିଅ ଆରାଧ୍ୟାଙ୍କ ସହ କଳା ରଙ୍ଗର ପୋଷାକରେ ଟ୍ୱିନିଂ କରିଥିବା ଦେଖିବାକୁ ମିଳିଛି। ଏହି ସମୟରେ ସେ ଫ୍ୟାନ ଓ ପାପରାଜିଙ୍କୁ ପୋଜ ମଧ୍ୟ ଦେଇଥିଲେ । ସୂଚନାଯୋଗ୍ୟ ଯେ, ୨୦୦୨ ମସିହାରେ 'ଦେବଦାସ'ର ସ୍କ୍ରିନିଂ ସହ ହଳଦିଆ ଶାଢ଼ି ପିନ୍ଧି କାନ୍ସରେ ଡେବ୍ୟୁ କରିଥିବା ଐଶ୍ୱର୍ଯ୍ୟାଙ୍କ ଗତ ବର୍ଷର ମନୀଷ ମଲହୋତ୍ରାଙ୍କ ଡିଜାଇନ କରାଯାଇଥିବା ପାରମ୍ପରିକ ଧଳା-ସୁନେଲି ଶାଢ଼ି ଏବଂ ଗୌରବ ଗୁପ୍ତାଙ୍କ କଳା ଗାଉନ ଲୁକ୍ ବେଶ୍ ଚର୍ଚ୍ଚାରେ ଥିଲା। ଏହା ବ୍ୟତୀତ ୨୦୦୪ର ଫ୍ଲାଟ୍ ଫୁଟୱେର୍ ଲୁକ୍ ଏବଂ ପର୍ପଲ-ବ୍ଲୁ ଲିପ୍‌ଷ୍ଟିକ ପାଇଁ ସେ ଅନେକ ସମାଲୋଚନା ଓ ଟ୍ରୋଲିଂର ମଧ୍ୟ ସାମ୍ନା କରିଛନ୍ତି । ଏସବୁ ସତ୍ତ୍ୱେ, ଐଶ୍ୱର୍ଯ୍ୟା ଅନେକ ସମୟରେ ଏହି ବିଶ୍ବସ୍ତରୀୟ ସିନେମା ଉତ୍ସବରେ ଭାରତକୁ ଗୌରାବନୀତ କରିଛନ୍ତି । ଐଶ୍ କାନ୍ସ ଫିଲ୍ମ ଫେଷ୍ଟିଭାଲରେ ଜ୍ୟୁରି ସଦସ୍ୟା ହେବାର ଗୌରବ ମଧ୍ୟ ହାସଲ କରିଥିଲେ । ତାଙ୍କ କାନ୍ସ ଲୁକ ଦେଖିବା ପାଇଁ ଫ୍ୟାନମାନେ ସବୁବେଳେ ଉତ୍ସାହିତ ଥାଆନ୍ତି ।

ରାଜସ୍ଥାନର ଜୈସଲମେର ମରୁଭୂମି ଅଞ୍ଚଳରେ ଏକ ବିଶାଳ କୃତ୍ରିମ ହ୍ରଦ ନିର୍ମାଣ କରାଯାଇଛି, ଯାହା ଜୈସଲମେର ଏବଂ ବାଡ଼ମେର ଜିଲ୍ଲାରେ ବର୍ଷସାରା ଜଳ ଯୋଗାଣ ବଜାୟ ରଖିବାରେ ସହାୟକ ହେବ । ପ୍ରାୟ ୨୮ କିଲୋମିଟର ଲମ୍ବ ଏବଂ ୩୩ ଫୁଟ ଗଭୀର ବିଶିଷ୍ଟ ଏହି ହ୍ରଦର ଜଳ ସଂରକ୍ଷଣ କ୍ଷମତା ୧୪୧୩ ମିଲିୟନ କ୍ୟୁବିକ୍ ଫୁଟ୍ ରହିଛି । ମରୁଭୂମିର ବାଲିଆ ମାଟି ଯେପରି ଶୀଘ୍ର ପାଣି ଶୋଷି ନନେବ, ସେଥିପାଇଁ ହ୍ରଦ ଶଯ୍ୟାରେ ୩୦୦ ମାଇକ୍ରୋନର ଏକ ବିଶେଷ 'ଏଚଡିପିଇ' ପ୍ଲାଷ୍ଟିକ ସିଟ୍ ବିଛାଯାଇଛି । ଏହାସହ ଏହାକୁ ପ୍ରାୟ ୧୦୦ ବର୍ଷ ପର୍ଯ୍ୟନ୍ତ ସୁରକ୍ଷିତ ରଖିବା ପାଇଁ ତା' ଉପରେ ଅଢେଇ ଫୁଟର ମାଟି ସ୍ତର ଦିଆଯାଇଛି । ଇନ୍ଦିରା ଗାନ୍ଧୀ କେନାଲ ସହ ସଂଯୁକ୍ତ ଏହି ହ୍ରଦରୁ ବଡ଼ ବଡ଼ ପାଇପ୍ ମାଧ୍ୟମରେ ପାଣିକୁ ପ୍ରଥମେ ମୋହନଗଡ଼ ଫିଲ୍ଟର ପ୍ଲାଣ୍ଟକୁ ପଠାଯିବ ଏବଂ ସେଠାରୁ ବିଶୁଦ୍ଧ କରାଯାଇ ପାଇପଲାଇନ ଯୋଗେ ଲୋକଙ୍କ ଘରକୁ ଯୋଗାଇ ଦିଆଯିବ । ପ୍ରତିବର୍ଷ କେନାଲ ମରାମତି ସମୟରେ ପ୍ରାୟ ଏକ ମାସ ପାଇଁ ଜଳ ଯୋଗାଣ ବନ୍ଦ ରହୁଥିବାରୁ ଏହି ସୀମାନ୍ତବର୍ତ୍ତୀ ଅଞ୍ଚଳରେ ଦେଖାଦେଉଥିବା ଉତ୍କଟ ଜଳାଭାବକୁ ଦୂର କରିବା ପାଇଁ ଏହି ପ୍ରକଳ୍ପ ଏକ ବର୍ଷର ଜଳ ବ୍ୟାକଅପ୍ ପ୍ରଦାନ କରିବ । ପ୍ରାୟ ୪୦୦ ଶ୍ରମିକ ଏବଂ ୧୦ ଜଣ ଇଞ୍ଜିନିୟରଙ୍କ ଅକ୍ଳାନ୍ତ ପରିଶ୍ରମ ଯୋଗୁଁ ଏହି ଗୁରୁତ୍ୱପୂର୍ଣ୍ଣ ପ୍ରକଳ୍ପ ସଫଳତାର ସହ ସମ୍ପୂର୍ଣ୍ଣ ହୋଇପାରିଛି ।

ଭୁବନେଶ୍ୱର : ଆସନ୍ତାକାଲି ଠାରୁ ସ୍ଥଗିତ ରହିବ ରତ୍ନଭଣ୍ଡାର ଗଣତି କାର୍ଯ୍ୟ। ଏନେଇ ଶ୍ରୀମନ୍ଦିର ମୁଖ୍ୟ ପ୍ରଶାସକ ଶ୍ରୀ ଅରବିନ୍ଦ ପାଢ଼ୀ ସୂଚନା ଦେଇଛନ୍ତି । ଜୁନ୍ ମାସରେ ପୁଣି ଗଣତି ଆରମ୍ଭ କରିବାକୁ ସ୍ଥିର କରାଯାଇଛି । ଆସନ୍ତା ସପ୍ତାହରୁ ଛତିଶା ନିଯୋଗ ଓ ପରିଚାଳନା କମିଟିର ବୈଠକଗୁଡ଼ିକ କ୍ରମାଗତ ଭାବେ ଆୟୋଜିତ ହେବ। ସେଥିପାଇଁ ଗଣିତି ପ୍ରକ୍ରିୟାକୁ ସ୍ଥଗିତ ରଖାଯାଇଛି। ଅତ୍ୟଧିକ ଗ୍ରୀଷ୍ମ ପ୍ରବାହ ଓ ଶ୍ରଦ୍ଧାଳୁଙ୍କ ଭିଡ଼ ଯୋଗୁଁ ନିଆଯାଇଛି ଏଭଳି ନିଷ୍ପତ୍ତି । ତେବେ ମହାପ୍ରଭୁଙ୍କ ଆଗାମୀ ପର୍ବପର୍ବାଣୀ, ବିଶେଷକରି ସ୍ନାନ ପୂର୍ଣ୍ଣିମା ଓ ଘୋଷଯାତ୍ରାକୁ ଦୃଷ୍ଟିରେ ରଖି, ପରବର୍ତ୍ତୀ ପର୍ଯ୍ୟାୟ ପାଇଁ ଯୋଜନା ପ୍ରସ୍ତୁତ କରାଯିବ। 

ମେଷ: ଥଣ୍ଡାଜନିତ ସମସ୍ୟା, ଅର୍ଥଲାଭ, ଦାମ୍ପତ୍ୟଖୁସି, ସମ୍ମାନଲାଭ ଭ୍ରମଣସୁଖ, ଦ୍ରବ୍ୟନଷ୍ଟ, ସମ୍ପତ୍ତିବିବାଦ,  େଲାକସମ୍ପର୍କ ବୃଦ୍ଧି, ବ୍ୟବସାୟରେ ସ୍ବଳ୍ପଲାଭ, ବିଦ୍ୟାରେ ସଫଳ, ହସ୍ତା ନକ୍ଷତ୍ର ସତର୍କ ରୁହନ୍ତୁ, ଶୁଭରଙ୍ଗ-ନାଲି, ସଂଖ୍ୟା-୫, ଆରାଧନା-ମା’ ଭଗବତୀ

ବୃଷ: କର୍ମକ୍ଷେତ୍ରେ ଅଶାନ୍ତି, ଦୂରଯାତ୍ରା, ଶରୀର ସୁସ୍ଥ, ଶୁଭକାର୍ଯ୍ୟରେ ଧନବ୍ୟୟ, ବ୍ୟବସାୟିକ ଖୁସି, ଯାନବାହନେ ସତର୍କ, ସମ୍ପତ୍ତିଲାଭ, ଦାମ୍ପତ୍ୟସୁଖ, ମୃଗଶିରା ନକ୍ଷତ୍ର- ସତର୍କ ରୁହନ୍ତୁ, ଶୁଭରଙ୍ଗ-କ୍ରିମ, ସଂଖ୍ୟା-୪,  ଆରାଧନା-ପ୍ରଭୁ ହନୁମାନ

ମିଥୁନ:   କାର୍ଯ୍ୟରେ ଅଗ୍ରଗତି, ଦୂରଯାତ୍ରା, ବ୍ୟବସାୟରେ ଉନ୍ନତି, ନୂତନ ଅାୟବୃଦ୍ଧି, ଶରୀର ସୁସ୍ଥ, ଶୁଭଖବର, ମାନସିକ ଶାନ୍ତି, ଶତ୍ରୁ ପରାଜିତ, ବିଦ୍ୟାରେ ସଫଳତା, ପୁନର୍ବସୁ ନକ୍ଷତ୍ର ସତର୍କ ରୁହନ୍ତୁ, ଶୁଭରଙ୍ଗ-ସବୁଜ, ସଂଖ୍ୟା-୭,  ଆରାଧନା-ପ୍ରଭୁ ରାଧାବହ୍ଲଭ

କର୍କଟ: ‌ମାନସିକ ଅଶାନ୍ତି, ଦୂରଯାତ୍ରାରେ ସତର୍କ, କାର୍ଯ୍ୟକ୍ଷେତ୍ରେ ଲାଭ, ବ୍ୟବସାୟରେ ସ୍ବଳ୍ପଲାଭ, ସମ୍ପତ୍ତିଲାଭ, ଅର୍ଥବିନିଯୋଗରେ ଲାଭ, ବିଦ୍ୟାରେ ସଫଳତା, ଅଶ୍ଳେଷା ନକ୍ଷତ୍ର ସତର୍କ ରୁହନ୍ତୁ, ଶୁଭରଙ୍ଗ-କ୍ରିମ, ସଂଖ୍ୟା-ପ୍ରଭୁ,  ଆରାଧନା-ପ୍ରଭୁ ଗଣେଶ

ସିଂହ: ମନରେ ଉତ୍ସାହ, ସହକର୍ମୀଙ୍କ ସହଯୋଗ, କର୍ମକ୍ଷେତ୍ରେ କଠିନ ପରିଶ୍ରମ, ଶତ୍ରୁବୃଦ୍ଧି, କିଛି ବିବାଦ ରହିବ, ସମ୍ପତ୍ତିଲାଭ, ଶୁଭଖବର, ଉଚ୍ଚପଦସ୍ଥ ଅଧÒକାରୀଙ୍କ ସାହାଯ୍ୟ, ଶରୀର ସୁସ୍ଥ, ବିଦ୍ୟାରେ ଉନ୍ନତି,  ପୂର୍ବାଫାଲଗୁନି ନକ୍ଷତ୍ର ସତର୍କ ରୁହନ୍ତୁ, ଶୁଭରଙ୍ଗ-ଧଳା, ସଂଖ୍ୟା-୧୦,  ଆରାଧନା-ଗ୍ରାମଦେବତୀ

କନ୍ୟା: ଶୁଭଖବର, ଧନବ୍ୟୟ, କାର୍ଯ୍ୟରେ ବିଳମ୍ବ, ସ୍ବାସ୍ଥ୍ୟ ସମସ୍ୟାରୁ ମୁକ୍ତି, ଦ୍ରବ୍ୟପ୍ରାପ୍ତି, ସମ୍ମାନଲାଭ,  ବ୍ୟବସାୟରେ ସ୍ବଳ୍ପଲାଭ, ଆର୍ଥିକ ଚିନ୍ତା, ଚିତ୍ରା ନକ୍ଷତ୍ର ସତର୍କ ରୁହନ୍ତୁ, ଶୁଭରଙ୍ଗ-ସବୁଜ, ସଂଖ୍ୟା-୬, ଆରାଧନା-ଶଙ୍କର ଭଗବାନ

ତୁଳା: ଭ୍ରମଣସୁଖ, ବିବାଦ ସମାଧାନ, ସମ୍ମାନଲାଭ, ପାରିବାରିକ ଖୁସି, କର୍ମକ୍ଷେତ୍ରେ ସହଯୋଗ, ପଦବୀଲାଭ, ସନ୍ତାନକଷ୍ଟ, ମୋକଦ୍ଦମାରେ ପଡ଼ିପାରନ୍ତି, ଦାମ୍ପତ୍ୟଖୁସି, ବିଶାଖା ନକ୍ଷତ୍ର ସତର୍କ ରୁହନ୍ତୁ, ଶୁଭରଙ୍ଗ-ଆକାଶି, ସଂଖ୍ୟା-୯, ଆରାଧନା-ଗୋସେବା କରନ୍ତୁ

ବିଛା:  କର୍ମକ୍ଷେତ୍ରେ ସାହାଯ୍ୟ, ବନ୍ଧୁଦ୍ବାରା ଲାଭ, ବ୍ୟବସାୟରେ ଉନ୍ନତି, ଲୋକସମ୍ପର୍କ ବୃଦ୍ଧି, ବିଦେଶ ଭ୍ରମଣ, ଶତ୍ରୁ ପରାଜିତ, ଦ୍ରବ୍ୟପ୍ରାପ୍ତି, ଶରୀର ସୁସ୍ଥ, ବଡ଼ କାର୍ଯ୍ୟରେ ମାନସିକ ଅଶାନ୍ତି, ବିଦ୍ୟାରେ ସଫଳ, ଜ୍ୟେଷ୍ଠା ନକ୍ଷତ୍ର ସତର୍କ ରୁହନ୍ତୁ, ଶୁଭରଙ୍ଗ-ହଳଦୀ, ସଂଖ୍ୟା-୮, ଆରାଧନା-ଭଗବାନ ବିଷ୍ଣୁ

ଧନୁ: ଧାର୍ମିକ କାର୍ଯ୍ୟରେ ଯୋଗଦାନ, କାର୍ଯ୍ୟ ସଫଳ, ମାନସିକ ଅସ୍ଥିରତ, ପାରିବାରିକ ବିବାଦ, ଅର୍ଥଲାଭ, ଶରୀର ସୁସ୍ଥ, ବ୍ୟବସାୟିକ ଖୁସି, ଦୂରଯାତ୍ରାରେ ସତର୍କ, ସନ୍ତାନଲାଭ, ପୂର୍ବାଷାଢ଼ା ନକ୍ଷତ୍ର ସତର୍କ ରୁହନ୍ତୁ, ଶୁଭରଙ୍ଗ-ଧଳା, ସଂଖ୍ୟା-୮, ଆରାଧନା-ପିତାମାତାଙ୍କ ସେବା କରନ୍ତୁ

ମକର: ମାନସିକ ଅସ୍ଥିର, ଅଯଥା ଭୟ, ଦୂରଯାତ୍ରା ନିଷେଧ, ବ୍ୟବସାୟରେ ସ୍ବଳ୍ପଲାଭ,ଶରୀର ଅସୁସ୍ଥ, ଲୋକସମ୍ପର୍କବୃଦ୍ଧି, ବନ୍ଧୁସହଯୋଗ, ଦାମ୍ପତ୍ୟଖୁସି, ଧନିଷ୍ଠା ନକ୍ଷତ୍ର ସତର୍କ ରୁହନ୍ତୁ, ଶୁଭରଙ୍ଗ-ବାଦାମି, ସଂଖ୍ୟା-୧୦,  ଆରାଧନା-ମା’ ବଗଳାମୁଖୀ

କୁମ୍ଭ: ‌ଅର୍ଥଲାଭ, ସାମାଜିକ ପ୍ରତିଷ୍ଠା, ନୂତନ କାର୍ଯ୍ୟରେ ଖୁସି, ବିଦେଶ ଭ୍ରମଣ, ଶରୀର ସୁସ୍ଥ, ଶତ୍ରୁ ପରାଜିତ, ସୁମିଷ୍ଠ ଭୋଜନପ୍ରାପ୍ତି, ବନ୍ଧୁଗୃହେ ଯାତ୍ରା, ପିଲାଙ୍କଖୁସି, ପୂର୍ବାଭାଦ୍ର ନକ୍ଷତ୍ର ସତର୍କ ରୁହନ୍ତୁ, ଶୁଭରଙ୍ଗ-ସବୁଜ, ସଂଖ୍ୟା-୭,  ଆରାଧନା-ପ୍ରଭୁ ଜଗନ୍ନାଥ

ମୀନ: ନୂତନ ଦ୍ରବ୍ୟଲାଭ, ଶତ୍ରୁ ପରାଜିତ, କର୍ମକ୍ଷେତ୍ରେ ପ୍ରଶଂସା, ଶରୀର ସୁସ୍ଥ, ବ୍ୟବସାୟିକ ଶତ୍ରୁତା, ସମ୍ପତ୍ତିଲାଭ, ବିଶିଷ୍ଠ କାର୍ଯ୍ୟରେ ଖୁସି, ଦ୍ରବ୍ୟଲାଭ, ପଦସ୍ଥ ଅଧÒକାରୀଙ୍କ ସହଯୋଗ,   ରେବତୀ ନକ୍ଷତ୍ର ସତର୍କ ରୁହନ୍ତୁ, ଶୁଭରଙ୍ଗ-ନାଲି, ସଂଖ୍ୟା-୬,  ଆରାଧନା-ମା’ ଦକ୍ଷିଣକାଳୀ

ଭୁବନେଶ୍ବର : ରାଜଧାନୀରୁ ଜବତ ହେଲା ୩୦ ଲକ୍ଷ ଟଙ୍କାର ବ୍ରାଉନସୁଗର । ୨ ନିଶା ମାଫିଆଙ୍କୁ ଗିରଫ କରିଛି କମିଶନରେଟ ପୋଲିସ। ଜଣେ ଅଭିଯୁକ୍ତର ଘର ଝାଡ଼ଖଣ୍ଡ। ତା ନାଁ ମହମ୍ମଦ ବାଦସାହା ହୋଇଥିବା ବେଳେ ଅନ୍ୟଜଣେ ହେଉଛି ଭଦ୍ରକର ଫକରୁଦ୍ଦିନ ଖାଁ । ନିଶା କାରବାର ବେଳେ ସାଦା ପୋଷାକରେ ମାଡି ବସିଲା ସ୍ପେଶାଲ କ୍ରାଇମ ୟୁନିଟ । ସେମାନଙ୍କ ନିକଟରୁ ୨୯୦ଗ୍ରାମ ବ୍ରାଉନସୁଗର ଜବତ ହୋଇଛି । ଯାହାର ଆନୁମାନିକ ମୂଲ୍ୟ ୨୯ଲକ୍ଷ ଟଙ୍କାରୁ ଉର୍ଦ୍ଧ୍ବ ହେବ ବୋଲି ଅନୁମାନ କରାଯାଉଛି । 

ପୋଲିସ କମିଶନର ଏସ ଦେବ ଦତ୍ତ ସିଂହ କହିଛନ୍ତି, ଫକରୁଦ୍ଦିନ ଖାଁ ଜଣେ ଅଭ୍ୟାସଗତ ନିଶା ବେପାରୀ । ସେ ଅନ୍ୟାନ୍ୟ ଅପରାଧିକ କାରବାରରେ ମଧ୍ୟ ଜଡିତ ରହିଛି ଏବଂ ତା' ବିରୁଦ୍ଧରେ ଭଦ୍ରକ ଜିଲ୍ଲାରେ ପୂର୍ବରୁ ଅନ୍ୟୂନ ୯ଟି ଅପରାଧିକ ମାମଲା ରୁଜୁ ହୋଇଛି। ଏହି ନିଶା କାରବାରର ଚେର କେଉଁ ପର୍ଯ୍ୟନ୍ତ ଯାଇଛି ସେ ନେଇ ଅଧିକ ତଦନ୍ତ ଜାରି ରହିଥିବା କହିଛନ୍ତି ପୋଲିସ କମିଶନର ।

ମୟୁରଭଞ୍ଜ : ଶୁଣିବାକୁ ଅଡୁଆ ଲାଗୁଥିଲେ ବି କଥାଟି ସତ । ଥାନା ବାହାରେ ଠିଆ ହୋଇଥିବା ଟ୍ରାକ୍ଟରରେ ପଡିଛି ହାତକଡ଼ି । ବାଲି ମାଫିଆଙ୍କ କବଳରୁ ଉଦ୍ଧାର ହୋଇଥିବା ବାଲି ବୋଝେଇ ଟ୍ରାକ୍ଟର ଷ୍ଟିୟରିଂରେ ହାତକଡ଼ି ପକାଇ ରଖିଛି ପୋଲିସ। ଏଭଳି ରୋଚକ ଦୃଶ୍ୟ ଦେଖିବାକୁ ମିଳିଛି ମୟୁରଭଞ୍ଜ ଜିଲ୍ଲା ଉଦଳା ଥାନା ଅନ୍ତର୍ଗତ କୁଶଲଦା ଫାଣ୍ଡିରେ। ଅପରାଧୀଙ୍କ ହାତରେ ପଡ଼ୁଥିବା ହାତକଡ଼ି ଟ୍ରାକ୍ଟରରେ ପଡ଼ିଥିବା ଦେଖିବାକୁ ମିଳିଛି । 

ଘଟନାନୁସାରେ, ଏଗ୍ରିକଲଚର ପାଇଁ ସରକାରୀ ସ୍ତରରେ ଦିଆଯାଉଥିବା ସୁବିଧାରେ କିଣା ଯାଇଥିବା ଟ୍ରାକ୍ଟରରେ ଚାଲିଥିଲା ଚୋରା ବାଲି ଚାଲାଣ । ଯାହାକୁ ଶୁକ୍ରବାର ବିଳମ୍ବିତ ରାତିରେ କୁଶଳଦା ପୋଲିସ ଦାମାସାହି ଛକ ନିକଟରୁ ଜବତ କରିଥିଲା । ଜବତ ଟ୍ରାକ୍ଟରରେ ଚୋରା ବାଲି ବୋଝେଇ ହୋଇଥିବା ବେଳେ ତାକୁ ଆଣି ଫାଣ୍ଡିରେ ରଖିଥିଲା ପୋଲିସ । ହେଲେ ଫାଣ୍ଡିରେ ପାଚେରୀ ନଥିବାରୁ ଜବତ ଟ୍ରାକ୍ଟରଟିକୁ ମାଫିଆମାନେ ନେଇଯିବାର ସନ୍ଦେହ କରିଥିଲା ପୋଲିସ । ଯାହା ଫଳରେ ଜବତ ଟ୍ରାକ୍ଟରର ଷ୍ଟିୟରିଂରେ ହାତକଡ଼ି ପକାଇଥିଲା ପୋଲିସ ।

ରାୟଗଡ଼ା : ହାଡ଼ିପ୍ପା ନିଖିଲ ହତ୍ୟା ପରେ ପୁଣି ଅଶାନ୍ତ ରାୟଗଡ଼ା ସହର । ପିଟଲା ଓ ରେଲି ସାହି ମଧ୍ୟରେ ବଚସା ଓ ମାରପିଟ ଘଟିଛି । ରାୟଗଡା ଥାନା ସମ୍ମୁଖରେ ମାରପିଟ ସହ ପଥର ଫିଙ୍ଗା ଫିଙ୍ଗି ହୋଇଛନ୍ତି ଉଭୟ ଗୋଷ୍ଠୀ । ପିଟଲା ସାହିରେ ପଶି ରେଲି ସାହିର କିଛି ଯୁବକ ଲୋକଙ୍କୁ ଗାଳିଗୁଲଜ ସହ ଅସଦାଚରଣ କରିଥିଲେ । ପ୍ରତିବାଦରେ ପିଟଲା ସାହିର ଲୋକେ ଥାନାରେ ଅଭିଯୋଗ କରିଥିଲେ। ସେହି ସମୟରେ ରେଲି ସାହିର କିଛି ଯୁବକ ଥାନା ନିକଟରେ ପହଞ୍ଚି ଗାଳିଗୁଲଜ କରିଥିଲେ । ପରେ ଉଭୟ ଗୋଷ୍ଠୀ ମଧ୍ୟରେ ଗୋଷ୍ଠୀ ସଂଘର୍ଷ ଆରମ୍ଭ ହୋଇଥିଲା । ୩ ଜଣ ଗୁରୁତର ଆହତ ସହ ଉଭୟ ଗୋଷ୍ଠୀର ବହୁ ଯୁବକ ଆହତ ହୋଇଛନ୍ତି। ଆହତମାନେ ହେଲେ ପିଟିଲାସାହିର ଆନ୍ନାମାଝୀ ଯାକକା, ତ୍ରିନାଥ ମେଲେକା ଓ ରେଲି ସାହିର ଶୁଣ୍ଢୀ ସୂରଜ । ପରିସ୍ଥିତି ଉତ୍ତେଜନାପୂର୍ଣ୍ଣ ଥିବାରୁ ଥାନା ଆଗରେ ବ୍ୟାପକ ପୁଲିସ ମୁତୟନ ହୋଇଛି। 

ସୂଚନାନୁସାରେ, ୧୯ବର୍ଷୀୟ ହାଡ଼ିପ୍ପା ନିଖିଲ ସହ ଅଭିଯୁକ୍ତମାନଙ୍କର ଜୁଆ ଖେଳକୁ ନେଇ ପୂର୍ବରୁ  ଶତ୍ରୁତା ରହିଥିଲା । ଘଟଣାକୁ ନେଇ ଗତ ମେ' ୯ ତାରିଖ ଦିନ ନିଖିଲକୁ ଗୋଟିଏ ଗୋଷ୍ଠୀ ଇନ୍ଦିରା ନଗର ଅଞ୍ଚଳରୁ ଅପହରଣ କରି ନେଇ ଗୋଡେଇ ଗୋଡେଇ ଗୁଳି କରି ହତ୍ୟା କରିଥିଲେ । ଗୋଟିଏ ଦିନ ପରେ, ତାଙ୍କ ମୃତଦେହ ନାଗାବଳୀ ନଦୀପଠାରୁ ଉଦ୍ଧାର କରାଯାଇଥିଲା । ସେହିପରି ତାଙ୍କ ମୋଟର ସାଇକେଲକୁ ଜାତୀୟ ରାଜପଥ-୩୨୬ ରେ ପୋଡି ଦିଆଯାଇଥିଲା । ଘଟଣା ପରେ ସ୍ଥାନୀୟ ଲୋକଙ୍କ ମଧ୍ୟରେ ଉତ୍ତେଜନା ଦେଖାଦେଇଥିଲା । ଏହି ଘଟଣାରେ ରାୟଗଡା ଏସପି (ଏସପି) ସ୍ୱାତୀ ଏସ. କୁମାର୯ ଜଣଙ୍କୁ ଗିରଫ କରିଛନ୍ତି । ଏହି ଘଟଣାରେ ସମୁଦାୟ ୨୧ଜଣଙ୍କ ସମ୍ପୃକ୍ତି ଥିବାବେଳେ  ଅନ୍ୟ ମାନଙ୍କୁ ଧରିବା ପାଇଁ ଜୋରଦାର ଅଭିଯାନ ଚଳାଇଛି ପୋଲିସ  I

ଭୁବନେଶ୍ୱର : ଇନ୍ଧନ ବଞ୍ଚାଇବାକୁ ପ୍ରଧାନମନ୍ତ୍ରୀଙ୍କ ଆହ୍ୱାନକୁ ଅକ୍ଷରେ ଅକ୍ଷରେ ପାଳନ କରୁଛନ୍ତି ରାଜ୍ୟ ସରକାର । ମଧ୍ୟପ୍ରାଚ୍ୟ ଯୁଦ୍ଧ ଯୋଗୁଁ ସାରା ଦେଶ ଏକପ୍ରକାର ଅର୍ଥନୈତିକ ସଙ୍କଟ ମଧ୍ୟକୁ ଠେଲି ହୋଇ ଯାଇଛି । ଦେଶବାସୀଙ୍କୁ ବିଭିନ୍ନ ଖର୍ଚ୍ଚକାଟ ପାଇଁ ପରାମର୍ଶ ଦେଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ତୈଳ କମାଇବା ପାଇଁ ପ୍ରଧାନମନ୍ତୀଙ୍କ ଆହ୍ୱାନ ପରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ତାଙ୍କ କାରକେଡ ରେ ଯାଉଥିବା ଗାଡି ସଂଖ୍ୟାକୁ ହ୍ରାସ କରିଛନ୍ତି  । ଗତ ୧୩ ତାରିଖରେ କାରକେଡ୍ ରେ  ଥିବା ଗାଡ଼ି ସଂଖ୍ୟା ୧୨ଟିରୁ ୭ଟିକୁ ହ୍ରାସ କରିଥିଲେ । ଶୁକ୍ରବାର ଏହାକୁ ଆହୁରି ୩ଟି କମ୍ କରି ସମୁଦାୟ ୪ଟି ଗାଡି ରଖିବାକୁ ନିର୍ଦେଶ ଦେଇଛନ୍ତି । ଏଣିକି ମୁଖ୍ୟମନ୍ତ୍ରୀଙ୍କ କାରକେଡ୍ ରେ ପ୍ରଥମେ ପାଇଲଟ୍ କାର ରହିବ । ଦ୍ୱିତୀୟ କାର୍ ରେ ମୁଖ୍ୟମନ୍ତ୍ରୀ , ତୃତୀୟ କାର୍ ରେମୁଖ୍ୟମନ୍ତ୍ରୀଙ୍କ ସୁରକ୍ଷା ଅଧିକାରୀ (ଏସ୍ପି) ନରେଶ କୁମାର ପଟେଲଙ୍କ ସହ ସାଧା ପୋଷାକଧାରୀ ସୁରକ୍ଷାକର୍ମୀ ଏବଂ ଚତୁର୍ଥ କାର୍ ରେ ଏସ୍କର୍ଟ-୨ (କମାଣ୍ଡୋ) ରହିବେ । ମୁଖ୍ୟମନ୍ତ୍ରୀଙ୍କ କାରକେଡ୍ ଇନ୍ଚାର୍ଜ ଦାୟିତ୍ୱରେ ଥିବା ଡିସିପି (ସିକ୍ୟୁରିଟି) ଅଶୋକ ପାଣିଗ୍ରାହୀ ଏସ୍କର୍ଟ-୨ ଗାଡି଼ରେ ଯିବେ  ବୋଲି ନିର୍ଦେଶ ରହିଛି ।

ସେହିପରି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଇନ୍ଧନ କମାଇବା ପାଇଁ ୮-ସୂତ୍ରୀ ନିର୍ଦେଶନାମା ଜାରି କରିଛନ୍ତି । ଏନେଇ ବିହିତ ପଦକ୍ଷେପ ନେବାକୁ ମୁଖ୍ୟ ଶାସନ ସଚିବଙ୍କୁ ନିର୍ଦ୍ଦେଶ ଦିଆଯାଇଛି । ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶ ଅନୁଯାୟୀ, ସରକାରୀ ସ୍ତରର ବିଭିନ୍ନ ବୈଠକ, ସମୀକ୍ଷା, ପ୍ରଶିକ୍ଷଣ, କର୍ମଶାଳା ଆଦି ଅତି ଆବଶ୍ୟକ ନ ହେଲେ ଭର୍ଚୁଆଲ ମୋଡ୍ରେ କରାଯିବ । ଯେଉଁଠି ପ୍ରତ୍ୟକ୍ଷ ଉପସ୍ଥିତିର ଆବଶ୍ୟକତା ଥିବ, ସେ ସ୍ଥଳରେ ସେମାନେ ପ୍ରତ୍ୟକ୍ଷ ଭାବେ ବୈଠକରେ ଯୋଗ ଦେଇପାରିବେ ଏବଂ ଅନ୍ୟମାନେ ଭର୍ଚୁଆଲ ମୋଡ୍ରେ ଯୋଗ ଦେବେ ।

ସେହିଭଳି, ୧ ଜୁନ୍ ୨୦୨୬ ଠାରୁ ସରକାରୀ କାର୍ଯ୍ୟାଳୟ ଗୁଡ଼ିକରେ ଯେତେ ନୂଆ ଦୁଇ ଚକିଆ ଓ ଚାରି ଚକିଆ ଯାନ କିଣାଯିବ, ସେଗୁଡ଼ିକ ବୈଦ୍ୟୁତିକ ଯାନ (EV) ହୋଇଥିବା ବାଧ୍ୟତାମୂଳକ । ବିଶେଷ ଆବଶ୍ୟକତା ଭିତ୍ତିରେ ପେଟ୍ରୋଲ କିମ୍ୱା ଡିଜେଲ ଯାନ କିଣିବାକୁ ଅନୁମତି ଦିଆଯିବ। ସେହିଭଳି, ଜୁନ୍ ପହିଲାରୁ ସରକାରୀ କାର୍ଯ୍ୟାଳୟରେ ଭଡ଼ା ସୂତ୍ରରେ ନିଆଯାଉଥିବା ସରକାରୀ ଚାରିଚକିଆ ଯାନ EV ହେବା ବାଧ୍ୟତାମୂଳକ କରାଯିବ ।

ଭୁବନେଶ୍ୱର : ମନଇଚ୍ଛା ବଦଳି ଉପରେ ଲାଗିବ ରୋକ । ଏଣିକି ଆଉ ଇଚ୍ଛାମୂତାବକ ବଦଳି ନେଇପାରିବେ ନାହିଁ ସରକାରୀ କର୍ମଚାରୀ । ଏନେଇ ସମସ୍ତ ବିଭାଗକୁ ସାଧାରଣ ପ୍ରଶାସନ ବିଭାଗ ପକ୍ଷରୁ ଜିଲାପାଳଙ୍କୁ କଡ଼ା ଚିଠି କରାଯାଇଛି । ପ୍ରତିବର୍ଷ ଏପ୍ରିଲ ୧୫ରୁ ଜୁନ ୧୫ ପର୍ଯ୍ୟନ୍ତ ହେବ ବଦଳି ପ୍ରକିୟା । ସଚିବାଳୟ ଓ କୌଣସି ନିର୍ଦ୍ଦେଶାଳୟରେ ୩ବର୍ଷ ରହିପାରିବେନି ଅଫିସର । ବ୍ଲକ କିମ୍ବା ତହସିଲରେ ୬ବର୍ଷ ରହିପାରିବେନି ଗ୍ରୁପ C ଅଫିସର । ଗୁରୁତ୍ୱପୂର୍ଣ୍ଣ ଦାୟିତ୍ଵରେ ଥିଲେ ନିଜ ଜିଲ୍ଲା ବଦଳି ମନା । କେବଳ ନିୟମ ଆଧାରରେ ବଦଳି କରାଯିବ। ବଦଳି ଅର୍ଡରରେ ରହିବ ରିଲିଭ ଓ ଜଏନିଙ୍ଗ୍ ସମୟ ସୀମା ।  କେବେ ସୁଦ୍ଧା ପୁରୁଣା ଦାୟିତ୍ୱ ହସ୍ତାନ୍ତର କରିବେ, କେଉଁ ସମୟ ସୀମା ସୁଦ୍ଧା ନୂଆ ଦାୟିତ୍ୱରେ ଯୋଗ ଦେବେ, ତାହା ସରକାରୀ ନିର୍ଦ୍ଦେଶନାମାରେ ଏଣିକି ସ୍ପଷ୍ଟ ଉଲ୍ଲେଖ ରହିବ । ଏହି ପ୍ରକିୟାରେ ସ୍ଵଚ୍ଛତା ରଖିବାକୁ ଚିଠି ଲେଖି ନିର୍ଦ୍ଦେଶ ଦେଇଛି ସାଧାରଣ ପ୍ରଶାସନ ବିଭାଗ ।

ଆମେରିକାର ଏକ ବିଳାସପୂର୍ଣ୍ଣ ରେଷ୍ଟୁରାଣ୍ଟ ଜଣେ ଗ୍ରାହକଙ୍କଠାରୁ କେବଳ କେକ୍ କାଟିବା ବାବଦକୁ ୧୦,୬୫୦ ଟଙ୍କା ଆଦାୟ କରିଥିବା ଘଟଣା ସାମ୍ନାକୁ ଆସିଛି । ଜଷ୍ଟିନ ନାମକ ଜଣେ ଫୁଡ୍ ଇନ୍‌ଫ୍ଲୁଏନ୍‌ସର ନିଜର ୧୦ ଜଣ ସାଙ୍ଗଙ୍କ ସହ କାଲିଫର୍ଣ୍ଣିଆର ଏକ ରୁଫ୍‌ଟପ୍ ରେଷ୍ଟୁରାଣ୍ଟକୁ ରାତ୍ରି ଭୋଜନ ପାଇଁ ଯାଇଥିଲେ । ସେଠାରେ ସେମାନେ ଜଣେ ବନ୍ଧୁଙ୍କ ଜନ୍ମଦିନ ପାଳନ କରିବା ପାଇଁ ବାହାରୁ ଏକ କେକ୍ ନେଇ ଯାଇଥିଲେ । ରାତ୍ରି ଭୋଜନ ପରେ ଯେତେବେଳେ ବିଲ୍ ଆସିଲା, ସେଥିରେ 'କେକ୍ କଟିଂ ଫିସ୍' ବାବଦକୁ ୧୧୦ ଡଲାର ଅର୍ଥାତ୍ ପ୍ରାୟ ୧୦,୬୫୦ ଟଙ୍କା ଅଲଗା ଭାବେ ଯୋଡ଼ା ଯାଇଥିଲା । ଯାହାକି ସେଠାରେ ଉପସ୍ଥିତ ଥିବା ୧୧ ଜଣ ଲୋକଙ୍କ ହିସାବରେ ଜଣ ପ୍ରତି ପ୍ରାୟ ୯୭୦ ଟଙ୍କା ଲେଖାଏଁ ଧାର୍ଯ୍ୟ କରାଯାଇଥିଲା । ଏହି ଇନ୍‌ଫ୍ଲୁଏନ୍‌ସର ଜଣକ ସୋସିଆଲ ମିଡିଆରେ ବିଲ୍ ସହ ସମ୍ପୂର୍ଣ୍ଣ କାହାଣୀ ସେୟାର କରିବା ପରେ ଏହା ଖୁବ୍ ଭାଇରାଲ ହୋଇଥିଲା । ବିବାଦ ବଢ଼ିବା ପରେ ରେଷ୍ଟୁରାଣ୍ଟ ପକ୍ଷରୁ ସ୍ପଷ୍ଟୀକରଣ ଦିଆଯାଇ କୁହାଯାଇଛି ଯେ ବାହାରୁ ଅଣାଯାଇଥିବା କେକ୍ କାଟିବା ଏବଂ ପରଷିବା ପାଇଁ ସେମାନଙ୍କର ପୂର୍ବରୁ ଫିସ୍ ସ୍ଥିର ରହିଛି । ତେବେ ଗ୍ରାହକଙ୍କୁ ଏହି ଚାର୍ଜ ବିଷୟରେ ସଠିକ୍ ଭାବେ ସୂଚନା ଦିଆଯାଇ ନଥିବା ସେମାନେ ସ୍ୱୀକାର କରିଛନ୍ତି ଏବଂ ଏଥିପାଇଁ କ୍ଷମା ମାଗିବା ସହ ଟଙ୍କା ଫେରସ୍ତ କରିବାକୁ ପ୍ରତିଶ୍ରୁତି ଦେଇଛନ୍ତି ।

ଭୁବନେଶ୍ୱର : ମଧ୍ୟପ୍ରାଚ୍ୟରେ ଯୁଦ୍ଧ ପରିସ୍ଥିତି ଯୋଗୁଁ ଭାରତରେ ପେଟ୍ରୋଲ ଏବଂ ଡିଜେଲର ମୂଲ୍ୟ ବୃଦ୍ଧି ପାଉଛି । ୧୦ଦିନ ମଧ୍ୟରେ ଆଜି ସକାଳୁ ତୃତୀୟ ଥର ପାଇଁ ବଢ଼ିଲା ତେଲ ଦର । ହର୍ମୁଜ୍ ପ୍ରଣାଳୀ ଅବରୋଧ ଯୋଗୁଁ ଭାରତକୁ ଆସିପାରୁନାହିଁ ପର୍ଯ୍ୟାପ୍ତ ପରିମାଣର ଅଶୋଧିତ ତେଲ। ଏଥିପାଇଁ ଦେଶରେ ପେଟ୍ରୋଲ ଲିଟର ପ୍ରତି ୮୭ ପଇସା ଏବଂ ଡିଜେଲ ୯୧ ପଇସା ମହଙ୍ଗା ହୋଇଛି । ଚଳିତ ମେ' ମାସରେ ମାତ୍ର କେଇଟା ଦିନ ଭିତରେ ତୃତୀୟ ଥର ପାଇଁ ତେଲ ଦର ବଢ଼ିଛି । ଏହା ପୂର୍ବରୁ ମେ ୧୫ରେ ତେଲ ଦର ଲିଟର ପିଛା ୩ ଟଙ୍କା ବଢ଼ିଥିବା ବେଳେ, ମେ ୧୯ରେ ପୁଣି ୯୦ ପଇସା ବୃଦ୍ଧି ପାଇଥିଲା । ସର୍ବମୋଟ ଭାବେ, ଏପର୍ଯ୍ୟନ୍ତ ଲିଟର ପିଛା ପ୍ରାୟ ୫ ଟଙ୍କା ଦର ବୃଦ୍ଧି ପାଇସାରିଛି । ଲଗାତାର ବଢୁଥିବା ଏହି ଦର ଏବେ ଗରିବ ଓ ମଧ୍ୟବିତ୍ତ ପରିବାରର ଚିନ୍ତାକୁ ଆହୁରି ବଢ଼ାଇଦେଇଛି । 

ଅନ୍ୟପଟେ ,ଇରାନ ଏବଂ ଆମେରିକା ମଧ୍ୟରେ ଶାନ୍ତି ଚୁକ୍ତିନାମା ନ ଥିବାରୁ ଆଉ ଏକ ଯୁଦ୍ଧର ସମ୍ଭାବନା ସୃଷ୍ଟି ହୋଇଛି । ସେହିପରି ଭାରତ ରୁଷ ଠାରୁ ଆଉ ଅଶୋଧିତ ତୈଳ କିଣି ପାରିବ ନାହିଁ ବୋଲି ଆମେରିକା ରାଷ୍ଟ୍ରପତି ଟ୍ରମ୍ପ ପ୍ରତିବନ୍ଧକ ଲଗାଇଛନ୍ତି । ଯଦିଓ ଯୁଦ୍ଧ ଯୋଗୁଁ ଭାରତକୁ ରୁଷରୁ ତେଲ କିଣିବା ପାଇଁ ଏକ ଅସ୍ଥାୟୀ ଛାଡ ମିଳିଥିଲା, କିନ୍ତୁ ସେହି ଛାଡକୁ ଆଉ ନବୀକରଣ କରାଯାଉ ନଥିବାରୁ ଏହି ସଙ୍କଟ ଉପୁଜିଛି । 

କେନ୍ଦ୍ର ସରକାରଙ୍କ ସୂଚନା ଅନୁଯାୟୀ,  ସରକାରୀ ତେଲ କମ୍ପାନିଗୁଡ଼ିକ ଦୀର୍ଘ ଦିନ ଧରି ଦର ସ୍ଥିର ରଖିଥିଲେ କିନ୍ତୁ ଆନ୍ତର୍ଜାତୀୟ ବଜାରରେ ଦର ବଢ଼ିବା ସତ୍ତ୍ୱେ ଘରୋଇ ବଜାରରେ ଦର ନବଢ଼ିବାରୁ କମ୍ପାନି ପ୍ରତି ମାସରେ ପ୍ରାୟ ୧,୦୦୦ କୋଟି ଟଙ୍କାର କ୍ଷତି ସହୁଥିଲା । ଏହି କ୍ଷତି ଭରଣା ପାଇଁ ଏବେ କମ୍ପାନି ଧୀରେ ଧୀରେ ଦର ବଢ଼ାଇବା ଆରମ୍ଭ କରିଛନ୍ତି । ଯଦିଓ ଗତ ଦୁଇ ବର୍ଷ ହେବ ଭାରତ ରୁଷଠାରୁ ଶସ୍ତାରେ କ୍ରୁଡ୍ ଅଏଲ୍ କିଣି ଦେଶବାସୀଙ୍କୁ ଆଶ୍ଵସ୍ତି ଦେବାକୁ ଚେଷ୍ଟା କରୁଥିଲା କିନ୍ତୁ ଏବେ ବିଶ୍ଵ ବଜାରର ସ୍ଥିତି ଏବଂ ସପ୍ଲାଇ ଚେନ୍ ପ୍ରଭାବିତ ହେବା ଯୋଗୁଁ ରୁଷିଆନ୍ ରିହାତିର ଲାଭ ମଧ୍ୟ କମି କମି ଯାଉଛି । ତେବେ ପେଟ୍ରୋଲ-ଡିଜେଲ ଦର ବଢ଼ିଲେ ଦୈନନ୍ଦିନ ବ୍ୟବହୃତ ପନିପରିବା, ଫଳ ଓ ଖାଦ୍ୟ ସାମଗ୍ରୀ ମହଙ୍ଗା ହେବ । ଗ୍ରୋସରୀ ଏବଂ ଗାଡ଼ି ଭଡ଼ା ମଧ୍ୟ ବୃଦ୍ଧି ପାଇବ । ତେଣୁ ବର୍ତ୍ତମାନ ଦରବୃଦ୍ଧି ପାଇଁ ଦେଶରେ ଏକପ୍ରକାର ଅଘୋଷିତ ଏମର୍ଜେନ୍ସି ଲାରି ହେବାଭଳି ପରିସ୍ଥିତି ସୃଷ୍ଟି ହୋଇଛି ।

ମାଲକାନଗିରି/ମାଥିଲି : ଅସହ୍ୟ ଖରା, ତାତି, ଗୁଳୁଗୁଳିରେ ଆଉଟୁ ପାଉଟୁ ହେଉଛି ସାରା ରାଜ୍ୟ।  ଏହା ମଧ୍ୟରେ କିଛି ସ୍ଥାନରୁ ଆସିଛି ଅଂଶୁଘାତ ଜନିତ ମୃତ୍ୟୁ ଖବର । ଶନିବାର ଅଂଶୁଘାତରେ ବନ ବିଭାଗର ପାରା କର୍ମଚାରୀଙ୍କ ମୃତ୍ୟୁ ଘଟିଥିବା ସୂଚନା ମିଳିଛି । ମୃତକ ହେଲା ଗୌରାଙ୍ଗ ପୂଜାରୀ । ଗୋବିନ୍ଦପାଲି ପାଟ୍ରୋଲିଂ ପାଇଁ ଗଲାବେଳେ ମଝିରାସ୍ତାରେ ପଡ଼ି ଯାଇଥିଲେ ଗୌରାଙ୍ଗ । ତାଙ୍କୁ ଅସୁସ୍ଥ ଅବସ୍ଥାରେ ମାଥିଲି ପରେ ମାଲକାନଗିରି ସ୍ଥାନାନ୍ତର ହୋଇଥିଲେ। ମାଲକାନଗିରି ଜିଲା ମୁଖ୍ୟଚିକିତ୍ସାଳୟରେ ଡାକ୍ତର ତାଙ୍କୁ ମୃତ ଘୋଷଣା କରିଛନ୍ତି। 

ସୂଚନାନୁସାରେ, ବର୍ତ୍ତମାନ ଯାଏଁ ରାଜ୍ୟରେ ୧୬ଜଣଙ୍କ ଅଂଶୁଘାତ ଜନିତ ମୃତ୍ୟୁ ଘଟିଥିବା ଅଭିଯୋଗ ହୋଇଥିଲେ ମଧ୍ୟ ସ୍ୱତନ୍ତ୍ର ରିଲିଫ କମିଶନର ବା SRCଙ୍କ କାର୍ଯ୍ୟାଳୟ ପକ୍ଷରୁ ମିଳିଥିବା ସୂଚନା ଅନୁଯାୟୀ, ଏଥିମଧ୍ୟରୁ ୩ଟି ମୃତ୍ୟୁ ମାମଲାକୁ ଆଧିକାରିକ ଭାବେ ସ୍ପଷ୍ଟ କରାଯାଇଛି । ସୁନ୍ଦରଗଡ଼ ଏବଂ ସୁବର୍ଣ୍ଣପୁର ଜିଲ୍ଲାରୁ ଜଣେ ଲେଖାଏଁ ଲୋକଙ୍କ ଅଂଶୁଘାତରେ ପ୍ରାଣ ହରାଇଥିବା ସ୍ପଷ୍ଟ ହୋଇଛି। ପୋଷ୍ଟମର୍ଟମ ରିପୋର୍ଟ ଆଧାରରେ ୪ଟି ମାମଲାକୁ ଖାରଜ କରାଯାଇଥିବା ବେଳେ ବାକି ମାମଲାର ଯାଞ୍ଚ ଚାଲିଥିବା ଏସଆରସିଙ୍କ ପକ୍ଷରୁ ସୂଚନା ମିଳିଛି ।  

ଯାଜପୁର : ଅନ୍ୟକୁ ବଂଚାଉ ବଂଚାଉ ନିଜେ ଚାଲି ଗଲେ । ଗୋଟିଏ ଗୋଇଠା ନେଇଗଲା ଯୁବକଙ୍କ ଜୀବନ । ପୁଅର ଅଚାନକ ମୃତ୍ୟୁ ଖବର ସହ୍ୟ କରି ନପାରି ଜୀବନ ହାରିଲେ ବାପା। ନିମିଷକେ ମଧ୍ୟରେ ଘରୁ ଉଠିଲା ଦୁଇ ଦୁଇଟି କୋକେଇ । ନିୟତିର ଖେଳ ଏତେ ଯେ କ୍ରୁର ହୋଇପାରେ ତାହା ଦେଖିବାକୁ ମିଳିଛି ଯାଜପୁର ଜିଲ୍ଲା ମଙ୍ଗଳପୁର ଥାନା ଅନ୍ତର୍ଗତ ମାନସୀପାଟଣା ଗାଁରେ । ବିଷ ଖାଇଥିବା ବ୍ୟକ୍ତିଙ୍କୁ ବଞ୍ଚାଇଵାକୁ ଯାଇ ତାଙ୍କ ଗୋଇଠା ମାଡ଼ରେ ଯୁବକଙ୍କ ମୃତ୍ୟୁ ଘଟିଥିବା ସୂଚନା ମିଳିଛି । ସେପଟେ ହସ୍ପିଟାଲ ରେ ମଧ୍ୟ ବିଷ ଖାଇଥିବା ଯୁବକଙ୍କ ମୃତ୍ୟୁ ଘଟିଥିବା ସୂଚନା ମିଳିଛି । ଗୋଟିଏ ରାତିରେ ତିନି ତିନିଟି ଅପମୃତ୍ୟୁ ଖବର କୁ ନେଇ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳି ଯାଇଛି । 

ଘଟନାନୁସାରେ, ମଙ୍ଗଳପୁର ବଜାର ରେ ଷ୍ଟୁଡିଓ କରିଥିବା ଷ୍ଟିମର ପଣ୍ଡାଙ୍କ(ସିଲୁ) ଙ୍କ ଦୋକାନରେ କାମ କରୁଥିବା ଜଣେ କର୍ମଚାରୀ ବିକି ବିଷପାନ କରିଥିଲେ। ତାଙ୍କୁ ମଙ୍ଗଳପୁର ମେଡିକାଲରେ ଚିକିତ୍ସା ପାଇଁ ଭର୍ତ୍ତି କରାଯାଇଥିଲା। ଏହି ସମୟରେ ଷ୍ଟିମର ପଣ୍ଡା ମଧ୍ୟ ସେଠାରେ ଉପସ୍ଥିତ ଥିଲେ ଇ ଡାକ୍ତରଙ୍କ ପରାମର୍ଶ କ୍ରମେ ସେ ବିକିଙ୍କୁ ମେଡ଼ିସିନ ଖୁଆଉଥିଲେ । କିନ୍ତୁ ବିଷ ଜ୍ୱାଳାରେ ଛାଟିପିଟି ହେଉଥିବା ବିକିଙ୍କ ହାତ ଗୋଡ ଷ୍ଟିମରଙ୍କ ଛାତି ରେ ବାଜିଥିଲା। ଏଣୁ ସିଲୁ ନିଶ୍ୱାସ ନେବାରେ କଷ୍ଟ ଅନୁଭବ କରିଥିଲେ । ମେଡିକାଲରେ ପ୍ରାଥମିକ ଚିକିତ୍ସା ପରେ ଯାଜପୁର ମୁଖ୍ୟ ଚିକିତ୍ସାଳୟକୁ ଶୁକ୍ରବାର ରାତିରେ ପଠାଇଦେଇଥିଲେ। ସେଠାରେ ଡାକ୍ତର ସିଲୁଙ୍କୁ ମୃତ ଘୋଷଣା କରିଥିଲେ। ପୁଅର ମୃତ୍ୟୁ ଖବର ପାଇ ଘରେ ବାପା ରସାନନ୍ଦ ପଣ୍ଡା ନିଜବାଡିରେ ଥିବା ଏକ ଆମ୍ବ ଗଛରେ ରଶି ଲଗାଇ ଆତ୍ମହତ୍ୟା କରିଥିଲେ । ନିମିଷକ ମଧ୍ୟରେ ଘରୁ ଉଠିଥିଲା ଦୁଇ ଦୁଇଟି କୋକେଇ । ଏହାକୁ ପରିବାର ଲୋକଙ୍କ ସହିତ ସ୍ଥାନୀୟ ବାସିନ୍ଦା ମଧ୍ୟ ସହ୍ୟ କରିପାରୁ ନାହାନ୍ତି । ଦୁଇ ମୃତଦେହକୁ ଶବ ବ୍ୟବଚ୍ଛେଦ ଲାଗି ଯାଜପୁର ମୁଖ୍ୟ ଚିକିତ୍ସାଳୟ ଅଣାଯାଇଛି। ଏ ନେଇ ମଙ୍ଗଳପୁର ପୋଲିସ ତଦନ୍ତ କରୁଛି।