ରକ୍ଷାବନ୍ଧନ ପର୍ବରେ ରାଖି ବାନ୍ଧିବା ପରେ ସମ୍ବେଦନଶୀଳ ତ୍ୱଚା (ସେନ୍ସିଟିଭ୍ ସ୍କିନ୍) ଥିବା ବ୍ୟକ୍ତିଙ୍କ କ୍ଷେତ୍ରରେ ଚର୍ମ ଆଲର୍ଜି ହେବାର ଯଥେଷ୍ଟ ସମ୍ଭାବନା ରହିଥାଏ । ରାଖି ବାନ୍ଧିବା ପରେ ହାତ କୁଣ୍ଡାଇ ହେବା, ଲାଲ ପଡିଯିବା, ଫଳିଯିବା ଭଳି ସମସ୍ୟା ଦେଖିବାକୁ ମିଳେ । ତେବେ ଏହି ସମସ୍ୟା ରାକ୍ଷୀ କେତେ ସମୟ ବନ୍ଧା ହୋଇ ରହିଛି, କେତେ ଝାଳ ଜମିଛି, ସୂତା କେତେ ଶକ୍ତ ଭାବେ ବନ୍ଧାଯାଇଛି ଏବଂ ସମ୍ପୃକ୍ତ ବ୍ୟକ୍ତିଙ୍କର ପୂର୍ବରୁ ଆଲର୍ଜି ସମସ୍ୟା ଅଛି କି ନାହିଁ ତାହା ଉପରେ ନିର୍ଭର କରେ । ଯଦି ଏହି ସମସ୍ୟା ସାମୟିକ ହୋଇ ଆପେ ଆପେ ଠିକ୍ ହୋଇଯାଏ ତେବେ ଚିନ୍ତାର କାରଣ ନାହିଁ, ମାତ୍ର ଏହା ଦୀର୍ଘସମୟ ଧରି ରହିଲେ କିମ୍ବା ବଢ଼ିଲେ ତୁରନ୍ତ ଦୃଷ୍ଟି ଦେବା ଆବଶ୍ୟକ। ମୁଖ୍ୟତଃ ରାଖିରେ ବ୍ୟବହୃତ ସିନ୍ଥେଟିକ୍ ସୂତା, କେମିକାଲ୍ ରଙ୍ଗ, ଗ୍ଲିଟର, ପ୍ଲାଷ୍ଟିକ୍ ଏବଂ ନିକେଲ୍, କୋବାଲ୍ଟ କିମ୍ବା କ୍ରୋମିୟମ୍ ଭଳି ଶସ୍ତା ଧାତବ ଉପାଦାନ ତ୍ୱଚାର ସଂସ୍ପର୍ଶରେ ଆସି ଏହି ଆଲର୍ଜି ସୃଷ୍ଟି କରିଥାନ୍ତି ।  ଅଧିକ ଶକ୍ତଭାବେ ବାନ୍ଧିବା ଓ ଝାଳ ଯୋଗୁଁ ହେଉଥିବା ସାଧାରଣ କୁଣ୍ଡିଆ ରାଖି ଖୋଲିବା ଓ ତ୍ୱଚା ସଫା କରିବା ଦ୍ୱାରା ଠିକ୍ ହୋଇ ଯାଉଥିବା ବେଳେ କେମିକାଲ୍‌ଜନିତ ସ୍କିନ୍ ଆଲର୍ଜି ରାଖି ଖୋଲିବା ପରେ ବି ବଢ଼ିଥାଏ ଏବଂ ଏଥିପାଇଁ ଡାକ୍ତରୀ ଚିକିତ୍ସାର ପ୍ରୟୋଜନ ପଡ଼ିଥାଏ । ଏହି ସମସ୍ୟାରୁ ବର୍ତ୍ତିବା ପାଇଁ ୧୦୦% ସୂତା (କପା) ସୂତାରେ ତିଆରି ସରଳ ଓ ହାଲୁକା ରାଖି ବ୍ୟବହାର କରିବା ସବୁଠାରୁ ନିରାପଦ ଅଟେ, କାରଣ ଏହା ତ୍ୱଚା ପାଇଁ କୋମଳ ହୋଇଥାଏ । ବିଶେଷ କରି ଛୋଟ ପିଲାଙ୍କ ପାଇଁ ରାଖି କିଣିବା ସମୟରେ ଅତ୍ୟାଧିକ ସଜାବଟ, ଧାରୁଆ କିମ୍ବା ମୋଟା ସୂତା, ତାର, ଶସ୍ତା ଧାତୁ ଏବଂ ସହଜରେ ଖସିଯାଉଥିବା ଛୋଟ ମୋତି କିମ୍ବା ଘଣ୍ଟି ଥିବା ରାଖି ଆଦୌ କିଣିବା ଉଚିତ୍ ନୁହେଁ । କାରଣ ଏହା ଦ୍ୱାରା ତ୍ୱଚାରେ ବିଭିନ୍ନ ସମସ୍ୟା ପୁଜିବାର ସମ୍ଭାବନା ରହିଛି । ତେଣୁ ରାଖି କିଣିବା ସମୟରେ ଧ୍ୟାନ ରଖନ୍ତୁ ।

ନେଦରଲ୍ୟାଣ୍ଡସରେ ଜଣେ ବ୍ୟକ୍ତି କାଠ ଜୋତା (କ୍ଲୋଗ୍) ଆକୃତିର ଏକ ନିଆରା ଗାଡ଼ି ତିଆରି କରିବାସହ ଏହାକୁ ସବୁଠାରୁ ଅଧିକ ବେଗରେ ଚଳାଇ ଗିନିଜ୍ ୱାର୍ଲ୍ଡ ରେକର୍ଡ ସୃଷ୍ଟି କରିଛନ୍ତି । ପ୍ରସିଦ୍ଧ ଟିଭି ହୋଷ୍ଟ କ୍ଲାସ ୱାନ କୁଇଷ୍ଟମ୍ ଏବଂ ତାଙ୍କ ଟିମ୍ ମିଶି ନେଦରଲ୍ୟାଣ୍ଡସର ପାରମ୍ପରିକ କାଠ ଜୋତା, ଯାହାକୁ 'କ୍ଲୋଗ୍' ବୋଲି କୁହାଯାଏ, ସେହି ଅନୁକରଣରେ ଏହି ଗାଡ଼ିର ଡିଜାଇନ୍ ପ୍ରସ୍ତୁତ କରିଥିଲେ । ଏହି ଗାଡ଼ିଟିର ନିର୍ମାଣ ପାଇଁ ଏକ ଛୋଟ ଇଲେକ୍ଟ୍ରିକ୍ ଗୋ-କାର୍ଟ ଫ୍ରେମ୍‌କୁ ଆଧାର ଭାବେ ବ୍ୟବହାର କରାଯାଇଥିଲା । ଯାହା ଉପରେ ପଲିଏଷ୍ଟର ଓ ଫାଇବରଗ୍ଲାସ୍‌ର ସାହାଯ୍ୟରେ ବଡ଼ ଜୋତା ଭଳି ଏକ ବଡି ତିଆରି କରାଯାଇଥିଲା । ଗତ ଏପ୍ରିଲ ୪ ତାରିଖରେ ନେଦରଲ୍ୟାଣ୍ଡସର ବ୍ରେଡା ଇଣ୍ଟରନ୍ୟାସନାଲ ଏୟାରପୋର୍ଟରେ କ୍ଲାସ ଏହି କାର୍‌କୁ ଚଳାଇଥିଲେ । ଯେଉଁଠାରେ ଏହା ଘଣ୍ଟାପ୍ରତି ୧୧୩ କିଲୋମିଟରର ବେଗ ହାସଲ କରି ସମସ୍ତଙ୍କୁ ଚକିତ କରିଦେଇଥିଲା । ଏହି ଅସାଧାରଣ ସଫଳତା ପାଇଁ ନିକଟରେ ଏହାକୁ 'ସବୁଠାରୁ ଦ୍ରୁତଗାମୀ ମୋଟରାଇଜ୍‌ଡ କ୍ଲୋଗ୍ ଶୁ' ଭାବେ ଗିନିଜ୍ ୱାର୍ଲ୍ଡ ରେକର୍ଡସ ପକ୍ଷରୁ ବିଶ୍ୱ ରେକର୍ଡର ମାନ୍ୟତା ସହ ଆନୁଷ୍ଠାନିକ ପ୍ରମାଣପତ୍ର ପ୍ରଦାନ କରାଯାଇଛି ।

ଆମେରିକାର ମାରିଆ ଲିୟୋନାର୍ଡ ନାମ୍ନୀ ଜଣେ ମହିଳା ସ୍ବାମୀଙ୍କ ସହ ବିବାହ ବିଚ୍ଛେଦ ଘଟିବାପରେ ନିଜ ସହ ନିଜେ ବିବାହ କରି ଏକ ଅନନ୍ୟ ଉଦାହରଣ ସୃଷ୍ଟି କରିଛନ୍ତି । ବୃତ୍ତିରେ ଜଣେ ଲେଖିକା, ଓକିଲ ତଥା ପୋଡକାଷ୍ଟ ହୋଷ୍ଟ ମାରିଆ କୋଲୋରାଡୋର ପାହାଡ଼ିଆ ଅଞ୍ଚଳସ୍ଥିତ ଏକ ରିସୋର୍ଟରେ ନିଜର ୩ ଜଣ ଘନିଷ୍ଠ ବାନ୍ଧବୀଙ୍କ ଉପସ୍ଥିତିରେ ଏହି ବାହାଘର କରିଥିଲେ । ଯେଉଁଠାରେ ବାନ୍ଧବୀମାନେ ବିବାହର ସମସ୍ତ ରୀତିନୀତି ସମ୍ପନ୍ନ କରିଥିଲେ । ଏହି ବିବାହରେ ସେ ନିଜକୁ ଆଜୀବନ ଭଲପାଇବା, ନିଜ ଖୁସିର ଦାୟିତ୍ୱ ନିଜେ ନେବା ଏବଂ ଜୀବନସାରା ନିଜ ସହ ରହିବାର ସଂକଳ୍ପ ନେଇଥିଲେ । ହଟ୍ ଟବ୍‌ରେ ରିସେପ୍ସନ୍ ପାର୍ଟି କରିଥିବା ମାରିଆ ବର୍ତ୍ତମାନ ପୁଣି ସେହି ପାହାଡ଼ିଆ ସ୍ଥାନକୁ ଯାଇ ବାନ୍ଧବୀମାନଙ୍କ ସହ ବିବାହର ବାର୍ଷିକୋତ୍ସବ ପାଳନ କରିବାକୁ ପ୍ରସ୍ତୁତି ଚଳାଇଛନ୍ତି । ଯାହା ବର୍ତ୍ତମାନ ସୋସିଆଲ ମିଡିଆରେ ଖୁବ ଭାଇରାଲ ହେବାରେ ଲାଗିଛି । କିଛି ଲୋକ ଏହାକୁ ପସନ୍ଦ କରୁଥିବାବେଳେ କିଛି ଲୋକ ତାଙ୍କୁ ସମାଲୋଚନା କରୁଥିବା ବି ଦେଖିବାକୁ ମିଳୁଛି ।

ପଞ୍ଜାବର ମୋଗା ସହରର ଦବିନ୍ଦରପାଲ ସିଂହ ନାମକ ଜଣେ ବ୍ୟକ୍ତି ପ୍ରାୟ ୫ ମାସ ପୂର୍ବେ ୩୧.୫୦ ଲକ୍ଷ ଟଙ୍କାରେ ଏକ ଇନୋଭା ହାଇକ୍ରସ୍ ଜେଡଏକ୍ସ କାର୍ କିଣିଥିଲେ । ମାତ୍ର ବାରମ୍ବାର ଶୋ’ରୁମ୍ ଓ କମ୍ପାନୀ ସହ ଯୋଗାଯୋଗ କରିବା ସତ୍ତ୍ୱେ କାର୍‌ର ରେଜିଷ୍ଟ୍ରେସନ୍ ସାର୍ଟିଫିକେଟ୍ ହୋଇପାରିନଥିଲା । ନୂଆ ନିୟମ ଆଳରେ ଶୋ’ରୁମ୍ ତାଙ୍କଠାରୁ ଅତିରିକ୍ତ ୫୪ ହଜାର ଟଙ୍କା ନେଇଥିଲେ ମଧ୍ୟ ଆରଟିଓ ଯାଞ୍ଚ ସମୟରେ ବିଲ୍ ଏବଂ ରେକର୍ଡ ରାଶି ମଧ୍ୟରେ ଫରକ ବାହାରିବାରୁ ରେଜିଷ୍ଟ୍ରେସନ୍ ଅଟକି ଯାଇଥିଲା । ସମସ୍ୟା ଜଣାଇବାରୁ ଜଣେ କର୍ମଚାରୀ ତାଙ୍କୁ ଥଟ୍ଟାରେ "ବେଶି ତରବର ଅଛି ଯଦି ଗାଡ଼ିରେ ଘାସ-ନଡ଼ା ବୁହାବୋହି କର" ବୋଲି ପରାମର୍ଶ ଦେଇଥିଲେ । ଯେଉଁଥିରେ ଅସନ୍ତୁଷ୍ଟ ହୋଇ ଦବିନ୍ଦରପାଲ କାର୍ ଉପରେ ଘାସ ଲୋଡ୍ କରି ବଳଦ ଦ୍ୱାରା ତାହାକୁ ଟଣାଇ ଶୋ’ରୁମ୍ ଆଗରେ ଏକ ନିଆରା ପ୍ରତିବାଦ କରିଥିଲେ । ବର୍ତ୍ତମାନ ସେ କାର୍ ଫେରାଇ ଟଙ୍କା ଫେରସ୍ତ ମାଗୁଥିବା ବେଳେ ଏଜେନ୍ସି କିମ୍ବା ଟୟୋଟା କମ୍ପାନୀ ପକ୍ଷରୁ କୌଣସି ପ୍ରତିକ୍ରିୟା ମିଳିନାହିଁ ।

ଜୟପୁରର ଜି-ଷ୍ଟୁଡିଓରେ ଆୟୋଜିତ ମିସ୍ ୟୁନିଭର୍ସ ଇଣ୍ଡିଆ ୨୦୨୬ର ଫାଇନାଲ୍‌ରେ ଦେଶର ୫୨ ଜଣ ସୁନ୍ଦରୀଙ୍କୁ ପଛରେ ପକାଇ କେରଳର ୧୯ ବର୍ଷୀୟା କେଜିଆ ଲିଜ୍ ମେଜୋ ବିଜେତା ହୋଇଛନ୍ତି । ଏହି ପ୍ରତିଯୋଗିତାରେ ତାମିଲନାଡୁର ବୈଷ୍ଣବୀ ଗଣେଶ ପ୍ରଥମ ରନର୍ସ-ଅପ୍ ଏବଂ ଗୁଜରାଟର ଅନୁଶ୍ରୀ ସାତବଲେକର ଦ୍ୱିତୀୟ ରନର୍ସ-ଅପ୍ ଘୋଷିତ ହୋଇଛନ୍ତି । ପୂର୍ବତନ ମିସ୍ ୟୁନିଭର୍ସ ସୁସ୍ମିତା ସେନ୍, ଉର୍ବଶୀ ରାଉତେଲା, ସେଲିନା ଜେଟଲୀ, ପ୍ରଜ୍ଞା କପୁର ଓ ନିଖିଲ ଆନନ୍ଦ ପ୍ରମୁଖ ବିଚାରକ ଭାବେ ଯୋଗଦେଇଥିବା ଏହି ଗ୍ରାଣ୍ଡ୍ ଫିନାଲେରେ କେଜିଆ ବିୟଜ ମୁକୁଟ ପିନ୍ଧିଥିଲେ । ବିଜୟ ପରେ କେଜିଆ କହିଛନ୍ତି ଯେ ଏହା କେବଳ ଏକ ସଫଳତା ନୁହେଁ, ବରଂ ଏକ ବଡ଼ ଦାୟିତ୍ୱ ଏବଂ ସେ ବିଶ୍ୱ ମଞ୍ଚରେ ଭାରତର ସଂସ୍କୃତି ଓ ଯୁବଶକ୍ତିକୁ ସଠିକ୍ ଭାବେ ପ୍ରତିଫଳିତ କରିବେ । ଏହି ସଫଳତା ସହ କେଜିଆ ଚଳିତ ବର୍ଷ ଶେଷରେ ପୁଏର୍ତୋ ରିକୋଠାରେ ଅନୁଷ୍ଠିତ ହେବାକୁ ଥିବା ୭୫ତମ ମିସ୍ ୟୁନିଭର୍ସ ପ୍ରତିଯୋଗିତାରେ ଅନ୍ତର୍ଜାତୀୟ ସ୍ତରରେ ଭାରତର ପ୍ରତିନିଧିତ୍ୱ କରିବେ ।

ମେଷ: ନୂତନ ଅାୟ, ବ୍ୟବସାୟରେ ସ୍ବଳ୍ପଲାଭ, ଶୁଭସମାଚାର, ମାନସିକ ଅବସାଦ, ସନ୍ତାନସମ୍ୟା, ଶରୀର ସୁସ୍ଥ, ବିଶିଷ୍ଠ କାର୍ଯ୍ୟରେ ଲାଭ, ଦାମ୍ପତ୍ୟସୁଖ, ଅନୁଷ୍ଠାନରୁ ଲାଭ,  ଭରଣୀ ନକ୍ଷତ୍ର ସତର୍କ ରୁହନ୍ତୁ, ଶୁଭରଙ୍ଗ-ହଳଦୀ, ସଂଖ୍ୟା-୯, ଆରାଧନା-ଶଙ୍କର ଭଗବାନ

ବୃଷ: ବ୍ୟୟବୃଦ୍ଧି, ବ୍ୟବସାୟରେ ସ୍ବଳ୍ପଲାଭ, ବନ୍ଧୁଲାଭ, ଉତ୍ସବ ପ୍ରତି ଅାଗ୍ରହ, ଶରୀର ସୁସ୍ଥ, କିଛିକାର୍ଯ୍ୟରେ ଅସନ୍ତୁଷ୍ଟ, ପାରିବାରିକ ଖୁସି, ସମ୍ପତ୍ତିଲାଭ, ବ୍ୟକ୍ତିସହାୟତା, ରୋହିଣୀ ନକ୍ଷତ୍ର ସତର୍କ ରୁହନ୍ତୁ, ଶୁଭରଙ୍ଗ-ଧଳା, ସଂଖ୍ୟା-୭, ଆରାଧନା-ମା’ ଲକ୍ଷ୍ମୀ 

ମିଥୁନ: ସମ୍ମାନଲାଭ, ଗୃହେ ଉତ୍ସବ, ତୀର୍ଥାଟନ, ଲୋକସମ୍ପର୍କ ବୃଦ୍ଧି, ଦ୍ରବ୍ୟଲାଭ, ଶୁଭଖବର, ବନ୍ଧୁଲାଭ, ସ୍ବାଦିଷ୍ଠ ଭୋଜନ, କର୍ମକ୍ଷେତ୍ରେ ସମ୍ମାନିତ, ଉଚ୍ଚବ୍ୟକ୍ତିଙ୍କ ସହାୟତା, ମାନସିକ ଶାନ୍ତି, ଆଦ୍ରା ନକ୍ଷତ୍ର ସତର୍କ ରୁହନ୍ତୁ, ଶୁଭରଙ୍ଗ-ସବୁଜ, ସଂଖ୍ୟା-୧୨, ଆରାଧନା-ଶ୍ରୀ ଗଣେଶ

କର୍କଟ: କର୍ମେ ଖୁସି, ଦେବକାର୍ଯ୍ୟରେ ସନ୍ତୁଷ୍ଟ, ମାନସିକଶାନ୍ତି, ଅର୍ଥସମସ୍ୟା, ପାରିବାରିକ ସହଯୋଗ, ନୂତନ କର୍ମଆରମ୍ଭ, ସମ୍ପତ୍ତିବିବାଦ, ବ୍ୟବସାୟିକ ଖୁସି, ପରିଭ୍ରମଣସୁଖ, ଶରୀର ସୁଖ, ଅଶ୍ଳେଷା ନକ୍ଷତ୍ର ସତର୍କ ରୁହନ୍ତୁ, ଶୁଭରଙ୍ଗ-ଗୋଲାପି, ସଂଖ୍ୟା-୮, ଆରାଧନା-ମା’ ଭଗବତୀ

ସିଂହ: ଶରୀର ସୁସ୍ଥ, ମାନସିକଶାନ୍ତି, ସନ୍ତାନଖୁସି, ଲୋକସମ୍ପର୍କବୃଦ୍ଧି, ବ୍ୟବସାୟରେ ଲାଭ, ଅର୍ଥପ୍ରାପ୍ତି, ସୁମିଷ୍ଠ ଭୋଜନ, ଦ୍ରବ୍ୟଲାଭ, ସମ୍ପତ୍ତିଲାଭ, ହଠାତ୍ ଦୂରଯାତ୍ରା, ପୂର୍ବାଫାଲଗୁନି, ନକ୍ଷତ୍ର ସତର୍କ ରୁହନ୍ତୁ, ଶୁଭରଙ୍ଗ-ଧଳା, ସଂଖ୍ୟା-୧୦, ଆରାଧନା-ଲକ୍ଷ୍ମୀନାରାୟଣ

କନ୍ୟା:  ଅର୍ଥଲାଭ, ବନ୍ଧୁଗୃହେ ଯାତ୍ରା, ବିବାଦ ସମାଧାନ, ଉଚ୍ଚବ୍ୟକ୍ତିଙ୍କ ସହାୟତା, ସନ୍ତାନସମସ୍ୟା, ନୂତନ କାର୍ଯ୍ୟଆରମ୍ଭ, ବ୍ୟବସାୟରେ ସ୍ବଳ୍ପଲାଭ,ଶତ୍ରୁ ପରାଜିତ, ପରିବହନକ୍ଷେତ୍ରେ ସମସ୍ୟା, ଆୟଭଲ, ହସ୍ତା ନକ୍ଷତ୍ର ସତର୍କ ରୁହନ୍ତୁ, ଶୁଭରଙ୍ଗ-ଆକାଶି, ସଂଖ୍ୟା-୬, ଆରାଧନା-ମା’ କୋଚିଲାଇ

ତୁଳା: ଆର୍ଥିକସୁଖ, ଶୁଭଖବର, ସନ୍ତାନସମସ୍ୟା, ଉଚ୍ଚଆଶାରେ ଲାଭ, ମାନସିକ ଅବସାଦ, ସ୍ବାସ୍ଥ୍ୟ ସମସ୍ୟା, ବ୍ୟବସାୟିକ ଖୁସି, ଦୂରଯାତ୍ରା, ଗୃହେ ଉତ୍ସବ, ପିତାମାତାଙ୍କ ଚିନ୍ତା, ସ୍ବାତୀ ନକ୍ଷତ୍ର ସତର୍କ ରୁହନ୍ତୁ, ଶୁଭରଙ୍ଗ-ଧଳା, ସଂଖ୍ୟା-୭, ଆରାଧନା-ଶଙ୍କରଭଗବାନ

ବିଛା: ଦ୍ରବ୍ୟଲାଭ, ଆତ୍ମସନ୍ତୋଷ, ଶୁଭକାର୍ଯ୍ୟେ ଯୋଗଦାନ, ଶତ୍ରୁସମସ୍ୟା, ଗାଡ଼ିଚାଳନାରେ ସତର୍କ, ସ୍ବାସ୍ଥ୍ୟସମସ୍ୟା, ମାନସିକ ଅବଦାସ, ଈଶ୍ବର ବିଶ୍ବାସ, ସନ୍ତାନଖୁସି, ଅର୍ଥପ୍ରାପ୍ତି, ସମ୍ପତ୍ତିକଳହ, ଜ୍ୟେଷ୍ଠା ନକ୍ଷତ୍ର ସତର୍କ ରୁହନ୍ତୁ, ଶୁଭରଙ୍ଗ-ହଳଦୀ, ସଂଖ୍ୟା-୪, ଆରାଧନା-ମା’ ବଗଳାମୁଖୀ

ଧନୁ: ପିଲାଙ୍କକଷ୍ଟ, ଗୃହେ ଉତ୍ସବ, ଅର୍ଥସମସ୍ୟା, ଜମିଗଣ୍ଡଗୋଳ, ଦୂରଯାତ୍ରା, ଭ୍ରାତୃସ୍ନେହ, ବ୍ୟବସାୟରେ କଷ୍ଟ, ଲୋକସମ୍ପର୍କ ହାନି, ଶରୀର ସୁସ୍ଥ, ମାନସିକ ଅବସାଦ, ପୂର୍ବାଷାଢ଼ା ନକ୍ଷତ୍ର ସତର୍କ ରୁହନ୍ତୁ, ଶୁଭରଙ୍ଗ-ଧଳା, ସଂଖ୍ୟା-୮, ଆରାଧନା-ପିତାମାତାଙ୍କ ସେବା

ମକର: କଳହଯୋଗ, ସନ୍ତାନଖୁସି, ପାରିବାରିକ ବିବାଦ, ବ୍ୟବସାୟରେ ଲାଭକମ୍‌ ଦ୍ରବ୍ୟନଷ୍ଟ, ବ୍ୟକ୍ତିସହାୟତା, ବିଦେଶ ଭ୍ରମଣ, ଶରୀରସୁସ୍ଥ, କଚେରୀମାମଲା, ଆୟକମ୍‌, ଶ୍ରବଣା ନକ୍ଷତ୍ର ସତର୍କ ରୁହନ୍ତୁ, ଶୁଭରଙ୍ଗ-ବାଇଗଣୀ, ସଂଖ୍ୟା-୫, ଆରାଧନା-ମା’ ଗ୍ରାମଦେବତୀ

କୁମ୍ଭ: କର୍ମେ ଖୁସି, ମାନସିକ ଅବସାଦ, ଦୂରଯାତ୍ରା, ବ୍ୟବସାୟରେ ସ୍ବଳ୍ପଲାଭ, ବନ୍ଧୁସାହାଯ୍ୟ, ଶାରୀରିକ ଅସୁସ୍ଥ, ଅର୍ଥସମସ୍ୟା, ସନ୍ତାନସମସ୍ୟା, ବିଦ୍ୟାରେ ସଫଳତା, ନୂତନ କାର୍ଯ୍ୟାରମ୍ଭ, ଶତଭିଷା ନକ୍ଷତ୍ର ସତର୍କ ରୁହନ୍ତୁ, ଶୁଭରଙ୍ଗ-ନୀଳ, ସଂଖ୍ୟା-୬, ଆରାଧନା-ଗାଈମାନଙ୍କୁ ଖାଦ୍ୟ ଦିଅନ୍ତୁ

ମୀନ: ଅଯଥାକଷ୍ଟ, ନୂଆଆଶା ପୂର୍ଣ୍ଣ, ସମ୍ପତ୍ତିଲାଭ, ଭ୍ରାତୃକଳହ, ବିଶିଷ୍ଠ ବ୍ୟକ୍ତିସହାୟତା, ଶରୀର ସୁସ୍ଥ, ବ୍ୟବସାୟ ଅାରମ୍ଭ, ପରିବହନ କ୍ଷେତ୍ରେ ସମସ୍ୟା, ଅର୍ଥସମସ୍ୟା, ଶତ୍ରୁସମସ୍ୟା,  ରେବତୀ ନକ୍ଷତ୍ର ସତର୍କ ରୁହନ୍ତୁ, ଶୁଭରଙ୍ଗ-ଧଳା, ସଂଖ୍ୟା-୮, ଆରାଧନା-ମା’ ଦକ୍ଷିଣକାଳୀ

'ଆୱାରାପନ୍ ୨' ରିଲଜ ପରେ ୨୦୦୭ର ମୂଳ ଚଳଚ୍ଚିତ୍ର 'ଆୱାରାପନ୍' ବର୍ତ୍ତମାନ ଚର୍ଚ୍ଚାକୁ ଆସିଛି । ଏଥିରେ ଆଲିୟା ହାମିଦ୍ ଭୂମିକାରେ ଅଭିନୟ କରିଥିବା ଅଭିନେତ୍ରୀ ଶ୍ରୀୟା ଶରନ୍‌ ନିକଟରେ ନିଜର ପୁରୁଣା ଅଭିଜ୍ଞତା ବାଣ୍ଟିଛନ୍ତି । ନିର୍ଦ୍ଦେଶକ ମୋହିତ ସୁରୀଙ୍କୁ ଜଣେ ଅତ୍ୟନ୍ତ ଭାବପ୍ରବଣ ନିର୍ଦ୍ଦେଶକ ଭାବେ ସେ ବର୍ଣ୍ଣନା କରିଛନ୍ତି । ସେହିଭଳି ଏହି ଫିଲ୍ମଟି ଅଭିନେତା ଇମ୍ରାନ୍ ହାଶମୀଙ୍କ ପାଇଁ ବହୁତ ଖାସ୍ ଥିଲାବୋଲି ଶ୍ରୀୟା ମତ ଦେଇଛନ୍ତି । ମୂଳ ଫିଲ୍ମଟି ବକ୍ସ ଅଫିସ୍‌ରେ ବିଫଳ ହୋଇଥିବାରୁ ସେ ଅତ୍ୟନ୍ତ ନିରାଶ ହୋଇଥିଲେ ବୋଲି ପ୍ରକାଶ କରିବା ସହ କହିଛନ୍ତି ଯେ ଏହି ଚଳଚ୍ଚିତ୍ରଟି ନିଜ ସମୟଠାରୁ ଯଥେଷ୍ଟ ଆଗୁଆ ଥିଲା । ଲୋକମାନେ ଫିଲ୍ମ ଓ ଏହାର ଗୀତଗୁଡ଼ିକୁ ବହୁତ ଭଲପାଇବା ଦେଇଥିଲେ ହେଁ ତାହା କାହିଁକି ବ୍ୟବସାୟିକ ସଫଳତାରେ ପରିଣତ ହୋଇପାରିନଥିଲା, ଯାହା ସେତେବେଳେ ତାଙ୍କୁ ଦୁଃଖ ଦେଇଥିଲା । ତେବେ କାହାଣୀର ଗଭୀରତା ଯୋଗୁଁ ଆଜି ବି ଲୋକଙ୍କ ହୃଦୟରେ ଏହି ଫିଲ୍ମ ପ୍ରତି ଭଲପାଇବା ରହିଛି ଏବଂ ଆଗାମୀ ସିକ୍ୟୁଏଲ୍ 'ଆୱାରାପନ୍ ୨' ସଫଳ ହେବବୋଲି ସେ ଆଶା ରଖିଛନ୍ତି ।

ଅନୁରାଗ ବାସୁଙ୍କ ନିର୍ଦ୍ଦେଶନାରେ ନିର୍ମିତ ହେବାକୁ ଯାଉଥିବା ଏକ ରୋମାଣ୍ଟିକ୍ ମ୍ୟୁଜିକାଲ୍ ଫିଲ୍ମରେ ଶ୍ରୀଲୀଲା ନଜର ଆସିବାନେଇ ସୂଚନା ରହିଛି । ଯେଉଁଥିପାଇଁ ସେ ମୁମ୍ବାଇରେ ପହଞ୍ଚି ସୁଟିଂ ମଧ୍ୟ ଆରମ୍ଭ କରିସାରିଛନ୍ତି ।  ପୂର୍ବରୁ ସମୟସୀମା ସମସ୍ୟା ଯୋଗୁଁ ବିଳମ୍ବିତ ହୋଇଥିବା ଏହି ଫିଲ୍ମର ଅଧିକାଂଶ ସୁଟିଂ ଅଭିନେତା କାର୍ତ୍ତିକ ଆରିୟନ ଶେଷ କରିସାରିଥିବା ବେଳେ, ଏହା ୨୦୨୬ ମସିହାରେ ରିଲିଜ ହେବା ନେଇ ଆଶା କରାଯାଉଛି। ପ୍ରଥମେ 'ଆଶିକୀ ୩' ବୋଲି ଚର୍ଚ୍ଚା ହେଉଥିବା ଏହି ଚଳଚ୍ଚିତ୍ରଟିର ନାମ 'ତୁ ମେରୀ ଜିନ୍ଦଗୀ ହୈ' ରଖାଯାଇଛି । ଯାହାର ସଙ୍ଗୀତ ନିର୍ଦ୍ଦେଶନା ଭାର ପ୍ରସିଦ୍ଧ ସଙ୍ଗୀତକାର ପ୍ରୀତମ୍ ଗ୍ରହଣ କରିଛନ୍ତି । ନିକଟରେ ଅନନ୍ୟା ପାଣ୍ଡେଙ୍କ ସହ 'ତୁ ମେରୀ ମେଁ ତେରା ମେଁ ତେରା ତୁ ମେରୀ'ରେ ନଜର ଆସିଥିବା କାର୍ତ୍ତିକଙ୍କ ହାତରେ 'ନାଗଜିଲା' ଓ 'ଭୁଲ୍ ଭୁଲେୟା ୪' ପରି ବଡ଼ ଚଳଚ୍ଚିତ୍ର ରହିଥିବା ବେଳେ, ପବନ କଲ୍ୟାଣଙ୍କ ସହ 'ଉସ୍ତାଦ୍ ଭଗତ୍ ସିଂ'ରେ ଅଭିନୟ କରିସାରିଥିବା ଶ୍ରୀଲୀଲା ଆଗାମୀ ଦିନରେ 'ଓମ୍ ଚାପ୍ଟର ୧: ଉଧିରାମ୍ - ଦ ବ୍ଲଡ୍ ଉଡ୍'ରେ ନଜର ଆସିବେ ।

ଆଜିକାଲିର ଫ୍ୟାଶନ୍ ଦୁନିଆରେ ଜୋତା କେବଳ ପାଦର ଆବଶ୍ୟକତା ହୋଇ ରହିନାହିଁ, ବରଂ ଏହା ଏକ ପ୍ରମୁଖ ଷ୍ଟାଇଲ୍ ଷ୍ଟେଟ୍‌ମେଣ୍ଟ ପାଲଟିଛି । ତେବେ ଅନେକ ସମୟରେ କେଉଁ ଜୋତା ସହ କେଉଁ ଡ୍ରେସ ମ୍ୟାଚ କରି ପିନ୍ଧିବେ ତାକୁ ନେଇ ଦ୍ବନ୍ଦ୍ବ ରହିଥାଏ । ଆସନ୍ତୁ ଜାଣିବା କିଛି ଟ୍ରିକ ସମ୍ପର୍କରେ ଯାହା ଆପଣଙ୍କୁ ଏକ ଷ୍ଟାଇଲିଷ୍ଟ ଲୁକ ଦେବ ।

 ବ୍ରାଉନ୍ ସ୍ନିକର୍ସ:

ପାରମ୍ପରିକ କଳା କିମ୍ବା ଧଳା ଜୋତା ସ୍ଥାନରେ ଏବେ ଗାଢ଼ ଓ ହାଲୁକା ବାଦାମୀ ରଙ୍ଗର ସ୍ନିକର୍ସ ବେଶ୍ ଆଦୃତ ହେଉଛି । ବିଭିନ୍ନ ବ୍ରାଣ୍ଡର ଏହି ସ୍ନିକର୍ସ ସହ 'ଷ୍ଟାଉଡ୍‌'ର ସ୍ଲାଇଟ୍ ମୁଭମେଣ୍ଟ ଥିବା ମିଡି ଡ୍ରେସ୍ ପିନ୍ଧିବା ଦ୍ୱାରା ଲୁକ୍ ଅଧିକ ଷ୍ଟାଇଲିଷ୍ଟ ଦେଖାଯାଏ ।

ଲାଲ୍ ସ୍ନିକର୍ସ:

ରଙ୍ଗୀନ୍ ସ୍ନିକର୍ସ ମଧ୍ୟରେ ଲାଲ୍ ଏବଂ ଗୋଲାପୀ ରଙ୍ଗ ମିନିମାଲିଷ୍ଟ ଟ୍ରେଣ୍ଡକୁ ଏକ ନୂଆ ମୋଡ଼ ଦେଇଛି ।  ଫ୍ଲାଟ୍-ସୋଲ୍ ଥିବା ଲାଲ୍ ସ୍ନିକର୍ସ ସହ ଷ୍ଟ୍ରାଇପ୍‌ସ ଓ ଅସମାନ କାଟ୍ ଥିବା ଆଧୁନିକ ମିଡି ସ୍କର୍ଟ ପିନ୍ଧିଲେ ଏହା ଆପଣଙ୍କୁ ଏକ  ଆକର୍ଷଣୀୟ ଲୁକ୍ ପ୍ରଦାନ କରେ । ଏହା ଖୁବ ଷ୍ଟାଇଲିସ ହୋଇଥାଏ ।

 ସୁଏଡ୍ ସ୍ନିକର୍ସ:

'ମାସିମୋ ଡୁଟି'ର ସୁଏଡ୍ ସ୍ନିକର୍ସ କାର୍ଯ୍ୟାଳୟ  ପାଇଁ ଅତ୍ୟନ୍ତ ସଫୋଷ୍ଟିକେଟେଡ୍ ଓ ଆରାମଦାୟକ । ଏହି ସ୍ନିକର୍ସକୁ ଏକ କଳା ରଙ୍ଗର ସ୍ପେଗେଟି-ଷ୍ଟ୍ରାପ୍ ଡ୍ରେସ୍ ସହ ପିନ୍ଧିଲେ ଏକ ସାଧାରଣ, କ୍ଲାସିକ୍  ଲୁକ୍ ମିଳିଥାଏ । ଏହା ସବୁ ଅକେଜନ ପାଇଁ ବେଶ୍ ସୁନ୍ଦର ହୋଇଥାଏ ।

 ପିଙ୍କ୍ ସ୍ନିକର୍ସ:

ଆଜିକାଲି ହାଲୁକା ବା ପାଷ୍ଟେଲ୍ ଗୋଲାପୀ ରଙ୍ଗର ସ୍ନିକର୍ସ ବେଶ୍ ଟ୍ରେଣ୍ଡରେ ଅଛି । ଏହି ସ୍ନିକର୍ସଗୁଡ଼ିକ ଧଳା ରଙ୍ଗ ଭଳି ଯେକୌଣସି ପୋଷାକ ସହ ସହଜରେ ମ୍ୟାଚ୍ ହୋଇଯାଏ । ଏହାକୁ ରଫଲ୍ଡ ସ୍କର୍ଟ ସହ ପିନ୍ଧିଲେ ଏକ ସିମ୍ପଲ ଓ ସୁନ୍ଦର ଲୁକ୍ ମିଳିଥାଏ ।

ମେସ୍-ଷ୍ଟାଇଲ୍ :

ଫ୍ୟାଶନ୍ ଦୁନିଆରେ  ମେସ ଷ୍ଟାଇଲ ସ୍ନିକର୍ସ ଏବେ ଖୁବ ଟ୍ରେଣ୍ଡରେ ରହୁଛି ।  ଏହି ସ୍ନିକର୍ସକୁ ଲିଓପାଡ ପ୍ରିଣ୍ଟ ଥିବା ମାକ୍ସି କିମ୍ବା ମିଡି ସ୍କର୍ଟ ସହ ପିନ୍ଧିଲେ ଏକ  ସ୍ୱତନ୍ତ୍ର ଲୁକ୍ ମିଳିଥାଏ। ଏହି ଲୁକ ଖୁବ ଷ୍ଟାଇଲିସ ହୋଇଥାଏ ।

ବର୍ତ୍ତମାନ ଭାରତର ବିଭିନ୍ନ ରାଜ୍ୟରେ ଦେଖିବାକୁ ମିଳିଛି ବନ୍ୟା ପରିସ୍ଥିତି, ଯେଉଁ କାରଣରୁ ଅନେକ ଲୋକ ନିଜ ବାସ ଗୃହ ହରାଇବା ସହିତ ଜଳବନ୍ଦୀ ଜୀବନ ବଞ୍ଚୁଛନ୍ତି । ତେବେ ଏଭଳି ସମସ୍ୟାରୁ ମୁକୁଳିବା ପାଇଁ ବିହାରର ଜଣେ ଯୁବକ ନିର୍ମାଣ କରିଛନ୍ତି ଭାସମାନ ଘର, ଯାହା ବର୍ତ୍ତମାନ ଖୁବ ଚର୍ଚ୍ଚାର ବିଷୟ ପାଲିଟିଛି । ପ୍ରତିବର୍ଷ ମୌସୁମୀ ଋତୁ ଆସିଲେ ବିହାରର ହଜାର ହଜାର ପରିବାର ଗୋଟିଏ ବଡ଼ ଭୟ ମଧ୍ୟରେ ଦିନ କାଟନ୍ତି । ନଦୀର ଜଳସ୍ତର ବୃଦ୍ଧି ପାଇବା ଯୋଗୁଁ ଘର ଭିତରେ ପାଣି ପଶିଯାଏ, ରାସ୍ତାଘାଟ ବୁଡ଼ିଯାଏ ଏବଂ ସମ୍ପୂର୍ଣ୍ଣ ଅଞ୍ଚଳ ବାହ୍ୟ ଜଗତରୁ ବିଚ୍ଛିନ୍ନ ହୋଇପଡ଼େ ।  କିନ୍ତୁ ଏବେ ଗଙ୍ଗା ନଦୀ କୂଳରେ ଏପରି ଏକ ବିଶେଷ ଘର ତିଆରି କରାଯାଇଛି, ଯାହା ବନ୍ୟା ପାଣି ବଢ଼ିବା ସହିତ ନିଜେ ମଧ୍ୟ ଉପରକୁ ଭାସିବାକୁ ଲାଗିବ । ବିହାରରେ ମୌସୁମୀ ବନ୍ୟା ଯୋଗୁଁ ହେଉଥିବା ବ୍ୟାପକ କ୍ଷତି ଦେଖିବା ପରେ ପ୍ରଶାନ୍ତ କୁମାରଙ୍କ ମନରେ ଏହି ନିଆରା ଚିନ୍ତାଧାରା ଆସିଥିଲା । ପ୍ରଶାନ୍ତ ପେଶାରେ ଜଣେ ଇଞ୍ଜିନିୟର, ଯାହା ତାଙ୍କର ଏହି ଚାନ୍ତାଧାରାକୁ ଅଧିକ ଖୋରାକ ଯୋଗାଇଥିଲା । ତାଙ୍କର ଚିନ୍ତାଧାରାରୁ ଜନ୍ମ ନେଇଥିଲା ଭାରତର ପ୍ରଥମ ଜଳବାୟୁ-ସହନଶୀଳ ଭାସମାନ ଘର ।

ଗଙ୍ଗା ନଦୀ କୂଳରେ ତିଆରି ହୋଇଥିବା ଏହି ତିନି ବଖରିଆ ଘରଟି ପ୍ରଚଣ୍ଡ ଖରାଦିନେ ଥଣ୍ଡା ଓ ପବନପୂର୍ଣ୍ଣ ରହୁଥିବା ବେଳେ ଶୀତଦିନେ ଉଷୁମ ରହେ ଏବଂ ବନ୍ୟା ସମୟରେ ପାଣି ଉପରେ ସହଜରେ ଭାସିପାରେ । ପ୍ରକୃତି ସହ ତାଳ ଦେଇ ରହିବା ପାଇଁ ତିଆରି କରାଯାଇଥିବା ଏହି ଘର ଦେଶର ଏକ ବଡ଼ ଜଳବାୟୁ ସମସ୍ୟାର ସରଳ ସମାଧାନ ସାଜିଛି ।

ବିଶେଷତ୍ବ

ଏହି ଘରର ବିଶେଷତ୍ୱ ହେଉଛି, ଏହାକୁ ତିଆରି କରିବା ପାଇଁ ବ୍ୟବହୃତ ସମସ୍ତ ସାମଗ୍ରୀ କେବଳ ୧୦ କିଲୋମିଟର ବ୍ୟାସାର୍ଦ୍ଧ ମଧ୍ୟରୁ ସଂଗ୍ରହ କରାଯାଇଛି, ଯାହା ପରିବେଶ ପ୍ରଦୂଷଣକୁ ଯଥେଷ୍ଟ କମ୍ କରିଥାଏ । ଏଥିରେ ପୁରୁଣା ବ୍ୟବହୃତ ପାଇପ୍ ଏବଂ ଗାଈ ଗୋବର, ଚୂନ, ଗୁଡ଼ ଓ ଧାନ କୁଣ୍ଡାରୁ ତିଆରି ଇଟା ବ୍ୟବହାର କରାଯାଇଛି । ଏହାସହ ବିଦ୍ୟୁତ୍ ପାଇଁ ସୋଲାର ପ୍ୟାନେଲ୍‌, ସବୁଜ ବଗିଚା ଏବଂ ବର୍ଜ୍ୟବସ୍ତୁକୁ ଖତରେ ପରିଣତ କରୁଥିବା ଶୁଖିଲା ଶୌଚାଳୟ ବ୍ୟବସ୍ଥା ମଧ୍ୟ ରହିଛି । ଏହି ସମ୍ପୂର୍ଣ୍ଣ ନିଆରା ଘରଟି ମାତ୍ର ୬ ଲକ୍ଷ ଟଙ୍କା ଖର୍ଚ୍ଚରେ ତିଆରି ହୋଇଛି । ପ୍ରଶାନ୍ତଙ୍କ ସ୍ୱପ୍ନ କେବଳ ଗୋଟିଏ ଘର ମଧ୍ୟରେ ସୀମିତ ନୁହେଁ । ସେ ଏହି ନିର୍ମାଣ ଖର୍ଚ୍ଚକୁ ୧.୫ ଲକ୍ଷ ଟଙ୍କାକୁ କମାଇବା ପାଇଁ ଚେଷ୍ଟା କରୁଛନ୍ତି, ଯାହାଦ୍ୱାରା ଗରିବ ଓ ସାଧାରଣ ଲୋକମାନେ ଏହାକୁ ସହଜରେ ଆପଣାଇପାରିବେ । ଆଗାମୀ ଦିନରେ ବିହାରରେ ଏକ ସମ୍ପୂର୍ଣ୍ଣ "ଭାସମାନ ଗାଁ" ଗଢ଼ିତୋଳିବାକୁ ସେ ଲକ୍ଷ୍ୟ ରଖିଛନ୍ତି, ଯାହା ବନ୍ୟା ସମୟରେ ମଧ୍ୟ ସୁରକ୍ଷିତ ଓ ଆତ୍ମନିର୍ଭରଶୀଳ ହୋଇରହିପାରିବ । ତାଙ୍କର ଏହି ନିଆରା ନିର୍ମାଣ ଶୈଳୀର ପ୍ରଶଂସା ସବୁଆଡେ ହେବା ସହିତ ସୋସିଆଲ ମିଡିଆରେ ଏହା ଖୁବ ଚର୍ଚ୍ଚିତ ପାଲଟିଛି ।

ଭାରତୀୟ ଟେଲିଭିଜନ ଏବଂ ଓଟିଟି ଦୁନିଆର ପରିଚିତ ଅଭିନେତ୍ରୀ ଶ୍ୱେତା ତିୱାରୀ ଆଜି ବି ନିଜର ଦମଦାର ଅଭିନୟ, ବୋଲ୍ଡ ଅନ୍ଦାଜ ପାଇଁ ଫ୍ୟାନଙ୍କ ପାଖରେ ପରିଚିତ । ନିଜ ରିଅଲ ଲାଇଫରେ ଖୁବ ସଂଘର୍ଷ କରିଥିବା ଶ୍ବେତା ଆଜିବି ଦର୍ଶକଙ୍କ ହୃଦୟରେ ରାଜ କରନ୍ତି ।

 ଶ୍ବେତା ତିୱାରୀ କ୍ୟାରିୟରର ଆରମ୍ଭ ଏକତା କାପୁରଙ୍କ ବହୁଚର୍ଚ୍ଚିତ ମେଗା ଧାରାବାହିକ 'କସୌଟୀ ଜିନ୍ଦଗୀ କୀ'ରେ 'ପ୍ରେରଣା ଶର୍ମା' ଚରିତ୍ରରୁ କରିଥିଲେ । ଏହି ଚରିତ୍ର ଜରିଆରେ ସେ ଦେଶର ପ୍ରତ୍ୟେକ ଘରେ ଘରେ ନିଜର ଏକ ସ୍ୱତନ୍ତ୍ର ପରିଚୟ ସୃଷ୍ଟି କରିପାରିଥିଲେ । ଏହି ଗୋଟିଏ ଶୋ' ତାଙ୍କୁ ଟେଲିଭିଜନ ଇଣ୍ଡଷ୍ଟ୍ରିରେ ସଫଳତାର ଶୀର୍ଷରେ ପହଞ୍ଚାଇ ଦେଇଥିଲା । ଏହାପରେ ସେ 'ବିଗ୍ ବସ୍ ସିଜନ୍ ୪'ରେ ଭାଗ ନେଇ ପ୍ରଥମ ମହିଳା ବିଜେତା ହେବାର ଗୌରବ ହାସଲ କରିଥିଲେ, ଯାହା ତାଙ୍କ ଲୋକପ୍ରିୟତାକୁ ଆହୁରି ଦ୍ୱିଗୁଣିତ କରିଦେଇଥିଲା। 'ପରବରିଶ୍', 'ବେଗୁସରାୟ' ଏବଂ 'ମେରେ ଦାଦା କି ଦୁଲହନ୍' ଭଳି ସଫଳ ଧାରାବାହିକ ଜରିଆରେ ସେ ନିଜର ଅଭିନୟ ଦକ୍ଷତା ପ୍ରମାଣିତ କରିବା ସହ ରିଆଲିଟି ଶୋ' 'ଖତରୋଁ କେ ଖିଲାଡ଼ି'ରେ ନିଜର ସାହସିକତାର ପରିଚୟ ମଧ୍ୟ ଦେଇଛନ୍ତି । ତେବେ ବୃତ୍ତିଗତ ଜୀବନରେ ବିପୁଳ ସଫଳତା ସାଉଁଟିଥିବା ଶ୍ୱେତାଙ୍କ ବ୍ୟକ୍ତିଗତ ଜୀବନ କିନ୍ତୁ ଅତ୍ୟନ୍ତ କଷ୍ଟକର ଓ ସଂଘର୍ଷମୟ । ମାତ୍ର ୧୯ ବର୍ଷ ବୟସରେ ରାଜା ଚୌଧୁରୀଙ୍କ ସହ ତାଙ୍କର ପ୍ରଥମ ବିବାହ ହୋଇଥିଲା, କିନ୍ତୁ ଘରୋଇ ହିଂସା ଓ ମାନସିକ ନିର୍ଯାତନା ଯୋଗୁଁ ୨୦୦୭ରେ ଏହି ସମ୍ପର୍କ ଭାଙ୍ଗିଯାଇଥିଲା । ଏହାପରେ ୨୦୧୩ରେ ସେ ଅଭିନେତା ଅଭିନବ କୋହଲିଙ୍କୁ ଦ୍ୱିତୀୟ ବିବାହ କରିଥିଲେ ମଧ୍ୟ ସେହି ସମ୍ପର୍କ ବି ଦୀର୍ଘସ୍ଥାୟୀ ହୋଇପାରିନଥିଲା । ଜଣେ  ସିଙ୍ଗଲ ମଦର ଭାବେ ସେ ନିଜର ଦୁଇ ସନ୍ତାନ ଝିଅ ପଲକ ତିୱାରୀ ଏବଂ ପୁଅ ହ୍ରିଦାଂଶଙ୍କୁ ଅତ୍ୟନ୍ତ ସ୍ନେହ ଓ ଦାୟିତ୍ୱର ସହ ବଡ଼ କରିଛନ୍ତି । ସମୟ ସହ ତାଳ ଦେଇ ଶ୍ୱେତା ନିଜକୁ କେବଳ ଛୋଟ ପରଦାରେ ସୀମିତ ନରଖି ଓଟିଟି ଏବଂ ଫିଲ୍ମ ଜଗତକୁ ମଧ୍ୟ ସଫଳତାର ସହ ସମ୍ପ୍ରସାରିତ କରିଛନ୍ତି । ରୋହିତ ଶେଟ୍ଟୀଙ୍କ ଆକ୍ସନ୍ ୱେବ୍ ସିରିଜ୍ 'ଇଣ୍ଡିଆନ୍ ପୋଲିସ୍ ଫୋର୍ସ'ରେ ତାଙ୍କର ଦମଦାର ଅଭିନୟ ବେଶ୍ ପ୍ରଶଂସିତ ହୋଇଥିଲା । ବର୍ତ୍ତମାନ ସେ ଆମାଜନ୍ ପ୍ରାଇମ୍ ଭିଡିଓର ବହୁଚର୍ଚ୍ଚିତ ରିଆଲିଟି ଗେମ୍ ଶୋ' 'ଦି ଟ୍ରେଟର୍ସ ସିଜନ୍ ୨'କୁ ନେଇ ସାରା ଦେଶରେ ଜୋରଦାର ଲାଇମ୍‌ଲାଇଟ୍‌ରେ ଅଛନ୍ତି ।  ୪୦ ବର୍ଷରୁ ଅଧିକ ବୟସରେ ମଧ୍ୟ ନିଜର  ଫିଟନେସ୍, ଚମତ୍କାର ଷ୍ଟାଇଲ୍ ଏବଂ ଜୀବନ୍ତ ଅଭିନୟ ବଳରେ ଶ୍ୱେତା ପ୍ରମାଣିତ କରିଛନ୍ତି ଯେ ବୟସ କେବଳ ଏକ ସଂଖ୍ୟା ମାତ୍ର ।

ଏକ ନୂଆ ରେକର୍ଡ ବର୍ତ୍ତମାନ ଖୁବ ଚର୍ଚ୍ଚାରେ ରହିଛି । ଆମେରିକାରେ ଡେଭିଡ୍ ରଶ୍‌ଙ୍କ ନେତୃତ୍ୱାଧୀନ ଏକ ଟିମ୍ ମାତ୍ର ୨ ମିନିଟ୍ ୧୯.୬୫ ସେକେଣ୍ଡରେ ୧୨ଟି ଟି- ସାର୍ଟ ଭାଙ୍ଗି ଏହି ନୂଆ ଗିନିଜ୍ ୱାର୍ଲ୍ଡ ରେକର୍ଡ ସୃଷ୍ଟି କରିଛନ୍ତି । ଏହା ପୂର୍ବରୁ ଏହି ରେକର୍ଡ ୨ ମିନିଟ୍ ୨୪ ସେକେଣ୍ଡ ରହିଥିଲା, ଯାହାକୁ ଭାଙ୍ଗିବା ପାଇଁ ଡେଭିଡ୍ ନିଜର ୧୦ ଜଣ ସହକର୍ମୀ ଓ ଲାସ୍ ଭେଗାସ୍‌ର ମେଣ୍ଟାଲିଷ୍ଟ ଜନ୍ ରୋଟେଲିନୀଙ୍କୁ ସାମିଲ କରିଥିଲେ । ଲାସ୍ ଭେଗାସ୍‌ରେ ଏକ କର୍ପୋରେଟ୍ ଟିମ୍-ବିଲ୍ଡିଂ ଟ୍ରିପ୍ ସମୟରେ କ୍ରମାଗତ ୯ଟି ପ୍ରଚେଷ୍ଟା ବିଫଳ ହୋଇଥିଲେ । ଯାହାପରେ ଶେଷରେ ୧୦ମ ପ୍ରଚେଷ୍ଟାରେ ସେମାନଙ୍କୁ ଏହି ସଫଳତା ମିଳିଥିଲା । ସୂଚନାଯୋଗ୍ୟ, ଡେଭିଡ୍ ରଶ୍‌ଙ୍କ ନାମରେ ପୂର୍ବରୁ ୨୦୦ରୁ ଅଧିକ ଗିନିଜ୍ ୱାର୍ଲ୍ଡ ରେକର୍ଡ ରହିଛି ।