ଭୁବନେଶ୍ବର : ରାଜଧାନୀରୁ ଜବତ ହେଲା ୩୦ ଲକ୍ଷ ଟଙ୍କାର ବ୍ରାଉନସୁଗର । ୨ ନିଶା ମାଫିଆଙ୍କୁ ଗିରଫ କରିଛି କମିଶନରେଟ ପୋଲିସ। ଜଣେ ଅଭିଯୁକ୍ତର ଘର ଝାଡ଼ଖଣ୍ଡ। ତା ନାଁ ମହମ୍ମଦ ବାଦସାହା ହୋଇଥିବା ବେଳେ ଅନ୍ୟଜଣେ ହେଉଛି ଭଦ୍ରକର ଫକରୁଦ୍ଦିନ ଖାଁ । ନିଶା କାରବାର ବେଳେ ସାଦା ପୋଷାକରେ ମାଡି ବସିଲା ସ୍ପେଶାଲ କ୍ରାଇମ ୟୁନିଟ । ସେମାନଙ୍କ ନିକଟରୁ ୨୯୦ଗ୍ରାମ ବ୍ରାଉନସୁଗର ଜବତ ହୋଇଛି । ଯାହାର ଆନୁମାନିକ ମୂଲ୍ୟ ୨୯ଲକ୍ଷ ଟଙ୍କାରୁ ଉର୍ଦ୍ଧ୍ବ ହେବ ବୋଲି ଅନୁମାନ କରାଯାଉଛି । 

ପୋଲିସ କମିଶନର ଏସ ଦେବ ଦତ୍ତ ସିଂହ କହିଛନ୍ତି, ଫକରୁଦ୍ଦିନ ଖାଁ ଜଣେ ଅଭ୍ୟାସଗତ ନିଶା ବେପାରୀ । ସେ ଅନ୍ୟାନ୍ୟ ଅପରାଧିକ କାରବାରରେ ମଧ୍ୟ ଜଡିତ ରହିଛି ଏବଂ ତା' ବିରୁଦ୍ଧରେ ଭଦ୍ରକ ଜିଲ୍ଲାରେ ପୂର୍ବରୁ ଅନ୍ୟୂନ ୯ଟି ଅପରାଧିକ ମାମଲା ରୁଜୁ ହୋଇଛି। ଏହି ନିଶା କାରବାରର ଚେର କେଉଁ ପର୍ଯ୍ୟନ୍ତ ଯାଇଛି ସେ ନେଇ ଅଧିକ ତଦନ୍ତ ଜାରି ରହିଥିବା କହିଛନ୍ତି ପୋଲିସ କମିଶନର ।

ରାୟଗଡ଼ା : ହାଡ଼ିପ୍ପା ନିଖିଲ ହତ୍ୟା ପରେ ପୁଣି ଅଶାନ୍ତ ରାୟଗଡ଼ା ସହର । ପିଟଲା ଓ ରେଲି ସାହି ମଧ୍ୟରେ ବଚସା ଓ ମାରପିଟ ଘଟିଛି । ରାୟଗଡା ଥାନା ସମ୍ମୁଖରେ ମାରପିଟ ସହ ପଥର ଫିଙ୍ଗା ଫିଙ୍ଗି ହୋଇଛନ୍ତି ଉଭୟ ଗୋଷ୍ଠୀ । ପିଟଲା ସାହିରେ ପଶି ରେଲି ସାହିର କିଛି ଯୁବକ ଲୋକଙ୍କୁ ଗାଳିଗୁଲଜ ସହ ଅସଦାଚରଣ କରିଥିଲେ । ପ୍ରତିବାଦରେ ପିଟଲା ସାହିର ଲୋକେ ଥାନାରେ ଅଭିଯୋଗ କରିଥିଲେ। ସେହି ସମୟରେ ରେଲି ସାହିର କିଛି ଯୁବକ ଥାନା ନିକଟରେ ପହଞ୍ଚି ଗାଳିଗୁଲଜ କରିଥିଲେ । ପରେ ଉଭୟ ଗୋଷ୍ଠୀ ମଧ୍ୟରେ ଗୋଷ୍ଠୀ ସଂଘର୍ଷ ଆରମ୍ଭ ହୋଇଥିଲା । ୩ ଜଣ ଗୁରୁତର ଆହତ ସହ ଉଭୟ ଗୋଷ୍ଠୀର ବହୁ ଯୁବକ ଆହତ ହୋଇଛନ୍ତି। ଆହତମାନେ ହେଲେ ପିଟିଲାସାହିର ଆନ୍ନାମାଝୀ ଯାକକା, ତ୍ରିନାଥ ମେଲେକା ଓ ରେଲି ସାହିର ଶୁଣ୍ଢୀ ସୂରଜ । ପରିସ୍ଥିତି ଉତ୍ତେଜନାପୂର୍ଣ୍ଣ ଥିବାରୁ ଥାନା ଆଗରେ ବ୍ୟାପକ ପୁଲିସ ମୁତୟନ ହୋଇଛି। 

ସୂଚନାନୁସାରେ, ୧୯ବର୍ଷୀୟ ହାଡ଼ିପ୍ପା ନିଖିଲ ସହ ଅଭିଯୁକ୍ତମାନଙ୍କର ଜୁଆ ଖେଳକୁ ନେଇ ପୂର୍ବରୁ  ଶତ୍ରୁତା ରହିଥିଲା । ଘଟଣାକୁ ନେଇ ଗତ ମେ' ୯ ତାରିଖ ଦିନ ନିଖିଲକୁ ଗୋଟିଏ ଗୋଷ୍ଠୀ ଇନ୍ଦିରା ନଗର ଅଞ୍ଚଳରୁ ଅପହରଣ କରି ନେଇ ଗୋଡେଇ ଗୋଡେଇ ଗୁଳି କରି ହତ୍ୟା କରିଥିଲେ । ଗୋଟିଏ ଦିନ ପରେ, ତାଙ୍କ ମୃତଦେହ ନାଗାବଳୀ ନଦୀପଠାରୁ ଉଦ୍ଧାର କରାଯାଇଥିଲା । ସେହିପରି ତାଙ୍କ ମୋଟର ସାଇକେଲକୁ ଜାତୀୟ ରାଜପଥ-୩୨୬ ରେ ପୋଡି ଦିଆଯାଇଥିଲା । ଘଟଣା ପରେ ସ୍ଥାନୀୟ ଲୋକଙ୍କ ମଧ୍ୟରେ ଉତ୍ତେଜନା ଦେଖାଦେଇଥିଲା । ଏହି ଘଟଣାରେ ରାୟଗଡା ଏସପି (ଏସପି) ସ୍ୱାତୀ ଏସ. କୁମାର୯ ଜଣଙ୍କୁ ଗିରଫ କରିଛନ୍ତି । ଏହି ଘଟଣାରେ ସମୁଦାୟ ୨୧ଜଣଙ୍କ ସମ୍ପୃକ୍ତି ଥିବାବେଳେ  ଅନ୍ୟ ମାନଙ୍କୁ ଧରିବା ପାଇଁ ଜୋରଦାର ଅଭିଯାନ ଚଳାଇଛି ପୋଲିସ  I

ଭଦ୍ରକ : ମର୍ଣ୍ଣିଂୱାକ ହେଲା କାଳ । ଆଜି ସକାଳେ ମର୍ଣ୍ଣିଂ ୱାକରେ ଯାଇଥିବାବେଳେ ଘର ନିକଟ ଶୌଚାଳୟ ଭିତରୁ ମିଳିଲା ଛାତ୍ରଙ୍କ ମୃତଦେହ। ତାଙ୍କ ମୁହଁ ଏବଂ ହାତକୁ ଏକ ଗାମୁଛାରେ ବନ୍ଧା ଯାଇଥିବା ଦେଖିବାକୁ ମିଳିଥିଲା । ସକାଳୁ ସକାଳୁ ଏଭଳି ଘଟଣାକୁ ନେଇ ଭଦ୍ରକ ଜିଲ୍ଲା ଚରମ୍ପା ହାଇସ୍କୁଲ ରୋଡ଼ ଅଞ୍ଚଳରେ ଚାଞ୍ଚଲ୍ୟ ଖେଳି ଯାଇଛି । ମୃତ ଛାତ୍ର ହେଲେ ସମ୍ବିତ କୁମାର ବିଶ୍ବାଳ। ସେ +3 ଦ୍ୱିତୀୟ ବର୍ଷରେ ପାଠ ପଢ଼ୁଥିଲେ । ତାଙ୍କୁ ହତ୍ୟା କରାଯାଇଥିବା ନେଇ ଅଭିଯୋଗ ଆଣିଛନ୍ତି ପରିବାର ଲୋକେ । ଏହାକୁ ନେଇ ସ୍ଥାନୀୟ ଅଞ୍ଚଳରେ ଉତ୍ତେଜନା ଦେଖାଦେଇଛି ।

ସୂଚନାନୁସାରେ, ଆଜି ସକାଳେ ସାଙ୍ଗମାନଙ୍କ ସହ ମର୍ଣ୍ଣିଂୱାକ ରେ ଯାଇଥିଲେ ସମ୍ବିତ । କିନ୍ତୁ ଅନେକ ସମୟ ଧରି ନଫେରିବାରୁ ପରିବାର ଲୋକେ ଖୋଜାଖୋଜି କରିଥିଲେ । କିଛି ସମୟ ପରେ ତାଙ୍କ ଘର ବାହାରେ ଥିବା ପାଇଖାନାରେ ମୃତଦେହ ମିଳିଥିଲା । ସମ୍ବିତଙ୍କ ବେକ ଓ ମୁହଁରେ ଗାମୁଛା ବନ୍ଧା ଯିବା ସହ ହାତଗୋଡ଼ ବନ୍ଧା ଅବସ୍ଥାରେ ମୃତଦେହ ପାଇଥିଲେ । କିନ୍ତୁ ସମ୍ବିତଙ୍କ ବାପା କହିଛନ୍ତି ପୁଅ ମର୍ଣ୍ଣିଂୱାକ ରେ ଘରକୁ ଫେରିଥିଲେ । ପରେ ତାଙ୍କୁ ଆଉ ଘରେ ଦେଖିବାକୁ ମିଳି ନଥିଲା । ସମ୍ବିତ୍ଙ୍କ ମୃତଦେହ ଶୌଚାଳୟରୁ ଉଦ୍ଧାର ପରେ ପୋଲିସକୁ ଖବର ଦେଇଥିଲେପାରିବାର ଲୋକେ । ଘଟଣାସ୍ଥଳରେ ଭଦ୍ରକ ଟାଉନ ପୁଲିସ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ କରିବା ପାଇଁ ପଠାଇବା ସହ ତଦନ୍ତ ଆରମ୍ଭ କରିଛି । ସମ୍ବିତକୁ ତାଙ୍କ ସାଙ୍ଗମାନେ କିମ୍ବା ପାରିବାରିକ ଶତ୍ରୁତା ପାଇଁ ଯୋଜନାବଦ୍ଧ ଭାବେ ହତ୍ୟା କରାଯାଇଥିବା ପରିବାର ଲୋକେ ଅଭିଯୋଗ କରିଛନ୍ତି ।

ବରଙ୍ଗ : ବାରଙ୍ଗରେ ଚାଞ୍ଚଲ୍ୟ । କାଠଯୋଡ଼ି ନଦୀ ପଠାରୁ ମିଳିଲା ମହିଳାଙ୍କ ଅଧାପୋତା ମୃତଦେହ । କଟକ ବ୍ରାହ୍ମଣି ଗାଁ ନିକଟ କାଠଯୋଡ଼ି ନଦୀପଠାରୁ ଏହି ଘଟଣା ସାମ୍ନାକୁ ଆସିଛି । ମୃତ ମହିଳା ଜଣକ ଗୋଲାପି ରଙ୍ଗର ବସ୍ତ୍ର ପିନ୍ଧିଥିବା ଜଣାପଡିଛି । ଘଟଣା ସ୍ଥଳରେ ବାରଙ୍ଗ ପୋଲିସ ପହଞ୍ଚି ତନାଘନା ଆରମ୍ଭ କରିଛି । ତେବେ ମୃତ ମହିଳା କିଏ ଏବଂ କାହିଁକି ତାଙ୍କୁ ହତ୍ୟା କରାଗଲା ବର୍ତ୍ତମାନ ସୁଦ୍ଧା ପ୍ରଶ୍ନବାଚୀ ହୋଇ ରହିଛି ।

ଘଟନାନୁସାରେ, ଆଜି ସକାଳେ ସ୍ଥାନୀୟ ଅଞ୍ଚଳର କିଛି ଲୋକ ନିତ୍ୟକର୍ମ ପାଇଁ ନଦୀକୁ ଯାଇଥିଲେ । ଏହି ସମୟରେ ମହିଳାଙ୍କ ଅଧାପୋତା ମୃତଦେହକୁ କୁକୁର ଖାଉଥିବାଦେଖି ସ୍ଥାନୀୟ ଲୋକ ପୋଲିସକୁ ଖବର ଦେଇଥିଲେ । ମହିଳାଙ୍କର କେବଳ ହାତ ଓ ଗୋଡ଼ ଦେଖା ଯାଉଥିବା ବେଳେ ଅବଶିଷ୍ଟ ଶରୀର ବାଲି ଭିତରେ ପୋତି ହୋଇ ରହିଛି । ତେବେ ମହିଳା ଜଣକ କିଏ ଓ ତାଙ୍କର ମୃତ୍ୟୁ କିଭଳି ହେଲା ତାହା ଜଣାପଡ଼ିନି । ହତ୍ୟା ପରେ କେହି ଦୁର୍ବୃତ୍ତ ମୃତଦେହକୁ ପୋତି ଦେଇଥିବା ସନ୍ଦେହ। ଘଟଣାସ୍ଥଳରେ ବାରଙ୍ଗ ପୋଲିସ ଓ ସାଇଣ୍ଟିଫିକ୍ ଟିମ୍ ପହଞ୍ଚି ତଦନ୍ତ ଆରମ୍ଭ କରିଛି।

ସେପଟେ ବିଭିନ୍ନ ଦିଗକୁ ଅନୁଧ୍ୟାନ କରି ତଦନ୍ତ କରୁଛି ପୁଲିସ। ମୃତଦେହ ଅଧା ପୋତା ହୋଇଥିବା ନଦୀର ଆଖପାଖ ଅଞ୍ଚଳରେ ବହୁ ଇଟାଭାଟି ରହିଛି। ଇଟାଭାଟିରେ ବାହାର ଜିଲ୍ଲା ଓ ରାଜ୍ୟର ଶ୍ରମିକ କାମକରନ୍ତି। କୌଣସି ଦୂରାରୋଗ୍ୟରେ ମହିଳା ଜଣକ ମୃତ୍ୟବରଣ କରିବାପରେ ପରିବାର ନଦୀ ବାଲିରେ ପୋତି ଦେଇଥିବା ପୁଲିସ ଅନୁମାନ କରୁଛି।

ବ୍ରହ୍ମପୁର : ବ୍ରହ୍ମପୁର ପୋଲିସ ର ବଡ଼ ଏନକାଉଣ୍ଟର । ଗିରିରୋଡ଼ରେ ଯୁବକ-ଯୁବତୀଙ୍କୁ ଆକ୍ରମଣ ଘଟଣାରେ ଅଭିଯୁକ୍ତ ମୁକେଶ ସାହୁକୁ ଟାମଣା ରୋଡ଼ରେ ଏନକାଉଣ୍ଟର କରିଛି ଟାଉନ ଥାନା ପୋଲିସ । ଗତକାଲି ରାତିରେ ଟାମଣା ରୋଡ଼ରେ ଅଭିଯୁକ୍ତ ସହ ପୋଲିସ ମୁହାଁମୁହିଁ ହେବାପରେ ପ୍ରଥମେ ମୁକେଶ ସାହୁ ପୋଲିସ ଉପରକୁ ଗୁଳି ଚାଳନା କରିଥିଲା ।  ପୋଲିସ ମଧ୍ୟ ମୁକେଶ ଉପରକୁ ପାଲଟା ଗୁଳି କରିଥିଲା । ତାର ହାତରେ ଓ ଗୋଡ଼ରେ ଗୁଳି ବାଜିଛି । ତାକୁ ଚିକିତ୍ସା ପାଇଁ ଏମକେସିଜି ମେଡିକାଲରେ ଭର୍ତ୍ତି କରାଯାଇଛି । ମୁକେଶ ସହ ଦିନେଶକୁ ମଧ୍ୟ ପୋଲିସ ଗିରଫ କରିଛି । ସେପଟେ ଗିରିରୋଡରେ ଦୁଇ ଜଣଙ୍କୁ ବିଚ୍ ରାସ୍ତାରେ ପିଟିବା ଘଟଣାରେ ୨ ଗିରଫ ।

ଏହି ଘଟଣାରେ ଜଡିତ ମୁକେଶର କିଛି ସହଯୋଗୀ ଏବେବି ଫେରାର ଅଛନ୍ତି । ସେପଟେ ଗତକାଲି ଏହି ବର୍ବରତା ମାମଲାରେ ୨ ଜଣଙ୍କୁ ବାନ୍ଧିଥିଲା ପୋଲିସ । ଗିରଫ ଦୁଇ ଅଭିଯୁକ୍ତ ହେଲେ ରାଜ୍ ମାଲହୋତ୍ରା ଓ ଲିଙ୍ଗରାଜ ସାମଲ। ସେମାନଙ୍କଠାରୁ ୨ଟି ସ୍କୁଟର, ଗୋଟିଏ ଲାଠି ଓ ଗୋଟିଏ ମୋବାଇଲ ଜବତ କରିଥିଲା ପୋଲିସ୍ । 

ଗତ ୧୮ ତାରିଖ ରାତିରେ ବ୍ରହ୍ମପୁରର ଗିରି ରୋଡ୍ ଅଞ୍ଚଳରେ ଗଜପତି ଅଞ୍ଚଳର ଉମେଶ ରଥଙ୍କୁ ମରଣାନ୍ତକ ଆକ୍ରମଣ ହୋଇଥିଲା । ଉମେଶ ନିଜ ବାନ୍ଧବୀଙ୍କ ସହ ମୋମୋ ଖାଇବାକୁ ଆସିଥିବାବେଳେ ତାଙ୍କୁ ରାସ୍ତାରେ ପକାଇ ବାଡ଼ିରେ ନିିର୍ଦ୍ଧୁମ ପିଟିଥିଲେ । ଗୁରୁତର ଉମେଶ ଏବେ ବିଶାଖାଟନମରେ ଚିକିତ୍ସାଧୀନ ଅଛନ୍ତି । ପୂର୍ବ ଶତ୍ରୁତାରୁ ଏହି ଆକ୍ରମଣ କରାଯାଇଥିଲା ବୋଲି ପୋଲିସ ସୂଚନା ଦେଇଛି । ଉମେଶଙ୍କ ନାଁରେ ବିଭିନ୍ନ ସ୍ଥାନରେ ଶତାଧିକ ମାମଲା ରହିଥିବା ଜଣାପଡିଛି ।

ନରସିଂହପୁର : କଟକ ଜିଲ୍ଲା ନରସିଂହପୁର ମବ୍ ଲିଞ୍ଚିଂ। ହତ୍ୟା ଓ ଶବ ପୋଡ଼ିବା ଅଭିଯୋଗରେ ୨୫ ଗିରଫ । ଗୁଣି ଗାରେଡି ସନ୍ଦେହରେ ଜଣେ ଯୁବକଙ୍କୁ ଘରୁ ଡ଼ାକିନେଇ ପିଟି ପିଟି ହତ୍ୟା ଘଟଣାରେ ବଡ଼ କାର୍ଯ୍ୟାନୁଷ୍ଠାନ ନେଇଛି କଟକ ଗ୍ରାମାଂଚଳ ପୋଲିସ । ବର୍ତ୍ତମାନ ସୁଦ୍ଧା ୨୫ଜଣ ଗ୍ରାମବାସୀଙ୍କୁ ଗିରଫ କରାଯାଇଥିବା ବେଳେ ଆଉ କିଛି ଫେରାର ଅଛନ୍ତି । ଗତ ୧୦ ତାରିଖରେ ଏହି ବିଭତ୍ସ ହତ୍ୟାକାଣ୍ଡ ଘଟିଥିବା ବେଳେ ଏବେ ପଦାକୁ ଆସିଛି । ମୃତକ ହେଲେ, ତାଳମୁଣ୍ଡଳି ଗ୍ରାମ ହରିଜନ ସାହିର ଶ୍ୱେତ ବେହେରାଙ୍କ ପୁଅ ଟିକନ ବେହେରା (୩୦)। ଅଭିଯୁକ୍ତମାନଙ୍କୁ ଗିରଫ କରି କୋର୍ଟଚାଲାଣ କରାଯାଇଛି । କଟକ ଗ୍ରାମାଞ୍ଚଳ ଆରକ୍ଷୀ ଅଧୀକ୍ଷକ (ଏସ୍‌ପି) ବିନିତ ଅଗ୍ରୱାଲ ତିଗିରିଆ ଥାନାରେ ଆୟୋଜିତ ଏକ ସାମ୍ୱାଦିକ ସମ୍ମିଳନୀରେ ଏ ବାବଦରେ ବିସ୍ତୃତ ସୂଚନା ଦେଇଛନ୍ତି। ଏହି ଘଟଣା ପଦାକୁ ଆସିବା ପରେ ରାଜ୍ୟବ୍ୟାପୀ ଚାଞ୍ଚଲ୍ୟ ସୃଷ୍ଟି ହୋଇଛି।

ସୂଚନାନୁସାରେ, ମାଣିଆବନ୍ଧ ଥାନା ଅନ୍ତର୍ଗତ ତାଳମୁଣ୍ଡୁଳି ଗ୍ରାମର ଶ୍ୱେତ ବେହେରାଙ୍କ ପୁଅ ଟିକନ ବେହେରା ରୁହନ୍ତି। ଦୀର୍ଘ ଦିନ ହେବ ତାଙ୍କ ସ୍ତ୍ରୀ ତାଙ୍କୁ ଛାଡି ଚାଲି ଯିବାରୁ ସେ ନିଜ ବଡ଼ ଭାଇ ଓ ଭାଉଜଙ୍କ ପାଖରେ ରହୁଥିଲେ । ତେବେ ଟିକନ ଗାଁ' ରେ ଗୁଣି କରୁଥିବା ନେଇ କିଛି ଲୋକ ସନ୍ଦେହ କରୁଥିଲେ । ଏହାକୁ ନେଇ ଗତ ୧୦ତାରିଖରେ ପ୍ରାୟ ୨୫ରୁ ଊର୍ଦ୍ଧ୍ବ ଗ୍ରାମବାସୀ ମିଶି  ସ୍ପଷ୍ଟ ଦିବାଲୋକରେ ଟିକନଙ୍କୁ ତାଙ୍କ ଘରୁ ବାହାରକୁ ଡାକି ଆଣିଥିଲେ । କେହି କିଛି ବୁଝିବା ପୂର୍ବରୁ ସମସ୍ତେ ମିଳିମିଶି ଘର ସମ୍ମୁଖରେ ଟିକନକୁ ବିଭିନ୍ନ ଧାରୁଆ ଅସ୍ତ୍ରରେ ନିର୍ମମ ଭାବେ ହାଣି ଶରୀରକୁ ଖଣ୍ଡ ବିଖଣ୍ଡିତ କରିଦେଇଥିଲେ । ଟିକନକୁ ହତ୍ୟା ପରେ ରକ୍ତ ଜୁଡୁବୁଡୁ ମୃତଦେହକୁ ଏକ ଅଖା (ବସ୍ତା)ରେ ଭର୍ତ୍ତି କରି ଗ୍ରାମବାସୀ ନିକଟସ୍ଥ ଜଙ୍ଗଲକୁ ନେଇ ଅପରାଧ ଲୁଚାଇବା ଶବକୁ ପୋଡ଼ି ପ୍ରମାଣ ନଷ୍ଟ କରିଦେଇଥିଲେ । ଘଟଣା ସମ୍ପର୍କରେ ପୋଲିସକୁ କହିଲେ ସମସ୍ତଙ୍କ ଅବସ୍ଥା ଏହିଭଳି ହେବ ବୋଲି ଟିକନଙ୍କ ପରିବାରକୁ ଧମକାଇଥିଲେ ଗ୍ରାମବାସୀ । ଘଟଣାର ଭୟାବହତା କୁ ଦେଖି ତାଙ୍କ ଭାଇ ଭାଉଜ ଘରେ ଲୁଚି ଯାଇଥିଲେ। ପରେ ପରିବାର ଲୋକେ ନିଜ ଜୀବନ ବଞ୍ଚାଇବା ପାଇଁ ମାଣିଆବନ୍ଧ ଅଞ୍ଚଳରେ ଆତ୍ମଗୋପନ କରି ରହିଥିଲେ। ସେପଟେ ନିଜ ଶ୍ଵଶୁରଙ୍କ ଘରେ ରହୁଥିବା ଟିକନଙ୍କ ବାପା ଶ୍ୱେତ ବେହେରା ପୁଅର ଏହି କରୁଣ ପରିଣତି ବିଷୟରେ ଜାଣି ହତ୍ୟାକାଣ୍ଡର ୮ ଦିନ ପରେ ଅର୍ଥାତ୍‌ ମେ’ ୧୮ ତାରିଖ ରାତିରେ ମଣିଆବନ୍ଧ ଥାନାରେ ଏଫ୍ ଆଇଆର୍ (FIR) ଦାୟର କରିଥିଲେ ।

ଏହାପରେ ପୋଲିସ ତୁରନ୍ତ ଆକ୍ସନ ମୋଡ୍ କୁ ଆସିଥିଲା । କଟକ (ଗ୍ରାମାଞ୍ଚଳ) ଏସପି ବିନୀତ ଅଗ୍ରୱାଲ ଏହି ବର୍ବର କାଣ୍ଡର ତଦନ୍ତ ପାଇଁ ଆଠଗଡ଼ ଏସଡିପିଓ ବିଶ୍ୱଜିତ ମହାନ୍ତିଙ୍କ ନେତୃତ୍ୱରେ ତିନୋଟି ପୋଲିସ ଟିମ୍ ଗଠନ କରିଥିଲେ । ସାଇଣ୍ଟିଫିକ୍ ଓ ଫୋରେନ୍ସିକ ଟିମ୍ ଘଟଣାସ୍ଥଳ ପରିଦର୍ଶନ କରି ନମୁନା ସଂଗ୍ରହ କରିଛନ୍ତି । ଜଣେ ଅଭିଯୁକ୍ତର ସ୍ୱୀକାରୋକ୍ତି ଆଧାରରେ ଜଙ୍ଗଲରୁ ଅଧାପୋଡ଼ା ଅସ୍ଥି ଓ ଶରୀରର କିଛି ଅଂଶ ଜବତ କରାଯାଇଛି । ଏପର୍ଯ୍ୟନ୍ତ ୨୫ ଜଣ ଗ୍ରାମବାସୀଙ୍କୁ ଗିରଫ କରାଯାଇଛି । ଘଟଣାରେ ସମ୍ପୃକ୍ତ ଥିବା ଅନ୍ୟମାନଙ୍କୁ ଚିହ୍ନଟ କରାଯାଉଛି ଏବଂ ଆଗକୁ ଗିରଫ ସଂଖ୍ୟା ଆହୁରି ବଢ଼ିପାରେ ବୋଲି ସୂଚନା ଦେଇଛନ୍ତି ଏସପି ବିନୀତ ଅଗ୍ରୱାଲ ।

ନରସିଂହପୁର : କଟକ ମାଣିଆବନ୍ଧ ଗାଁ ରେ ବିଭତ୍ସକାଣ୍ଡ । ତାଳମୁଣ୍ଡଳୀ ଶବରସାହି ଗାଁରେ ଯୁବକଙ୍କୁ ପିଟି ପିଟି ନିର୍ମମ ହତ୍ୟା କରି ପୋଡିଦେଲେ । ମୃତକ ହେଉଛନ୍ତି ଟିକନ ବେହେରା । ପୂର୍ବ ଶତ୍ରୁତାକୁ କେନ୍ଦ୍ର କରି ଟିକନକୁ ହତ୍ୟା କରାଯାଇଥିବା ଅଭିଯୋଗ କରିଛନ୍ତି ପରିବାର ଲୋକ । ଅଭିଯୋଗ ପରେ ଗାଁର ୨୩ ଜଣଙ୍କୁ ଉଠାଇନେଇଛି ମାଣିଆବନ୍ଧ ପୋଲିସ । ସମସ୍ତଙ୍କୁ ଏକ ଅଜ୍ଞାତ ସ୍ଥାନରେ ରଖି ପଚରାଉଚରା କରୁଥିବା ସୂଚନା ମିଳିଛି । ଘଟଣା ପରେ ଗାଁ ପୁରୁଷଶୁନ୍ୟ ହୋଇଯାଇଛି । ଅନ୍ୟପଟେ  ବଡମ୍ବା ଓ ମାଣିଆବନ୍ଧ ଥାନା ସମ୍ମୁଖରେ ପ୍ରତିବାଦ କରିଛନ୍ତି ଶତାଧିକ ମହିଳା ।

ଭୁବନେଶ୍ଵର: ବାଲିଅନ୍ତା କନଷ୍ଟେବଳ ସୌମ୍ୟ ରଞ୍ଜନ ସ୍ବାଇଁ ହତ୍ୟା ମାମଲା, ପରିବାରକୁ ମିଳିବ ନ୍ୟାୟ  । ସବୁ ସ୍ତରରୁ ତଦନ୍ତ ଜାରି ରହିଛି ଇ ଏପର୍ଯ୍ୟନ୍ତ ସମସ୍ତ ଅଭିଯୁକ୍ତଙ୍କୁ ଚିହ୍ନଟ କରାଯାଇଛି ବୋଲି ଗଣମାଧ୍ୟମକୁ ପ୍ରତିକ୍ରିୟା ଦେଇ କହିଛନ୍ତି କ୍ରାଇମବ୍ରାଞ୍ଚ ଡିଜି ବିନୟତୋଷ ମିଶ୍ର । ସିସିଟିଭି ଓ ଭିଡିଓ ଫୁଟେଜରୁ ମିଳିଛି ପ୍ରମାଣ । ସେ କହିଛନ୍ତି ଯେ, ଆମ ଟିମ୍ ପୁରା ଆକ୍ଟିଭ୍ ଅଛି । ଏହି ଘଟଣାରେ କାହାରିକୁ ବି ଛଡ଼ା ଯିବନି। ସମସ୍ତଙ୍କୁ ଗିରଫ କରାଯିବ ।  ତଦନ୍ତ ଉପରେ ଯେପରି ପ୍ରଶ୍ନ ନଉଠେ ସେ ଦିଗରେ ଧ୍ୟାନ ଦିଆଯାଉଛି। ପ୍ରତ୍ୟକ ମାମଲାରେ ସାଇଣ୍ଟିଫିକ୍ ଟୁଲ୍‌ ବ୍ୟବହାର କରୁଛୁ । କ୍ରାଇମବ୍ରାଞ୍ଚ SPଙ୍କ ନତୃତ୍ବରେ ଏବଂ DIGଙ୍କ ତତ୍ତ୍ବାବଧାନରେ ମାମଲାର ଅନୁଧ୍ୟାନ କରାଯାଉଛି । ସୌମ୍ୟଙ୍କ ମାଆ ନିଶ୍ଚିତ ନ୍ୟାୟ ପାଇବେ । ଏପର୍ଯ୍ୟନ୍ତ ଏହି ଘଟଣାରେ ୧୩ଜଣଙ୍କୁ ଗିରଫ କରାଯାଇଛି ।

ଏହି ଘଟଣାରେ ମୁଖ୍ୟ ଅଭିଯୁକ୍ତ ଚିନୁ ଓରଫ ରଞ୍ଜିତ ପାତ୍ରକୁ ମିଶାଇ ୧୩ ଜଣଙ୍କୁ ଗିରଫ କରାଯାଇଛି। ପୂର୍ବରୁ ୧୧ ଅଭିଯୁକ୍ତଙ୍କୁ ପୁଲିସ ଗିରଫ କରିଥିବା ବେଳେ ମୁଖ୍ୟ ଅଭିଯୁକ୍ତ ସମେତ ୨ ଜଣଙ୍କୁ କ୍ରାଇମବ୍ରାଞ୍ଚ ଗିରଫ କରିଛି। ବାକି ଅଭିଯୁକ୍ତଙ୍କୁ ଚିହ୍ନଟ କରାଯାଇଛି। ଖୁବଶୀଘ୍ର ସେମାନେ ବନ୍ଧା ହେବେ ବୋଲି କ୍ରାଇମବ୍ରାଞ୍ଚ ଡିଜି କହିଛନ୍ତି। 

ମାହାଙ୍ଗା : ଜମିବାଡ଼ି ବିବାଦକୁ ନେଇ ମହିଳାଙ୍କୁ ବିଭତ୍ସ ହତ୍ୟା । ସୋମବାର ସକାଳେ ମହିଳା ଜଣକ ନିଜ ବିଲକୁ ଯାଇଥିବାବେଳେ ସେଠାରେ ତାଙ୍କୁ ଅତି ଅମାନୁଷିକ ଭାବରେ ଆକ୍ରମଣ କରି ହତ୍ୟା କରିଛନ୍ତି ସମ୍ପର୍କୀୟ ଦାଦା ଶ୍ୱଶୁର । ମୃତକ ହେଉଛନ୍ତି ସ୍ଵର୍ଣ୍ଣଲତା ସାହୁ। ଘଟଣା ଘଟିଛି କଟକ ଜିଲ୍ଲା ମାହାଙ୍ଗା ବ୍ଲକ୍ ଅକରପଡା ଗ୍ରାମରେ ।

ଘଟଣା ଅନୁସାରେ ,ସ୍ଵର୍ଣ୍ଣଲତା ସାହୁଙ୍କ ସହିତ ତାଙ୍କ ସମ୍ପର୍କୀୟ ଦାଦା ଶ୍ଵଶୁର ଚନ୍ଦ୍ରମଣି ସାହୁଙ୍କ ସହ ପୂର୍ବରୁ ଜମିଜମା ବିବାଦ ରହି ଆସିଛି । ଆଜି ସକାଳେ ସ୍ଵର୍ଣ୍ଣଲତା ବିଲକୁ ଘାସ କାଟିବାକୁ ଯାଇଥିବା ବେଳେ, ବିଲ ମଝିରେ ଦାଦା ଶ୍ୱଶୁରଙ୍କ ପରିବାର ତାଙ୍କୁ ବିଭିନ୍ନ ମାରଣାସ୍ତ୍ର ଆକ୍ରମଣ କରିଥିଲେ। କୋଦାଳ, କଟୁରୀ, ଟାଙ୍ଗିଆ ସାହାଯ୍ୟରେ ମହିଳାଙ୍କ ମୁଣ୍ଡ, ବେକ, ଛାତି ଓ ପିଠି ଆଦି ଏକାଧିକ ସ୍ଥାନରେ ହାଣିଥିଲେ। ଗୁରୁତର ଅବସ୍ଥାରେ ପରିବାର ଲୋକେ ତାଙ୍କୁ ମାହାଙ୍ଗା ମେଡିକାଲରେ ଭର୍ତ୍ତି କରିଥିଲେ। ଅବସ୍ଥା ସଙ୍କଟାପନ୍ନ ହେବାରୁ ତାଙ୍କୁ କଟକ ବଡ ଡାକ୍ତରଖାନାକୁ ସ୍ଥାନାନ୍ତର କରାଯାଇଥିଲା। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଏହାକୁ ନେଇ ସ୍ଥାନୀୟ ଅଞ୍ଚଳରେ ତୀବ୍ର ଅସନ୍ତୋଷ ପ୍ରକାଶ ପାଇଛି। ସ୍ଵର୍ଣ୍ଣଲତାଙ୍କ ପରିବାର ଏନେଇ ଅଭିଯୋଗ କରିବା ପରେ ପୁଲିସ ଅଭିଯୁକ୍ତ ଚନ୍ଦ୍ରମଣିକୁ ଥାନାରେ ଅଟକ ରଖି ତଦନ୍ତ ଆରମ୍ଭ କରିଛି।

କେନ୍ଦ୍ରାପଡା : ଭିଜିଲାନ୍ସ ଜାଲରେ ପ୍ରଧାନଶିକ୍ଷକ। ୫ ହଜାର ଲାଞ୍ଚ ନେଉଥିବା ବେଳେ ଧରାପଡ଼ିଲେ  କେନ୍ଦ୍ରାପଡା ଜିଲ୍ଲା ମହାକାଳପଡ଼ା ବ୍ଲକ ଅଧିନ ଯୁଗରୂପା ବିଦ୍ୟା ଭବନର ପ୍ରଧାନଶିକ୍ଷକ ରଘୁନାଥ ଦାସ। ପ୍ରଧାନଶିକ୍ଷକ ଜଣକ ଦରମା କରାଇଦେବା ପାଇଁ ସ୍କୁଲ ଜଗୁଆଳିଙ୍କ ଠାରୁ ଲାଞ୍ଚ ନେଉଥିବା ଅଭିଯୋଗ ହୋଇଛି । ତାଙ୍କ ନିକଟରେ ରଙ୍ଗବେଳା ୫୦୦୦ ହଜାର ଟଙ୍କା ଜବତ କରାଯାଇଛି । ପ୍ରଧାନଶିକ୍ଷକ ଅଫିସ ସମେତ ବିଭିନ୍ନ ସ୍ଥାନ ଭିଜିଲାନ୍ସ ଟିମ୍ ରେଡ୍ ଜାରି ରଖିଛି । 

ସୂଚନା ଅନୁଯାୟୀ,୨୦୨୫ ଅଗଷ୍ଟ ମାସରୁ ଜଗୁଆଳିଙ୍କ ଦରମା ଟଙ୍କା ଅଟକି ରହିଥିଲା। ଦରମା ଟଙ୍କା ଉଠାଇବା ପାଇଁ ଡିଇଓ କାର୍ଯ୍ୟାଳୟର ବିଇଓଙ୍କ ନିକଟକୁ ଉପସ୍ଥାପନ ପତ୍ର ପଠାଇବାକୁ ସେ ବାରମ୍ବାର ପ୍ରଧାନଶିକ୍ଷକଙ୍କୁ ଅନୁରୋଧ କରୁଥିଲେ। କିନ୍ତୁ ପ୍ରଧାନଶିକ୍ଷକ ଏଥିପାଇଁ ୫ ହଜାର ଟଙ୍କା ମାଗୁଥିଲେ। ଏଥିରେ ଅସନ୍ତୁଷ୍ଟ ହୋଇ କର୍ମଚାରୀ ଜଣକ ଭିଜିଲାନ୍ସ ବିଭାଗକୁ ଅଭିଯୋଗ କରିଥିଲେ। ଅଭିଯୋଗ ପାଇବା ପରେ ଭିଜିଲାନ୍ସର ଏକ ଟିମ୍ ଚଢ଼ାଉ କରିଥିଲା। ସ୍କୁଲ ଜଗୁଆଳିଙ୍କ ଠାରୁ ପ୍ରଧାନଶିକ୍ଷକ ରଘୁନାଥ ଦାସଙ୍କୁ ୫ ହଜାର ଟଙ୍କା ନେଉଥିବା ସମୟରେ ଧରିଥିଲା ଭିଜିଲାନ୍ସ। ତାଙ୍କ ନିକଟରୁ ସମସ୍ତ ଲାଞ୍ଚ ଟଙ୍କା ଜବତ କରାଯାଇଛି । ଭିଜିଲାନ୍ସ ଯାଞ୍ଚ ବେଳେ ଜଣାପଡିଛି ପ୍ରଧାନ ଶିକ୍ଷକ ରଘୁନାଥ ଦାସ ବିଦ୍ୟାଳୟର ଛାତ୍ରୀଛାତ୍ରମାନଙ୍କ ପୋଷାକ ଯୋଗାଣ ସଂସ୍ଥା ଠାରୁ ମଧ୍ୟ ଚେକ୍ ପ୍ରଦାନ ନେ଼ଇ ୫ ହଜାର ଟଙ୍କା ଦାବି କରିଥିଲେ ।ଏ ନେଇ ପୂର୍ବରୁ କଟକ ଭିଜିଲାନ୍ସରେ ଅଭିଯୋଗ ହୋଇଥିଲା।

ପଶ୍ଚିମବଙ୍ଗ : ଆରଜି କର ମେଡିକାଲ କଲେଜ ଏବଂ ହସ୍ପିଟାଲ ବଳାତ୍କାର ଏବଂ ହତ୍ୟା ମାମଲାର ତଦନ୍ତ ପୁନର୍ବାର ଆରମ୍ଭ କରିଥିବା ପଶ୍ଚିମବଙ୍ଗ ସରକାର ଶୁକ୍ରବାର ଦିନ କର୍ତ୍ତବ୍ୟରେ ଅବହେଳା ପାଇଁ ତିନି ଜଣ ଆଇପିଏସ ଅଧିକାରୀଙ୍କୁ ନିଲମ୍ବନ କରିଛନ୍ତି।

ତତ୍କାଳୀନ କୋଲକାତା ପୋଲିସ କମିଶନର ବିନୀତ ଗୋୟଲ, ତତ୍କାଳୀନ ଡେପୁଟି କମିଶନର ଅଫ୍ ପୋଲିସ (ଉତ୍ତର) ଅଭିଷେକ ଗୁପ୍ତା ଏବଂ ଡେପୁଟି କମିଶନର ଅଫ୍ ପୋଲିସ (ମଧ୍ୟ)ଙ୍କୁ ରାଜ୍ୟ ସରକାର ନିଲମ୍ବନ କରିଛନ୍ତି। ଆରମ୍ଭରୁ ହିଁ, ଏହି ଘଟଣାରେ କୋଲକାତା ପୋଲିସର ଭୂମିକା ସନ୍ଦେହରେ ଥିଲା । ବିଶେଷକରି, ସବୁଠାରୁ ଗୁରୁତ୍ୱପୂର୍ଣ୍ଣ ଅଭିଯୋଗ ଗୋୟଲ; ଗୁପ୍ତା ଏବଂ ମୁଖାର୍ଜୀଙ୍କ ବିରୁଦ୍ଧରେ ହୋଇଥିଲା। 

ଏହି ଅଧିକାରୀମାନେ ଘଟଣାକୁ ତ୍ରୁଟିପୂର୍ଣ୍ଣ ପରିଚାଳନା କରିଥିଲେ; ଯେପରିକି ମୃତ ଛାତ୍ରୀଙ୍କ ପିତାମାତାଙ୍କୁ ଲାଞ୍ଚ ଆକାରରେ ଟଙ୍କା ଯାଚିବା ଓ ଅନଧିକୃତ ଭାବେ ସାମ୍ବାଦିକ ସମ୍ମିଳନୀ କରିବା। ମୁଖ୍ୟମନ୍ତ୍ରୀ ଶୁଭେନ୍ଦୁ ଅଧିକାରୀ ଏହି ଅଧିକାରୀଙ୍କୁ ନିଲମ୍ବନ କରିବା ସହିତ ସେମାନଙ୍କ ବିରୋଧରେ ବିଭାଗୀୟ ତଦନ୍ତ ନିର୍ଦେଶ ଦେଇଛନ୍ତି। ମୁଖ୍ୟ ଶାସନ ସଚିବଙ୍କ ତତ୍ତ୍ବାବଧାନରେ ରାଜ୍ୟ ଗୃହ ବିଭାଗ ସଚିବ ଅଧିକାରୀଙ୍କ ବିରୋଧରେ ତଦନ୍ତ କରିବେ। ୨୦୨୪ ଅଗଷ୍ଟରେ ଆରଜି କର ମେଡିକାଲ କଲେଜର ଜନୈକ ଛାତ୍ରୀଙ୍କୁ କଲେଜ ପରିସରରେ ବଳାତ୍କାର ଓ ହତ୍ୟା କରାଯାଇଥିଲା।

ରାୟଗଡା : ବହୁ ଚର୍ଚ୍ଚିତ ହାଡ଼ିପା ନିଖିଲ ହତ୍ୟାକାଣ୍ଡ ଘଟଣା ରେ ତିନି ଅଭିଯୁକ୍ତ ଗିରଫ । ସମସ୍ତ ଅଭିଯୁକ୍ତଙ୍କୁ ବିହାର ମଦନପୁର ଅଞ୍ଚଳରୁ ଅଭିଯୁକ୍ତଙ୍କୁ ଗିରଫ କରିଛି ରାୟଗଡା ପୋଲିସ  । ଅଭିଯୁକ୍ତମାନେ ହେଉଛନ୍ତି, ଉମେଶ ହିଆଲ,ରାଜ ସିମେଲି, ଅକ୍ଷୟ ସାମଲ ଓରଫ , ଟିଙ୍କୁଲୁ । ଅନ୍ୟ ଅଭିଯୁକ୍ତଙ୍କୂ ଖୁବଶୀଘ୍ର ଗିରଫ କରାଯିବ ବୋଲି କହିଛନ୍ତି ରାୟଗଡା ଏସପି ସ୍ବାତୀ ଏସ୍. କୁମାର । ଏହି ହତ୍ୟାକାଣ୍ଡରେ ଏକାଧିକ ଅପରାଧି ସାମିଲ ଥିବା ବେଳେ ପୋଲିସ ରାଜ୍ୟ ତଥା ରାଜ୍ୟ ବାହାରକୁ ଜାଲ ବିଛାଇଛି । ଏଥିପାଇଁ ମୋଟ ୬ଟି ଟିମ୍ ଗଠନ କରି ତଦନ୍ତ କରାଯାଉଛି ।

ସୂଚନାନୁସାରେ, ଗତ ୯ ତାରିଖ ରାତିରେ ରାୟଗଡ଼ା ସହର ଇନ୍ଦିରା ନଗର ୩ୟ ଲାଇନ ଆମ୍ବେଦକର ସାହିର ଜଣେ ଯୁବକ ନିଖିଲ ହାଡ଼ପାକୁ କିଛି ଅଜଣା ଦୁର୍ବୃତ୍ତ  ଗୋଡ଼ାଇ ଗୋଡ଼ାଇ ହତ୍ୟା କରିଥିଲେ।ରାତି ୧୦ଟା କିଛି ଯୁବକ ଗୋଟିଏ ବୁଲେଟ୍‌ ଏବଂ ଏକ ଚାରି ଚକିଆ ଗାଡ଼ିରେ ନିଖିଲକୁ ପିଛା କରଥିଲେ । ଏହି ସମୟରେ ନିଖିଲି ଦୌଡ଼ି ପଳେଇବା ସମୟରେ ତାକୁ ଅପହରଣ କରି ଗୁଳି କରି ହତ୍ୟା  କରିଥିଲେ ଇ ଏହାପରେ ନିଖିଲଙ୍କ ମୃତ ଦେହକୁ  ତୁମ୍ବିଗୁଡ଼ା ନିକଟସ୍ଥ ନାଗାବଳୀ ନଦୀପଠାରେ ଫିଙ୍ଗି ଦେଇ ଚାଲିଯାଇଥିଲେ। ଏହି ଘଟଣା ରାୟଗଡ଼ା ସହରରେ ଚାଞ୍ଚଲ୍ୟ ଖେଳାଇ ଦେଇଥିଲା। ପୋଲିସର ସ୍ୱତନ୍ତ୍ର ସ୍କ୍ବାଡ ବିଭିନ୍ନ ସ୍ଥାନରେ ଛାପା ମାରିଥିଲେ । ସହରବାସୀ ଆତଙ୍କିତ ଥିବା ବେଳେ ସହରରେ ୩ ପ୍ଲାଟୁନ୍ ପୋଲିସ ଫୋର୍ସ ମୁତୟନ କରାଯାଇଥିଲା । ପୂର୍ବ ଶତ୍ରୁତାକୁ ନେଇ ହତ୍ୟାକାଣ୍ଡ ଘଟିଥିବା ପୋଲିସ ପ୍ରାଥମିକ ତଦନ୍ତରୁ ଜାଣିବାକୁ ପାଇଥିଲା । ଏଥିପାଇଁ ମୋଟ ୬ଟି ଟିମ୍ ଗଠନ କରି ପୋଲିସ ଘଟଣାର ତଦନ୍ତ କରି ବର୍ତ୍ତମାନ ସୁଦ୍ଧା ୩ଜଣକୁ ଗିରଫ କରିଥିବାବେଳେ ଅନ୍ୟମାନଙ୍କୁ ମଧ୍ୟ ଖୁବ ଶୀଘ୍ର ଗିରଫ କରାଯିବ ବୋଲି ସୂଚନା ଦେଇଛି  ।