ଭୁବନେଶ୍ୱର : ମଧ୍ୟପ୍ରାଚ୍ୟରେ ଯୁଦ୍ଧ ପରିସ୍ଥିତି ଯୋଗୁଁ ଭାରତରେ ପେଟ୍ରୋଲ ଏବଂ ଡିଜେଲର ମୂଲ୍ୟ ବୃଦ୍ଧି ପାଉଛି । ୧୦ଦିନ ମଧ୍ୟରେ ଆଜି ସକାଳୁ ତୃତୀୟ ଥର ପାଇଁ ବଢ଼ିଲା ତେଲ ଦର । ହର୍ମୁଜ୍ ପ୍ରଣାଳୀ ଅବରୋଧ ଯୋଗୁଁ ଭାରତକୁ ଆସିପାରୁନାହିଁ ପର୍ଯ୍ୟାପ୍ତ ପରିମାଣର ଅଶୋଧିତ ତେଲ। ଏଥିପାଇଁ ଦେଶରେ ପେଟ୍ରୋଲ ଲିଟର ପ୍ରତି ୮୭ ପଇସା ଏବଂ ଡିଜେଲ ୯୧ ପଇସା ମହଙ୍ଗା ହୋଇଛି । ଚଳିତ ମେ' ମାସରେ ମାତ୍ର କେଇଟା ଦିନ ଭିତରେ ତୃତୀୟ ଥର ପାଇଁ ତେଲ ଦର ବଢ଼ିଛି । ଏହା ପୂର୍ବରୁ ମେ ୧୫ରେ ତେଲ ଦର ଲିଟର ପିଛା ୩ ଟଙ୍କା ବଢ଼ିଥିବା ବେଳେ, ମେ ୧୯ରେ ପୁଣି ୯୦ ପଇସା ବୃଦ୍ଧି ପାଇଥିଲା । ସର୍ବମୋଟ ଭାବେ, ଏପର୍ଯ୍ୟନ୍ତ ଲିଟର ପିଛା ପ୍ରାୟ ୫ ଟଙ୍କା ଦର ବୃଦ୍ଧି ପାଇସାରିଛି । ଲଗାତାର ବଢୁଥିବା ଏହି ଦର ଏବେ ଗରିବ ଓ ମଧ୍ୟବିତ୍ତ ପରିବାରର ଚିନ୍ତାକୁ ଆହୁରି ବଢ଼ାଇଦେଇଛି । 

ଅନ୍ୟପଟେ ,ଇରାନ ଏବଂ ଆମେରିକା ମଧ୍ୟରେ ଶାନ୍ତି ଚୁକ୍ତିନାମା ନ ଥିବାରୁ ଆଉ ଏକ ଯୁଦ୍ଧର ସମ୍ଭାବନା ସୃଷ୍ଟି ହୋଇଛି । ସେହିପରି ଭାରତ ରୁଷ ଠାରୁ ଆଉ ଅଶୋଧିତ ତୈଳ କିଣି ପାରିବ ନାହିଁ ବୋଲି ଆମେରିକା ରାଷ୍ଟ୍ରପତି ଟ୍ରମ୍ପ ପ୍ରତିବନ୍ଧକ ଲଗାଇଛନ୍ତି । ଯଦିଓ ଯୁଦ୍ଧ ଯୋଗୁଁ ଭାରତକୁ ରୁଷରୁ ତେଲ କିଣିବା ପାଇଁ ଏକ ଅସ୍ଥାୟୀ ଛାଡ ମିଳିଥିଲା, କିନ୍ତୁ ସେହି ଛାଡକୁ ଆଉ ନବୀକରଣ କରାଯାଉ ନଥିବାରୁ ଏହି ସଙ୍କଟ ଉପୁଜିଛି । 

କେନ୍ଦ୍ର ସରକାରଙ୍କ ସୂଚନା ଅନୁଯାୟୀ,  ସରକାରୀ ତେଲ କମ୍ପାନିଗୁଡ଼ିକ ଦୀର୍ଘ ଦିନ ଧରି ଦର ସ୍ଥିର ରଖିଥିଲେ କିନ୍ତୁ ଆନ୍ତର୍ଜାତୀୟ ବଜାରରେ ଦର ବଢ଼ିବା ସତ୍ତ୍ୱେ ଘରୋଇ ବଜାରରେ ଦର ନବଢ଼ିବାରୁ କମ୍ପାନି ପ୍ରତି ମାସରେ ପ୍ରାୟ ୧,୦୦୦ କୋଟି ଟଙ୍କାର କ୍ଷତି ସହୁଥିଲା । ଏହି କ୍ଷତି ଭରଣା ପାଇଁ ଏବେ କମ୍ପାନି ଧୀରେ ଧୀରେ ଦର ବଢ଼ାଇବା ଆରମ୍ଭ କରିଛନ୍ତି । ଯଦିଓ ଗତ ଦୁଇ ବର୍ଷ ହେବ ଭାରତ ରୁଷଠାରୁ ଶସ୍ତାରେ କ୍ରୁଡ୍ ଅଏଲ୍ କିଣି ଦେଶବାସୀଙ୍କୁ ଆଶ୍ଵସ୍ତି ଦେବାକୁ ଚେଷ୍ଟା କରୁଥିଲା କିନ୍ତୁ ଏବେ ବିଶ୍ଵ ବଜାରର ସ୍ଥିତି ଏବଂ ସପ୍ଲାଇ ଚେନ୍ ପ୍ରଭାବିତ ହେବା ଯୋଗୁଁ ରୁଷିଆନ୍ ରିହାତିର ଲାଭ ମଧ୍ୟ କମି କମି ଯାଉଛି । ତେବେ ପେଟ୍ରୋଲ-ଡିଜେଲ ଦର ବଢ଼ିଲେ ଦୈନନ୍ଦିନ ବ୍ୟବହୃତ ପନିପରିବା, ଫଳ ଓ ଖାଦ୍ୟ ସାମଗ୍ରୀ ମହଙ୍ଗା ହେବ । ଗ୍ରୋସରୀ ଏବଂ ଗାଡ଼ି ଭଡ଼ା ମଧ୍ୟ ବୃଦ୍ଧି ପାଇବ । ତେଣୁ ବର୍ତ୍ତମାନ ଦରବୃଦ୍ଧି ପାଇଁ ଦେଶରେ ଏକପ୍ରକାର ଅଘୋଷିତ ଏମର୍ଜେନ୍ସି ଲାରି ହେବାଭଳି ପରିସ୍ଥିତି ସୃଷ୍ଟି ହୋଇଛି ।

ଭୁବନେଶ୍ୱର: ଭୁବନେଶ୍ୱରରେ ଖୋଲିବ SEBI( Securities and Exchange bourd of india )ର ନୂଆ କାର୍ଯ୍ୟାଳୟ  I ଏହା ପୂର୍ବ ଭାରତରେ ସେବିର ପ୍ରଥମ କାର୍ଯ୍ୟାଳୟ ହେବ । ଏନେଇ ଭୁବନେଶ୍ୱରରେ ସାମ୍ବାଦିକ ସମ୍ମିଳନୀରେ ସୂଚନା ଦେଇଛନ୍ତି ସେବି ଅଧ୍ୟକ୍ଷ ତୁହିନକାନ୍ତ ପାଣ୍ଡେ । ଆଜି ଏଥିପାଇଁ ଭଡ଼ା ଚୁକ୍ତି ସ୍ବାକ୍ଷର ହୋଇଛି। ପ୍ରାଥମିକ ପର୍ଯ୍ୟାୟରେ ଏକ ଛୋଟ କାର୍ଯ୍ୟାଳୟ ଆରମ୍ଭ ହେବ। ଆସୋସିଏସନ ଅଫ ମ୍ୟୁଚୁଆଲ ଫଣ୍ଡ ଅଫ ଇଣ୍ଡିଆର ଏକ କର୍ମଶାଳାରେ ଯୋଗ ଦେବା ଅବସରରେ ଏହା କହିଛନ୍ତି ସେବି ଅଧ୍ୟକ୍ଷ । 

ଓଡିଶାରେ SIP ର ଚାହିଦା ବଢ଼ିଛି I ୧୦ ବର୍ଷରେ ୧୦ ଗୁଣା ଅଧିକ SIP ଇନଭେଷ୍ଟମେଣ୍ଟ ବୃଦ୍ଧି ପାଇଛି। ହେଲେ ଇନଭେଷ୍ଟମେଣ୍ଟ କ୍ଷେତ୍ରରେ ଏବେ ବି ଓଡିଶା ପଛରେ ରହିଛି। ତେଣୁ ଏହାକୁ ବୃଦ୍ଧି କରିବା ପାଇଁ ଅଣ୍ଟା ଭିଡ଼ିଛି ସେବି। ଓଡିଶାରେ municipality bond କୁ ଆରମ୍ଭ କରିବା ପାଇଁ ରାଜ୍ୟ ସରକାରଙ୍କୁ ସେବି ପକ୍ଷରୁ ପରାମର୍ଶ ଦିଆଯାଇଛି। ମ୍ୟୁନିସପାଲିଟିଗୁଡ଼ିକ ପାଇଁ ପାଣ୍ଠି ସଂଗ୍ରହ କରିବାର ଏହି ବ୍ୟବସ୍ଥାକୁ ଓଡ଼ିଶା ଗମ୍ଭୀରତାର ସହ ଗ୍ରହଣ କରିବା ଦରକାର ବୋଲି ସେ କହିଥିଲେ। ବର୍ତ୍ତମାନ ସୁଦ୍ଧା ଦେଶର ୨୨ଟି ସହରାଞ୍ଚଳ ପୌର ସଂସ୍ଥା ୩୩ ମୁନସିପାଲିଟି ବଣ୍ଡ ଜାରି କରି ୪୫୦୦ କୋଟି ଟଙ୍କା ସଂଗ୍ରହ କରିଛନ୍ତି। ଉତ୍ତରପ୍ରଦେଶ, ମହାରାଷ୍ଟ୍ର ଓ ମଧ୍ୟପ୍ରଦେଶର ମୁନସିପାଲିଟିଗୁଡ଼ିକ ଏହି ବଣ୍ଡ୍ ଜାରି କରିଛନ୍ତି। ଓଡ଼ିଶା ମଧ୍ୟ‌ ସେଥିରେ ସାମିଲ ହୋଇ ସେହି ବଣ୍ଡ୍‌ର ଲାଭ ହାସଲ କରିବା ଉଚିତ୍‌। ଦ୍ରୁତ ଗତିରେ ବଢ଼ୁଥିବା ସହରାଞ୍ଚଳ ବିକାଶ ପାଇଁ ପାଣ୍ଠି ଆବଶ୍ୟକତା ପୂରଣ କରିବାରେ ଏହି ବଣ୍ଡ୍ ସହାୟକ ହୋଇପାରିବ। କେନ୍ଦ୍ର ସରକାର ଏହି ବଣ୍ଡ୍ ଉପରେ ଅନୁଦାନ ଆକାରରେ ପ୍ରୋତ୍ସାହନ ମଧ୍ୟ ଦେଉଛନ୍ତି । ତେଣୁ ଓଡିଶା ସମିତ ବିଭିନ୍ନ ରାଜ୍ୟ ସରକାରଙ୍କୁ ଏହି ବଣ୍ଡ୍ ଆରମ୍ଭ କରିବା ପାଇଁ ସେବି ପକ୍ଷରୁ ପରାମର୍ଶ ଦିଆଯାଇଛି ।

ଭୁବନେଶ୍ୱର : ତେଲ ଯନ୍ତ୍ରଣା ମଧ୍ୟରେ ଜନସାଧାରଣ ହନ୍ତସନ୍ତ ହେଉଥିବାବେଳେ ପୁଣି ବଢିଛି ଘରୋଇ ବସ ଭଡା । ତୈଳ ଦର ବୃଦ୍ଧିକୁ ଦୃଷ୍ଟିରେ ରଖି ରାଜ୍ୟ ସରକାର ବସ ଭଡ଼ା ବଢ଼ାଇବାକୁ ନିଷ୍ପତ୍ତି ନେଇଛନ୍ତି।  ସାଧାରଣ ଓ ଏକ୍ସପ୍ରେସ୍ ବସ୍ ଭଡ଼ା କିଲୋମିଟର୍ ପିଛା  ୨ ପଇସା ବଢ଼ିଥିବାବେଳେ ଡିଲକ୍ସ, ଏସି ଡିଲକ୍ସ ଓ ସୁପର ଡିଲକ୍ସ ବସ୍ ଭଡ଼ା ୪ରୁ ୬ ପଇସା ବୃଦ୍ଧି ପାଇଛି । ଏହି ନୂତନ ଭଡ଼ା ତୁରନ୍ତ ଲାଗୁ ହେବା ନେଇ ସୂଚନା ମିଳିଛି।ଏ ନେଇ ବିଜ୍ଞପ୍ତି ପ୍ରକାଶ ପାଇଛି ।  

ସାଧାରଣ ବସ୍ ଭଡ଼ା କିଲୋମିଟର୍ ପିଛା ୮୮ ପଇସା ଥିବା ବେଳେ ବର୍ଦ୍ଧିତ ଦର ସହ ୯୦ ପଇସା ହୋଇଛି । ସେହିପରି ଏକ୍ସପ୍ରେସ୍ ବସ୍ ଭଡ଼ା ୯୨ ପଇସାରୁ ୯୪ ପଇସାକୁ ବୃଦ୍ଧି ପାଇଛି । ସେହିପରି ଡିଲକ୍ସ ବସ୍ ଭଡ଼ା ୧୨୭ ପଇସାରୁ ବୃଦ୍ଧି ପାଇ ୧୩୧ ପଇସା, ଏସି ଡିଲକ୍ସ ୧୫୫ ପଇସାରୁ ୧୫୯ ପଇସା ଓ ସୁପର ଡିଲକ୍ସ ଭଡ଼ା ୨୪୧ ପଇସାରୁ ୨୪୭ ପଇସାକୁ ବୃଦ୍ଧି ପାଇଛି ।

ସୂଚନାଯୋଗ୍ୟ, ଗତ କିଛି ଦିନ ହେବ ଡିଜେଲ ଦରରେ କ୍ରମାଗତ ବୃଦ୍ଧି ଘଟିଛି। ଫଳରେ ବସ ମାଲିକ ସଂଘ ପକ୍ଷରୁ ଭଡ଼ା ବଢ଼ାଇବାକୁ ଦାବି ହୋଇଆସୁଥିଲା। ସରକାରଙ୍କ ଏହି ନିଷ୍ପତ୍ତି ପରେ ସାଧାରଣ ଯାତ୍ରୀଙ୍କ ଉପରେ ଆର୍ଥିକ ବୋଝ ପଡ଼ିବ। ବିଶେଷ କରି ଦୂର ଯାତ୍ରୀମାନଙ୍କୁ ଏବେ ଅଧିକ ଖର୍ଚ୍ଚାନ୍ତ ହେବାକୁ ପଡ଼ିବ।

ଭୁବନେଶ୍ୱର : ଜନସାଧାରଣଙ୍କ ଉପରେ ମହଙ୍ଗା ମାଡ଼ । ନିତ୍ୟବ୍ୟବହାର୍ଯ୍ୟ ଜିନିଷର ଦରବୃଦ୍ଧି ପରେ ଏବେ ସାରା ଦେଶରେ ଦେଖାଦେଇଛି ତୈଳ ସଙ୍କଟ । ଆଜି ପୁଣି ଥରେ ବଢିଛି ତେଲ ଦର । ପେଟ୍ରୋଲ୍ ଲିଟର ପିଛା ୩ ଟଙ୍କା ବଢ଼ିଥିବାବେଳେ ଡିଜେଲ୍ ଲିଟର ପିଛା ୩ ଟଙ୍କା ୧୧ ପଇସା ବୃଦ୍ଧି ପାଇଛି । ସେହିପରି CNG ଦରରେ ମଧ୍ୟ ୨ ଟଙ୍କା ବୃଦ୍ଧି ଘଟିଛି । ଦିଲ୍ଲୀରେ ପେଟ୍ରୋଲ୍ ଲିଟର ୯୭ ଟଙ୍କା ୭୭ ପଇସା ଏବଂ ଡିଜେଲ୍ ଲିଟର ୯୯ ଟଙ୍କା ୬୭ ପଇସା ଅଛି । ଅନ୍ୟପଟେ ଅଶୋଧିତ ତୈଳର ଉଚ୍ଚ ମୂଲ୍ୟ ତେଲ କମ୍ପାନୀଗୁଡ଼ିକର ମାର୍ଜିନକୁ ପ୍ରଭାବିତ କରିଛି, ଯାହା ଫଳରେ ମାସିକ ₹୩୦,୦୦୦ କୋଟି କ୍ଷତି ହେଉଛି ।

ସେହିପରି କୋଲକାତାରେ ପେଟ୍ରୋଲ ମୂଲ୍ୟ ସର୍ବାଧିକ ₹୩.୨୯ ବୃଦ୍ଧି ପାଇଛି, ଯାହା ଫଳରେ ସହରର ମୂଲ୍ୟ ₹୧୦୮.୭୪ ପ୍ରତି ଲିଟର ହୋଇଛି । ମୁମ୍ବାଇରେ ପେଟ୍ରୋଲ ମୂଲ୍ୟ ₹୩.୧୪ ବୃଦ୍ଧି ପାଇ ₹୧୦୬.୬୮ ହୋଇଛି, ଯେତେବେଳେ ଚେନ୍ନାଇରେ ₹୨.୮୩ ବୃଦ୍ଧି ପାଇଛି । ତାମିଲନାଡୁ ରାଜଧାନୀରେ, ପେଟ୍ରୋଲର ଏକ ଲିଟର ମୂଲ୍ୟ ଏବେ ₹୧୦୩.୬୭ ହୋଇଛି । ଭୁବନେଶ୍ଵରରେ ପେଟ୍ରୋଲ ପ୍ରତି ଲିଟର ପିଛା ୧୦୪ ଟଙ୍କା ପାର କରିଛି ।

ଭୁବନେଶ୍ୱର : ରାଜ୍ୟ​‌ରେ ଏବେ ଇନ୍ଧନ ସଙ୍କଟ ଚରମ ସୀମାରେ ପହଞ୍ଚିଛି। ପେଟ୍ରୋଲ ଓ ଡିଜେଲ ଅଭାବ ଯୋଗୁଁ ସାଧାରଣ ଜନଜୀବନ ସମ୍ପୂର୍ଣ୍ଣ ଅସ୍ତବ୍ୟସ୍ତ ହୋଇପଡିଛି। ପେଟ୍ରୋଲପମ୍ପରେ ଲାଗିଛି ଲମ୍ବା ଧାଡି।

ତୈଳ ସଂକଟକୁ ନେଇ ଆଜି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଏକ ଗୁରୁତ୍ତ୍ୱପୂର୍ଣ୍ଣ ଘୋଷଣା କରି ପାରନ୍ତି ।ପ୍ରଧାନମନ୍ତ୍ରୀ ନିଜ କାରକେଡ ଗାଡ଼ି ୨କୁ ହ୍ରାସ କରିଥିବା ବେଳେ ମୁଖ୍ୟମନ୍ତ୍ରୀ ମୋହନ ମାଝୀ ମଧ୍ୟ ଅନୁରୂପ ପଦକ୍ଷେପ ନେଇଛନ୍ତି। ନିଜ କାରକେଡ ଗାଡ଼ି ହ୍ରାସ କରିଛନ୍ତି। ଆଜି ଦୁଇ ଉପମୁଖ୍ୟମନ୍ତ୍ରୀ ବିନା ପାଇଲଟରେ ଲୋକସେବା ଭବନ ଆସିଥିଲେ । ତେଲ ସଂକଟ ଦେଖି ପାଇଲଟ ଭ୍ୟାନ ଫେରାଇଦେଇଛନ୍ତି ଉପମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂଦେଓ। ଏଣିକି ଗୋଟିଏ ମାତ୍ର ଗାଡି ବ୍ୟବହାର କରିବେ। ସେହିପରି ଆଜିଠାରୁ ପରିବହନ ମନ୍ତ୍ରୀ ବିଭୁତି ଭୂଷଣ ଜେନା ଇଭିର ବ୍ୟବହାର କରିବା ଆରମ୍ଭ କରିଛନ୍ତି | ଆଇନ ମନ୍ତ୍ରୀ ପୃଥ୍ବୀରାଜ ହରିଚନ୍ଦନ ଏବଂ ରାଜସ୍ବ ମନ୍ତ୍ରୀ ସୁରେଶ ପୂଜାରୀ ମଧ୍ୟ ନିଜ ପାଇଲଟ ଗାଡ଼ି ଛାଡ଼ିଛନ୍ତି।

ତେବେ କଥା କେବଳ ମନ୍ତ୍ରୀ, ଜନପ୍ରତିନିଧି ଓ ସରକାରୀ କର୍ମଚାରୀଙ୍କ ପାଖରେ ସୀମିତ ରହୁନାହିଁ। ସାଧାରଣ ଲୋକେ ଏବଂ ଘରୋଇ ଅନୁଷ୍ଠାନର କର୍ମଚାରୀଙ୍କ ପାଇଁ ମଧ୍ୟ ଅନୁରୂପ ପଦକ୍ଷେପ ନେବା ଜରୁରୀ ହୋଇଛି । କାରଣ ସମସ୍ତେ ଚାହିଁଲେ ସଙ୍କଟକୁ ବହୁ ଅଂଶରେ ହାଲୁକା କରାଯାଇପାରିବ। ସେହିପରି ସାଧାରଣ ଲୋକଙ୍କ ପାଇ ମଧ୍ୟ କିଛି ଏସଓପି ରାଜ୍ୟ ସରକାର ଆଣିପାରନ୍ତି ।

ସେପଟେ, ରାତି ଅଧରୁ ତେଲ ପାଇଁ ଟାଙ୍କିରେ ଲୋକଙ୍କ ପ୍ରବଳ ଭିଡ଼ ଦେଖାଯାଉଛି । ଟ୍ୱିନ୍‌ସିଟି ସମେତ ପୁରୀ, ବାଲେଶ୍ୱର,କେନ୍ଦ୍ରାପଡ଼ା, ଜୟପୁର, ରାଉରକେଲାରେ ମଧ୍ୟ ଟାଙ୍କିରେ ଲମ୍ବା ଲାଇନ୍।ଘଣ୍ଟା ଘଣ୍ଟା ଧରି ଲମ୍ବା ଲାଇନ୍‌ରେ ଅପେକ୍ଷା କରିଛନ୍ତି ଗ୍ରାହକ। ପ୍ରବଳ ଗ୍ରୀଷ୍ମ  ପ୍ରବାହ ପ​‌ରେ ବି ଲୋକେ ଘଣ୍ଟା ଘଣ୍ଟା ଧରି ଅପେକ୍ଷା କରୁଛନ୍ତି। ତେଲ ପାଇଁ ଗାଡିଗୁଡିକ ଏନଏଚ ଉପରେ ଲମ୍ବି ରହୁଥିବାରୁ ଦୁର୍ଘଟଣା ବଢ଼ିବାରେ ଆଶଙ୍କା ରହୁଛି। ଅନେକ ଟାଙ୍କିରେ  ନୋ ଷ୍ଟକ  ବୋର୍ଡ ଝୁଲୁଥିବାରୁ ଲୋକେ ନିରାଶ ହୋଇ ଗୋଟିଏ ପମ୍ପରୁ ଅନ୍ୟ ପମ୍ପକୁ ଦୌଡୁଛନ୍ତି।

ଭୁବନେଶ୍ୱର : ରାଜ୍ୟରେ ଦେଖାଦେଇଛି ତୈଳ ସଙ୍କଟ । ଅନେକ ସ୍ଥାନରେ ଟାଙ୍କିରେ ପେଟ୍ରୋଲ ନଥିବାରୁ ଲାଗିଛି ନୋ ଷ୍ଟକ୍‌ ବୋର୍ଡ଼ । କେନ୍ଦୁଝର, ଭଦ୍ରକ, ବାଲେଶ୍ୱର, ଯାଜପୁର, ଗଞ୍ଜାମ, ବଲାଙ୍ଗୀର, ରାଉରକେଲା ଏବଂ ପାରାଦୀପର ବିଭିନ୍ନ ସ୍ଥାନରେ ତେଲର ଅଭାବ ଥିବା ଦେଖାଦେଇଛି । ଆଉ ଯେଉଁଠି ତେଲ ମିଳୁଛି ସେଠାରେ ଲମ୍ବା ଲାଇନ୍ ଲାଗିଛି । ତେଣୁ ଘଣ୍ଟା ଘଣ୍ଟା ଧରି ଅପେକ୍ଷା କରିବାକୁ ପଡ଼ୁଛି ।  ଆଗକୁ କାଳେ ତେଲ ମିଳିବନି, ତେଲ ଦର ବଢ଼ିଯିବ, ସେଇ ଆଶଙ୍କାରେ ଅନେକ ଜାଗାରେ ଲୋକେ ଅଧିକ ମାତ୍ରାରେ ପେଟ୍ରୋଲ ନେଉଥିବାରୁ ଟାଙ୍କି ଗୁଡ଼ିକରେ ଷ୍ଟକ୍‌ ସରିଯାଉଛି । ହଠାତ୍‌ ପେଟ୍ରୋଲ କିଣିବା ପରିମାଣ ୫୦ ପ୍ରତିଶତ ବଢ଼ିଯାଇଥିବାରୁ ଏଭଳି ପରିସ୍ଥିତି ସୃଷ୍ଟି ହୋଇଛି। 

 ଗ୍ୟାସ୍ ପାଇଁ ଯେଭଳି ହୋ-ହଲ୍ଲା ଚାଲିଥିଲା, ଠିକ୍‌ ସେମିତି ଏବେ ପେଟ୍ରୋଲ ଡିଜେଲ ପାଇଁ ହୋ-ହଲ୍ଲା ଚାଲିଛି । ଗ୍ୟାସ୍‌ ଭଳି ଖୁବ୍‌ ଶୀଘ୍ର ତେଲ ସମସ୍ୟା ଦୂର ହେବ ବୋଲି କହିଛନ୍ତି ସରକାର । ତେବେ ରାଜ୍ୟରେ ତେଲ ସଙ୍କଟ ଅଭିଯୋଗକୁ ଖଣ୍ଡନ କରିଛନ୍ତି ଯୋଗାଣ ସଚିବ ପ୍ରମୁଖ ସଚିବ ସଂଜୟ ସିଂ । ଘରୋଇ ବସ୍ ମାଲିକ ସଂଘର ଆଶଙ୍କାକୁ ଭିତ୍ତିହୀନ ବୋଲି କହିଛନ୍ତି  । ତେଲ ସଙ୍କଟ ଆଦୌ ନାହିଁ । ରାଜ୍ୟରେ ୨୦ରୁ ୨୨ଟି ତେଲ ଟାଙ୍କିରେ ଡ୍ରାଏ ଆଉଟ୍ ସ୍ଥିତି ଦେଖାଦେଇଛି । ଡ୍ରାଏ ଆଉଟ୍ ସ୍ଥିତି ମ୍ୟାନେଜମେଣ୍ଟର ଅଭାବ ଯୋଗୁଁ ହୋଇଛି । ତେଲ ଅଭାବ ଯୋଗୁଁ ଆଦୌ ଡ୍ରାଏ ଆଉଟ୍ ସ୍ଥିତି ଦେଖାଦେଇନି । ସ୍ୱାଭାବିକ ସ୍ଥିତିରେ ବି ୨୦ରୁ ୨୨ଟି ତେଲ ଟାଙ୍କିରେ ଡ୍ରାଏ ଆଉଟ୍ ସ୍ଥିତି ଦେଖାଯାଏ । ଏଭଳି ଡ୍ରାଏ ଆଉଟ୍ ସ୍ଥିତିର ମନିଟରିଂ ଚାଲିଛି । ଆବଶ୍ୟକୀୟ ବ୍ୟବସ୍ଥା କରିବୁ ବୋଲି କହିଛନ୍ତି ସଚିବ । ତେଣୁ ଭୟଭୀତ ହୋଇ ଆଦୌ ତେଲ ନ କିଣିବାକୁ ଜନସାଧାରଣଙ୍କୁ ଯୋଗାଣ ବିଭାଗ ସଚିବ ପରାମର୍ଶ ଦେଇଛନ୍ତି । 

ସେପଟେ ରାଜ୍ୟ ଘରୋଇ ବସ୍ ମାଲିକ ସଂଘ ସମ୍ପାଦକ ଦେବେନ୍ଦ୍ର ସାହୁ କହିଛନ୍ତି ଯେ ରାଜ୍ୟରେ ତୈଳ ସଙ୍କଟ ଦେଖା ଦେଇଛି । ଏଭଳି ସମସ୍ୟା ଲାଗି ରହିଲେ ୬ ରୁ ୭ ଦିନରେ ଘରୋଇ ବସ୍ ଚଳାଚଳ ସମ୍ପୂର୍ଣ୍ଣ ଠପ୍ ହୋଇଯିବ । ତେଣୁ ସରକାର ଏଥିପ୍ରତି ତୁରନ୍ତ ଧ୍ୟାନ ଦେବାକୁ ସେ ଅନୁରୋଧ କରିଛନ୍ତି । ପବ୍ଲିକ୍‌ ଟ୍ରାନ୍ସପୋର୍ଟ ପାଇଁ କାର୍ଡ ବ୍ୟବସ୍ଥା କରି ଡିଜେଲ ଦେବାକୁ କହିଛନ୍ତି । ଏବେ ରାଜ୍ୟରେ ମୋଟ ୧୪ ହଜାର ଘରୋଇ ବସ୍ ଚାଲିଛି । ତେଲ ନ ମିଳିବାରୁ ପ୍ରାୟ ୨୦୦୦ ବସ୍ ବନ୍ଦ ହୋଇପଡ଼ିଥିବାବେଳେ ଗ୍ରାମାଞ୍ଚଳରେ ତେଲ ନ ମିଳିବାରୁ ବସ୍‌ଗୁଡ଼ିକ ଆସିପାରୁ ନାହିଁ ବୋଲି ସେ କହିଛନ୍ତି । 

ଭୁବନେଶ୍ୱର : ଚରମ ସୀମାରେ ପହଞ୍ଚିଲାଣି ତୈଳ ସମସ୍ୟା । ଯାହାକୁ ନେଇ ବେଶୀ ଚିନ୍ତାରେ ପଡିଛନ୍ତି ରାଜ୍ୟ ଘରୋଇ ବସ୍ ମାଲିକ ସଂଘ। ଶୀଘ୍ର ସମାଧାନ ନହେଲେ ରାଜ୍ୟରେ ବିଭିନ୍ନ ସ୍ଥାନରେ ବସ ସେବା ବନ୍ଦ ହୋଇପାରେ ବୋଲି ଘରୋଇ ବସ୍‌ ସଂଘ ସମ୍ପାଦକ ବଡ଼ ବୟାନ ଦେଇଛନ୍ତି । ସେ କହିଛନ୍ତି ଯଦି ଏଭଳି ସମସ୍ୟା ଲାଗି ରହିଲେ ୬ରୁ ୭ ଦିନ ମଧ୍ୟରେ ଘରୋଇ ବସ୍ ଚଳାଚଳ ବନ୍ଦ ହୋଇଯିବ। ସରକାର ଏଥିପ୍ରତି ତୁରନ୍ତ ଧ୍ୟାନ ଦେବାକୁ ସେ ଅନୁରୋଧ କରିଛନ୍ତି। ପବ୍ଲିକ ଟ୍ରାନ୍ସପୋର୍ଟ ପ୍ରତି ସ୍ବତନ୍ତ୍ର ଧ୍ୟାନ ଦେବା  ଏବଂ କାର୍ଡ ବ୍ୟବସ୍ଥା କରି ଡିଜେଲ ଦେବାକୁ ଅନୁରୋଧ  କରିଛନ୍ତି। ବର୍ତ୍ତମାନ୍ ରାଜ୍ୟରେ ମୋଟ ୧୪ ହଜାର ଘରୋଇ ବସ୍ ଚାଲିଛି। -ତେଲ ନ ମିଳିବାରୁ ପ୍ରାୟ ଦୁଇ ହଜାର ବସ୍ ବନ୍ଦ ହୋଇପଡ଼ିଛି। ଗ୍ରାମାଞ୍ଚଳରେ ତେଲ ନ ମିଳିବାରୁ ବସ୍‌ଗୁଡ଼ିକ ଆସିପାରୁନାହିଁ।   

ଘରୋଇ ବସ ମାଲିକ ସଙ୍ଘର ସାଧାରଣ ସମ୍ପାଦକ ଦେବେନ୍ଦ୍ର ସାହୁ କହିଛନ୍ତି , ଓଡିଶା ସମେତ ପଡ଼ୋଶୀ ରାଜ୍ୟ ଆନ୍ଧ୍ରପ୍ରଦେଶ, ଛତିଶଗଡ଼, ଝାଡ଼ଖଣ୍ଡ, ପଶ୍ଚିମବଙ୍ଗରେ ମଧ୍ୟ ତେଲ ମିଳୁ ନାହିଁ। ତେଣୁ ବାହାର ରାଜ୍ୟର ଗାଡ଼ି ଓଡିଶାକୁ ଆସି ପାରୁ ନାହିଁ। ରାଜ୍ୟ ସରକାର ସମ୍ବେଦନଶୀଳ ହୋଇ ତୁରନ୍ତ ଯାତ୍ରୀବାହୀ ବସ ଗୁଡିକୁ ତେଲ ଯୋଗାଇ ଦିଅନ୍ତୁ। ନଚେତ ଗାଡ଼ି ଚଳାଚଳ ସମ୍ଭବ ହେବ ନାହିଁ। ଏବେ ରାଜ୍ୟରେ କୋଭିଡ ଭଳି ସ୍ଥିତି । ସରକାର ପଦକ୍ଷେପ ନ ନେଲେ ବାଧ୍ୟ ହୋଇ ସମସ୍ତ ଘରୋଇ ଗାଡ଼ି ବନ୍ଦ ହୋଇ ଯିବ ।

ଭୁବନେଶ୍ୱର : ଆମଦାନୀ ଶୁଳ୍କ ବୃଦ୍ଧି ନିଷ୍ପତ୍ତି ପରେ ଅହେତୁକ ଭାବରେ ବୃଦ୍ଧି ପାଇଛି ସୁନା-ରୁପା ଦର । ବିବାହ ଋତୁରେ ପୁଣି ଥରେ ଗ୍ରାହକଙ୍କୁ ନିରାଶ କରିଛି ସୁନା ଦର । ଆଜି ରୁପା ଦର କେଜି ପିଛା ପ୍ରାୟ ୧୯ ହଜାର ଟଙ୍କା ବୃଦ୍ଧି ପାଇ ୩ ଲକ୍ଷ ଟଙ୍କା ପାଖାପାଖି ଥିବାବେଳେ  ୨୨ କ୍ୟାରେଟ୍ ସୁନା ୧୦ ଗ୍ରାମ୍ ପିଛା ୧୩ ହଜାର ଟଙ୍କା ବୁଧବାର ବୃଦ୍ଧି ପାଇଛି । ଭାରତୀୟ ବଜାରରେ ୨୪ କ୍ୟାରେଟ ସୁନା ୧,୬୭,୮୯୦ ଟଙ୍କା ରହିଛି । ସେହିପରି ୨୨ କ୍ୟାରେଟ ସୁନା ଦର ୧,୫୩, ୯୦୦ ଟଙ୍କା ଛୁଇଁଛି ।

ସେହିପରି ରାଜଧାନୀ ଭୁବନଶେ୍ବରରେ ୨୪ କ୍ୟାରେଟ ସୁନା ମୂଲ୍ୟ ୧୦ ଗ୍ରାମ ପିଛା ୧,୬୭,୮୯୦ ଟଙ୍କା ରହିଥିବା ବେଳେ ୨୨ କ୍ୟାରେଟ ସୁନାର ମୂଲ୍ୟ ହଜାର ୧,୫୩, ୯୦୦ ଟଙ୍କାକୁ ପହଞ୍ଚିଛି । 

ଗତକାଲି ୨୨ କ୍ୟାରେଟ୍ ସୁନା ଦର ଗ୍ରାମ୍ ପିଛା ୧୪ ହଜାର ୧୬୦ ଟଙ୍କା ରହିଥିଲା । ଆଜି ତାହା ୧୫ ହଜାର ୪୬୦ ଟଙ୍କାରେ ପହଞ୍ଚିଛି । ଅର୍ଥାତ୍ ଗୋଟିଏ ଗ୍ରାମ୍ ସୁନା ପିଛା ଦର ୧୩ ଶହ ଟଙ୍କା ବଢ଼ିଛି । 

ବଜାର ବିଶେଷଜ୍ଞଙ୍କ ମତରେ, ସୁନା-ରୁପା ମହଙ୍ଗା ପଛର କାରଣ ସରକାର ଉଭୟ ଧାତୁ ଆମଦାନୀ ଉପରେ ଶୁଳ୍କ ବୃଦ୍ଧି କରିବା । କମୋଡିଟି ଏକ୍ସପର୍ଟ ଅଜୟ କେଡିଆ କହିଛନ୍ତି, "ସୁନା-ରୁପା ଉପରେ ଆମଦାନୀ ଶୁଳ୍କ ୬ରୁ ୧୫ ପ୍ରତିଶତକୁ ବଢ଼ିଛି । ଯାହାର ପ୍ରଭାବ କମୋଡିଟି ବଜାରରେ ପଡ଼ିଛି । ଫଳରେ ସୁନା ଓ ରୁପା ପ୍ରାୟ ୬ ପ୍ରତିଶତ ମହଙ୍ଗା ହୋଇଛି ।"

ନୂଆଦିଲ୍ଲୀ, ମେ ୧୩, ୨୦୨୬ - କେନ୍ଦ୍ର ଶିକ୍ଷା ମନ୍ତ୍ରୀ ଶ୍ରୀ ଧର୍ମେନ୍ଦ୍ର ପ୍ରଧାନ ଆଜି ଭାରତ ଇନୋଭେଟସ  ୨୦୨୬ ଅନ୍ତର୍ଗତ ‘ଇଣ୍ଡଷ୍ଟ୍ରି ଲିଡର୍ସ ରାଉଣ୍ଡଟେବୁଲ’ରେ ଅଧ୍ୟକ୍ଷତା କରିଛନ୍ତି । ଏହି ଅବସରରେ ସେ ବିଶ୍ୱର ଶିଳ୍ପ ନେତୃବୃନ୍ଦ ଏବଂ ପ୍ରତିଷ୍ଠିତ ସଂସ୍ଥାଗତ ସହଯୋଗୀମାନଙ୍କ ସହ ଭାରତର ଡିପ-ଟେକ୍ ଏବଂ ଗବେଷଣାଭିତ୍ତିକ ଅଭିନବ ଚିନ୍ତାଧାରାକୁ ସୁଦୃଢ଼ କରିବା ନେଇ ବିସ୍ତୃତ ଆଲୋଚନା କରିଛନ୍ତି ।

ଶ୍ରୀ ପ୍ରଧାନ କହିଛନ୍ତି ଯେ ଭାରତର ଇନୋଭେସନ ଇକୋସିଷ୍ଟମ ଆଜି ଆଇଆଇଟି, ଆଇଆଇଏସସି ଭଳି ପ୍ରତିଷ୍ଠିତ ଅନୁଷ୍ଠାନ ସମେତ ଦେଶର ଟାୟାର-୨ ଏବଂ ଟାୟାର-୩ ସହରର ପ୍ରତିଭାବାନ ଶକ୍ତିମାନଙ୍କ ଦ୍ୱାରା ପରିଚାଳିତ । ଏଆଇ, ସେମିକଣ୍ଡକ୍ଟର, କ୍ଲାଇମେଟ୍-ଟେକ୍, ମୋବିଲିଟି, ହେଲ୍‌ଥ-ଟେକ୍ ଏବଂ ଆଡଭାନ୍ସଡ୍ ମ୍ୟାନୁଫ୍ୟାକ୍ଚରିଂ କ୍ଷେତ୍ରରେ ଏହି ପ୍ରତିଭାମାନେ ବିଶ୍ୱସ୍ତରୀୟ ସମାଧାନ ପ୍ରସ୍ତୁତ କରୁଛନ୍ତି ।  

ଫ୍ରାନ୍ସର ରାଷ୍ଟ୍ରପତି ଏମାନୁଏଲ ମାକ୍ରୋନଙ୍କ ମନ୍ତବ୍ୟକୁ ଉଦ୍ଧୃତ କରି ଶ୍ରୀ ପ୍ରଧାନ କହିଛନ୍ତି ଯେ, ବର୍ତ୍ତମାନ ପ୍ରଶ୍ନ ଭାରତ ଇନୋଭେସନ କରୁଛି କି ନାହିଁ ତାହା ନୁହେଁ, ବରଂ “ଭାରତ ସହିତ କିଏ ଇନୋଭେସନ କରିବ” ତାହା ଗୁରୁତ୍ୱପୂର୍ଣ୍ଣ । ଏହି ଦିଗରେ ଫ୍ରାନ୍ସ ଭାରତର ଏକ ପ୍ରମୁଖ ସହଭାଗୀ ଭାବେ ଉଭା ହୋଇଛି । ୨୦୨୬ ପ୍ରାରମ୍ଭରେ ସ୍ୱାକ୍ଷରିତ ହୋଇଥିବା 'ଭାରତ-ଇୟୁ ମୁକ୍ତ ବାଣିଜ୍ୟ ଚୁକ୍ତି'କୁ ଶ୍ରୀ ପ୍ରଧାନ “ସମସ୍ତ ଚୁକ୍ତିର ଜନନୀ” ଭାବେ ବର୍ଣ୍ଣନା କରିଛନ୍ତି । ଏହା ବିଶ୍ୱ ଜିଡିପିର ଏକ ଚତୁର୍ଥାଂଶ ଏବଂ ପ୍ରାୟ ୨୦୦ କୋଟି ଜନସଂଖ୍ୟାକୁ ସଂଯୋଗ କରୁଥିବା ଏକ ପରିବର୍ତ୍ତନକାରୀ ଆର୍ଥିକ ସହଯୋଗୀ ଭାବେ ସେ ଅଭିହିତ କରିଛନ୍ତି । ତେବେ ଆଗାମୀ ଦିନରେ ଫ୍ରାନ୍ସର ନିସ୍ ଠାରେ ଅନୁଷ୍ଠିତ ହେବାକୁ ଥିବା ସ୍ୱତନ୍ତ୍ର ଅଧିବେଶନ ଭାରତୀୟ ଷ୍ଟାର୍ଟଅପ୍, ବିଶ୍ୱସ୍ତରୀୟ ପୁଞ୍ଜିନିବେଶକ ଏବଂ ଗବେଷଣା ସଂସ୍ଥାଗୁଡ଼ିକ ମଧ୍ୟରେ ସମନ୍ୱୟ ରକ୍ଷା କରିବାରେ ଏକ ପ୍ରମୁଖ ଆନ୍ତର୍ଜାତୀୟ ପ୍ଲାଟଫର୍ମ ସାଜିବ ବୋଲି ସେ କହିଛନ୍ତି ।

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ଦୂରଦୃଷ୍ଟି ସମ୍ପନ୍ନ ନେତୃତ୍ୱରେ ଭାରତ ଆଜି ବିଶ୍ୱର ଏକ ବିଶ୍ୱସ୍ତ ପ୍ରଯୁକ୍ତି ସହଭାଗୀ ଭାବେ ନିଜକୁ ପ୍ରତିଷ୍ଠିତ କରିଛି । ‘ବିକଶିତ ଭାରତ’ ଆଡ଼କୁ ଅଗ୍ରସର ହେବା ସହ ଭାରତ ସମଗ୍ର ବିଶ୍ୱ ପାଇଁ ସମାଧାନ ସହ-ନିର୍ମାଣ କରିବାରେ ବିଶ୍ୱାସ କରେ ବୋଲି ଶ୍ରୀ ପ୍ରଧାନ ମତପ୍ରକାଶ କରିଛନ୍ତି ।

ଭୁବନେଶ୍ୱର : ଗତ କିଛି ଦିନ ହେବ ରାଜ୍ୟର କେତେକ ଜିଲ୍ଲାରେ ତୈଳ ସଙ୍କଟ ଖବର ସାମ୍ନାକୁ ଆସୁଛି । ଇନ୍ଧନ ଅଭାବ ଖବରକୁ ଲୋକଙ୍କ ଚିନ୍ତା ବଢ଼ିଥିବା ବେଳେ ବଡ଼ ସ୍ପଷ୍ଟୀକରଣ ଦେଇଛନ୍ତି ତୈଳ ବିପଣନ କମ୍ପାନୀ (OMCs)। କମ୍ପାନୀ ପକ୍ଷରୁ କୁହାଯାଇଛି ମେ’ ମାସ ଆରମ୍ଭରେ ଓଡ଼ିଶା ସୀମାନ୍ତ ଅଞ୍ଚଳର କିଛି ଜିଲ୍ଲାରେ ହଠାତ୍ ପେଟ୍ରୋଲ ଓ ଡିଜେଲ ଚାହିଦା ବଢ଼ିଯାଇଥିଲା। ଏହାର ପ୍ରଭାବରେ କିଛି ପେଟ୍ରୋଲ ପମ୍ପରେ ସ୍ୱଳ୍ପ ସମୟ ପାଇଁ ଇନ୍ଧନ ଅଭାବ ଦେଖାଦେଇଥିଲା। ଫଳରେ ଅନେକ ସ୍ଥାନରେ ଗାଡ଼ିଚାଳକଙ୍କ ଲମ୍ବା ଲାଇନ୍ ଲାଗିଥିଲା। ପରିସ୍ଥିତିକୁ ସାମ୍ନା କରିବାକୁ OMCs ତୁରନ୍ତ ଅତିରିକ୍ତ ଟ୍ୟାଙ୍କର ମୁତୟନ କରିଥିଲେ। ପ୍ରଭାବିତ ପେଟ୍ରୋଲ ପମ୍ପଗୁଡ଼ିକୁ ଦ୍ରୁତ ଗତିରେ ଇନ୍ଧନ ପହଞ୍ଚାଇବା ସହିତ ଷ୍ଟକ ଉପରେ ନିରନ୍ତର ନଜର ରଖାଯାଇଥିଲା। ବର୍ତ୍ତମାନ ସମସ୍ତ ପେଟ୍ରୋଲ ପମ୍ପରେ ସାଧାରଣ ଭାବେ ପେଟ୍ରୋଲ ଓ ଡିଜେଲ ଉପଲବ୍ଧ ଅଛି। ଶିଳ୍ପ ସଂସ୍ଥାମାନଙ୍କୁ ଖୁଚୁରା ପେଟ୍ରୋଲ ପମ୍ପରୁ ଇନ୍ଧନ କିଣିବା ବଦଳରେ ସିଧାସଳଖ ତୈଳ କମ୍ପାନୀଙ୍କୁ ଯୋଗାଯୋଗ କରିବାକୁ OMCs ପରାମର୍ଶ ଦେଇଛନ୍ତି। କାରଣ ଖୁଚୁରା ପମ୍ପଗୁଡ଼ିକ bulk fuel sale ପାଇଁ ଅନୁମୋଦିତ ନୁହେଁ। ସେହିପରି ଲୋକମାନଙ୍କୁ ଅନାବଶ୍ୟକ ଭୟଭୀତ ହୋଇ ନ କିଣିବାକୁ ଅନୁରୋଧ କରିଛନ୍ତି ତୈଳ କମ୍ପାନୀ। ବର୍ତ୍ତମାନ ରାଜ୍ୟରେ ପେଟ୍ରୋଲ କିମ୍ବା ଡିଜେଲର କୌଣସି ଅଭାବ ନାହିଁ ଏବଂ ପରିସ୍ଥିତି ପୂରାପୂରି ନିୟନ୍ତ୍ରଣରେ ରହିଛି।

କୋରାପୁଟ : ଉଗ୍ର ରୂପ ଧାରଣ କରିଛି କୋରାପୁଟ ଜିଲ୍ଲା ଜୟପୁର ସହରର ତୈଳ ସଙ୍କଟ । ମାଲକାନଗିରି ଜିଲ୍ଲାରେ ସହରାଞ୍ଚଳ ଠାରୁ ଗ୍ରାମାଞ୍ଚଳ ଯାଏଁ ସବୁଠି ଡିଜେଲର ଘୋର ଅଭାବ । ଫଳରେ ପ୍ରଭାବିତ ହୋଇଛି ଗାଡ଼ି ଚଳାଚଳ ବ୍ୟବସ୍ଥା । କେବଳ ଜୟପୁର ସହରରେ ଥିବା ୬ଟି ତେଲ ଟାଙ୍କି ମଧ୍ୟରୁ ୪ଟି ଟାଙ୍କି ବନ୍ଦ ପଡିଥିବାବେଳେ କେବଳ ୨ଟି ଟାଙ୍କିରେ ତେଲ ମିଳୁଛି ଇ ସେଥିପାଇଁ ଦୀର୍ଘ ସମୟ ଧରି ଲମ୍ବା ଲାଇନରେ ଛିଡା ହେଉଛନ୍ତି ଗାଡି ମାଲିକ । ପର୍ଯ୍ୟାପ୍ତ ପରିମାଣର ଇନ୍ଧନ ମିଳୁନଥିବାରୁ ଅଧିକାଂଶ ପରିବହନ ସେବା ଠପ୍ ହୋଇଯାଇଥିବା ଗାଡ଼ି ମାଲିକମାନେ ଅଭିଯୋଗ କରିଛନ୍ତି। ପମ୍ପ କର୍ମଚାରୀଙ୍କ କହିବା ଅନୁସାରେ, ଚାହିଦା ତୁଳନାରେ ଯୋଗାଣ ବହୁତ କମ୍ ଥିବାରୁ ସମସ୍ତଙ୍କୁ ଅଳ୍ପ ଅଳ୍ପ କରି ତେଲ ଦିଆଯାଉଛି। ଏହାକୁ ନେଇ ଗ୍ରାହକ ଏବଂ କର୍ମଚାରୀଙ୍କ ମଧ୍ୟରେ ଅସନ୍ତୋଷ ମଧ୍ୟ ଦେଖାଦେଉଛି। ପରିସ୍ଥିତିକୁ ଦୃଷ୍ଟିରେ ରଖି ପମ୍ପ କର୍ତ୍ତୃପକ୍ଷ ଗ୍ରାହକମାନଙ୍କ ପାଇଁ ତେଲ ବଣ୍ଟନରେ ସୀମା ନିର୍ଦ୍ଧାରଣ କରିଛନ୍ତି। ପ୍ରତ୍ୟେକ ଗ୍ରାହକଙ୍କୁ ମାତ୍ର ୨୦୦ ଟଙ୍କାର ପେଟ୍ରୋଲ ଓ ୫୦୦ ଟଙ୍କାର ଡିଜେଲ ଦିଆଯାଉଛି। 

ପ୍ରତିବର୍ଷ ଭାରତରୁ ଅନେକ ସାମଗ୍ରୀ ବିଦେଶକୁ ରପ୍ତାନି ହୋଇଥାଏ, କାରଣ ବିଦେଶରେ ଭାରତୀୟ ହସ୍ତତନ୍ତର ଅନେଦ ଚାହିଦା ରହିଛି । ରପ୍ତାନି ହେଉଥିବା ପ୍ରମୁଖ ସାମଗ୍ରୀଗୁଡ଼ିକ ମଧ୍ୟରେ ମ୍ୟାଟ୍, କାର୍ପେଟ୍, ବେଡ୍‌ସିଟ୍ ଏବଂ କୁସନ କଭର ଅନ୍ୟତମ । ଏକ ରିପୋର୍ଟ ଅନୁସାରେ ଆର୍ଥିକ ବର୍ଷ ୨୦୨୩ରେ ମ୍ୟାଟ୍ ରପ୍ତାନିର ଅଂଶ ମୋଟ ହସ୍ତତନ୍ତ ରପ୍ତାନିର ୧୨.୪୦% ଥିଲା। ସେହିଭଳି ହୋମ ଟେକ୍ସଟାଇଲ୍ସର ଅଂଶ ୬୦% ରୁ ଅଧିକ। ଆର୍ଥିକ ବର୍ଷ ୨୦୨୫ରେ କାର୍ପେଟ୍ ଏବଂ ଚଟାଣ ସାମଗ୍ରୀ ରପ୍ତାନିର ମୂଲ୍ୟ ୧.୬୩ ବିଲିୟନ ଆମେରିକୀୟ ଡଲାର ଥିଲା। ଭାରତୀୟ ସିଲ୍କ ସ୍କାର୍ଫ ମଧ୍ୟ ବିଶ୍ୱରେ ଖୁବ୍ ଲୋକପ୍ରିୟ। କରୁର, ପାନିପଥ, ବାରାଣସୀ ଏବଂ କନ୍ନୁର ହେଉଛି ପ୍ରମୁଖ ରପ୍ତାନି କେନ୍ଦ୍ର । ଭାରତ ବିଶ୍ୱର ୨୦ରୁ ଅଧିକ ଦେଶକୁ ହସ୍ତତନ୍ତ ସାମଗ୍ରୀ ରପ୍ତାନି କରିଥାଏ । ପ୍ରମୁଖ ଆମଦାନୀକାରୀ ଦେଶଗୁଡ଼ିକ ହେଲା ଆମେରିକା, ସଂଯୁକ୍ତ ଆରବ ଏମିରେଟ୍ସ, ନେଦରଲ୍ୟାଣ୍ଡ, ଫ୍ରାନ୍ସ, ବ୍ରିଟେନ, ଇଟାଲୀ, ଜର୍ମାନୀ ଏବଂ ଅଷ୍ଟ୍ରେଲିଆ । ଗତ ଆଠ ବର୍ଷ ଧରି ଆମେରିକା ଶୀର୍ଷ ସ୍ଥାନରେ ରହିଛି । ଆର୍ଥିକ ବର୍ଷ ୨୦୨୫ରେ ଭାରତର ମୋଟ ହସ୍ତତନ୍ତ ରପ୍ତାନିରେ ଆମେରିକାର ଅଂଶ ୨୮.୧% ଏବଂ ୟୁଏଇର ଅଂଶ ୧୫.୨% ଥିଲାବୋଲି ସୂଚନା ରହିଛି ।

ସେହିଭଳି ଓଡ଼ିଶାର କଳା ଓ ସଂସ୍କୃତିର ପ୍ରତୀକ ହେଉଛି ହସ୍ତତନ୍ତ ।  କେବଳ ଓଡ଼ିଶାନୁହେଁ ଅନ୍ୟ ରାଜ୍ୟରେ ମଧ୍ୟ ଏଭଳି ଅନେକ ଯୋଜନା ରହିଛି ଯାହା ହସ୍ତତନ୍ତକୁ ଏକ ନୂଆ ସ୍ତରକୁ ନେଉଛି ।  ବୁଣାକାରମାନଙ୍କର ଆର୍ଥିକ ବିକାଶ ଏବଂ ଏହି ପାରମ୍ପରିକ ଶିଳ୍ପକୁ ସମୃଦ୍ଧ କରିବା ପାଇଁ ରାଜ୍ୟ ଓ କେନ୍ଦ୍ର ସରକାରଙ୍କ ପକ୍ଷରୁ ଅନେକ ଜନକଲ୍ୟାଣକାରୀ ଯୋଜନା କାର୍ଯ୍ୟକାରୀ ହେଉଛି । ସରକାରଙ୍କ ସମସ୍ତ ଯୋଜନାଗୁଡ଼ିକର ମୁଖ୍ୟ ଲକ୍ଷ୍ୟ ହେଉଛି ବୁଣାକାରଙ୍କ ଜୀବନଧାରଣର ମାନ ବୃଦ୍ଧି କରିବା ଏବଂ ଓଡ଼ିଶାର ଶାଢ଼ୀ, କପଡ଼ା ତଥା ହସ୍ତତନ୍ତ ସାମଗ୍ରୀକୁ ବିଶ୍ୱ ବଜାରରେ ଏକ ସ୍ୱତନ୍ତ୍ର ପରିଚୟ ଦେବା ।