ଦେବାଶିଷ ହତ୍ୟା ମାମଲା; ମାନବାଧିକାର କମିଶନକୁ ଭେଟିଲା କଂଗ୍ରେସ

0

ଭୁବନେଶ୍ୱର : ଜୁଲାଇ ୨୮:୪ ତାରିଖ ଦିନ କେନ୍ଦ୍ରାପଡା ଜମଧର ଗ୍ରାମରୁ ପୁରିକୁ ଡକାଇ ଦେବାଶିଷ ସେଠିଙ୍କୁ ହତ୍ୟା କରାଯାଇଥିବା ମାମଲା ନେଇ ଓଡିଶା ପ୍ରଦେଶ କଂଗ୍ରେସ କମିଟି ରାଜ୍ୟ ମାନବାଧିକାର କମିଶନଙ୍କୁ ଭେଟି ଦୋଷୀ ପୋଲିସ ଅଫିସରଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ପାଇଁ ଦାବି କରିଛି । ଜଟଣୀ ବିଧାୟକ ସୁରେଶ କୁମାର ରାଉତରାୟଙ୍କ ନେତୃତ୍ୱରେ ଏକ ୧୫ ଜଣିଆ କଂଗ୍ରେସ ପ୍ରତିନିଧୀଦଳ କମିଶନଙ୍କୁ ଏକ ଲିଖିତ ଦାବିପତ୍ର ପ୍ରଦାନ କରି ଏହି ହତ୍ୟା ମାମଲାରେ ଜଡିତ ପଟ୍ଟାମୁଣ୍ଡାଇ ଥାନାର ଏସ ଆଇ ଚନ୍ଦ୍ରିକା ମହାପାତ୍ରଙ୍କୁ ଚାକିରିରୁ ବରଖାସ୍ତ କରି ଗିରଫ କରିବା,ମୃତ ଦେବାଶିଷଙ୍କୁ ଫୋନ କରି ପୁରୀ ଡାକିନେଇଥିବା ତାଙ୍କ ସହଯୋଗୀ ମନୋଜ ମହାପାତ୍ର ଏବଂ ପ୍ରମଥ ବିଶ୍ୱାସଙ୍କୁ ଗିରଫ କରିବା ସହ ଏହି ହତ୍ୟାକାଣ୍ଡରେ ସମ୍ପୃକ୍ତ ଅନ୍ୟ ଅଭିଯୁକ୍ତ ମାନଙ୍କୁ ଶୀଘ୍ର ଚିହ୍ନଟ କରିବା ଏବଂ ମୃତକଙ୍କ ବିଧବା ମାଆକୁ ୩୫ ଲକ୍ଷ ଟଙ୍କା ର ଆର୍ଥିକ ସହାୟତା ଯୋଗାଇ ଦେବାପାଇଁ କଂଗ୍ରେସ ଦାବି କରିଛି । ଜୁଲାଇ ୪ ତାରିଖ ଦିନ କେନ୍ଦ୍ରାପଡା ସମେତ କଟକ, ଭୁବନେଶ୍ୱର ଓ ପୁରୀ ସହର କରୋନା ପ୍ରତିକାର ପାଇଁ ସମ୍ପୂର୍ଣ୍ଣ ସଟ୍‌ଡାଉନ ଥିବା ବେଳେ ଦେବାଶିଷଙ୍କୁ ଚନ୍ଦ୍ରିକାଙ୍କ ସାଙ୍ଗମାନେ ବାଧ୍ୟ କରି ଜରୁରୀ କାମ ବାହାନାରେ କେନ୍ଦ୍ରାପଡା ଯମଧର ଗ୍ରାମରୁ ପୁରୀକୁ ଡାକିବା,ବଳିଆପଣ୍ଡା ଭାର୍ଗଭି ନଦୀ ମୁହାଣ ନିକଟରୁ ଜବତ ହୋଇଥିବା କୋରାପୁଟ ନମ୍ବର ଥିବା ମାରୁତି ୱାଗନର କାର ଭିତରେ ତକିଆ, ବେଡ଼ସିଟ ଓ ଭଙ୍ଗା ମଦ ବୋତଲ ମିଳିବା,ଅପରିଚିତ ଦୁଇ ବ୍ୟକ୍ତି ପେଟ ଯାଏ ପାଣି ଥିବା ନଦୀର ଏକ ନିର୍ଦ୍ଧିଷ୍ଟ ସ୍ଥାନ କୁ ପ୍ରବେଶ କରି ଶବ ଆବିଷ୍କାର କରିବା ଆଦି ବିଷୟକୁ ଅନୁସନ୍ଧାନରେ ଗୁରୁତ୍ୱ ନ ଦେବା ଯୋଗୁଁ ପୋଲିସର କାର୍ଯ୍ୟ ଦକ୍ଷତା ଉପରେ ସନ୍ଦେହ ସୃଷ୍ଟି ହୋଇଛି । ଦୀର୍ଘ ୧୨ ବର୍ଷ ତଳୁ ପ୍ରେମ କରୁଥିବା ଦେବାଶିଷଙ୍କୁ ଏସ ଆଇ ଚନ୍ଦ୍ରିକା ମହାପାତ୍ର ଚାକିରୀ ପାଇବା ପରେ ଗତ ୨୦୧୮ ମସିହାରୁ ବିବାହ ପାଇଁ ଅରାଜି ହେବା ଏବଂ ଗତ ଦେଢ଼ ମାସ ତଳେ ଦୁହିଁଙ୍କ ମଧ୍ୟରେ କିଛି ପୋଲିସ ଶୁଭେଛୁଙ୍କ ଦ୍ୱାରା ଆପୋଷ ବୁଝାମଣା ବିଷୟକୁ ମଧ୍ୟ ପୋଲିସ ଅଣଦେଖା କରିବା ନେଇ ଅଭିଯୋଗ ହେଇଛି । ଦୀର୍ଘ ୨୪ ଦିନ ବିତିଯାଇଥିଲେ ମଧ୍ୟ କୌଣସି ଆସାମୀ ଗିରଫ ନହେବା ପୋଲିସର ତଦନ୍ତରେ ପ୍ରଶ୍ନବାଚି ସୃଷ୍ଟି କରିଛି । ପୁରୀ ବଳିଆପଣ୍ଡା ଥାନାରେ ରୁଜୁ ହୋଇଥିବା ଏହି ହତ୍ୟା ମାମଲାର ତଦନ୍ତ ରେ ପକ୍ଷପାତିତା କରାଯାଉଥିବା କଂଗ୍ରେସ ଅଭିଯୋଗ କରି କମିଶନଙ୍କ ହସ୍ତକ୍ଷେପ ଲୋଡିଛି । କଂଗ୍ରେସ ର ଏହି ପ୍ରତିନିଧି ଦଳରେ ବିଧାୟକ ସୁରେଶ କୁମାର ରାଉତରାୟଙ୍କ ସମେତ, ଶିବାନନ୍ଦ ରାୟ,ମନୋରଞ୍ଜନ ଦାଶ,ହଳଧର ସେଠି, ଦୀପକ କୁମାର ମହାପାତ୍ର, ଚିନ୍ମୟ ସୁନ୍ଦର ଦାଶ,ଦେବୀ ପ୍ରସାଦ ବାହାଲିଆ, ପ୍ରମୁଖଙ୍କ ସହ ମୃତକ ଦେବାଶିଷ ସେଠୀଙ୍କ ବିଧବା ମା ଭଗବତୀ ସେଠି ମଉସା ଉଛବାନନ୍ଦ ମଲ୍ଲିକ ପ୍ରମୁଖ ଉପସ୍ଥିତ ଥିଲେ ।

Leave A Reply

Your email address will not be published.